Eba, Weewe Witeaniizie juu ya ‘Kupyana Kyalo’?

FWE bonse tupembeele kwa nkulu eevi bulayo bwakue Yesu bufikiliziiwe. Bobo bulayo bulandile eevi: “Bali ni nsaansa, ni baalia bali ni mibeele ya kufuuka, paantu bakapyana kyalo.” (Mat. 5:5, NWT) Baalia babiikilue mafuta, bakapyana kyalo kupitila kuteeka bali bamakolo pamo ni Yesu bali ku muulu. (Nfy. 5:10; 20:6) Loonu, Bakristu bengi ba kisinka bapembeele kwikala loonse pa kyalo. Bakaba bapuililikile, bali ni nsaansa kabili bali mu mutende. Eevi keekio kikakitike, babo bantu bakaba bali ni miilo ya mana ya kukita. Ezia kutontonkania palua eezi miilo itatu: Kwa mufuano, bakakwasia kukita kyalo kikaaluke paradiso, bakasininkizia nangue baalia bakatuntumunua bakwete bintu bibakaba bakabiile, kabili bakasambilizia baalia bakatuntumunua. Tontonkania palua bintu byuli kuviinda kukita atasie loonu, eevi kulangilila nangue utonene kukita bebio bintu mu kyalo kya leenu.

EBA, WEEWE WITEANIIZIE EEVI KUKITA KYALO KIKAALUKE PARADISO?

Musita Yehova lwaabalandile bantu ‘bezuzie kyalo ni kukiteeka,’ keekio kyaalangiliile nangue kyalo kyonse kipalile kufikiila kwaluka paradiso. (Kut. 1:28) Baalia bakeekala loonse pa kyalo, ni beene bakakindika malaizio enka azo. Paantu busitani bwa Edeni tebuliiko kabili, kyalo tekikaba kyali paradiso ku ntendeko. Kisia vita ya Armagedoni, twakaba twali ni miilo ingi ya kukita eevi kuswesia seemu ya kyalo iinoonekele. Kakiine, keekio kyakaloomba kukita miilo ingi!

Keekio, kyatulangulusia miilo yaali yapalile kukita Baisraeli musita ubaabuelele kufuma ku Babiloni. Kyalo kyabo kyaakitile miaka 70 bila mwaikeele muntu. Inzi Isaya waalandile ntaanzi nangue, kupitila kukwasiiwa na Yehova bakaviinda kuwaamia saana kyalo kabili. Bukabika bwaalandile eevi: “Weene wakaalula kisonso kyakue nga Edeni, ni kaseeba kakue ka mu lulambe nga busitani bwakue Yehova.” (Is. 51:3) Baisraeli baaviindile. Evio vyenka, kupitila kukwasiiwa na Yehova, baalia bakapyana kyalo, bakaviinda kukita kyalo kikaaluke paradiso iweeme saana. Kabili, atasie loonu kuli bintu byuli kuviinda kukita eevi kulangilila nangue utonene kukwasia ezio miilo.

Weewe, kunti wakita evio kupitila kwikwinda saana eevi kuswesia nsesi yobe, ni kuya wapaangile tuntu buino. Weewe, kunti wakita evio atasie kine bekazi nobe te beezi kuswesia masesi abo. Kabili, kunti wakwasia kuswesia ni kusuunga Nsesi yeenu ya Bukolo ni Kipaka kya Kulonghaaninamo. Kabili kine aali yobe yaitabizia, kunti waizuzia fomu eevi wipeele kukwasia baalia basaanzilue. Kukita evio, kuli kulangilila nangue utonene kubakwasia balupua ni bankazi bobe kine kuli ni fuasi ipalile kukwasia. Iipuzie eevi: ‘Eba, kunti nasambilila bufundi paleepale bunakaviinda kubombia kine Yehova wangitabizia kwikala loonse pa kyalo?’

Kikundi kya balupua ni bankazi kili mukuswesia ni kuwaamia Nsesi ya Bukolo.

EBA, WEEWE WITEANIIZIE EEVI KUKWASIA BAALIA BAKATUNTUMUNUA?

Kisia kumutuntumuna muana mwanakazi mwina Yairo, Yesu waalandile nangue ozo muana apalile kupeelua kyakulia. (Mark. 5:42, 43) Paange te kibanga kyakolele kumwemena ozo muana mwanakazi wa miaka 12. Inzi, tontonkania palua miilo yakaloomba kukitua, musita Yesu lwali wakafikilizia bulayo bwakue bulandile nangue “baalia bonse bali mu mankabuli alangulukilue bakonvua lizui lyakue, ni kufuma.” (Yoan. 5:28, 29) Anzia kine Bibilia te ilandile bintu bingi, kunti twaezia kutontonkania palua bintu byakaba byakabiile kukwasiiwa baalia bakatuntumunua, nga evelia byakulia, mwa kwikala ni maubo. Eba, kunti walangilila atasie loonu nangue utonene kuya waiteaniizie eevi kukwasia? Paapa pensina, pali biipuzio paleepale bipalile kutontonkania.

Weewe pa lobe, kunti wakita ki loonu eevi kulangilila nangue witeaniizie kupyana kyalo?

Balupua ni bankazi bali ni nsaansa musita ubali ku kiwanja kya avio eevi kupokelela baalia bakupilue ku kulonghaana kukata kwa ntundu ingi mu Paris.

Kine mu kilonghaano kyenu bapunda nangue kangalila wa muputule wakaba kuiza kumyendela, eba, uli waipeela palua kumupeela kyakulia? Kine miilo ya nsita yonse ya babombi ba ku Beteli yaaluluka kisia batumua mu kazonga, ao kine miilo yakue kangalila wa muputule yapua, eba weewe kunti wabakwasia kupata fuasi mwa kwikala? Kine kulonghaana kwa kalaale ao kwa ntundu ingi kwakaba kukitika mu kazonga keenu, eba kunti waipeela eevi kukwasia miilo ntaanzi ao kisia kulonghaana, ao kuya waiteaniizie kubapokelela baalia bali bakupua ku kulonghaana kooko?

EBA, WEEWE WITEANIIZIE EEVI KUSAMBILIZIA BAALIA BAKATUNTUMUNUA?

Kukoonkana ni milandu ili mu lileembo lya Miilo 24:15, fwefue tuswapiile nangue mabilioni a bantu akatuntumunua. Bengi pakati kaabo, te baapatile fuasi ya kumumana Yehova ntaanzi ya kufua kwabo. Inzi, bakapeelua leelio lisyuko lya kumumana Yehova kisia kutuntumunua kwabo.a Babombi ba kisinka bakue Leeza, kabili bali ni kibeelezio, bakakwasia ezio miilo ya kusambilizia babo bantu. (Is. 11:9) Charlotte, olia waakisimikila mu Bulaya, mu Amérique du Sud, ni mu Afrika, apembeele kwa nkulu ezio miilo. Walanda eevi kwa nsaansa: “Mpembeele kusambilizia bantu musita wa kutuntumunua. Musita undi nasoma palua muntu olia waaikeele mu nsita ya kale, lingi ndi natontonkania eevi: ‘Ozu muntu abengesie wamumanine Yehova, paange buikazi bwakue nga bwibeleele saana.’ Mpembeele kubabuila baalia bakatuntumunua palwakue Yehova, ni kubabuila buikazi bwabo vibuli kuwaama saana kine bamubombela.”

Atasie babombi ba kisinka bakue Yehova baalia baaikeele ntaanzi yakue Yesu, bakaba ni bingi bya kusambilila. Ezia kutontonkania nsaansa ni lisyuko lya kumubuila Danieli bukabika bwaaleembele vibwaafikiliziiziwe, inzi muine bila kunvua mana yakue. (Dan. 12:8) Ale palua kubakwasia ba Rutu ni Naomi kumana nangue luvyalo lwabo lubanga lwali seemu yaaizile kufika kuli Masia? Kakiine, twakasekelela kusambilizia bantu mu kyalo kyonse, kabili tetukaba twatintilue ao kutwamininua na keenu kyalo kibiipile!

Nkazi umo wamupeela mwanakazi umo trakti baali ku fuasi ya kufulila.

Weewe, kunti wakita siani loonu eevi kulangilila nangue witeaniizie juu ya kukwasia kusambilizia baalia bakatuntumunua? Kunti wakita evio kupitila kwikwinda eevi kwaluka kasambilizia ali ni bufundi, ni kuya wasimikila kwa mute. (Mat. 24:14) Anzia kine loonu teuviinda kusimikila saana nga evelia vyutonene juu ya miaka yobe ao juu ya aali inge, kunti walangilila nangue utonene saana kubasambilizia baalia bakatuntumunua kupitila kwikwinda saana loonu mu miilo ya kusimikila.

Kili buino kutontonkania palua beebi biipuzio bya mana: Eba, weewe upembeele kakiine kupyana kyalo? Eba, weewe uli ni nkulu ya kukita kyalo kikaaluke paradiso, kubakebela baalia bakatuntumunua bintu bibakaba bakabiile, ni kubasambilizia? Kunti walangilila nangue witeaniizie kwikala loonse mu kyalo, kupitila kukita loonu miilo ipaleene ni elia yuli wakakita musita luwakapyana kyalo!

a Mona lyasi lilandile, ‘Kuleeta Bantu Bengi ku Nsaambu’ lili mu Lupungu Lwakue Kamwenenena, lwa Muezi wa 09, 2022.