“Saakule mwe Bene Lelo, Olia Umwakaba Kuya Mwabombela”

1. Evi tuye twali ni nsansa mu bwikazi bwetu, tupalile kukita ki, kabili juu ya ki? (Isaya 48:​17, 18)

BABA wetu wa ku muulu atutonene sana, kabili atonene tuye twali ni nsansa lonu ni musita uli waiza. (Kas. 3:​12, 13) Waatubumbile twali ni buvinde bwa kukita bintu bya kupapia. Inzi, taatupeele buvinde bwa kwitungulula fwe bene ao buvinde bwa kwipingwila kiweme ni kibipile. (Kas. 8:9; Yer. 10:23) Wene amanine nangue evi tuye twali ni nsansa mu bwikazi bwetu, tupalile kumubombela ni kumunakila.—Soma Isaya 48:​17, 18.

2. Sataana atonene tuzumine ki, kabili Yehova waakitile syani evi kulangilila nangue Sataana waabepele?

² Sataana atonene tuzumine nangue kunti twaaluka ni nsansa mu bwikazi bwetu kine tetwizi kumubombela Yehova, kabili nangue kunti twaitungulula sie bwino fwe bene. (Kut. 3:​4, 5) Evi kulangilila nangue Sataana waabepele, Yehova alekeleele bantu betungulule bo bene kwa musita unini. Kulanda kisinka, tuli mukwimwena nangue bantu bali mukwandua kwiteeka bwino. Inzi, mu Bibilia muli mifuano ya balalume ni banakazi baalia babanga bali ni nsansa mu bwikazi pantu babanga bamubombela Yehova. Yesu Kristu i abanga wali ni nsansa sana kupita bonse. Mu leli lyasi, tuli kumona juu ya ki Yesu waasaakwile kumubombela Yehova. Kisia, tuli kumona juu ya ki tupalile kumupupa sie Baba wetu wa ku muulu. Ni ku mwinsio, tuli kwilangulusia juu ya ki ni fwefue tusaakwiile kumubombela Yehova.

JUU YA KI YESU WAASAAKWILE KUMUBOMBELA YEHOVA?

3. Sataana waamulandile Yesu akite ki, inzi Yesu waasaakwile kukita ki?

³ Yesu lwabanga wali panu pa kyalo, abanga wapalile kusaakula wa kubombela. Musita unini kisia Yesu kubatiziiwa, Sataana waamulandile amupupe limo sie evi wene amupeele ma bukolo onse a pa kyalo. Evi kulangilila nangue waasaakwile kumubombela Yehova, Yesu wamulandile evi Sataana: “Fuma panu, Sataana! Pantu, ilembelue evi: ‘Yehova sie Leeza obe i uupalile kupupa, kabili wene sie bunke i uupalile kubombela miilo itakatifu.’” (Mat. 4:​8-10, NWT) Ale tumone bintu byaalengiizie Yesu asaakule kukita evio.

4-5. Juu ya ki Yesu waasaakwile kumubombela Yehova?

⁴ Kintu kikata kyaalengiizie Yesu asaakule kumubombela Baba wakue, Yehova, ni keki: Amutonene sana. (Yoan. 14:31) Kukila pa kako, ali wamubombela pantu amanine nangue i kintu kiweme kyapalile kukita. (Yoan. 8:​28, 29; Nfy. 4:11) Amanine nangue Yehova i Nsulo ya bukose, aswapikikile, kabili nangue i ali watupeela bintu biweme. (Malum. 33:4; 36:9; Yak. 1:17) Yehova tanamubepepo Yesu ata limo, kabili i amupeele kila kintu kyali nakio. (Yoan. 1:14) Inzi, Sataana apusene ni Yehova. Sataana i waalengiizie bantu bakite lizambi ni kutendeka kufua. Wene ni wa bufi, ni wa butani, kabili ali wakeba sie faida yakue. (Yoan. 8:44) Pantu Yesu abanga wamumanine bwino Yehova pamo ni Sataana, wene taatonene ata kanini kwaluka nga Sataana, kabili taatonene kumusangukila Yehova.—Baf. 2:​5-8.

⁵ Kintu kinge kyaalengiizie Yesu asaakule kumubombela Yehova ni keki: Waatontele menso ku belia bibanga byali bya kufumamo kine wene wamubombela Yehova mu bukisinka. (Baeb. 12:2) Abanga wamanine nangue kine watwalilila kuya wali wa kisinka, wakaba kuswesia liina lyakue Baba wakue, kabili nangue lizambi, lufu, pamo ni maavia onse alia aalengiiziwe na Kibanda akaba kupua.

JUU YA KI TUPALILE KUMUPUPA SIE YEHOVA?

6-7. Juu ya ki bantu bengi tebezi kumubombela Yehova, inzi juu ya ki tupalile kumupupa sie Yehova?

⁶ Lonu, bantu bengi tebezi kumubombela Yehova pantu te bamanine mibele yakue iweme, kabili te bamanine bintu byonse biweme byali wabakitila. Evio i vyaali ni bantu ba mu Atene, baalia baasimikiilue na mutumua Paulo. Te bababanga bamumanine Leeza.—Miil Bat. 17:​19, 20, 30, 34.

⁷ Paulo waabalandile bantu ba mu Atene nangue Leeza wa kisinka i ali “wapeela bukose ni binge byonse.” Kabili waalandile evi: “Leeza i ali watupeela bukose, i ali watwenzia, kabili i kitubeleelepo.” Leeza i Kabumba, olia “waakitile ntundu yonse ni kuiteeka pa kyalo.” Pa kako, tupalile kumupupa sie wene.—Miil Bat. 17:​25, 26, 28.

8. Yehova tezi kukita ki? Kabili ni biki bilangiliile nangue atutonene?

⁸ Pantu Yehova i Kabumba wa bintu byonse, wene ali ni buvinde bwa kubapatikizia bantu bamubombele. Inzi, tezi kukita evio ata kanini. Kuliko kukita evio, wene ali watupeela bintu bisininkiziizie nangue kwali, kabili bya kutukwasia twipingwile fwe bene kine tuli kumuzumina ni kumubombela. Kabili bili byalangilila nangue atonene sana kila umo pakati ketu. Kukila pa kako, Yehova atonene bantu bengi baaluke ba rafiki bakue lonse. (1 Tim. 2:​3, 4) Pa kako, Yehova ali watubelezia evi twaluke ni buvinde bwa kubasambilizia bange palua bulayo bwakue ni palua bintu biweme belia byakaba kubakitila bantu musita uli waiza. (Mat. 10:​11-13; 28:​19, 20) Ni palua fwe basaakwiile kumubombela, Yehova atupeele kilonghaano mwa kumupupila, kabili waakwete mipango evi ba kangalila bali ni ntono baye batwemena.—Miil Bat. 20:28.

9. Ni biki bilangiliile nangue Yehova abatonene bantu?

⁹ Yehova ali walangilila ntono yakue kupitila kubakitila bantu bonse bintu biweme, ata sie baalia basizumiine nangue kwali. Kwa mufuano, mu ma elufu a myaka, bantu bali baipingwila kukita kelia kibali bamona nangue kibipile ao kiweme kuliko kumunakila Yehova. Ata sie kine bali bakita evio, Yehova ali wabapeela belia bibali nabio lazima evi batwalilile kuya bakosele ni kuya bali ni nsansa mu bwikazi. (Mat. 5:​44, 45; Miil Bat. 14:​16, 17) Kupitila wene, bali ni buvinde bwa kwaluka ni ba rafiki, bwa kuvyala baana, bwa kubomba, ni kunonkelamo mu miilo elia ibali babomba kwa maka. (Malum. 127:3; Kas. 2:24) Bebio byonse bilangiliile nangue Baba wetu wa ku muulu atonene bantu bonse. (Kuf. 34:6) Lonu, twilangulusie bintu bilengiizie tusaakule kumubombela Yehova, kabili tumone vyali wabapaala baalia bali bamubombela.

JUU YA KI TUSAAKWIILE KUMUBOMBELA YEHOVA?

10. (a) Ni kintu ki kikata kili kyalengia tumubombele Yehova? (Mateo 22:37) (b) Kumana nangue Yehova ali wa kunvua ni kukweleela kwa kulengia wiunvue syani? (Malumbo 103:​13, 14)

¹⁰ Nga evelia sie Yesu, kintu kikata kili kyalengia ni fwefue tumubombele Yehova ni keki: Tumutonene sana. (Soma Mateo 22:37.) Kusambilila palua mibele yakue Yehova kuli kwalengia tumupalame. Kwa mufuano, ali tayari kutweleela kine twamuluvia. Musita Baisraeli lubaamusangukiile, wene waabapapaatile wali mukulanda evi: “Bwele, napapaata, lekele nzila yenu ibipile.” (Yer. 18:11) Yehova alangulukile nangue te tupwililikile, amanine nangue tuli lufunko. (Soma Malumbo 103:​13, 14.) Kisia kuwaza sana Yehova vyali wakweleela ni kisia kuwaza sana palua mibele inge iweme yali nayo, eba kekio te kikusonsenziizie utone kumubombela wene lonse?

11. Ni bintu ki binge bilengiizie tusaakule kumubombela Baba wetu wa ku muulu?

¹¹ Kabili, kintu kinge kili kyalengia tumubombele Yehova ni keki: Tumanine nangue kekio i kintu kiweme kitupalile kukita. (Mat. 4:10) Kukila pa kako, tumanine bintu biweme byakaba kufumamo kine twatwalilila kuya twali ba kisinka kuli Yehova. Kine twatwalilila kumubombela wene twali ba kisinka, tuli kukwasia kuswesia liina lyakue, tuli kulangilila nangue Kibanda ni wa bufi, kabili tuli kusansamusia mutima wakue Baba wetu Yehova. Kukila pa kako, kine twasaakula kumubombela Yehova lonu, twakaba kuvinda kukita evio muyayaya!—Yoan. 17:3.

12-13. Mufuano wakue Jane ni Pam watusambilizia ki?

¹² Lutukili banike, kunti twavinda kumutona sana Yehova, ni ezio ntono kunti yakila kuluma kine twakula. Tulandile palua ba Jane ni Pam, ba nkazi babili ba munda mumo.a Jane abanga wali ni myaka 11 ni Pam abanga wali ni myaka 10 musita ubaatendekele kusambilila Bibilia lya kwanza. Ata sie kine bavyazi babo te babanga batona kusambila Bibilia, baabetabiziizie ba Jane ni Pam baye basambilila ni Bakasininkizia Bakue Yehova. Inzi, baabetabiziizie basambiliziiwe kine sie baitabila kuya baya ni ku kanisa kabo pamo ni bantu ba mu lupua lwabo ku mwinsio wa kila mulungu. Jane walanda evi: “Bintu bili mu Bibilia binaasambiliziiziwe na Bakasininkizia Bakue Yehova byaankwasiizie evi te kunti ngiye nabombia miti ili yakolana ni kukita bukambue, nga vimbanga nakinkinziiwa na ba rafiki bane.”

¹³ Kisia myaka fulani, bonse babili baalukile ba kasimika. Kisia, baatendekele bupainia. Mu wenka ozo musita, babanga basunga bavyazi babo baalia babanga basyakotele. Kisia kuwaza palua bwikazi bwabo, Jane walanda evi: “Naasambiliile nangue Yehova ali waemena ba rafiki bakue, kabili nangue ‘Mulopue [ao Yehova] amanine bantu bakue,’ nga vilandile lilembo lya 2 Timoteo 2:19.” Kulanda kisinka, Yehova ali wabemena baalia bali basaakula kumubombela wene ni kumutona!

14. Kunti twakita syani evi kumusakila Yehova? (Mona ni ma foto.)

¹⁴ Tutonene kumusakila Yehova kupitila kubabwila bantu nangue bintu bibipile bibali baunvua pa lwakue ni bya bufi. Wazanke palua ozu mufuano: Wewe ukwete rafiki obe wa pepi olia ali bwino, ali wapeelana, kabili ali waeleelana. Kya kupapia, busiku bumo, muntu umo waiza kuli wewe ni kumusongela rafiki obe nangue abipile, kabili nangue ni wa bufi. Wewe kunti wakita syani? Uli kumusakila. Enka evio, lonu Sataana pamo ni baalia bali wasonsezia, bali baezia kufiisia liina lyakue Yehova kupitila kulanda bintu bya bufi pa lwakue. Pantu bali bakita evio, fwefue tuli twamusakila Yehova kupitila kubabwila kisinka pa Lwakue. (Malum. 34:1; Is. 43:10) Tuli twalangilila nangue tutonene kumubombela Yehova kwa mweo onse kupitila milandu ni bikitua byetu.

15. Pantu mutumua Paulo waakitile bupilibuko mu bwikazi bwakue, waapatile faida ki? (Bafilipi 3:​7, 8)

¹⁵ Tuli twakita bupilibuko mu bwikazi bwetu evi tumusansamusie Yehova ao evi tumubombele sana. Kwa mufuano, mutumua Paulo waalekeele cheo yabanga wali nayo mu dini ya Bayuda evi aaluke musambi wakue Kristu ni kutendeka kumubombela Yehova. (Bag. 1:14) Pantu wene waakitile evio, waalukile ni bwikazi buweme, kabili waapeelue lisyuko lya kuteeka pamo ni Kristu ku muulu. Wene taawazilepo ata limo nangue waakitile ovio pantu waapingwile kutendeka kumubombela Yehova. Ni fwefue kine twapingula kumubombela Yehova, te tukaba kunvua ovio ata limo palua bobo bupinguzi.—Soma Bafilipi 3:​7, 8.

16. Mufuano wakue Julia watusambilizia ki? (Mona ni ma foto.)

¹⁶ Kine twabiika pa ntanzi miilo yakue Yehova, wene ali kutupaala lonu, kabili wakaba kutupaala ni musita uli waiza. Tumone mufuano wakue nkazi Julia. Ntanzi tanasambilile kisinka, abanga waimba mu kanisa lwabanga wakili mukazyana. Abanga waimba bwino sana, ni kekio kyaalengiizie atendeke kubeleziiwa evi atendeke kubomba miilo ya kwimba. Bila kukokola, Julia waamanikile sana, kabili waatendekele kwimbila mu ma fwasi amanikile sana kabili a pa muulu. Lwabanga wasoma ku masomo amo a pa muulu a miziki alia abanga amanikile sana, mwanafunzi nakue umo waatendekele kulanziana nakue pa lwakue Leeza, kabili waamubwilile nangue liina lyakue Leeza ni Yehova. Bila kukokola, Julia waatendekele kusambilila Bibilia mara ibili mu mulungu. Kupwako, waapingwile kutendeka kupisia musita mu kumubombela Yehova kuliko kupisia musita mu miilo ya kwimba. Bobo bupinguzi te bubanga bwalengele. Walanda evi: “Bantu bengi baandandile nangue mbanga nazezia bupe bwane. Inzi, nene mbanga natonene kumubombela sana Yehova mu bwikazi bwane.” Kisia kuwaza palua bupinguzi bwaakwete, tekusyapitile myaka ikilile pa 30, wene ali waiunvua syani? Walanda evi: ‘Ndi ni mutende mu mano, kabili nswapiile nangue Yehova wakaba kunkitila byonse bitonene mutima wane musita uli waiza.’—Malum. 145:16.

TWALILILA KUMUBOMBELA YEHOVA

17. Kumana nangue tuli pepi sana ni mpela ya kenu kyalo, kwabalangulusia ki baalia basinatendeke kumubombela Yehova ni baalia bali bamubombela?

¹⁷ Kulanda kisinka, tuli pepi sana ni mpela ya kenu kyalo. Mutumua Paulo waalembele evi: “Kusyele sie ‘musita unini,’ ni ‘olia apalile kwiza, wakaba kwiza, takakokola.’” (Baeb. 10:37) Kekio kyatulangulusia ki? Kyabalangulusia baalia basinatendeke kumubombela Yehova nangue basyaliilue sie na musita unini wa kusaakula kutendeka kumubombela. (1 Bakor. 7:29) Kine fwefue twaasaakwile kale kumubombela Yehova, kekio kyatulangulusia nangue ata sie kine twakaba kupata maavia, akaba kuya ali sie a “musita unini.”

18. Yehova ni Yesu batonene tukite ki?

¹⁸ Yesu taatonene sie basambi bakue bamukonke, inzi waatonene batwalilile kumukonka. (Mat. 16:24) Pa kako, kine tetusyamubombeele Yehova kwa myaka ingi, tupalile kuya twapingwile kutwalilila kumubombela. Evi tuvinde kwikala kukonkana ni bupinguzi bwetu bwa kumubombela Yehova, tupalile kwikwinda sana. Kulanda kisinka, te kilengele kukita evio, inzi kine twaikwinda, Yehova ali kutupaala ata sie lonu!—Malum. 35:27.

19. Mufuano wakue Gene watusambilizia ki?

¹⁹ Bamo bali bawaza nangue kumubombela Yehova kunti kwalengia te kunti baye bali ni nsansa. Kine wewe uli mulumendo ao mukazyana, eba uli wawaza nangue kekio ni kisinka? Lupua umo mulumendo, olia ali wakuutua Gene, walanda evi: “Mbanga nawaza nangue kine naaluka Kasininkizia wakue Yehova, nsikaba kuya naisansamusia pamo ni bange. Kibanga kyamwenekele nangue banike bengi banaakuliile nabo pamo babanga baisansamusia mu bintu paleepale, nga evelia, kuya ku ma feti, kukita burafiki pamo ni banakazi, ao kusaapa misaapo ya video ya mazibo. Musita ubabanga bakita evio, nene mbanga napisia musita ku kulonghaana ni mu kusimikila.” Kekio kyaalengiizie Gene akite syani? Walanda evi: “Naatendekele kukita bintu bibipile belia bibanga byakita balumendo ni bakazyana bange. Inzi, kulanda kisinka, kukita evio te kwaandeteele nsansa. Kisia musita, naatendekele kuwaza palua faida ya kukonka belia bili byalanda Bibilia, kabili naapingwile kutendeka kumubombela Yehova kwa mutima wane onse. Kutendekela papo, ndi namona nangue Yehova ali waasuka mapepo ane onse.”

20. Tupalile kupingula kukita ki?

²⁰ Kalemba umo wa malumbo waamwimbiile evi Yehova: “Ali ni nsansa ni muntu uwasaakula wewe ni kumupalamika evi ekale mu misolo yobe.” (Malum. 65:4) Kansi, tuye twapingwile kutwalilila kumubombela Yehova nga Yoshua. Wene walandile evi: “Nene ni bantu ba mu nsesi yane, twakaba kumubombela Yehova.”—Yosh. 24:15.