Biipuzio Kufuma ku Bakabeleenga

Musita Sataana lwaamulandile Eva nangue takaba kufua kine walia ku kimuti kya kumana kiweeme ni kibiipile, eba, waali waingizia mu maano akue malanga ali na bantu bengi leenu a kusifua kwa bukose?

Paange ata. Kibanda taamwanine Eva nangue kine walia lizabo lyaakaniizie Leeza, wakafuakosie mubili, inzi seemu ya mubili wakue isiizi kumoneka (keelia kimwenue leelo na bange nga kusifua kwa bukose) yakatwalilila kuya yakosele ku fuasi inge. Lwaali walanda kupitila kizoka, Sataana walandile nangue kine Eva walia lizabo lya ku keelia kimuti, ‘kakiine takafua’ ata kaniini. Sataana waali wakeba kulanda nangue Eva wakatwalilila kuya wakosele ni kusekelela buikazi buweeme pa kyalo, bila kutungululua na Leeza.​—Kut. 2:17; 3:3-5.

Kine lisambilizio lya bufi lili lyasambiliziiwa leenu lya kusifua kwa bukose te lyaatendekeele mu Edeni, eba, ale lyatendekele musita ki? Te tuviinda kulanda twasininkiziizie. Tumanine nangue lupupo loonse lwa bufi lwainoonenue musita wa Kibunda kya mu nsiku yakue Noa. Te kuli malanga a bufi a kidiini aapusukile ku Kibunda, paantu Noa ni lupua lwakuesie​—baali bapupa mu kisinka​—i baapusukile.

Kansi lisambilizio limanikile lya kusifua kwa bukose bwa muntu kipalile lyaatendekele kisia Kibunda. Musita Leeza lwaavulunghaniizie ndimi ku Babeli, bantu baasalangheene “mwaya kyalo kyonse,” bila kutwisika, baaile baali ni malanga a kusifua kwa bukose. (Kut. 11:8, 9) Anzia kine te tumanine buino musita watendekele malanga azo a bufi, kunti twaya twali ni kisininkizio nangue “baba wa bufi,” Sataana Kibanda waali wafyeme ku nyuma ya azo malanga kabili wasekeleele kumona asalanghana mu nkeende yonse.​—Yoan. 8:44.