Mpapulo Izimbuilue mu Libuku lya Kulonghaana kwa Miilo ni Buikazi
© 2022 Christian Congregation of Jehovah’s Witnesses
NSIKU 02-08/01
BUNOONSI KUFUMA MU MULANDU WAKUE LEEZA | 2 MAKOLO 22-23
“Juu ya ki Tuye Twaikeefiizie?”
w00 15/9 lub. 29 lifu. 7-lub. 30 lifu. 1
Kwikeefia Kwakue Yosia, Kwalengia Etabilue na Yehova
Paakili lukele-keele, bantu batendeka kubomba miilo ya kuwaamia ekalu. Kakiine, Yosia wamutasia Yehova paantu babombi bali mukuwaamia nsesi yakue Leeza yaainoonenue na bamo ba babikolue bakue babiipile. Musita miilo luitwaliliile, Shafani waiza kuleeta mpunda. Eba, ni mpunda ki ezio? Kansi, ku minue atwemeko kitabu kya kukunzua! Walanda nangue Hilkia, Koani Mukulu, wapata “kitabu kilimo mizilo yakue Yehova kupitila kuboko kwakue Musa.” (2 Milandu ya Nsiku 34:12-18, NWT) Keekio kitabu kya Muzilo kyaapatilue, kyaali kya kupapia saana paantu kibanga keelia kyenka kyaaleembelue kuli Musa!
Yosia ali ni nkulu ya kunvua kila mulandu uli mu keekio kitabu. Musita Shafani lwali mukusoma, likolo ali mukwikwinda kumona malaizio ali mu keekio kitabu vyali kubomba kuli weene muine, ni ku bantu bange. Watona saana kumona keekio kitabu vikilandiile saana palua lupupo lwa kisinka, ni kulanda ntaanzi maavia akwaluka na bantu ni kutwalua ku buzia kine bakita lupupo lwa bufi. Kisia kwinika nangue malaizio onse akue Leeza te aakindikilue, Yosia wazabula ngubo yakue ni kubalanda ba Hilkia, Shafani, ni bangeko nangue: ‘Mwipuzie Yehova palua milandu ileembelue mu keeki kitabu, paantu kipuki kikata kyakue Yehova kileemene palwetu, paantu babikolue betu te baanakiile milandu ili mu keeki kitabu.’—2 Makolo 22:11-13; 2 Milandu ya Nsiku 34:19-21, NWT.
w00 15/9 lub. 30 lifu. 2
Kwikeefia Kwakue Yosia, Kwalengia Etabilue na Yehova
Baalia bantu baatuminue na Yosia kuya kumumona Hulda, nabi mwanakazi wa mu Yerusalemu, babuela bali ni mpunda. Kupitila mulandu wakue Yehova, Hulda waalandile nangue aalia maavia alandilue mu kitabu kya kukunzua kyaakimoneka leenusie, akaba kupata ntundu isaangukile. Inzi, paantu Yosia waikeefia ntaanzi yakue Yehova Leeza, weene, takaba kupatuako na azo maavia. Wakaba kukolonghaniiwa pamo ni babikolue bakue, kabili wakaziikua mu mankabuli akue mu mutende.—2 Makolo 22:14-20; 2 Milandu ya Nsiku 34:22-28.
Bunoonsi bwa Kimupasi
w01 15/4 lub. 26 lifu. 3-4
Kunti Waviinda Anzia Kine Waakuliile mu Aali Ibiipile
Anzia aali ibiipile yaalimo ku bwanike bwakue, Yosia waatwaliliile kukita bintu biweeme pa menso akue Yehova. Pakaako, buteeko bwakue bwali bwaweeme saana. I kyalengia Bibilia ilande nangue: “Ntaanzi yakue te kwali likolo waali nga weene, olia waamubueleele Yehova na mutima wakue onse, ni mweo wakue onse, kabili na maka akue onse, kukoonkana ni muzilo onse wakue Musa; ni kisia weene te kuli unge waaizile kwaluka nga weene.”—2 Makolo 23:19-25, NWT.
Kakiine, mufuano wakue Yosia, wakoselezia baalia, paange ku bwanike bwabo, babanga bali ni maavia abiipile saana! Fwefue, kunti twasambililako ki ku mufuano wakue Yosia? Ni kiki kyaamukwasiizie Yosia kusaakula lwendo luweeme, ni kutwalilila ni loolo lwendo?
NSIKU 09-15/01
BUNOONSI KUFUMA MU MULANDU WAKUE LEEZA | 2 MAKOLO 24-25
“Twalilila Kuya Wakentele Paantu Musita Waya”
w01 15/2 lub. 12 lifu. 2
Busiku Bwakue Yehova bwa Bupinguzi Bwapalama!
2 Kakiine, bukabika bwakue Zefania, bwamukwasia mulumendo Yosia enike nangue lupupo lwa bufi lupalile kufumiiwa mu muzi wa Yuda. Inzi, bintu byaakitile ozo likolo bya kufumia diini ya bufi mu kyalo, te byaapuisiizie bubiifi bonse bubanga pakati ka bantu. Kabili te byaaviimbile mazaambi aakitile babu wakue, Likolo Manase, olia waali “waizuziizie Yerusalemu na milopa isili na kilubo.” (2 Makolo 24:3, 4, NWT; 2 Milandu ya Nsiku 34:3) Pakaako, busiku bwakue Yehova bwa bupinguzi, bwaali bwapalile kuiza kakiine.
w07 15/3 lub. 11 lifu. 10
Bintu Bikata Bili mu Kitabu kya Yeremia
Ni muaka wa 607 Yesu tanavyalue. Ozo ni muaka wa likumi na kamo (11) wa buteeko bwakue Sedekia. Likolo Nebukadneza wa ku Babiloni, wakita miezi likumi na munane (18) wazyungulukiile Yerusalemu. Pa nsiku saba (7) Muezi wa Busano (5), mu muaka wa likumi na kenda (19) wa kuteeka kwakue Nebukadneza, Nebuzaradani mukulu wa bazamu, ‘waiza,’ ao wafika ku Yerusalemu. (2 Makolo 25:8, NWT) Paange musita lwali panze pa muzi mu nkambi yakue, Nebuzaradani watoosia aali ya muzi ni kupaanga vya kuwinoona. Kisia nsiku itatu (3), i kulanda pa nsiku likumi (10) ya ozo muezi, Nebuzaradani ‘wafika mu muzi,’ ao waingila mu Yerusalemu. Kisia, wazizia muzi.—Yeremia 52:12, 13, NWT.
Bunoonsi bwa Kimupasi
w05 1/8 lub. 12 lifu. 1
Bintu Bikata Bili mu Kitabu kya Makolo wa Bubili
24:3, 4. Kilubo kyakue Manase kya kwitila milopa, kyaalengiizie Yehova ‘tekuti etabile kweleela’ muzi wa Yuda. Leeza ali wakindika milopa ya bantu basili na kilubo. Kunti twaya twali ni kisinka nangue Yehova wakaba kubwezia kilanduzi kya milopa isili na kilubo ili mukwitilua, kupitila kubenoona baalia bali mukwitila ezio milopa.—Malumbo 37:9-11; 145:20.
NSIKU 16-22/01
BUNOONSI KUFUMA MU MULANDU WAKUE LEEZA | 1 MILANDU YA NSIKU 1-3
“Bibilia Ni Kitabu Kilimo Maasi a Kisinka Apana a Bufi”
w09 1/9 lub. 14 lifu. 2
Eba, ba Adamu ni Eva, Baali Bantu Kakiine?
Kwa mufuano, tontonkania liste ya meena a bantu azimbuilue mu Bibilia mu kitabu kya Milandu ya Nsiku wa Kuanza, katue ka 1 mpaka ka katue ka 9 ni mu Nsimiko yakue Luka katue ka 3. Azo ma liste ni a kupapia. Azimbuile meena a bantu ba mu luvyalo ao bizaazi makumi ana na munane (48), ni makumi saba na bisano (75) byakoonkeene buino. Luka, waaleembele meena a bantu ba mu luvyalo lwakue Yesu Kristu. Inzi kitabu kya Milandu ya Nsiku, kizimbuile meena a bantu ba mu luvyalo lwa ba makolo ni ba makoani ba mu ntundu ya Israeli. Mu ezio liste yonse ibili, muzimbuilue aza meena amanikile saana: Sulemani, Daudi, Yakobo, Isaka, Abrahamu, Noa ni Adamu. Meena onse ali mu eezi liste ibili, azimbuile bantu baaliko kakiine. Kabili, Adamu i abanga muntu wa kuanza waaliko kakiine azimbuilue ku kila liste.
w08 1/6 lub. 3 lifu. 4
Lyasi Palwakue Noa ni Kibunda Ni lya Kisinka Apana lya Bufi
Mu Bibilia muli mpunda ibili ilandiile palua luvyalo, ili yasininkizia nangue Noa waaliko kakiine. (1 Milandu ya Nsiku 1:4; Luka 3:36) Ezra ni Luka, bakaleemba baaleembele aza ma liste a luvyalo, bonse babili, babanga bantu baali batoosia bintu bapoozeleko ni maano. Luka waatoosiizie kizaazi kyaafuminemo Yesu Kristu, watendekela pali Yesu wabuela ku nyuma mpaka kufikiila pali Noa.
w09 1/9 lub. 14-15 lifu. 7
Eba, ba Adamu ni Eva, Baali Bantu Kakiine?
Kwa mufuano, mona lisambilizio litonenue saana na bazumizi ba mu makanisa engi: kilubula mulandu. Kukoonkana ni leeli lisambilizio, Yesu Kristu waafumiizie bukose bwakue bupuililikile bwaluke kilubula mulandu eevi kupususia bantu mu mazaambi abo. (Mateo 20:28; Yoane 3:16) Nga vitumanine, kilubula mulandu ni kintu kya mutengo kilingheene, kili kyafumiiwa eevi kukombola ao kusitilamo kabili kintu keelia kyaazeezele. Ezio i nsaambu ili yaleengia Bibilia ilande nangue Yesu ni “kilubula mulandu kilingheene.” (1 Timoteo 2:6, NWT) Paange kunti twaiipuzia, kilubula mulandu kilingheene na ki? Bibilia yaasuka eevi: “Paantu nga evelia bantu bonse vibali bafua pa mulandu wa buumo ni Adamu, i vibakaba bakose pa mulandu wa buumo ni Kristu.” (1 Bakorinto 15:22, Le Nouveau Testament en langue Kitaabua) Bukose bupuililikile bwaafumiizie Yesu eevi kukombola bantu bali banakila, bulingheene ni bukose bupuililikile bwaazeziizie Adamu musita lwaakitile lizaambi mu Edeni. (Baroma 5:12) Kulanda kisinka, ibenge Adamu taaliko, ni kilubula mulandu kyakue Kristu nga te kili na mana ata kaniini.
Bunoonsi bwa Kimupasi
it-1-F lub. 977 lifu. 2-3
Liste ya Luvyalo
Meena a Banakazi. Mu ma liste a luvyalo, meena a banakazi ali azimbuluamosie limo-limo kine paali ni nsaambu ya kiistoria yaalengiizie kuazimbula. Mu Kutendeka 11:29, 30, muli mwazimbulua liina lyakue Sarai (Sara), paantu kakiine luvyalo lubanga lwalailue lwaali lwa kuiza kupitila weene, apana kupitila mukazi unge wakue Abrahamu. Paange, Milka ni weene wazimbulua pa yenka eezi fuasi paantu abanga wali bibi wakue kwa Rebeka, mukazi wakue kwa Isaka. Kabili, ezio yaali nzila ya kulangilila nangue luvyalo lwakue Rebeka lwaali lwafumine kuli Abrahamu, paantu Isaka tabanga wapalile kuupa mukazi afumine mu ntundu inge. (Kut 22:20-23; 24:2-4) Mu Kutendeka 25:1, muzimbuilue liina lyakue Ketura, mwanakazi waizile kwaluka muka Abrahamu musita unge kisia paapo. Keekio kyalangilila nangue kisia Sara kufua, Abrahamu waupile. Kabili, abanga wakilisie ni buviinde bwa kuvyala atasie kisia miaka ikilile pa makumi ana (40) ntangia Yehova lwaabapeele kabili buviinde bwa kuvyala. (Bar 4:19; Kut 24:67; 25:20) Kukila pakaako, eezi mpunda, yalangilila nangue Bamidiani enka evelia ni ntundu inge ya mu Arabia, babanga bali bamo ni Baisraeli.
Lea, Raheli, ni bakazi banike bakue Yakobo pamo ni baana babaavyeele, bazimbuilue meena abo. (Kut 35:21-26) Keekio kyatukwasia kumana keelia kyaabakitiile Leeza babo baana musita unge kisia paapo. Mu nsaambu ipaleeneko ni ezio, meena a banakazi bange, ali azimbulua mu ma liste a luvyalo. Meena a banakazi abanga aziimbulua musita bupyani lububanga bwapeelua kupitila beene. (Mpen 26:33) Kakiine, kuzimbulua kwakue Tamari, Rahabu, ni Rutu kwibeleele. Mu kila aali, muli kintu kimo kya kupapia kilangiliile babo banakazi vibaaizile kwaluka ku liste ya ba bikolue ba mu kizaazi kyakue Masia, Yesu Kristu. (Kut 38; Rut 1:3-5; 4:13-15; Mat 1:1-5) Kuli ni banakazi bange bazimbuilue kabili ku liste ya luvyalo, kwa mufuano mu 1 Milandu ya Nsiku 2:35, 48, 49; 3:1-3, 5.
NSIKU 23-29/01
BUNOONSI KUFUMA MU MULANDU WAKUE LEEZA | 1 MILANDU YA NSIKU 4-6
“Mapepo ane Alangilila Nangue Neene Ndi Muntu wa Siani?”
w10 1/10 lub. 23 lifu. 3-7
“Katuilizia wa Lipepo”
Yabesi, abanga muntu waali watona kupepa. Waatendekele lipepo lyakue na kuloomba Leeza amupaale. Kisia waazimbuile bintu bitatu bilangiliile nangue waali ni kiketekelo kikata.
Kya kuanza, Yabesi waamuloombele Leeza walanda eevi: ‘Tania kazonga kane.’ (Mulongo wa 10) Ozu muntu akindikilue asibanga watona kupoka tuzonga nghuana, tabanga na lwinso ku bintu bya bantu bange. Mu kooko kuloomba kwakue, waali wapoozele saana maano ku bantu apana ku kazonga. Paange waali walomba kazonga kakue kataniiwe mu nzila ya mutende eevi apate fuasi itosiizie ya kunti bantu baye bamupupilamo Leeza wakisinka.
Kya bubili, Yabesi waaloombele “kuboko” kwakue Leeza kuye kwali pamo nakue. Kooko kuboko kwa mufuano, kulangiliile maka akue Leeza, aalia ali wabombia eevi kukwasia bantu bali bamupupa. (1 Milandu ya Nsiku 29:12) Pa kunti bamwasuke mapepo akue a kufuma ku mutima, Yabesi waamuswapiile Leeza olia asili na kuboko kufupi ku bantu baalia bamuketekeele.—Isaya 59:1.
Kya butatu, Yabesi waaloombele walanda eevi: “Nsuunge kufuma ku masaanzo, eevi te kunti andeetele misa.” Paange milandu “te kunti andeetele misa” yalangilila nangue Yabesi waaloombele, te kunti atiine masaanzo, inzi asuungue eevi te kunti akisiiwe ao bintu bibiipile bili kufuma mu bubiifi te kunti bimukite andue kusipikizia maavia.
Lipepo lyakue Yabesi, lyalangilila nangue abanga waemena lupupo lwa kisinka, kiketekelo kyakue, kabili nangue abanga wamuswapiile Katuilizia wa lipepo. Yehova waakitile siani? Leeli lyasi lifupi, lyapeleezia na eezi milandu: “Kupuako, Leeza waamukitiile beelia byaaloombele.”
Bunoonsi bwa Kimupasi
w05 1/10 lub. 9 lifu. 7
Bintu Bikata Bili mu Kitabu kya Milandu ya Nsiku wa Kuanza
5:10, 18-22. Mu nsiku yakue Likolo Sauli, makabila abanga ali ku buala bwa kutula koba kwa mwenzi wa Yordani, aabakandile ao aabomine saana Bahagri anzia kine mpendua ya Bahagri ibanga yavulile mara 2 mu mpendua ya azo makabila. Babo balalume basiizi kutiina, baaviindile kuboma Bahagri paantu, baamuswapiile Yehova kabili baamuloombele abakwasie. Pakaako, tuye twamuswapiile saana Yehova musita utuli mukuluana eezi vita yeetu ya kimupasi na baluani bali batiinia saana.—Baefeso 6:10-17.
NSIKU 30/01–05/02
BUNOONSI KUFUMA MU MULANDU WAKUE LEEZA | 1 MILANDU YA NSIKU 7-9
“Kupitila Kukwasiiwa na Yehova, Kunti Waviinda Kufikilizia Miilo Elia Iumwene Nangue Ikolele”
w05 1/10 lub. 9 lifu. 8
Bintu Bikata Bili mu Kitabu kya Milandu ya Nsiku wa Kuanza
9:26, 27. Balawi bazamu ba ku miliango, baali baswapiilue saana mu miilo ibaali bakita. Baapeelue mafungulo akwizuilako mu seemu itakatiifu ya ku ekalu. Baalangiliile nangue baswapiilue, kupitila kuya baizula miliango kila busiku. Ni fwefue, tulangiliilue nangue tuswapiilue paantu tupeelue miilo ya kubasimikila bantu mu kazonga keetu, ni kubakwasia batendeke kumupupa Yehova. Kakiine, ni fwefue, tupalile kuya twaswapiilue nga Balawi bazamu ba ku miliango!
w11 15/9 lub. 32 lifu. 7
Eba, Kunti Waaluka nga Finehasi Kine Wasaakaana ni Aali Ikolele?
Finehasi waali ni miilo ikata mu Israeli ya kale. Anzia evio, waaviindile kusipikizia maavia, paantu waali ni buviinde bwa kwinika, wakinkimeene, kabili waali wamuswapiile Leeza. Kabili Finehasi baamupaalile kuli Yehova, paantu waikwindile kusuunga kilonghaano kyakue Leeza. Miaka elufu imo (1 000) kisia paapo, Ezra waatunguluilue na mupasi ni kuleemba eevi: “Musita wa kale, Finehasi muana mwina Eleazari i abanga wali ntunguluzi wabo. Yehova waali pamo nakue.” (1 Mil Nsi. 9:20, NWT) Iye yali enka evio ku baalia bali mukuya batungulula bantu bakue Leeza enu nsiku, kabili iye yali enka evio ku Bakristu bonse bali mukuya bamubombela Leeza mu kisinka.
Bunoonsi bwa Kimupasi
w10 15/12 lub. 21 lifu. 6
Mwimbile Yehova!
6 Kakiine, kupitila banabi bakue, Yehova waabalandile babombi bakue baye bamutasia kupitila nghimbo. Mu kabila ya ba makoani i mubanga mwafumine bantu bakwimba. Kabili, babo bakwimba, te baali bapeelue ata miilo yaali yapalile kukita Balawi bange eevi baye bali ni musita wingi wa kutunga nghimbo, kabili paange, eevi baye baibeelezia.—1 Mil Nsi. 9:33.
NSIKU 06-12/02
BUNOONSI KUFUMA MU MULANDU WAKUE LEEZA | 1 MILANDU YA NSIKU 10-12
“Lumia Nkulu Yobe ya Kukita Kutona Kwakue Leeza”
w12 15/11 lub. 6 lifu. 12-13
“Nsambilizie Kukita Kutona Kobe”
12 Daudi waali waapoza maano ku mafunde aswapiile Muzilo. Ni fwefue tupalile kumupala kupitila kuya twali ni nkulu nga yakue ya kuya twakoonkele azo mafunde mu buikazi bwetu. Mona kyaakitikile musita Daudi lwaatonene saana “kumina menda a mu kisima kili peepi ni muliango wa ku Betlehemu.” Balalume batatu bakue Daudi, baaile ni kwingila kwa maka mu muzi wa Bafilisti ni kumuleetela azo menda. Inzi, “Daudi wakeene kuamina, kabili waaetilile ntaanzi yakue Yehova.” Juu ya ki? Daudi waalandile eevi: “Ni kintu kisiviinda kutontonkaniiwa palwane kukita eevi nga Leeza wane vyamwene! Eba, mine milopa ya baaba balalume baabiikanga bukose bwabo mu buavia? Paantu, pa kunti baleete aza menda, baabiikanga bukose bwabo mu buavia.”—1 Mil Nsi. 11:15-19, NWT.
13 Kupitila Muzilo, Daudi waali wamanine nangue milopa ipalile kwitilua ntaanzi yakue Yehova kabili te ipalile kuliiwa. Kabili waali wainikile juu ya ki kipalile kukita evio. Daudi waali wamanine nangue “bukose bwa mubili buli mu milopa.” Inzi, azo abanga ali menda apana milopa. Juu ya ki Daudi waakeene kuamina? Waamwene lifunde lili mu ozo muzilo kuya lyaali lya mana. Kuli Daudi, menda aali a bei nga eveliasie milopa ya baalia balalume batatu. Pakaako, kuli weene kyali kintu kisipalile kumina azo menda. Pali pa kunti amine, waapinguile nangue apalile kwitila azo menda pansi mu bulongo.—Bal. 17:11, NWT; Mal Miz. 12:23, 24.
w18.06 lub. 17 lifu. 5-6
Lekelela Mizilo ni Mafunde Akue Leeza Bibeelezie Kampingu Kobe
5 Kine tutonene mizilo yakue Leeza itukwasie, tupalile kukita bingi kulikosie kuisoma ao kuya twamanine bintu bingi bili mu ezio mizilo. Tupalile kuitona ni kuikindika. Bibilia ili yalanda eevi: “Suula bintu bibiipile, kabili tona bintu biweeme.” (Amosi 5:15) Inzi, kunti twaviinda siani kakiine kukita evio? Kumona bintu nga evelia Yehova vyali wabimona, i kintu kili kutukwasia. Kwa mufuano: Tontonkania kuya wali ni buavia bwa kwandua koona buino. Munghanga obe wakulanda eevi: upalile kuya walia byakulia bya kukuula mubili, waibeelezia mubili, ni kwalululako nzila yobe ya buikazi. Kisia kukoonka azo masoke, wamona aali yobe yawaama! Paange kunti wamutasia saana munghanga obe paantu wakikukwasia uye wali ni buikazi buweeme.
6 Enka evio, Kabumba weetu waatupeele mizilo elia ili yatupususia mu maavia ali aleetua na lizaambi, kabili ili yawaamia buikazi bwetu. Tontonkania mpaalo ituli twapata kine twakoonka mizilo ili mu Bibilia ilandiile palua kubeepa, kupaangilana mipaango ibiipile, kwiba, bulalelaale ao bukambue, mazibo ni bintu bya mipasi. (Soma Tuswalo ni Mafunde 6:16-19; Nfy. 21:8) Lutuli twaimwena mpaalo ingi musita utuli twakita bintu nga mutoneene Yehova, mutima weetu uli wakila kumutona ni kumutasia Yehova pamo ni mizilo yakue.
Bunoonsi bwa Kimupasi
it-1-F lub. 492 lifu. 2-3
Mutima
Kubomba na “Mutima Wakumeene.” Mu kisinka, mutima wa kimubili upalile kuya wakwateene i kunti ubombe buino, inzi mutima wa mufuano kunti waya wakasanikile. Daudi waapepele eevi: “Kwatania mutima wane.” Keekio kyalangilila nangue mutima wa muntu kunti waya wakasanikile kukoonkana ni beelia byali watona ao byali watiina. (Malum 86:11) Muntu wa evio, kunti waya wali ni “mutima usikumeene”, i kulanda nangue wamubombela Leeza wanuaminiine. (Malum 119:113; Nfy 3:16) Kabili, muntu kunti waya wali ni “mitima ibili” (mu mulandu kwa mulandu, wali ni mutima ni mutima), waezia kubombela bamulopue babili, ao wali mukulanda bufi kintu kimo eevi ni kooku wali mukutontonkaniasie kinge. (1Mil Nsi 12:33; Malum 12:2, NWT, bulondolozi bwa pensina) Yesu waakaniizie saana bukankobenkania ao bunafiki bwa baalia bali ni mutima ukasanikile.—Mat 15:7, 8.
Muntu olia onse atonene kumusaansamusia Leeza, tapalile kuya wali na mutima usikumeene ao wali na mitima ibili, inzi apalile kumubombela na mutima ukumeene. (1 Mil Nsi. 28:9) Ni pa kunti muntu aviinde kukita evio, iloombele kukita saana maka paantu mutima uli wabeepana kabili tewizi kukwatika. (Yer 17:9, 10; Kut 8:21) Eevi tutwalilile kuya twali ni mutima ukumeene, tupalile: kupepa mu kisinka (Malum 119:145; Lwi Mal 3:41), kusambilila kila busiku Mulandu Wakue Leeza (Ezr 7:10; Tus Maf 15:28), kubomba kwa mute miilo ya kusimikila mpunda iweeme (mona Yer 20:9), ni kukita bukibuza pamo ni bantu bange baalia bali ni mutima ukumeene kuli Yehova.—Mona 2Mak 10:15, 16.
NSIKU 13-19/02
BUNOONSI KUFUMA MU MULANDU WAKUE LEEZA | 1 MILANDU YA NSIKU 13-16
“Kukoonka Malaizio Kuli Kwaleeta Mpaalo”
w03 1/5 lub. 10 lifu. 12
Eba, Uli Waiipuzia, “Yehova Ali Kupi?”
12 Kisia kisanduku kya bulayo kubueziiwa ku Baisraeli ni kukita miaka ingi kyali ku muzi wa Kiriat-yearimu, Likolo Daudi waatonene kukitwala ku Yerusalemu. Waalondoluele ni bakulu ba bantu walanda nangue, Kisanduku kipalile kukuusiiwa ‘kine bamona kyalisie buino kukita evio, kabili kine Yehova waali waitabiziizie.’ Inzi waapuuluile kukebulula saana eevi amane buino Yehova vyatonene palua kukuusia. Kabenge waakebuluile, nga Kisanduku te kyatwemue ata kaniini ku kityakala. Inga kyaatwemue pa bikoope na Balawi Bakohati kukoonkana ni malaizio akue Leeza. Ntaanzi ya paapo, Daudi waali wazoweye kumwipuzia Yehova, inzi ozu musita waandua kukita evio. Byaafumiinemo, byaali byabiipile saana. Kisia paapo, Daudi wainikile ni kulanda eevi: “Yehova Leeza weetu watulapizia paantu te twakimukeba kukoonkana ni kabeelela.”—1 Milandu ya Nsiku 13:1-3, NWT; 15:11-13, NWT; Mpendua 4:4-6, 15; 7:1-9.
w03 1/5 lub. 11 lifu. 13
Eba, Uli Waiipuzia, “Yehova Ali Kupi?”
13 Kupuako, musita Kisanduku lukyatwemue na Balawi bakifumia ku nsesi yakue Obed-edomu bakitwala ku Yerusalemu, paaimbilue ni lwimbo lwaatungilue kuli Daudi. Mu loolo lwimbo, mubanga eezi milandu ya kulangulusia ifumine ku mutima: “Mukebe Yehova pamo ni maka akue, kebe lukebu lwakue bila kulekela. Languluke bikitua byakue bya kupapia beelia byakitile, bimpezia maano byakue ni bupinguzi bufumine mu kanua kakue.”—1 Milandu ya Nsiku 16:11, 12, NWT.
Bunoonsi bwa Kimupasi
w14 15/1 lub. 11 lifu. 14
Tumupupe Yehova, Likolo wa Muyayaya
14 Daudi waakusiizie kisanduku kitakatiifu kya bulayo ku Yerusalemu. Mu keekio kipindi kya nsaansa, Balawi baaimbile lwimbo lwakutasia lulimo eezi milandu ya mana saana ili mu 1 Milandu ya Nsiku 16:31 (NWT): “Punde eevi pakati ka bantu: ‘Yehova waaluka Likolo!’” Unge kunti waiipuzia eevi: ‘Eba, ale Yehova vyali Likolo wa muyayaya, waalukile siani Likolo mu ozo musita?’ Yehova ali waaluka Likolo musita lwali wabombia buviinde bwakue ao lwali wasaakula muntu umo eevi, eevi aye wali mukenzi wakue ao akwasie mu aali imo iibeleele imanikile buino. Kakiine, nzila ya kuteeka yakue Yehova, ili ni mana ikata saana. Ntaanzi Daudi afue, Yehova waamulaile nangue bukolo bwakue, bwakaba kutwalilila mpaka muyayaya. Waamulaile eevi: “Nakaba kulendula luvyalo lobe kisia weewe, muana obe wa kwivyalila, kabili nakaba kwimika sinta bukolo bobe.” (2 Sam. 7:12, 13, NWT) Kupuako, loolu ‘luvyalo’ lwakue Daudi, lwaaizile kumoneka miaka ikilile pa elufu imo (1 000) eevi kisia paapo. Naani waaizile kwaluka loolo luvyalo, kabili waalukile Likolo musita ki?
NSIKU 20-26/02
BUNOONSI KUFUMA MU MULANDU WAKUE LEEZA | 1 MILANDU YA NSIKU 17-19
“Suunga Nsaansa Yobe Anzia Kutioka Mutima”
w06 15/7 lub. 19 lifu. 1
Pooza Maano ku Buwaame Buli mu Kuteania Kwakue Yehova
DAUDI wa mu Israeli ya kale, ni muntu umo alondolwelue saana mu Maleembo a Kiebrania. Ozo musuungi, waimba nghimbo, kabika kabili likolo, waali wamuswapiile saana Yehova Leeza. Bukibuza bukata bwakue Daudi pamo ni Yehova, bwaamusonseziizie aaluke ni nkulu ya kumwimikila Leeza nsesi. Ezio nsesi ao ekalu yaatengele kwimika, yaali ya kunti yaaluke kitente kya lupupo lwa kisinka mu kyalo kya Israeli. Daudi waali wamanine nangue mipaango ya kwimika ekalu, yakaba kubaleetela mpaalo ni nsaansa bantu bakue Leeza. Pakaako, Daudi waaimbile eevi: “Ali ni nsaansa ni muntu uwasaakula [Yehova] ni kumupalamika eevi ekale mu misolo yobe. Kakiine, twakaba kutantuka buwaame buli mu nsesi yobe, mu fuasi itakatiifu ya ekalu yobe.”—Malumbo 65:4, NWT.
Sekelela Bintu Byuli Kuviinda Kumukitila Yehova
11 Ni fwefue kunti twakizia nsaansa yeetu, kupitila kwipeela saana mu bintu byonse bituloombelue kukita mu miilo yakue Yehova. ‘Iipeele’ mu miilo ya kusimikila, kabili bomba kwa mute pamo ni kilonghaano. (Miil Bat. 18:5, NWT; Baeb. 10:24, 25) Uye wateania buino kulonghaana eevi uye waleeta byasuko bili byakuula. Twama wapoozeleko maano kiputulua kyonse kya musambi kibali kukupeela kya kupisia ku kulonghaana kwa mukati ka mulungu. Kine bakupeela miilo ya kubomba mu kilonghaano, bomba pa musita kabili bomba buino miilo ezio. Apana kutontonkania nangue miilo yuli nayo te ya mana kabili nangue te upalile kuzeezia nsita yobe wabomba ezio miilo. Kita maka eevi ukile kwaluka ni bufundi mu miilo yobe. (Tus Maf. 22:29) Kine uli waipeela saana mu bintu bya kimupasi ni mu miilo yupeelue, wakaba kukita buyantanzi bila kukokola, kabili nsaansa yobe yakaba kukila kuvula. (Bag. 6:4) Kabili, wakaba kumona kyaleengelesie kusekelela pamo ni bange, kine bapeelua miilo iwakiba watonene kupeelua.—Bar. 12:15; Bag. 5:26.
Bunoonsi bwa Kimupasi
w20.02 lub. 12, kisanduku
Tumutonene Saana Yehova, Baba Weetu
Ozu Yehova, Amwene ni Neene?
Eba, waaeziizie kale kwiipuzia eevi: ‘Yehova amwene ni neene mu aza mamilioni a bantu bonse bekeele pa kyalo?’ Kine waaeziizie kale, kuli ni bantu bengi baweeme baaiipuziizie keekio kyenka kiipuzio. Likolo Daudi waaleembele eevi: “We Yehova, muntu ni kiki eevi umuinike, muana mwina muntu ali wafua ni kiki eevi umupoozeko maano?” (Malum. 144:3, NWT) Daudi waali wasininkiziizie nangue Yehova waali wamumanine buino. (1 Mil Nsi. 17:16-18) Kabili kupitila Mulandu wakue ni kuteania kwakue, Yehova wakusininkiziizia nangue ali mukumona ntono yuli mukulangilila palwakue. Mona milandu paleepale ili mu Mulandu Wakue Leeza ili kuviinda kukukwasia uye wasininkiziizie evio:
• Yehova waakumwene atasie ntaanzi teunavyalue.—Malum. 139:16.
• Yehova amanine bili ku mutima obe, beelia biuli watontonkania kabili ni viuli waiunvua.—1 Mil Nsi. 28:9.
• Yehova muine ali watuilizia mapepo obe onse.—Malum. 65:2.
• Bikitua byobe bili byamulengia Yehova eyunvue buino ao abe.—Tus Maf. 27:11.
• Yehova muine waakukuliile kuli weene.—Yoane 6:44.
• Kine weewe wafua, Yehova akumanine buino saana, ni pakaako wakaba kuviinda kukutuntumuna. Waakaba kubumba kupia mubili obe ni kukubueziizia kupia maano obe pamo ni buviinde bobe bwa kulanguluka ni aali inge ibeleele ya bumuntu bobe.—Yoane 11:21-26, 39-44; Miilo 24:15.
NSIKU 27/02–05/03
BUNOONSI KUFUMA MU MULANDU WAKUE LEEZA | 1 MILANDU YA NSIKU 20-22
“Bakwasie Balumendo ni Bakaziana Eevi Bakite Buyantanzi”
w17.01 lub. 29 lifu. 8
“Beebi Bintu Bapeele Balalume ba Kisinka”
8 Soma 1 Milandu ya Nsiku 22:5. Daudi nga waapinguile nangue Sulemani taviinda kwimanina miilo ya mana nga ezio. Ekalu, yaali yapalile kuya “yapelelepo kufuanina,” ni mu ozo musita, Sulemani abanga wakilisie “mulumendo kabili bila wali na kibeelezio.” Inzi, Daudi waamanine nangue Yehova wakaba kumukwasia Sulemani akabe kuviinda kubomba miilo ibeleele ibaamupeele. Pakaako, Daudi waakitile maka akue onse eevi kumukwasia kuteania biombo bya kubombelako ezio miilo ikata saana.
w17.01 lub. 29 lifu. 7
“Beebi Bintu Bapeele Balalume ba Kisinka”
7 Daudi waali watonene saana kumukuulila Yehova ekalu, pakaako waali wapalile kutioka saana mutima. Inzi waatwaliliile kukwasia saana ezio miilo yaali yakutungululua na muana wakue Sulemani. Daudi waakwasiizie kupaanga babombi ni kukolonghania byuma, mikuba, nfalanga, oro ni mbao. Kumana olia waali wapalile kupeelua bulumba juu ya kukuula ekalu elia yaaizile kukuutua ekalu yakue Sulemani, te kwaamwemiizie. Inzi, waamukoseleziizie Sulemani wamulanda eevi: “Pakaako, we muana waane, Yehova aye wali pamo ni weewe, kabili uviinde miilo ni kukuula nsesi yakue Yehova, nga evelia vyakilanda pa lobe.”—1 Mil Nsi. 22:11, 14-16, NWT.
w18.03 lub. 11-12 lifu. 14-15
Baviazi, Bakwasie Baana Benu Bakite Buyantanzi ni Kufikiila Kubatiziiwa
14 Paantu bakote ba kilonghaano ni basuungi ba kimupasi, kunti babakwasia baviazi kupitila kulanda bintu biweeme palua mipaango iweeme ya kimupasi. Nkazi umo, waakitile miaka ikilile pa makumi saba (70) wabomba miilo ya bupainia. Musita lwabanga wali na miaka sita, waakitile bulondolozi bumo pamo ni Lupua Charles T. Russell. Abanga walanguluka bobo bulondolozi vibwamukwasiizie. Walanda eevi: “Waakitile dakika likumi na isano (15) wali mukulondolola pamo ni neene juu ya mipaango yane ya kimupasi.” Kakiine milandu iweeme kabili ya kukoselezia, kunti yamukwasia muntu musita waleepele. (Tus Maf. 25:11) Bakote ni beene, kunti bapaanga eevi baviazi pamo ni baana babo bakwasieko kubomba miilo paleepale ku Nsesi ya Bukolo. Kunti bakita evio kupitila kubapeela balumendo ni bakaziana miilo ya kunti bakite kukoonkana ni miaka yabo ni buviinde bwabo.
15 Balupua ni bankazi ba mu kilonghaano, kunti babakwasia balumendo ni bakaziana bakite buyantanzi, kupitila kubalangilila nangue bamupoozeleko saana maano kila umo wabo. Pa kunti tuviinde kukita evio, iloombele kuya twali menso eevi tumone bintu bibali mukukita bilangiliile buyantanzi bwabo bwa kimupasi. Eba, mulumendo ao mukaziana ali waleeta byasuko bifumine ku mutima, bya kukoselezia ao ali wapisia kiputulua ku kulonghaana kwa mu katikati ka mulungu? Eba, musita kiketekelo kyakue lukyakyeziiwa, waakiisampulula? Ao eba, ali wakebako ni fuasi ya kunti abasimikileko bange ku masomo? Uye waleengele kumutasia kakiine. Wamona siani kine waiibiikila mupaango wa kulanda ni mulumendo ao mukaziana umo ntaanzi ao kisia kulonghaana, ni kumulangilila nangue umupoozeleko saana maano? Kine twakita evio ao mu nzila ingeko, bamisepuka bali kwinika nangue ni bene, ni seemu ya “kilonghaano kikata.”—Malum. 35:18, NWT.
Bunoonsi bwa Kimupasi
w05 1/10 lub. 11 lifu. 6
Bintu Bikata Bili mu Kitabu kya Milandu ya Nsiku wa Kuanza
21:13-15. Yehova waamulandile malaika abanga waleeta buinooni, alekele, paantu Ali wakisua lwali wamona bantu Bakue bali mukwema. Kakiine “luse lwakue ni luvulile saana.”
Lyasi: Mwe Balumendo ni Bakaziana, Kite Buyantanzi Mufikiile Kubatiziiwa
w16.03 lub. 14-16 lifu. 10-15
Mwe Bamisepuka, Kunti Mwaiteania Siani Eevi Mufikiile Kubatiziiwa?
10 Bibilia ili yalanda eevi: ‘Eevi i vili ni kiketekelo: Kine kilisie bunke bila bikitua, kifuile.’ (Yak. 2:17, Le Nouveau Testament en langue Kitaabua) Kine uli ni kiketekelo kyalumine, keekio kili kumoneka kupitila bikitua byobe. Uli kutendeka kukita beelia bili byalanda Bibilia nangue “bikitua bya lwendo lutakatiifu ni bikitua bya kwipeela kuli Leeza.”—Soma 2 Petro 3:11, NWT.
11 “Bikitua bya lwendo lutakatiifu” ni biki? Kine bikitua byobe ni bitakatiifu, lwendo lobe luli kuya lwaweeme. Kwa mufuano, tontonkania miezi sita yakipita. Musita luwakyeziiwa ukite kibiipile, eba, wakitontonkania saana eevi kupusania kiweeme ni kibiipile? (Baeb. 5:14) Eba, walanguluka musita uwaakeene kwilekelela uponene mu buezio ao luwaakeene kukita kibiipile anzia kupatikiziiwa na bamisepuka nobe? Eba, ku masomo uli mufuano uweeme ku bange? Eba, uli watwalilila kuya wali wa kisinka kuli Yehova, ao uli waezia kukita nga banafunzi benoobe eevi apana bakuseke? (1 Pet. 4:3, 4) Kakiine te kuli muntu apuililikile. Musita unge, atasie baalia bakita kale miaka ingi bamubombela Yehova, kunti baunvua busoni ni kumona kyakolele kubasimikilako bange. Inzi, muntu olia epeele kuli Leeza, ali kuya waitaanka ao waitoneena paantu ni Kasininkizia Wakue Yehova, kabili ali kulangilila nangue ali waitoneena, kupitila lwendo lwakue luweeme.
12 “Bikitua bya kwipeela kuli Leeza” ni biki? Bebio bikitua, bibiikile mukati miilo ya mu kilonghaano, nga evelia kuya ku kulonghaana ni kusimikila. Inzi kabili, bibiikile mukati kukita bintu beelia bisiviinda kumonua na bange, nga evelia kupepa kuli Yehova, ni kukita lisambililo lya pa bunke. Muntu olia waipeele buikazi bwakue kuli Yehova, taviinda kumona nangue ezio miilo ni kifunda kikata. Inzi, ali kwiunvua nga vyaiunvuile Likolo Daudi, waalandile eevi: “Kukita kutona kobe, i nsaansa yane, We Leeza wane, ni muzilo obe wingiile saana mukati mwane.”—Malum. 40:8, NWT.
13 Eevi kukukwasia wibiikile mipaango, ku lubali lwa 308 ni 309 lwa kitabu Biipuzio Bili Byaipuziiwa na Bamisepuka— Byasuko Bili Byabomba, Libuku lya 2, kya Kiswahili, kubiikilue ni devuara ao bintu bya kunti ukite. Pa ezio devuara, kunti waleembapo byasuko byobe bya biipuzio nga beebi: “Uli wazimbula bintu bimanikile buino mu mapepo obe, kabili mapepo obe, ali alangilila ki palua ntono yobe kuli Yehova?” “Mu lisambililo lyobe lya pa bunke, uli wasambililamo ki?” “Eba, uli waya mu kusimikila atasie kine baviazi bobe te bailemo?” Pa ezio devuara, pali ni fuasi ya kunti uleembepo mipaango yobe iuli kutona kwibiikila palua mapepo obe, lisambililo lya pa bunke, ni miilo ya kusimikila.
14 Bamisepuka bengi baalia batonene kubatiziiwa, bali bamona nangue ezio devuara ni kiombo kyaweeme. Nkazi umo mukaziana ali wakuutua Tilda, walanda eevi: “Liingi naali nabombia ezio devuara eevi kwibiikila mipaango. Naatendekele kufikilizia mupaango umo-umo, kupuako naafikiliziizie mipaango yonse, ni muaka umo kisia paapo, naali naiteaniizie eevi kubatiziiwa.” Lupua umo mulumendo ali wakuutua Patrick, ni weene waanoonkeelemo. Walanda eevi: “Naali namanine buino mipaango yane. Inzi, kuileemba kwaankwasiizie mbombe na maka saana eevi kuifikiila.”
15 Pakati ka biipuzio bili pa ezio devuara, kimo kilandile eevi: “Eba, wakaba kumubombela Yehova anzia kine baviazi bobe, ao benoobe balekela kumubombela? Kine waipeela kuli Yehova mu buikazi bobe ni kubatiziiwa, uli kwaluka ni bukibuza bobe bunke pamo nakue. Pakaako, te upalile kutintua na baviazi bobe ao muntu yeyonse, eevi umubombele Yehova. Bikitua bya lwendo lutakatiifu pamo ni bikitua bya kwipeela kuli Leeza, bili kulangilila nangue usininkiziizie kakiine nangue uli mu diini ya kisinka, kabili utonene kukoonka mafunde akue Leeza, kabili nangue witeaniizie palua kubatiziiwa.
Lyasi:Mukwasie Musambi obe wa Bibilia Abombie Beelia Byali mu Kusambilila
Bakwasie Basambi Bobe ba Bibilia Bafikiile Kubatiziiwa
3 Ntaanzi ya kubatiziiwa, musambi wa Bibilia apalile kubombia beelia byali mukusambilila mu Bibilia. (Soma Mateo 28:19, 20*.) Kine musambi wa Bibilia ali mukubombia beelia byali mukusambilila ali kwaluka nga “muntu wa maano” azimbuilue mu mufuano wakue Yesu, waaimbile kapato eevi emike nsesi pa lyalaala ao pa libue. (Mat. 7:24, 25; Luk. 6:47, 48) Kunti twamukwasia siani musambi aye wabombia beelia byali mukusambilila? Kansi, tumone bintu bitatu bituli kuviinda kukita.
4 Mukwasie musambi obe ebiikile mipaango. Juu ya ki upalile kukita evio? Mona ozu mufuano: Kine uli wakukita bulendo buleepele, kunti wapingula kuya watuuzia mu nkeende paleepale iweeme. Kine wakita evio, teumona bulendo kuya bwakolele saana. Evio vyenka, kine musambi wa Bibilia ali waibiikila mipaango ya musita uniini ni kuifikilizia, ali kufikiila kumona nangue kunti waviinda kufikilizia mupaango wakue wa kubatiziiwa. Bombia kisanduku kilandile nangue, “Ezianke Kukita Eevi” kili mu kitabu Sekelela Buikazi Loonse! eevi umukwasie musambi obe kukita buyantanzi. Ku mpela ya kila lisomo, londolola pamo ni musambi obe eevi amane kwibiikila mupaango vikuli kumukwasia abombie beelia byali mukusambilila. Kine ukebele musambi obe afikilizie mupaango unge, leemba mupaango ozo pa nkeende ilandile nangue, “Paangako ni Kange.” Lingi, uye wabombia nkeende eezi yakue musambi eevi kubweluluka pamo nakue palua mipaango yakue ya musita uniini ni ya musita uleepele.
Mukwasie Musambi obe Ebiikile Mipaango ni Kuifikilizia
1. Londolola pamo ni musambi obe palua mipaango yali kuviinda kwibiikila
2. Mukwasie amane vya kukita eevi aviinde kufikilizia mipaango yakue
3. Lingi, uye wamutasia palua buyantanzi bwali mukukita
5 Mukwasie musambi obe aalulule buikazi bwakue. (Soma Marko 10:17-22.) Yesu waali wamanine nangue kikolele ku muntu munoonsi kwitabila kusisia bintu byakue byonse. (Mark. 10:23) Inzi, Yesu waamulandile muntu umo akite bobo bupilibuko bwaviizie mu buikazi bwakue. Juu ya ki? Paantu Yesu waali wamutonene. Nsita inge, kunti twaandua kumukinkizia musambi abombie beelia byali mukusambilila, paantu tumwene nangue tanaiteanie eevi kukita buyantanzi bupalile. Kunti kyatwama musita waleepele eevi bantu balekele mibeele ya kale ni kuvuala bumuntu bwa leenu. (Bakol. 3:9, 10) Inzi, kine wakita lubilo kulondolola nakue bila kumufiika palua kukita bupilibuko, musambi obe takaba kukokola kutendeka kukita bupilibuko. Kine walondolola nakue evio, wamulangilila nangue wamwemena.—Malum. 141:5; Tus Maf. 27:17.
6 Kiipuzio kya kukwasia kumana malanga a muntu, i kiipuzio kituli twamwipuzia musambi eevi tumane bintu byali mukutontonkania, ao malanga akue palua lyasi lituli mukulondoluela. Bombia biipuzio bya ozo musango, eevi umane kine musambi obe waunvua siani, ao kine wazumina beelia byuli mukusambilila pamo nakue. Lingi kine uli wakita evio, kunti wamona kyaleengele kulondolola pamo nakue bintu byumwene nangue, paange musambi kunti wamona byakolele kuzumina. Kitabu Sekelela Buikazi Loonse! kilimo biipuzio bingi byakukwasia kumana malanga a muntu. Kwa mufuano, mu lisomo lya 04 muli kiipuzio keeki: “Tontonkanianke, ati kine weewe wabombia liina lyakue, Yehova ali kwiunvua siani?” Mu lisomo lya 09 muli kiipuzio keeki: “Ni bintu ki paleepale byuli kutona kubiika mu lipepo lyobe?” Ku ntendeko, musambi obe kunti wamona kyakolele kwasuka ku bebio biipuzio. Kunti wamukwasia kupitila kumubeelezia aye watontonkania palua maleembo ni ma foto ali mu kitabu.
7 Musita musambi lwainika beelia byapalile kukita, bombia bintu bya kisinka byaaimweneene bantu mu buikazi bwabo, eevi kumusonsezia ni weene akite keelia kyapalile kukita. Kwa mufuano, kine musambi obe amwene kyakolele kuiza ku kulonghaana, mulangilile viideo ilandile nangue Yehova Waangemeene ili mu seemu ilandile nangue “Manako ni Binge” ya mu lisomo lya 14. Mu masomo engi ali mu kitabu Sekelela Buikazi Loonse! wakaba kusaanga bintu bya evio byaaimweneene bange, bili mu seemu ilandile “Tukebe Saana” ao mu seemu ilandile “Manako ni Binge.”* Uye wakengeele, te kumupalania musambi obe na muntu unge kupitila kumulanda eevi: “Paantu weene waaviindile kukita eevi, ni weewe wakaba kuviinda.” Mulekele musambi obe epinguile ye muine. Kuliko kukita evio, langilila bintu bikata byaamukwasiizie ozo muntu ali mu viideo eevi abombie masambilizio a Bibilia. Paange kunti wakonkomena lileembo lya mana ao kintu kya mana kyaakitikile. Kine fuasi yamoneka, konkomena saana Yehova vyaamukwasiizie ozo muntu.
8 Mukwasie musambi obe afikiile kumutona Yehova. Kumukwasia siani? Keba mu nkeende mupalile kumukwasia musambi obe eevi asambilile palua mibeele yakue Yehova. Mukwasie musambi obe amumone Yehova kuya wali Leeza wansaansa kabili ali wakwasia baalia bamutonene. (1 Tim. 1:11; Baeb. 11:6) Mulangilile musambi obe nangue wakaba kunoonkelamo kine wabombia beelia byali mukusambilila. Kabili mubuile nangue kunoonkelamo kooko, kulangiliile nangue Yehova amutonene. (Is. 48:17, 18) Kine musambi obe wakila kukosia ntono yakue kuli Yehova, keekio kyakaba kumukinkizia saana kukita bupilibuko bupalile.—1 Yoan. 5:3.
Lyasi: “Ntono Yakue Kristu I Ili Yatukinkizia”
w16.01 lub 10-11 lifu. 7-10
Lekelela ‘Kyabupe Kyakue Leeza Kisili na Kipimo’ Kikusonsezie
7 Kya kuanza, tupalile kusonseziiwa kubombia buikazi bwetu eevi tulangilile nangue tumukindikile Yesu. Mutumua Paulo waalandile eevi: ‘Ntono yakue Kristu i ili yatukinkizia.’ (Soma 2 Bakorinto 5:14, 15, Le Nouveau Testament en langue Kitaabua.) Mutumua Paulo, waali wamanine nangue kine twaitabizia ntono ikata yakue Yesu, tuli kukinkiziiwa ao kusonseziiwa kumutona ni kumukindika. Kakiine, kine twainika buino bintu bili byatukitila Yehova, ntono yakue ili kutusonsezia twikale buikazi bulangiliile nangue tumukindikile Yesu. Kunti twakita siani evio?
8 Kumutona Yehova, kuli kwatukinkizia kupala mufuano wakue Kristu, ni kukoonka mu peepi ntanfu yakue. (1 Petro 2:21; 1 Yoane 2:6) Musita utuli twamukindika Leeza ni Kristu, tuli twalangilila nangue tubatonene. Yesu waalandile eevi: ‘Muntu ali wapokelela mulao wane ni kuunakila, weene i antonene. Muntu antonene, Tawe ao Baba wane ali kumutona, kabili neene ndi kumutona ni kwilangisia kuli weene.’—Yoane 14:21, Le Nouveau Testament en langue Kitaabua; 1 Yoane 5:3.
9 Mu enu milungu ya mu kipindi kya Kibukisio, kili buino kutontonkania saana vituli kubombia buikazi bwetu. Pakaako, iipuzie eevi: ‘Eba, ni bintu ki bindi nakita eevi kulangilila nangue ndi mukukoonka mufuano wakue Yesu? Ni bintu ki bimpalile kuwaamia eevi kukita buyantanzi?’ Kili buino kwiipuzia fwe beene beebi biipuzio, paantu bantu ba mu kyalo batonene tukoonke mibeele yabo ya buikazi. (Baroma 12:2) Kine te tukengeele, tuli kusonseziiwa ni kutendeka kukoonka mifuano ya balimu, basaapi ba misaapo, ni bantu bamanikile saana mu keeno kyalo. (Bakolosai 2:8; 1 Yoane 2:15-17) Kunti twakita siani eevi tutiine ozo muteo?
10 Mu enu milungu ya mu kipindi kya Kibukisio, kili buino kukwata musita wa kutoosia maubo etu, ma viideo, miziki, ni bintu bitubiikile mu ordinatere, telefone, ao tablete yeetu. Iipuzie eevi: ‘Ibenge Yesu waali paanu kusiali wamona navuele eevi, eba, ali kuuzika?’ (Soma 1 Timoteo 2:9, 10.) ‘Eba, maubo ane alangiliile nangue ndi musambi wakue Kristu? Eba, Yesu kunti watona kumona aza ma viideo andi namona? Eba, kunti watuilizia miziki elia indi natona? Kine Yesu watwama telefone ao tablete yane, eba, ndi kunvua busoni? Eba, ndi kumona kyakolele kumubuila Yesu juu ya ki ndi natona kusaapa eezi misaapo ya viideo?’ Kumutona Yehova, kupalile kutukinkizia kupooza kule kila kintu kimwenekele nangue te kipalile ku Mukristu, atasie kine twakikisita mu bei ikata. (Miilo ya Batumua 19:19, 20) Musita utwaipeele kuli Yehova, twaamulaile nangue twakaba kubombia buikazi bwetu eevi kumukindika Kristu. Pakaako, tupalile kulekela kakiine kila kintu kili kulengia kiye kyakolele kuli fwefue kukoonka mufuano wakue Yesu.—Mateo 5:29, 30; Bafilipi 4:8.