Eba, Kunti Kyakitika Tukeekale Loonse?

1. Kutontonkania palua bulayo bwakue Yehova bwa kutupeela bukose bwa loonse kuli kwatukwasia siani?

YEHOVA alaile nangue baalia bali bamunakila weene, bakapata ‘bukose bwa muyayaya.’ (Bar. 6:23) Musita utuli twatontonkania palua bintu bituli twapeelua na Yehova, tuli twakila kumutona. Tontonkania palua keeki: Baba weetu wa ku muulu atutonene saana, ni pakaako tetuviinda ata kaniini kufuma kuli weene.

2. Bulayo palua bukose bwa loonse buli bwatukwasia siani?

² Bulayo bwakue Leeza bwa kutupeela bukose bwa loonse, buli bwatukwasia kusipikizia maavia atuli nao loonu. Atasie kine baluani betu batulanda nangue bali kutwipaya, tetuviinda kulekela kumubombela Yehova. Juu ya ki? Nsaambu imo ni eezi: Tumanine nangue kine twafua twali ba kisinka kuli Yehova, weene wakatubuusia kufuma ku bafuile twaswapiile nangue tetukafuapo kabili. (Yoan. 5:28, 29; 1 Bakor. 15:55-58; Baeb. 2:15) Juu ya ki kunti twasininkizia nangue kunti kyakitika tukeekale loonse? Mona nsaambu ili paapa pensina.

YEHOVA ALIKO LOONSE

3. Juu ya ki kunti twasininkizia nangue Yehova kunti waviinda kutupeela buviinde bwa kwikala loonse? (Malumbo 102:12, 24, 27)

³ Tumanine nangue Yehova ali ni buviinde bwa kutusuunga eevi tusiale twakosele loonse paantu weene i Nsulo ya bukose, kabili aliko loonse. (Malum. 36:9) Mona milongo iniini ya Bibilia isininkiziizie nangue Yehova alikosie lyonse, kabili wakaba walikosie lyonse. Malumbo 90:2 ilandile nangue Yehova, weene ni wa “kufuma ku muyayaya mpaka ku muyayaya.” Malumbo a 102 alandile milandu ipaleene ni ezio. (Soma Malumbo 102:12, 24, 27.) Kabili, kabika Habakuki waaleembele eevi palwakue Baba weetu wa ku muulu: “We Yehova, eba weewe, teuli wa kufuma ku muyayaya? We Leeza wane, Mutakatiifu wane, tewizi kufua.”​—Hab. 1:12.

4. Eba, tupalile kutwisika kine twaandua kunvua malanga a kulanda nangue Yehova aliko lyonse? Londolola.

⁴ Eba, uli wamona kyakolele kunvua malanga a kulanda nangue Yehova aliko “mu muyayaya onse”? (Is. 40:28) Ni bantu bange bengi, bali baandua kunvua palua kaako. Elihu waalandile eevi palwakue Leeza: “Mpendua ya miaka yakue teiviinda kunvuika.” (Yob. 36:26) Inzi, kwandua kunvua kintu te kulangiliile nangue manake keekio kintu ni kya bufi. Kwa mufuano, anzia kine tetuviinda kunvua buino mwangaza vyuli wabomba, eba, keekio kilangiliile nangue teuliiko? Te evio! Evio vyenka ni fwefue bantu, tetuviinda kunvuisia buino malanga a kulanda nangue Yehova aliko lyonse, kabili wakaba walikosie lyonse. Inzi, keekio te kilangiliile nangue Leeza tekeele loonse. Kisinka palwakue Kabumba te kiswapiile beelia bituli kunvua ao beelia bitusiviinda kunvua fwefue. (Bar. 11:33-36) Kabili, abanga waliko ntaanzi kintu kyonse tekinabeko mu myulu ni kyalo, kubiika mukati ni koba pamo ni ntanda. Yehova watusininkiziizia nangue weene i “Waakitile kyalo kupitila buviinde bwakue.” Kabili, abanga waliko ntaanzi weene ‘tanapanzike myulu.’ (Yer. 51:15; Miil Bat. 17:24) Ni nsaambu ki inge ili yatusininkiziizia nangue kunti kyakitika fwefue tukekale loonse?

YEHOVA WAATUBUMBILE EEVI TWIKALE LOONSE

5. Ba mulume ni mukazi ba kuanza babanga bali ni kiswapilo ki?

⁵ Bintu byonse bili ni bukose byaabumbile Yehova, te byaabumbilue eevi biye byaikala loonse, ingasie bantu. Waabapeele kiswapilo kya bunke kya kwikala bila kufua ata limo. Anzia evio, Yehova waamusokele eevi Adamu: “Inzi palua kimuti kya kumana biweeme ni bibiipile, te upalile kuliako, paantu busiku buwakaliako wakafua kakiine.” (Kut. 2:17) Kabenge ba Adamu ni Eva baamunakiile Yehova, nga te baafuile. Kilisie buino kulanda nangue, kisia musita Yehova waasiile kufikiila kubalekelela balie ku “kimuti kya bukose.” Keekio, kyaasiile kulangilila nangue bali ni busininkizio bulangiliile nangue ‘bakekala loonse.’b​—Kut. 3:22.

6-7. (a) Ni biki bilangiliile nangue bantu te baabumbilue eevi baye bafua? (b) Ni biki byutonene kukita mu kyalo kya leenu? (Mona foto.)

⁶ Basayansi bange, bakifikiila kupata busininkizio bulangiliile nangue bongo bwetu kunti bwasuunga mpunda ingi saana ikilile pa elia ituli kusuunga mu buikazi bwetu loonu. Keekio ni kya kupapia saana. Mu 2010 kazeeti kamo (Scientific American Mind), kaalandile nangue bongo bwetu kunti bwasuunga mpunda ingi saana ilingeene ni ntantiko ya televizio ya nsa milioni itatu. Kabili, kunti kyakitika bongo bwetu buye bwasuunga mpunda ikilile paapo. Keekio kilangiliile nangue Yehova waabumbile bongo bwetu buye bwasuunga mpunda ingi saana ikilile pa elia ituli twasuunga mu miaka 70 ao 80 sie.​—Malum. 90:10.

⁷ Kabili, Yehova waatubumbile twali ni nkulu ikata ya kutwalilila kuya twaikeele. Bibilia ili yalanda palua bantu nangue Leeza “waabiikile bumuyayaya mu mutima wabo.” (Kas. 3:11) Keekio i kilengiizie tuye twamwene lufu kuya lwali muluani. (1 Bakor. 15:26) Kine twaluala saana, eba, tuli twailekelelasie ni kupembelela kufua? Bila. Lingi, tuli twaya kumumona munganga, kabili lunge tuli twatendeka kubombia miti eevi kutunza bobo buluele. Kakiine tuli twakita kyonse kituli kuviinda kukita eevi apana tufue. Kabili, kine muntu ututonene wafua, aye wali mwanike ao mukulu, eba tetwizi kukita musita waleepele twakisilue saana? (Yoan. 11:32, 33) Kunti twatwalilila kusambilila bintu loonse, kabili tuli ni nkulu ikata ya kwikala loonse, paantu Kabumba weetu wantono i vyaatubumbile. Kakiine, weene wakalengia kikakitike tukekale loonse. Kabili, kuli ni nsaambu inge ingi ya kutulengia tuzumine nangue kunti twaikala loonse. Kansi, tumone bintu paleepale bili byakita Yehova loonu ni beelia byaakitile lwa kale bilangiliile nangue tanaalulule mupaango wakue wa ku ntendeko.

MUPAANGO WAKUE YEHOVA TEUNAALULUKE

8. Isaya 55:11, yatusambilizia ki palua bulayo bwakue Yehova juu yeetu?

⁸ Anzia kine ba Adamu ni Eva baakitile lizaambi ni kubaleetela baana babo lufu, Yehova taaluluile maano akue palua mupaango wakue. (Soma Isaya 55:11.) Mipaango yakue ikilisie ya kubalengia bantu ba kisinka bakeekale loonse. Tumanine evio, kupitila bintu bili byalanda ni kukita Yehova eevi kufikilizia mupaango wakue.

9. Leeza alaile ki? (Danieli 12:2, 13)

⁹ Yehova alaile nangue wakaba kubatuntumuna bantu bafuile ni kubapeela bukose bwa loonse. (Miil Bat. 24:15; Tit. 1:1, 2) Yobu mwalalume wa kisinka, waali wasininkiziizie nangue Yehova atonene saana kubatuntumuna bantu bafuile. (Yob. 14:14, 15) Kabika Danieli waali wamanine nangue baalia bali ni kiswapilo kya kutuntumunua, bali ni fuasi ya kupata bukose bwa loonse. (Malum. 37:29; soma Danieli 12:2, 13.) Bayuda ba mu nsiku yakue Yesu ni beene, babanga bamanine nangue Yehova kunti wabapeela babombi bakue ba kisinka “bukose bwa muyayaya.” (Luk. 10:25; 18:18) Yesu waazimbuile lingi bobo bulayo, kabili ni wenka muine waatuntumwinue kuli Baba wakue.​—Mat. 19:29; 22:31, 32; Luk. 18:30; Yoan. 11:25.

10. Kutuntumunua kwaakitikile musita waapitile kwalangilila ki? (Mona foto.)

¹⁰ Yehova i ali Wapeelana Bukose, kabili ali ni buviinde bwa kubuezia bantu ku bukose. Waamupeele kabika Eliya buviinde bwa kumutuntumuna muana mwina mwanakazi umo mukanfwilua wa ku Sarefati. (1 Mak. 17:21-23) Kisia, kupitila kukwasiiwa na Leeza, kabika Elisha waamutuntumuine muana mwina mwanakazi umo Mushunamu. (2 Mak. 4:18-20, 34-37) Kooko kutuntumunua pamo ni kutuntumunua kunge kwaakitikile, kulangiliile nangue Yehova atonene kubabuezia bantu ku bukose. Musita lwabanga wali pa kyalo, Yesu waalangiliile nangue Baba wakue waamupeele bobo buviinde. (Yoan. 11:23-25, 43, 44) Loonu Yesu ali ku muulu, kabili apeelue “buviinde bonse mwiulu ni pa kyalo.” Pakaako, ali ni buviinde bwa kufikilizia bulayo bulandile nangue “baalia bonse bali mu mankabuli alangulukilue” bakatuntumunua ku bukose bali ni kiswapilo kya kusiala bakosele loonse.​—Mat. 28:18; Yoan. 5:25-29, NWT.

11. Kilubula mulandu kili kyakwasia siani eevi tukaviinde kwikala loonse?

¹¹ Juu ya ki Yehova waalekeleele Muana wakue afue lufu lwa kukisia? Yesu waalangiliile kintu kyaalengiizie musita lwaalandile eevi: “Leeza waatoneesie bantu ba mu kyalo, i kyaapeeleele Muana wakue lyonga, eevi kubalua muntu wamuketekela tekuti azeeze, inzi aye wali ni bukose bwa muyayaya.” (Yoan. 3:16) Kupitila kumufumia Muana wakue eevi aaluke kilubula mulandu kya kuvimba mazaambi etu, Leeza waalengiizie kikitike fwefue tupate bukose bwa loonse. (Mat. 20:28) Mutumua Paulo waalondoluele ezio seemu ya mana ya ozu mupaango wakue Leeza. Waaleembele eevi: ‘Lufu lwaaleetelue na muntu umo. Kutuntumuka ni kwene, kuleetelue na muntu umo. Paantu nga evelia bantu bonse vibali bafua pa mulandu wa buumo ni Adamu, i vibakaba bakose pa mulandu wa buumo ni Kristu.’​—1 Bakor. 15:21, 22.

12. Bukolo bwakakwasia siani kufikilizia mupaango wakue Yehova palwetu?

¹² Yesu waabasambiliziizie basambi bakue baye bapepa Bukolo Bwakue Leeza buize, ni kutona kwakue kukitike paanu pa kyalo. (Mat. 6:9, 10) Bantu kwikala loonse pa kyalo, ni kwene ni seemu ya mupaango wakue Leeza. Eevi kufikilizia ozo mupaango, Yehova waamusaakuile Muana wakue eevi aaluke Likolo wa Bukolo bwa Kimasia. Leeza ali mukukolonghania bantu mia ni makumi ana na bana elufu (144 000) kufuma pa kyalo, eevi bakabombe pamo ni Yesu juu ya kufikilizia kutona kwakue Leeza.​—Nfy. 5:9, 10.

13. Yehova ali mukukita ki loonu, kabili weewe upalile kukita ki?

¹³ Loonu, Yehova ali mukukolonghania “bantu bengi saana,” kabili ali mukuya wababeelezia eevi baaluke bantu ba mu Bukolo bwakue. (Nfy. 7:9, 10; Yak. 2:8) Anzia kine loonu bekeele mu kyalo kikasanikile juu ya muenzo ni vita, bantu baundile keekio kikundi, bali baikwinda saana kukaana kusuulana mu nzila yonse. Balangiliile kupitila bikitua byabo nangue bali mukutila bipanga byabo ni kwalula nkasu. (Mik. 4:3) Kuliko kukwasia vita ili yaleeta nfua ingi, beene bali mukukwasia bantu bapate “bukose buine-buine” kupitila kubasambilizia palwakue Leeza wakisinka ni mipaango yakue. (1 Tim. 6:19) Anzia kine bantu ba mu lupua lwabo kunti babapinga, ao kunti bazeezia nfalanga juu ya kukwasia Bukolo Bwakue Leeza, Yehova ali wasininkizia nangue bakwete bintu bibakabiile. (Mat. 6:25, 30-33; Luk. 18:29, 30) Bebio bintu, byatusininkiziizia nangue Bukolo Bwakue Leeza kubuli kakiine, kabili nangue bwakatwalilila kufikilizia mupaango wakue Yehova.

MUSITA UWEEME SAANA ULI KU NTAANZI YEETU

14-15. Bulayo bwakue Yehova bwa kwinoona lufu loonse, bwakafikiliziiwa siani ku mpeleezio?

¹⁴ Loonu Yesu, i Likolo wa Bukolo Bwakue Leeza ku muulu, kabili wakaba kufikilizia bulayo bonse bulaile Yehova. (2 Bakor. 1:20) Tangia mu 1914, Yesu waababiikile baluani bakue pensina buviinde bwakue. (Malum. 110:1, 2) Weene pamo ni baalia bakateeka nakue, bakaba kubenoona babiifi leenusie.​—Nfy. 6:2.

¹⁵ Mu Buteeko bwa Miaka Elufu bwakue Yesu, bantu bafuile bakatuntumunua, kabili bantu bali banakila, bakabuela kupuililika. Kisia buezio bwa kupeleezia, baalia bakapingulua na Yehova kuya bali bantu ba nsaambu “bakapyana kyalo, kabili bakeekalapo loonse.” (Malum. 37:10, 11, 29) Kya nsaansa ni keeki: “Lufu, muluani wa kupeleezia, wakenoonua.”​—1 Bakor. 15:26, NWT.

16. Zimbula kintu kya mana saana kipalile kutukinkizia kumubombela Yehova.

¹⁶ Nga vitwamona mu leeli lyasi, kiswapilo kyetu kya kwikala loonse, kiswapiile saana Mulandu Wakue Leeza. Keekio kiswapilo, kunti kyatukwasia kusiala twali ba kisinka mu enu nsiku ikolele ya mpeleezio. Inzi, eevi tumusaansamusie Yehova, te tupalile kukinkiziiwasie na nkulu ya kutona kuya twakosele. Kumutona saana Yehova ni Yesu, i nsaambu ya mana saana ya kutukinkizia tusiale twali ba kisinka kuli beene. (2 Bakor. 5:14, 15) Ezio ntono, ili yatukinkizia tubapale beene, ni kubabuilako bange kiswapilo kyetu. (Bar. 10:13-15) Kine twasambilila kutiina mibeele ya kuya twaitonenesie fwe beene, ni kusambilila kuya twali ni mibeele ya kupeelana, Yehova ali kutona kwaluka kibuza weetu wa loonse.​—Baeb. 13:16.

17. Kila muntu palwakue ali ni miilo ki? (Mateo 7:13, 14)

¹⁷ Eba, twakaba twali pakati ka bantu bakapata bukose bwa loonse? Yehova atupeele fuasi ya kupata bukose bobo. Loonu, tupalile kupingula kusiala twali mu nzila ili yatungulula ku bukose. (Soma Mateo 7:13, 14.) Bukose bwakaba siani musita utwakeekala loonse? Twakaba kulondoluela kyasuko kya keekio kiipuzio mu lyasi likoonkelepo.