Mwe Bakote, Sambilile Kupitila Mufuano Wakue Gideoni

1. Kukoonkana ni 1 Petro 5:2, bakote bali ni miilo ki ya mana ibapalile kubomba?

BAKOTE Bakristu, baapeelue miilo ya kwemena mikooko ikindeeme yakue Yehova. Babo balalume bepeele, bamwene miilo yabo ya kubombela balupua ni bankazi kuya yali ya mana. Kabili bali babomba kwa mute eevi baye bali ‘basuungi . . . baalia bali basuunga kakiine.’ (Yer. 23:4; soma 1 Petro 5:2.) Tuli twatasia kakiine paantu tuli ni babo balalume mu bilonghaano byetu!

2. Bakote bange kunti basaakaana ni maavia ki?

² Bakote bali basaakaana ni maavia engi musita ubali babomba miilo yabo. Kwa mufuano, kwemena kilonghaano kuloombele kubomba kwa maka saana. Tony mukote wa mu kyalo kya États-Unis, waali wapalile kusambilila vya kulangilila mibeele ya kwikeefia palua miilo yaaitabiile kubomba. Walanda eevi: “Buluele bwa korona (COVID-19) lubwatendekele, naabambile kubomba miilo ingi saana ya kuteania kulonghaana ni miilo ya kusimikila. Atasie kine naali nabomba saana, lyonse kubanga kwasialasie miilo ingi ya kukita. Naalukile ni bintu bingi saana bya kukita, kabili keekio kyaalengiizie ngandue kupata musita utosiizie wa kusoma Bibilia, kusambilila ni kupepa.” Mukote umo wa mu Kosovo ali wakuutua Ilir, weene waapatile buavia bwibeleele. Musita lwabanga wali mu kazonga kalimo vita, waamwene kyakolele kukoonka malaizio a mu kuteania. Walanda eevi: “Mibeele yane ya kusipa yaaeziiziwe musita biro ya musambo luyaanganine kuya kukwasia balupua ni bankazi baali baikeele mu fuasi yaviizie. Naaunvuile muenzo, kabili naamwene nangue, azo malaizio kusia asiviinda kubomba.” Misionere umo mu Asia, olia ali wakuutua Tim, weene waamwenesie kyakolele kukita bintu byonse byaali wapalile kukita kila busiku. Walanda eevi: “Nsita inge, naali naunvua kutopa mu maano ni kupuilua saana palua kwemena balupua ni bankazi.” Ni kiki kili kuviinda kukwasia bakote bali mukusaakaana ni maavia nga azo?

3. Fwe bonse kunti twanoonkelamo siani kupitila kutoosia mufuano wakue Mupinguzi Gideoni?

³ Bakote kunti basambilila kupitila mufuano wakue Mupinguzi Gideoni. (Baeb. 6:12; 11:32) Weene waakingiliile bantu bakue Leeza ni kubasuunga. (Bap. 2:16; 1 Mil Nsi. 17:6) Nga Gideoni, bakote ni beene basaakuilue eevi kusuunga bantu bakue Leeza mu kipindi kikolele saana. (Miil Bat. 20:28; 2 Tim. 3:1) Kunti twasambilila mibeele ya kwikeefia ni ya kunakila kupitila mufuano wakue Gideoni. Mibeele yakue ya kusipikizia yaaeziiziwe musita lwaali wabomba miilo ibaamupeele. Tuye twali bakote ao abe, fwe bonse, kunti twakuzia mibeele ya kutasia bakote betu. Kunti twabakwasia babo balupua bali mukubomba kwa mute eevi kutwemena mu kilonghaano.​—Baeb. 13:17.

WEEWE KUNTI WAKITA SIANI KINE MIBEELE YOBE YA KWIKEEFIA YAEZIIWA?

4. Gideoni waalangiliile siani mibeele ya kwikeefia?

⁴ Gideoni abanga wali muntu ekefiizie.b Malaika wakue Yehova waamulandile Gideoni nangue, weene waasaakwilue eevi abakombole Baisraeli kufuma ku Bamidiani ba maka. Gideoni, mwalalume waali waikefiizie, waalandile eevi: “Mukowa wane i ukilile buniini muli Manase, kabili neene i muntu wa pansi saana mu nsesi yakue baba wane.” (Bap. 6:15) Weene waaimwene nangue tapalile kupeelua ezio miilo. Inzi Yehova waali wamanine nangue Gideoni kunti waviinda kubomba. Kupitila kukwasiiwa na Yehova, Gideoni waaviindile kubomba miilo ibaamupeele.

5. Mukote kunti waandua kulangilila mibeele ya kwikeefia musita ki?

⁵ Bakote bali baikwinda saana kulangilila mibeele ya kwikeefia mu bintu byonse. (Mik. 6:8; Miil Bat. 20:18, 19) Te beezi kwitasia palua beelia bibali ni buviinde bwa kukita, ao palua beelia bibakikita. Kabili te beezi kwimona nangue te ba mana juu ya bilubo paleepale bibakikita. Inzi nsita inge, mukote kunti waandua kulangilila mibeele ya kwikeefia. Kwa mufuano, mukote kunti waitabila kubomba miilo ingi mu kilonghaano, inzi kisia wabamba kwandua kupua ezio miilo yonse. Kabili paange bange kunti batendeka kumwamba palua miilo yaakikita ao kunti batendeka kumutasia saana palua miilo inge yaakikita. Kine mukote waisaanga mu aali nga ezio, kunti wasambilila ki kupitila mufuano wakue Gideoni eevi amane vya kukita?

6. Mufuano wakue Gideoni kunti wabasambilizia ki bakote palua kwikeefia? (Mona ni foto.)

⁶ Loomba bakukwasie. Muntu ali ni mibeele ya kwikeefia ali wasaangua wamanine bintu byasili na buviinde bwa kukita. Gideoni waaloombele bamukwasie, keekio kyaalangiliile nangue waali waikefiizie. (Bap. 6:27, 35; 7:24) Bakote baalia bali ni mulangue, bali baloomba eevi bakwasiiwe. Tony, olia utwazimbulanga lwa ntaanzi walanda eevi: “Aali inaakuliilemo, yaali yandengia ngie natona kwitabila kubomba miilo ingi kupusana ni buviinde bwane. Pakaako, naapinguile kulondoluela palua mibeele ya kwikeefia mu lupupo lwetu lwa mu lupua, kabili naamwipuziizie mukazi wane malanga akue. Kisia naabuelele kumona viideo imo mu jw.org, ili ni mutue ulandile, Kama Yesu, Uwazoeze, Uwategemeze na Uwatie Wengine Nguvu.” Tony waabambile kubalanda bange bamukwasieko miilo yaali wakita. Kukita evio kwaakwasiizie siani? Tony walanda eevi: “Miilo ili mukubombua buino mu kilonghaano, kabili ni neene ndi ni musita wa kukosia bukibuza bwane pamo ni Yehova.”

7. Bakote kunti bapala siani mufuano wakue Gideoni kine balandilua bintu bisifuaniine? (Yakobo 3:13)

⁷ Te kufipua kine bakulandila bintu bisifuaniine. Bakote kunti bapata buezio bunge: Kulandilua bintu bisifuaniine. Mufuano wakue Gideoni kunti wabakwasia kabili. Weene waali wamanine nangue taali wapuililikile, pakaako wasiele wateekameene musita Baefraimu lubaamulandiile milandu ibiipile. (Bap. 8:1-3) Gideoni taasukile wasasile. Waalangiliile mibeele ya kwikoosia kupitila kubatuilizia Baefraimu palua beelia bibaali bakebele, ni kupitila kulanda naabo mu nzila iweeme. Kukita evio, kwaakwasiizie babo bantu bateekamane. Baalia bakote bali ni mulangue, bali bapala mufuano wakue Gideoni kupitila kutuilizia bapoozeleko maano ni kwasuka mu nzila ya bufuuke musita bange lubali babalandila bintu bibiipile. (Soma Yakobo 3:13.) Kukita evio, kuli kwakwasia kuleeta mutende mu kilonghaano.

8. Bakote bapalile kukita siani kine batasiiwa? Leeta mufuano.

⁸ Mupeele Yehova bulumba bonse. Gideoni lwaaviindile kubooma Bamidiani waatasiiziwe. Inzi weene waamupeele Yehova bulumba. (Bap. 8:22, 23) Bakote kunti bamupala siani Gideoni? Bapalile kumupeela Yehova bulumba palua miilo ibali bakita. (1 Bakor. 4:6, 7) Kwa mufuano, kine mukote ali ni bufundi bwa kusambilizia buino, balupua ni bankazi kunti bamutasia. Inzi kuliko kwitasia, mukote kunti walanda nangue malaizio aakifuma mu Mulandu Wakue Leeza, kabili nangue fwe bonse tuli twasambiliziiwasie na kuteania kwakue Yehova. Kila musita bakote bapalile kwiipuzia kine bali basambilizia juu ya kumuleetela Yehova bulumba, ao kine bali bakita evio juu ya kutonasie bantu babatasie. Tumone kyaaimweneene mukote umo ali wakuutua Timothy. Musita lwaabambile kubomba wali mukote, Timothy waali watona kulanda lyasi lya bantu bonse. Walanda eevi: “Naali nabombia milandu ya kubambilapo lyasi ni mifuano yaleepele, kabili yakolele. Keekio kyaali kyalengia bantu baye bantasia saana. Inzi, keekio kyaalengiizie bantu batendeke kupooza saana maano kuli neene, kuliko kupooza maano ku Bibilia ao kuli Yehova.” Pa musita umo, Timothy waafikiile kwinika nangue apalile kwalulula nzila yakue ya kusambilizia eevi bantu bange te kunti baye bapooza saana maano kuli weene. (Tus Maf. 27:21) Keekio kyaalengiizie kwaluke ki? Walanda eevi: “Bamo pakati ka balupua ni bankazi bali bangana nangue lyasi linaalandile lili lyabakwasia kuluisia buavia, kusipikizia buezio, ao kusiala peepi ni Yehova. Ezio milandu ili yansaansamusia saana kuliko vinaaiunvuile musita unaatasiiziwe mu miaka yaapitile.”

WEEWE KUNTI WAKITA SIANI KINE MIBEELE YOBE YA KUNAKILA AO YA KUSIPA YAEZIIWA?

9. Mibeele ya kunakila ni ya kusipa yakue Gideoni yaaeziiziwe siani? (Mona foto ili ku ntendeko ya kazeeti.)

⁹ Kisia Gideoni kusaakulua eevi aaluke mupinguzi, mibeele yakue ya kunakila ni ya kusipa yaaeziiziwe. Waapeelue miilo ikolele ya kwinoona mazabau akue baba wakue a kupupilamo Baali. (Bap. 6:25, 26) Musita uniini kisia kukolonghania libumba lya basoda, Gideoni waalandilue mara ibili apunguzie mpendua ya basoda. (Bap. 7:2-7) Kupuako, Yehova waamulandile aye abengilile baluani mu nkambi yabo mu nsita ya busiku saana.​—Bap. 7:9-11.

10. Mibeele ya kunakila yakue mukote, kunti yaeziiwa siani?

¹⁰ Bakote bapalile kuya ‘baleengele kunakila.’ (Yak. 3:17, NWT) Mukote olia ali wanakila, ali waikala waleengele kukoonka beelia bili byalanda Maleembo, ni malaizio ali aleetua na kuteania kwakue Leeza. Kupitila kukita evio, ali wababiikila bange mufuano uweeme. Inzi, paange mukote kunti wamona kyakolele kunakila. Kwa mufuano, paange kunti wapokelela malaizio engi, ao paange malaizio kunti aaluluka lubilo, ni keekio kunti kyalengia mukote amone kyakolele kuabombia. Kabili mu aali inge, paange mukote kunti waiipuzia kine malaizio aakileetua kunti abomba kakiine ao ni a mulangue. Ao paange kunti wapeelua miilo mu kuteania, elia ili kulengia paange akwatue ni kukakua. Mukote kunti wapala siani mibeele ya kunakila yakue Gideoni mu aali nga ezio?

11. Ni kiki kili kubakwasia bakote eevi baye banakila?

¹¹ Tuilizia malaizio wapoozeleko maano ni kuabombia. Languluka nangue Leeza waamulandile Gideoni vya kwinoona mazabau akue baba wakue, ni fuasi ipalile kukuulilapo mazabau a leenu akue Yehova. Kabili waamubuilile ni banama bapalile kufumia eevi baye bali ngeleelo ao zabiu. Gideoni taabambile kwitendooka palua azo malaizio. Inzi waakitile beelia byenka byaalandilue kuli Yehova bila kukokola. Loonu, bakote bali mukupokelela malaizio mu kuteania kwakue Yehova kupitila mikanda, mpunda, ni malaizio ange ali atukwasia kusiala twali ni bukose bwaweeme, kabili twali peepi ni Yehova. Tubatonene bakote betu, paantu bali bakoonka malaizio a kiteokrasi mu kisinka. Kilonghaano kyonse kili kyanoonkelamo.​—Malum. 119:112.

12. Bakote kunti babombia siani lileembo lya Baebrania 13:17 kine kuli bintu byaaluluka mu kuteania kwakue Yehova?

¹² Uye waleengele kwaluluka kukoonkana ni malaizio. Languluka nangue Yehova waamulandile Gideoni afumie pa kikundi kyakue basoda bakilile pa pursa makumi kenda na kenda (99). (Bap. 7:8) Paange Gideoni nga waatontonkaniizie eevi: ‘Bobu bupilibuko ni bwa mana kakiine? Bwakaba kubomba kakiine?’ Inzi Gideoni waakoonkele azo malaizio. Loonu, bakote kunti bamupala Gideoni kupitila kukoonka bupilibuko mu malaizio ali afumiiwa na kuteania. (Soma Baebrania 13:17.) Kwa mufuano, mu 2014 Kabungue Kali Katungulula kaakitile bupilibuko juu ya kufumia bulongio palua kukuulilua Masesi a Bukolo ni Bipaka bya Kulonghaaninamo. (2 Bakor. 8:12-14) Bilonghaano te byaali byafumia kabili bulongio bwa kubueziiziamo nfalanga palua kukuula. Inzi bilonghaano bya mu kyalo kyonse byaatendekele kufumia bulongio lwa pamo, eevi Masesi a Bukolo ni Bipaka bya Kulonghaaninamo bitendeke kukuulua konse kubikabiilue atasie kine kilonghaano kilisie na buviinde buniini. Musita José lwaaunvuile mpunda palua bobo bupilibuko, waatwisikile kine ezio mipaango kunti yabomba. Waatontonkaniizie eevi: ‘Te kuli ata Nsesi ya Bukolo yakaviinda kukuulua. Ku enu fuasi, bintu tebiizi kukitua mu ezio nzila.’ Ale ni kiki kyaamukwasiizie José eevi akwasie azo malaizio? Walanda eevi: “Milandu ili mu Tuswalo ni Mafunde 3:5, 6, yaandangulusiizie palua kumuswapila Yehova. Kabili ezio mipaango, ili mukuleeta mazabo aweeme! Loonu, tuli mukukuula Masesi engi a Bukolo, kabili twaakisambilila kulongia mu nzila ipusene-puseene eevi apana kuye kwali bange ba kufinua.”

13. (a) Gideoni waali wasininkiziizie ki? (b) Bakote kunti bamupala siani Gideoni? (Mona ni foto.)

¹³ Kita kutona kwakue Yehova wasipile. Gideoni waamunakiile Yehova atasie kine waali ni muenzo, kabili atasie kine miilo ibaamupeele ibanga yali ya kuleeta buavia. (Bap. 9:17) Kisia kupeelua busininkizio kuli Yehova, Gideoni waainikile kakiine nangue Leeza wakaba kumukwasia kusuunga bantu bakue Leeza. Bakote baalia bekeele mu kyalo mukaaniiziwe miilo yeetu, bali bamupala Gideoni. Bali balangilila mibeele ya kusipa kupitila kuya bali mufuano palua kulonghaana ni kusimikila atasie kine bali batinsiiwa kukakua, bali basambisiiwa, bali bazeezia miilo ao kukitilua bintu bya bungipaani.c Mu nsita ya lyemo likata, bakote bakaba bakabiile kulangilila mibeele ya kusipa eevi kunakila malaizio abakapeelua, atasie kine azo malaizio kunti aleeta buavia. Kwa mufuano, paange twakapata malaizio palua kusimikila mpunda ifinine ya bupinguzi, ni keelia kitupalile kukita eevi tukapusuke musita utwakasaukilua na Gogu wa Magogu.​—Ezek. 38:18; Nfy. 16:21.

WEEWE KUNTI WAKITA SIANI KINE MIBEELE YOBE YA KUSIPIKIZIA YAEZIIWA?

14. Mibeele ya kusipikizia yakue Gideoni yaaeziiziwe siani?

¹⁴ Gideoni waali wapalile kubomba saana mu miilo yakue ya bupinguzi. Lubaali baluana ni Gideoni mu musita wa busiku, Bamidiani baabutukile. Gideoni waabakumbiziizie kufuma mu Lulambe lwa Yezreeli mpaka ku Mwenzi wa Yordani, kabili paange ozo mwenzi ubanga walimo bimuti bingi. (Bap. 7:22) Eba, Gideoni waapuiliilesie ku mwenzi wa Yordani? Ata! Atasie kine weene pamo ni balalume bakue mia itatu (300) baali basyatopele, baabukile mwenzi ni kutwalilila kubakumbizia. Kupuako, Gideoni pamo ni balalume bakue baabakwete Bamidiani kabili baabaviindile.​—Bap. 8:4-12.

15. Juu ya ki paange nsita inge mukote kunti wamona kyakolele kusipikizia?

¹⁵ Paange nsita inge mukote kunti waiunvua kuya watopele saana juu ya miilo ya kwemena kilonghaano, ni bantu ba mu lupua lwakue. Kine mukote waisaanga mu ezio aali, kunti wamupala siani Gideoni?

16-17. Ni kiki kyaamukwasiizie Gideoni kusipikizia, ni bakote kunti baya basininkiziizie ki? (Isaya 40:28-31) (Mona ni foto.)

¹⁶ Uye waswapiile nangue Yehova wakaba kukupeela maka. Gideoni waali waswapiile nangue Yehova wakaba kumupeela maka. Kabili ni Yehova waamukitiile evio vyenka. (Bap. 6:14, 34) Musita umo, Gideoni pamo ni balalume bakue baali bakumbiziizie lwa pansi, bamakolo babili Bamidiani. Inzi paange babo bamakolo baali babutukile baikeele pa bangamia. (Bap. 8:12, 21) Anzia evio, Leeza waabakwasiizie Baisraeli babakwate, kabili baaviindile ezio vita. Enka evio, ni bakote kunti bamuswapila Yehova, olia ‘asiizi kutopa ata kaniini ao kupuilua na maka.’ Weene wakaba kubapeela maka pa musita ubakabiile.​—Soma Isaya 40:28-31.

¹⁷ Mona mufuano wakue lupua Matthew, olia ali wabomba mu Kabungue Kali Kabombela Pamo ni Opitali. Ni kiki kili kyamukwasia kusipikizia? Matthew walanda eevi: “Naakiimwena nangue milandu ili mu Bafilipi 4:13 ni ya kisinka. Lingi, musita undi naiunvua kuya natopele, kabili napuiliilue saana, ndi napepa kwa mute, namuloomba Leeza ampeele maka ni maano andi nasaangua nakabiile eevi mbakwasie balupua bane. Mu ezio nsita, ndi naunvua Yehova wampeela maka ni kunkwasia kusipikizia.” Nga evelia vyaakitile Gideoni, bakote betu bali babomba saana eevi kwemena bantu bakue Yehova, atasie kine nsita inge kili kyasaangua kyakolele saana kukita evio. Kulanda kisinka, bakote bapalile kuya baikefiizie ni kwinika nangue tebaviinda kukita lyonse kila kintu kibatonene kukita. Anzia evio, bakote bapalile kuya baswapiile nangue Yehova wakaba kubonvua musita ubakaba kuya bamuloomba eevi abakwasie, kabili wakaba kubapeela maka a kubakwasia kusipikizia.​—Malum. 116:1; Baf. 2:13.

18. Nga vitwafuma mu kusambilila, bakote kunti bamupala siani Gideoni?

¹⁸ Bakote kunti basambilila bingi kupitila mufuano wakue Gideoni. Bakote bapalile kuya baikefiizie musita ubali mukupingula palua buingi bwa miilo ibali kwitabila kubomba. Kabili bapalile kuya bakengeele musita bange lubali babalandila milandu ibiipile ao kubatasia. Bapalile kulangilila mibeele ya kunakila ni kusipa, asa paantu mpela ya keenu kyalo yakila kupalama. Kabili bapalile kuya baswapiile nangue, atasie kine basaakaana na maavia a siani, Leeza wakaba kubapeela maka a kusipikizia. Kakiine tuli mukutasia saana basuungi ba evio, baalia bali babomba kwa maka. Kabili ‘bantu ba ozo musango, tuli mukubakindika.’​—Baf. 2:29.