Hulda Waafikiliziizie Mupaango Wakue

KINE weewe waaendeele kale mu kilila kiniini kya Sangir Besar, mu kyalo kya Indonesia, mu miaka yaapitile, paange waamwene bankazi batatu Bakristu ku musenga. Babo bankazi bamaninue buino mu keekio kilila paantu baali babomba miilo ya kusimikila, i kulanda, kukwasia bantu bonvue masambilizio a Bibilia. Inzi, ozo musita babanga bakita miilo inge.

Kya kuanza, baali baingila mu lyezi, ni kutwama mabue afinine. Kisia, baali batwala azo mabue ku musenga Mabue amo abanga atanine nga kabumbu. Kisia, babo bankazi babanga baikala pa bitebe bya mbao ni kubombia marto eevi kutoota azo mabue mpaka aaluka tumabue tuniini tusifikile mu bukata bwa liyai lya nkoko. Kisia paapo, babanga babiika tooto tumabue mu mabuumba a plastike ni kupiluka nao mpaka pa fuasi pa baali baikala. Kupuako, babanga batwama azo mabue ni kualonga mu bifunda bikata bya kupakiziiwa mu miotoka ikata. Kabili, azo mabue abanga abombiiwa eevi kuwaamia misebo.

Umo pakati ka babo bankazi, liina lyakue ni Hulda. Kukoonkana ni aali yakue, weene abanga wapisia musita waleepele wali mukubomba ezio miilo kuliko benakue. Lyonse abanga wabombia nfalanga yonse yabanga wapata eevi kubasitila bantu ba mu lupua lwakue bintu bya mu buikazi bibaali bakabiile kila busiku. Inzi ozo musita, waatendekele kusuunga nfalanga inge eevi afikilizie mupaango wakue. Abanga watonene kupata tablete eevi aviinde kubombia JW Library. Hulda abanga wamanine nangue ma viideo pamo ni seemu inge ili mu JW Library bili kuviinda kumukwasia kubasimikila bange, kusambilila ni kunvua Bibilia.

Hulda waakitile muezi umo ni nusu wabomba nsa ibili kila lukele-keele. Abanga watoota mabue ni kukumania kifunda kya kupakizia mu motoka. Kupuako, waakumaniizie nfalanga ya kusita tablete.

Hulda waalandile eevi: “Anzia kine naali natoopa, ni kukisika juu ya ezio miilo ya kutoota mabue, nsyaakokuele kulaba ezio misa musita lunatendekele kubombia ezio tablete paantu yankwasiizie kukila kuwaamia nzila yane ya kusimikila, kabili yaankwasiizie kuya nateania kulonghaana nalengeelue.” Kabili walanda nangue tablete yaamukwasiizie ku ntendeko ya buluele bwa korona paantu miilo yonse ya mu kilonghaano ibanga yakitua kupitila biombo bya kielektronike. Tuli mukusekelela pamo ni Hulda paantu waafikiliziizie mupaango wakue.