Eba, Masambilizio a Musinzi a Bibilia Kunti Akukwasia ni Lonu?

1. Masambilizio a musinzi a Bibilia alia atwaasambiliile lya kwanza aatukwasiizie mu nzila ki?

MASAMBILIZIO a musinzi a Bibilia aalulwile bwikazi bwetu. Kwa mufuano, lutwaasambiliile nangue liina lyakue Leeza ni Yehova, twaatendekele kukita burafiki pamo nakue. (Is. 42:8) Kabili, lutwaasambiliile kisinka palua bantu bafwile, twaalekeele kwiipuzia kine batonua betu baalia baafwile babanga bateseka ao abe. (Kas. 9:10) Kukila pa kako, lutwaasambiliile palua bulayo bwakue Leeza bwa kuleta Paradiso panu pa kyalo, twaalekeele kwema palua aali yetu ya musita uli waiza. Twaasininkiziizie nangue tetukekala sie musita unini, i kulanda, myaka 70 ao 80, inzi nangue twakekala lonse.—Malum. 37:29; 90:10.

2. Lilembo lya 2 Petro 1:​12, 13 lilangiliile syani nangue ata sie Bakristu bakulile kimupasi bali banonkelamo mu masambilizio a musinzi a Bibilia?

² Te tupalile ata kanini kupuulula masambilizio a musinzi a Bibilia. Mutumua Petro waabandikiile mukanda wakue wa bubili Bakristu baalia babanga ‘baimeene sinta mu kisinka.’ (Soma 2 Petro 1:​12, 13.) Inzi mu ozo musita, mu kilonghaano mubanga mwali bantu babipile, baalia babanga batonene kubafumia ba lupua mu kisinka. (2 Pet. 2:​1-3) Petro abanga watonene kubakoselezia ba lupua ni ba nkazi bakue evi kekio te kunti kibakitikile. Evi kukita evio, waabalangulusiizie masambilizio amo alia ababanga basyasambiliile. Azo masambilizio abanga ali a kubakwasia evi batwalilile kuya bali ba kisinka mpaka ku mpela.

3. Leta mufuano ulangiliile juu ya ki Bakristu bonse bapalile kutwalilila kutontonkania palua masambilizio a musinzi a Bibilia.

³ Ata sie kine tetusyali Bakristu bakulile kimupasi, kunti twasambilila masomo a lenu kupitila masambilizio a musinzi. Kwa mufuano, mama olia amanine bwino sana kweleka pamo ni mwana wakue mwanakazi kunti babombia bintu bimo sie evi kweleka kyakulia fulani. Inzi, mu kupita kwa nsita, olia mama kunti wasambilila kubombia belia byenka bintu mu nzila inge evi kweleka kyakulia kinge kiweme sana. Enka evio, babombi bakue Yehova, baalia bakokola kale mu kuteania, kunti babombia masambilizio enka alia a musinzi a Bibilia, ni kusambililako masomo ange, alia asivinda kusambilila baalia baakitendeka sie bulenu kusambilila Bibilia. Ntangia kubatiziiwa, aali yetu ao bintu bituli twakita mu miilo yakue Yehova pange bili byaya byaaluluka. Kine twawaza sana palua masambilizio a Bibilia alia atwaasambiliile lwa kale, ni kuabombia mu aali itulimo lonu, kunti twasambililako masomo ange a lenu a kutukwasia. Ale tumone masomo alia ali kusambilila Bakristu bakulile kimupasi kupitila masambilizio atatu a musinzi a Bibilia.

YEHOVA NI KABUMBA

4. Kumana nangue Yehova ni Kabumba kuli kwatuletela faida ki?

⁴ “Leeza i waakitile bintu byonse.” (Baeb. 3:4) Tumanine nangue Kabumba wa mulangue onse, kabili wa maka onse i waabumbile kenu kyalo pamo ni bukose bwetu ni bwa bibumbua binge. Pantu wene i waatubumbile, atumanine bwino sana. Kukila pa kako, ali watwemena. Amanine bintu bili bwino sana kuli fwefue. Pa kako, kumana nangue Yehova ni Kabumba, kwaalulwile bwikazi bwetu mu nzila ingi ya kupapia, kabili kuli kwalengia bwikazi bwetu bwaluke ni mana.

5. Ni kiki kili kutukwasia kwaluka ni mibele ya kwikeefia? (Isaya 45:​9-12)

⁵ Kumana nangue Yehova ni Kabumba kunti kwatukwasia kwaluka ni mibele ya kwikeefia. Kisia Yobu kulanda bintu bisili bya kisinka pa lwakue Yehova ni kwilangilila nangue tabanga wali na kilubo, Yehova waamulangulusiizie nangue Wene i Kabumba wa maka onse. (Yob. 38:​1-4) Kekio kyaamukwasiizie Yobu enike nangue nzila yakue Yehova ni ya pa muulu sana kuliko nzila ya muntu. Pa kako, kisia musita, nabi Isaya waandikile evi: “Eba, bulongo kunti bwamulanda Mubumbi nangue: ‘Uli mukubumba ki?’”—Soma Isaya 45:​9-12.

6. Mukristu apalile kuwaza sana vili mulangue ni maka akue Kabumba wetu mu aali ki? (Mona ni ma foto.)

⁶ Kine Mukristu waaluka ni kibelezio, pange kunti wabamba kuswapila sana mawazo akue kuliko kuswapila butunguluzi bwakue Yehova pamo ni Mulandu wakue. (Yob. 37:​23, 24) Inzi, eba kuwaza sana palua mulangue ukata sana pamo ni bukulu bwakue Kabumba kunti kwamukwasia syani? (Is. 40:22; 55:​8, 9) Kukita evio kwakaba kumukwasia kuya waikeefiizie ni kwalulula mawazo akue.

7. Rahela waakitile ki evi avinde kwitabila bupilibuko bwaakitikile mu kuteania kwetu?

⁷ Rahela, olia ali waikala mu Slovenia, waainikile nangue kuwaza sana pa lwakue Kabumba wakue kwaamukwasiizie kwitabila bupilibuko bwaakitikile mu kuteania. Walanda evi: “Nsita imo, te kyaali kyaleengele kuli nene kwitabila bupinguzi bwaakwetue na baalia bali batungulula. Kwa mufuano, ata sie kisia kumona Mpunda ya 8 Kufuma ku Kabungue Kali Katungulula ya 2023, naaunvwile ovio lunaamwene lya kwanza muntu wali mukulanda lyasi wali ni ndevu. Pa kako, naapepele kuli Yehova evi ankwasie kwipatanisia na bobo bupilibuko.” Rahela waainikile nangue pantu Yehova ni Kabumba wa muulu ni kyalo, wene i ali ni buvinde bwa kutungulula kuteania kwakue mu nzila iweme sana. Kine wewe wamona kyakolele kwipatanisia na kunvua kwa lenu, ni kintu kya mana kutontonkania palua bukata bwa mulangue ni maka akue Kabumba.—Bar. 11:​33-36.

NSAMBU ILENGIIZIE LEEZA ALEKELELE MATESO

8. Kumana kilengiizie Leeza alekelele mateso kwaakuleteele faida ki?

⁸ Juu ya ki Leeza alekeleele mateso? Bamo, baalia basimanine kyasuko kya kekio kipuzio bali bamufipilua Leeza ao kulanda nangue taliko. (Tus Maf. 19:3) Inzi, wewe waasambiliile nangue lizambi pamo ni kusipwililika belia bitwaapyene i bilengiizie tuye twateseka, te Yehova alengiizie. Kabili, wewe waasambiliile nangue kupembelela kwakue Yehova kuli kwakwasia bantu bengi bafikiile kumumana ni kumana wene vyakaba kupwisia mateso lonse. (2 Pet. 3:​9, 15) Kumana bebi bisinka byonse kwaakuteekiizie mutima ni kulengia umupalame sana.

9. Ni mu aali ki mutupalile kulanguluka kilengiizie Yehova alekelele mateso?

⁹ Twainika nangue tupalile kuya twali ni mibele ya kupembelela musita utupembeleele Yehova apwisie mateso. Kine muntu olia ututonene wafua, ao kine fwefue ao bantu ba mu lupua lwetu bali mu maavia, ao kine bali mukukitilua bintu bila nsambu, kunti twabamba kwema ni kwiipuzia kine juu ya ki Yehova wakokola bila wawamia bintu. (Baeb. 1:​2, 3) Kine twaisanga mu aali ya evio, ni kintu kya mana kuwaza sana palua nsambu ilengiizie Yehova alekelele bantu bolokele baye bateseka.a (Malum. 34:19) Kabili, tupalile kuwaza sana palua bulayo bwakue bwa kupwisia mateso lonse.

10. Ni kiki kili kyamukwasia Anne aye wali ni mutende mu mano ata sie kine mama wakue waafwile?

¹⁰ Kumana kisinka palua mateso kunti kwatukwasia tusipikizie. Anne, olia ali waikala mu kilila kya Mayotte, mu Lyezi Likata lya India, walanda evi: “Mama wane waafwile tekusyapitile myaka fulani, kekio kyaandeteele bulanda sana. Inzi, ndi nailangulusia lingi nangue te Yehova alengiizie tuye twateseka. Manine nangue wene atonene kakiine kupwisia mateso onse ni kufufula batonua betu baalia bafwile. Kutontonkania palua bebio bisinka kuli kwampeela mutende mu mano, olia uli wampapia lingi.”

11. Kumana nsambu ilengiizie Yehova alekelele mateso kunti kwatukwasia syani kutwalilila kusimikila?

¹¹ Kumana nsambu ilengiizie Yehova alekelele mateso kunti kwatusonsezia tutwalilile kusimikila. Kisia kulondolola nangue Yehova apembeleele pantu atonene bantu balapile evi bakabe kupusuka, Petro waandikile evi: “Tontonkanie kine mupalile kuya mwali bantu ba musango ki, mu bikitua bya lwendo lutakatifu pamo ni bikitua bya kwipeela kuli Leeza.” (2 Pet. 3:​11, NWT) Miilo yetu ya kusimikila ni imo pakati ka “bikitua bya kwipeela kuli Leeza.” Nga evelia sie Baba wetu, ni fwefue tubatonene bantu. Tutonene ni bene bakekale mu kyalo kya lenu kyakue Leeza. Yehova ali mukulangilila mibele ya kupembelela kupitila kubapeela bantu ba mu kazonga kobe lisyuko lya kumupupa wene. Kulanda kisinka, uli ni lisyuko likata sana lya kubomba pamo ni Leeza ni kubakwasia bantu bengi basambilile pa lwakue ntanzi mpela teinaize!—1 Bakor. 3:9.

TULI MU “NSIKU YA MPELEEZIO”

12. Kumana nangue tuli mu “nsiku ya mpeleezio” kwaakituletela faida ki?

¹² Bibilia yaalondolwele bwino vyakaba vyali bantu mu “nsiku ya mpeleezio.” (2 Tim. 3:​1-5) Bintu bili byakita bantu enu nsiku bilangiliile paswetele nangue bobu bunabi buli mukufikiliziiwa. Lutuli twamona lwendo pamo ni aali ya bantu byakila kubipa, kekio kili kyalengia tukile kusininkizia nangue Mulandu Wakue Leeza uswapikikile.—2 Tim. 3:​13-15.

13. Kukonkana ni mufuano wakue Yesu olia uli mu Luka 12:​15-21, tupalile kwiipuzia bipuzio ki?

¹³ Kabili, kumana nangue tuli mu nsiku ya mpeleezio kunti kwatukwasia kupoza mano ku bintu bya mana kakiine. Tumone juu ya ki ni kintu kya mana kukita evio kupitila mufuano wakue Yesu olia uli mu Luka 12:​15-21. (Soma.) Juu ya ki olia mwalalume munonsi waakuutilue nangue “kipuba”? Taamukuutile evio pantu abanga wali munonsi, inzi pantu abanga wabiikile pa ntanzi bintu bisipalile. Waaibiikiile “bunonsi panu kyalo, inzi [tabanga wali] munonsi mu bintu byakue Leeza.” Kusibombia bwino musita wakue kibanga kyali kilubo kikata pantu abanga wasyele sie na musita unini pa kyalo. Leeza waamulandile evi: “Lelo busiku uli kufua.” Lonu, pantu mpela ya kenu kyalo yapalama, tupalile kwiipuzia evi: ‘Miradi yane ilangiliile nangue ndi mukupoza mano ku bintu bya mana sana? Ndi nakwasia baana bane bebiikile miradi ki? Eba, kintu kya kwanza kili kyalengia mbombie maka ane, musita wane, pamo ni makuta ane ni juu ya kwibiikila bunonsi panu pa kyalo ao ku muulu?’

14. Kukonkana ni mufuano wakue Miki, juu ya ki ni kintu kya mana kulanguluka nangue tuli mu nsiku ya mpeleezio?

¹⁴ Kulanguluka nangue tuli mu nsiku ya mpeleezio kunti kwatukwasia kumana kine ni bupinguzi ki butupalile kukwata. Kekio i kyaakitile nkazi Miki. Wene walanda evi: “Kisia kupata diplome ku sekondere, naabambile kukeba miilo ya kunkwasia kupata makuta a kunkwasia kusambilila palua ba nama ku iniversite. Inzi kabili, mbanga natonene kwaluka painia ni kuya kubombela ku fwasi kuli lazima ikata ya ba kasimika. Ba lupua ni ba nkazi bamo ba mu kilonghaano baandandile ngwazepo sana evi mone kine kunti navinda kubomba ezio miilo ni wenka ozo musita nvinde kwaluka painia, ni kuya kubombela ku fwasi kuli lazima ikata ya ba kasimika. Baandangulusiizie nangue, lenu sie, kenu kyalo kyakaba kufika ku mpela. Kabili, baandangulusiizie nangue, mu kyalo kya lenu, nakaba kuya nali ni lisyuko lya kusambilila lonse palua ba nama bonse. Pa kako, naapingwile kusambilila masomo a musita sie unini, inzi a kunkwasia kumana bufundi paleepale bwa mana. Kekio kyaankwasiizie kupata miilo ya kupata makuta anini ni kupata musita wa kubomba bupainia. Kisia, naaile ku Ekwatere, kolia kubanga kwali lazima ikata ya ba kasimika.” Lonu, Miki pamo ni mulume wakue bali mukubomba mu muputule mu kekio kyalo.

15. Eba, bantu bakili ni musita wa kwitabila mpunda iweme? Leta mufuano. (Mona ni ma foto.)

¹⁵ Te tupalile kutyoka mutima kine bantu bakaana lya kwanza kwitabila mpunda iweme. Juu ya ki? Pantu bantu kunti baaluluka. Tumone mufuano wakue Yakobo, mwalawakue kwa Yesu. Wene waamwene Yesu lwabanga wakula, ni lwabanga wasambilizia bwino sana kuliko muntu unge onse. Kabili, waainikile bwino nangue Yesu i abanga wali Masiya. Inzi, paapitile myaka ingi bila wamukonka. Kya kupapia, wene waalukile musambi wa mute sana wakue Yesu kisia sie Yesu kufufulua!b (Yoan. 7:5; Bag. 2:9) Te tupalile kutyoka mutima ni kulekela kubasambilizia bantu ba mu lupua lwetu pamo ni bantu bange baalia basinaitabile mpunda iweme. Tupalile kulanguluka nangue pantu tuli mu nsiku ya mpeleezio, miilo yetu ya kusimikila ipalile kubombua lubilo. Belia bituli mukubabwila lonu, kunti babibombia musita uli waiza, pange ata sie kisia lyemo likata kutendeka.c

UYE WATASIA PALUA BINTU BILI BYATULANGULUSIA YEHOVA

16. Bintu bili byatulangulusia Yehova bili byakuletela faida ki? (Mona ni kisanduku kilandile “Bombia Bisinka Bili mu Bibilia evi Kubakwasia Bange.”)

¹⁶ Byakulia bimo bya kimupasi bituli twapeelua bili byateaniiziwa bantu basinaunvuepo ata limo masambilizio a musinzi a Bibilia. Kwa mufuano, lyasi lya bantu bonse lya kila mulungu, mpapulo ni ma video amo alia ali asangua ku jw.org, pamo ni ma kazeeti etu a bantu bonse, bili byakitilua asa baalia basili Bakasininkizia. Inzi, bebio bintu bili byatuletela ni fwefue faida. Bili byalengia tukile kumutona Yehova, tukile kuswapila Mulandu wakue, kabili bili byatukwasia kwaluka ni bufundi bwa kubasambilizia bange masambilizio a musinzi a Bibilia.—Malum. 19:7.

17. Ni mu aali ki mutupalile kutontonkania palua masambilizio a musinzi a Bibilia?

¹⁷ Fwe Bakasininkizia Bakue Yehova tuli twaunvua makola kine kuteania kwatukwasia kunvua mu nzila inge ao ya lenu kisinka kimo kili mu Bibilia. Inzi kabili, tuli twatasia sana palua masambilizio a musinzi a Bibilia alia atwaasambiliile lya kwanza, kabili alia aatukwasiizie kubamba kukita burafiki pamo ni Yehova. Kine twaponena mu bwezio bwa kukakatila mawazo etu kuliko kunakila butunguluzi butuli twapeelua mu kuteania kwakue Yehova, tupalile kwikeefia ni kulanguluka nangue Kabumba wa mulangue ni maka onse i ali watungulula koko kuteania. Kine fwefue ao muntu olia ututonene ali ni bwavia, tupalile kulangilila mibele ya kupembelela ni kutontonkania palua kelia kilengiizie Yehova alekelele mateso. Kabili, kine tuli mukupingula vya kubombia musita wetu pamo ni bintu byetu bya kimubili, tupalile kulanguluka nangue tuli mu nsiku ya mpeleezio, kabili nangue kusyele sie musita unini mpela ifike. Kansi, bintu bili byatulangulusia Yehova bitwalilile kutulumia, kutusonsezia, ni kutulengia twaluke ni mulangue.