Bipuzio Kufuma ku ba Kabelenga
“Ba malaika basaakwilue” baalia bazimbwilue mu 1 Timoteo 5:21 ni bani?
Mutumua Paulo waamulembeele evi mukote nakue Timoteo: “Nakukonkobezia nafiniizie ntanzi yakue Leeza ni Kristu Yesu ni ba malaika basaakwilue ukonke aza malaizio bila kitoolela ao kapaatulula ata kanini.”—1 Tim. 5:21.
Evi kutukwasia kumana kine babo ba malaika ni bani, tuli kulondolwelanke ba malaika basipalile kuya bali mu kekio kikundi kya ba malaika basaakwilue. Kulanda kisinka, te baalia ba mia ni makumi ana na bana elufu (144 000). Musita Paulo lwaali wamulembela Timoteo, kutuntumunua kwa Bakristu babiikilue mafuta evi kuya ku muulu kubanga kwali tekunatendeke. Batumua ni Bakristu bange baalia baali babiikilue mafuta, babanga bakili sie tebanaaluke bibumbua bya kimupasi. Pa kako, tekikitika babo “ba malaika basaakwilue” baye bali batumua ni Bakristu babiikilue Mafuta.—1 Bakor. 15:50-54; 1 Bat. 4:13-17; 1 Yoan. 3:2.
Kukila pa kako, babo “ba malaika basaakwilue” tebavinda kuya bali baalia ba malaika baasangukile pa kibunda kya mu nsiku yakue Noa. Babo ba malaika baalukile ku lubali lwakue Sataana ni kwaluka bibanda, kabili baalukile balwani bakue Yesu. (Kut. 6:2; Luk. 8:30, 31; 2 Pet. 2:4) Musita uli waiza, bakapozua mu abiso, mu kipindi kya myaka elufu imo (1 000). Kisia papo, bakenoonua pamo ni Kibanda.—Yud. 6; Nfy. 20:1-3, 10.
Kimonekele nangue pange “ba malaika basaakwilue,” baalia bazimbwilue na Paulo, ni ba malaika ba kisinka baalia bali ku muulu, babomba pamo ni “Leeza ni Kristu Yesu.”
Kuli ma elufu engi a ba malaika ba kisinka. (Baeb. 12:22, 23) Kimonekele nangue Yehova tezi kubapeela ba malaika bonse miilo imonke. (Nfy. 14:17, 18) Languluka nangue mu lwendo lumo, malaika umo sie waapeelue miilo ya kwipaya ba soda mia imo ni makumi munane na basano elufu (185 000) Baashuru. (2 Mak. 19:35) Kipalile kuli ni mpendua ya ba malaika baapeelue miilo ya “kukolonghania kufuma mu Bukolo bwakue [Yesu] bintu byonse bili byalengia kwiputala pamo ni bantu bali bakita kupusana ni mizilo.’ (Mat. 13:39-41) Pange bange bali ni miilo ya “kukolonghaania bantu basaakwilue” evi kuya ku muulu. (Mat. 24:31) Kabili ba malaika bange bali ‘batusunga mu nzila yetu yonse.’—Malum. 91:11; Mat. 18:10; palania ni Mateo 4:11; Luk. 22:43.
Pange “ba malaika basaakwilue” baalia bazimbwilue mu 1 Timoteo 5:21, ni ba malaika baalia baapeelue miilo ibeleele palua bantu bakue Leeza. Mu milandu izyungulukiile lelio lilembo, Paulo waafumiizie masoke alangiliile bakote vibapalile kubomba miilo yabo. Kabili, azo masoke alangiliile nangue bantu bonse mu kilonghaano bapalile kubakindika bakote. Bakote bapalile kubomba miilo yabo ‘bila kutoolela ao kupaatulula ata kanini.’ Kabili, te bapalile kukwata bupinguzi ao kupingula lubilo-lubilo bila kutontonkania. Nsambu iine ipalile kubalengia baye bakonkele musoko wakue Paulo utungulwilue na mupasi ni pantu bali babomba “ntanzi yakue Leeza ni Kristu Yesu ni ba malaika basaakwilue.” Pa kako, kimonekele paswetele nangue ba malaika bange bapeelue miilo ya kubomba palua kilonghaano, nga evelia kusunga, kwimanina miilo ya kusimikila, ni kutwala ripoti kuli Yehova.—Mat. 18:10; Nfy. 14:6.