Leenga Ubatiziiwe

1. Juu ya ki kubatiziiwa ni kwa mana?

EBA, wewe umutonene Yehova Leeza, olia waakupeele bukose buuli nabo, kabili olia ali wakupeela bintu byonse biweme? Eba, utonene kumulangilila nangue umutonene? Nzila iweme ya kukita evio ni ezi: Kwipeela kuli wene ni kulangilila kwipeela kobe kupitila kubatiziiwa mu menda. Kine wakita evio, uli kwingila mu lupua lwakue Yehova. Kabili, pantu wene i Baba ni Rafiki obe, wakaba kuya wakutungulula ni kukwemena pantu wakaba kwaluka muntu wakue. (Malum. 73:24; Is. 43:​1, 2) Kukila pa kako, kine waipeela kuli Yehova ni kubatiziiwa, wakaba kwaluka ni kiswapilo kya kupata bukose bwa lonse.—1 Pet. 3:21.

2. Tuli kusambilila ki mu leli lyasi?

² Eba, kuli ni kintu kili mukulengia utiine kubatiziiwa? Kine i evio, mana nangue te we bunke. Ma milioni a bantu baalia baabatiziiziwe ntanzi yobe, baakitile bupilibuko mu mibele yabo ni mu namuna yabo ya kutontonkania evi bafikiile kubatiziiwa. Lonu, bali mukumubombela Yehova kwa mute ni nsansa. Wewe kunti wasambilila ki kupitila bantu bamo baalia baabatiziiziwe mu kipindi kya batumua? Ale tulondolwele palua maavia abaasaakeene nao, kabili tumone bintu bituli kusambilila kupitila mufuano wabo.

BASAMARIA BAABATIZIIZIWE

3. Basamaria bengi babanga bapalile kukita ki evi babatiziiwe?

³ Mu nsita yakue Yesu, Basamaria babanga bali mu kikundi kimo kya kidini. Bengi pakati kabo, babanga baikala ku kaskazini ka Yudea. Babo Basamaria babanga bapalile kumana bwino sana Mulandu Wakue Leeza ntanzi ya kubatiziiwa. Kukonkana ni mawazo a Basamaria, bitabu sie bisano bya Bibilia, i kulanda, kitabu kya Kutendeka mpaka kya Malanguluzi a Mizilo, pange ni kitabu kya Yoshua, i byaatungulwilue na mupasi wakue Leeza. Inzi, babanga bazumiine nangue Masiya wakaba kwiza, nga evelia vilangiliile bulayo bwakue Leeza, bolia buli mu lilembo lya Malanguluzi a Mizilo 18:​18, 19. (Yoan. 4:25) Evi bafikiile kubatiziiwa, babanga bapalile kuzumina nangue Yesu i olia Masiya waalailue. Evio i vyaakitile “Basamaria bengi.” (Yoan. 4:39) Basamaria bamo babanga bapalile kulwisia kapatulula kaalia kabanga kali pakati kabo ni ba Yuda.—Luk. 9:​52-54.

4. Nga vilandile Miilo ya Batumua 8:​5, 6 ni 14, Basamaria bengi baakitile syani musita Filipo lwaabasimikiile?

⁴ Ni kiki kyaabakwasiizie Basamaria babatiziiwe? Musita kabila-mbila Filipo lwaasimikiile “mu kyalo kya Samaria pa lwakue Kristu,” Basamaria bamo ‘bapokelele keebo kakue Leeza.’ (Soma Miilo ya Batumua 8:​5, 6, 14.) Ata sie kine Filipo abanga wali Muyuda, bene te baakeene kumutwilizia. Pange baalangulukile malembo alandile nangue Leeza tali na kapatulula. (Mal Miz. 10:​17-19) Lyonse, babanga ‘bamutwilizia [Filipo] bapozeleko ni mano’ musita lwabanga walandila pa lwakue Kristu, kabili baaitabiile busininkizio bubanga bwalangiliile paswetele nangue Filipo waatuminue na Leeza. Kabili, Filipo abanga wakita bimpezia-mano bingi, kubiika mukati kukosia balwele ni kukumba bibanda.—Miil Bat. 8:7.

5. Wewe kunti wasambilila ki kupitila mufuano wa Basamaria?

⁵ Babo Basamaria batonenge, nga baalekeleele kapatulula ni kusimana kwabo bibalengie bandue kukita buyantanzi. Inzi, te baakitile evio. Kisia kwisininkiziizia nangue Filipo waabasambiliziizie kisinka, Basamaria baabatiziiziwe bila kukokola. Bibilia yalanda evi pa lwabo: “Babo baazumiine twebo twaalandile Filipo palua mpunda iweme ya Bukolo Bwakue Leeza ni pa lwakue Yesu Kristu, baabatiziiziwe bonse, balalume ni banakazi.” (Miil Bat. 8:12) Eba, wewe usininkiziizie nangue Mulandu Wakue Leeza ni wa kisinka? Kabili, eba usininkiziizie nangue Bakasininkizia Bakue Yehova te bali na kapatulula, kabili nangue bali baikwinda kulangililana ntono ya kiine, elia ili yalangilila nangue bene ni Bakristu ba kisinka? (Yoan. 13:35) Kine wewe usininkiziizie evio, ale uli mukutiinina ki kubatiziiwa? Uye waswapiile nangue kine wapingula kubatiziiwa, Yehova wakaba kukupaala.

6. Mufuano wakue Ruben kunti wakukwasia syani?

⁶ Ruben, olia ali waikala mu Alemanye, waakuliile mu lupua lwa Bakasininkizia Bakue Yehova. Inzi, lwabanga mulumendo, taali wazumiine nangue Yehova kwali. Waakitile ki evi apwisie masyaka akue? Waatendekele kusambilila bingi pa lwakue Yehova. Waalandile evi: “Evi kupwisia masyaka ane, naatendekele kukita lisambililo lya Bibilia lya bunke. Naali nasambilila lingi maasi alandiile palua kwialulula kwa bintu (évolution).” Ruben abanga wasoma kitabu, Je, Kuna Muumba Anayekujali? Kekio kitabu kyaamukwasiizie sana. Waalandile evi: ‘Haa, Kansi Yehova kwali kakiine!’ Kabili, lwaaendeele ku kitente kikata kya Bakasininkizia Bakue Yehova, Ruben waapapile sana ni kutasia palua buumo buli pakati kaba Kasininkizia mu kyalo kyonse. Musita lwaabwelele mu Alemanye, Ruben waabatiziiziwe na myaka 17. Kine ni wewe uli ni masyaka pa lwakue Leeza, palua Bibilia, ao palua bintu binge belia biwaasambiliile, wamona syani kine wakebulula mu mpapulo yetu evi upwisie masyaka obe? Masyaka kunti apua kine waaluka ni “kumana kusili na kilubo.” (Baef. 4:​13, 14) Kabili, kine watwilizia mpunda palua ntono ni buumo buli pakati ka bantu bakue Yehova, baalia bekeele mu fwasi ilekenkeene mwaya kyalo, kabili kine wamona ntono ili na ba lupua ba mu kilonghaano kyenu, uli kukila kubatona.

SAULI WA KU TARSO WAABATIZIIZIWE

7. Sauli abanga wapalile kwalulula mawazo ki?

⁷ Tulandile palua mufuano wakue Sauli wa ku Tarso. Wene abanga wali Muyuda, kabili waakitile buyantanzi bukata mu Dini ya Bayuda. (Bag. 1:​13, 14; Baf. 3:5) Mu ozo musita, Bayuda bengi babanga bazumiine nangue Bakristu ni ba bisanguka, pa kako Sauli abanga wabatesa sana. Sauli abanga watontonkania ovio nangue abanga wakita kutona kwakue Leeza. (Miil Bat. 8:3; 9:​1, 2; 26:​9-11) Pantu Sauli waapingwile kumuzumina Yesu ni kwaluka Mukristu abatiziiziwe, kekio kilangiliile nangue waaitabiile ye mwine kwemiiwa.

8. (a) Ni kiki kyaamukwasiizie Sauli abatiziiwe? (b) Kukonkana ni Miilo ya Batumua 22:​12-16, Anania waamukwasiizie syani Sauli? (Mona ni foto.)

⁸ Ni kiki kyaamukwasiizie Sauli abatiziiwe? Musita Yesu lwabanga wali ku muulu wali mukulanda ni Sauli, kwaalukile mwangaza ukata olia waalengiizie Sauli aaluke mpofu. (Miil Bat. 9:​3-9) Waakitile nsiku itatu wali mukutontonkania palua kelia kyaamukitikiile. Kulanda kisinka, Sauli waazumiine nangue Yesu i abanga wali Masiya, kabili waainikile nangue basambi bakue i babanga bali mu dini ya kisinka. Kakiine, Sauli waaunvwile bulanda pantu waaitabiziizie Stefano epaiwe! (Miil Bat. 22:20) Kisia ezio nsiku itatu, musambi ali wakuutua Anania waamupalamiine Sauli. Kisia kukita evio, waamukosiizie menso ni kumukoselezia aleenge abatiziiwe. (Soma Miilo ya Batumua 22:​12-16.) Sauli waaikoosiizie ni kwitabila kukwasiiwa, kabili waabatiziiziwe.—Miil Bat. 9:​17, 18.

9. Mufuano wakue Sauli wakusambilizia ki?

⁹ Kunti twasambilila masomo paleepale kuli Sauli. Wene atonenge, nga waalekeleele kibuli ao kutiina bantu kumwanzie kubatiziiwa. Inzi, taakitile evio. Wene waaikeefiizie ni kwalulula lwendo lwakue musita lwaaitabiile kisinka pa lwakue Kristu. (Miil Bat. 26:​14, 19) Mu kwitonena, Sauli waalukile Mukristu ata sie kine abanga wamanine nangue kukita evio kwakaba kulengia akabe kutesua. (Miil Bat. 9:​15, 16; 20:​22, 23) Kisia kubatiziiwa, Sauli waatwaliliile kumuketekela Yehova evi amukwasie kusipikizia maavia paleepale. (2 Bakor. 4:​7-10) Ni wewe, kine wabatiziiwa ni kwaluka Kasininkizia Wakue Yehova, pange kiketekelo kyobe kyakaba kweziiwa ao pange wakaba kupata maavia. Inzi, mana nangue, lyonse Leeza pamo ni Yesu bakaba bakupeela maka evi ukabe wavinda kusipikizia ni kusyala wa kisinka.—Baf. 4:13.

10. Wewe wasambilila ki kupitila mufuano wakue Anna?

¹⁰ Anna waakuliile mu lupua lwa Bakurdi, lolia luli lwasangua mu Bulaya bwa Kutula-koba. Kisia mama wakue kubatiziiwa, Anna waatendekele kusambilila Bibilia lwabanga wali na myaka 9. Baba wakue i waamwitabiziizie atendeke kusambilila Bibilia. Inzi, bantu bange ba mu lupua, baalia babanga waikala nabo mu nsesi imo, baatendekele kumupinga lubaamanine nangue abanga wasambilila Bibilia pamo ni Bakasininkizia Bakue Yehova. Bantu ba mu lupua babanga bazumiine nangue ni bya busoni kine muntu wafuma mu dini ilimo bantu ba mu lupua lwakue. Musita Anna lwaakumaniizie myaka 12, waamwipuziizie baba wakue kine ali kumwitabizia abatiziiwe. Baba wakue waali watonene kumana kine Anna waakwete ye mwine bobo bupinguzi ao kine waasonseziiziwe na muntu unge. Anna waamulandile evi: “Mutonene Yehova.” Baba wakue waaitabiziizie abatiziiwe. Kisia kubatiziiwa, Anna waasaakeene ni maavia paleepale, nga evelia, kusekua ni kukitilua mu nzila isipalile. Muntu umo wa mu lupua lwakue waamulandile evi: “Kyasiile kuwama ubenge wakita sie bintu bibipile ni kupeepa fwanka kuliko kwaluka Kasininkizia Wakue Yehova.” Anna waakitile syani evi kusipikizia? Walanda evi: “Yehova waankwasiizie ngaluke ni maka, kabili mama pamo ni baba wane baankwasiizie sana.” Anna ali ni liste ilangiliile nsita yali wakwasiiwa na Yehova. Evi te kunti alabe Yehova vyali wamukwasia, Anna ali wabwela kusomapo pa ezio liste. Kine ni wewe uli mukutiina kupingua, languluka nague Yehova wakaba kukukwasia.—Baeb. 13:6.

KORNELIO WAABATIZIIZIWE

11. Ni kiki kyaasiile kulengia Kornelio akokole bila wabatiziiwa?

¹¹ Kunti twasambilila masomo ange a mana kupitila mufuano wakue Kornelio. Wene abanga wali “mukulu wa libumba lya ba lukale,” i kulanda, abanga watungulula kikundi kya ba soda mia imo evi (100) Baroma. (Miil Bat. 10:1) Kekio kyaalengiizie bantu ni ba soda baye bamumona kuya wali wa mana. Kornelio ‘waali wakita bintu bingi evi kukwasia Bayuda.’ (Miil Bat. 10:2) Yehova waamutumine mutumua Petro evi aye amusimikile mpunda iweme. Eba, cheo yakue Kornelio yaamulengiizie akokole bila wabatiziiwa?

12. Ni kiki kyamukwasiizie Kornelio abatiziiwe?

¹² Ni kiki kyaamukwasiizie Kornelio abatiziiwe? Bibilia ili yalanda nangue: “Wene ni lupua lwakue lonse baali bamupupa Leeza.” Kabili, lyonse Kornelio abanga wamupapaata Leeza. (Miil Bat. 10:2) Musita Petro lwaamusimikiile mpunda iweme, Kornelio pamo ni bantu ba mu lupua lwakue baamuzumiine Kristu, kabili baabatiziiziwe bila kukokola. (Miil Bat. 10:​47, 48) Kulanda kisinka, Kornelio waakitile bupilibuko bwa mana evi wene pamo ni bantu ba mu lupua lwakue babambe kumupupa Yehova.—Yosh. 24:15; Miil Bat. 10:​24, 33.

13. Wewe wasambilila kupitila mufuano wakue Kornelio?

¹³ Nga evelia sie Sauli, Kornelio atonenge nga waalekeleele cheo yakue imwanzie kwaluka Mukristu. Inzi, taakitile evio. Eba, ni wewe upalile kukita bupilibuko bukata mu bwikazi bobe evi ufikiile kubatiziiwa? Kine i evio, Yehova wakaba kukukwasia. Kine wewe wapingula kubombia masoke ali mu Bibilia mu bwikazi bobe, wene wakaba kukupaala.

14. Mufuano wakue Tsuyoshi kunti wakukwasia syani?

¹⁴ Evi kufikiila kubatiziiwa, Tsuyoshi wa mu Japani, abanga wapalile kukita bupilibuko mu miilo yakue. Abanga wamukwasia direktere wa masomo amo alia abanga amanikile sana. Ku azo masomo, babanga basambilizia vya kupanga maua. Ozo direktere abanga wapanga maua abanga abombiiwa mu tubelela twa maziko a Babuda. Musita ozo direktere lwasibanga waya ku maziko, lingi Tsuyoshi i abanga wayako pa fwasi yakue evi kukita toto tubelela. Abanga waya kukitako tubelela twa kupanga maua palua maziko, tolia tubanga twakitua na Babuda. Inzi, kisia kusambilila kisinka palua aali ya bantu bafwile, Tsuyoshi waainikile nangue takaba kubatiziiwa kine talekeele kukitako toto tubelela twa Babuda. Pa kako, waalekeele kukitako toto tubelela. (2 Bakor. 6:​15, 16) Tsuyoshi waamubwilile olia direktere bupinguzi bwakue. Ni kiki kyaakitikile? Tsuyoshi waatwaliliile kubomba miilo yakue, bila wakitako tolia tubelela. Mwaka umo evi kisia sie kutendeka kusambilila Bibilia, Tsuyoshi waabatiziiziwe.a Kine ni wewe wakeba miilo inge juu umusansamusie Yehova, uye wasininkiziizie nangue wene wakaba kukupeela wewe pamo ni lupua lobe bintu bimuli nabio lazima.—Malum. 127:2; Mat. 6:33.

BAKORINTO BAABATIZIIZIWE

15. Ni biki byaasiile kulengia Bakorinto bandue kubatiziiwa?

¹⁵ Bantu baalia babanga baikala mu muzi wa kale wa Korinto, babanga batona sana bintu bya kimubili. Kukila pa kako, bengi babanga bakita bintu bibipile belia bili byasuula Leeza. Pa kako, kibanga kyakolele ku bantu baalia babanga baikeele mu ozo muzi kutendeka kumubombela Yehova. Inzi, musita mutumua Paulo lwaabasimikiile mpunda iweme pa lwakue Kristu, bantu “bengi ba mu Korinto lubaaunvwile masimiko akue, baazumiine ni kubatiziiwa.” (Miil Bat. 18:​7-11) Kisia, Mulopue Yesu Kristu waamonekele kuli Paulo mu kimonua ni kulanda evi: “Mu ozo muzi muli bantu bane bengi.” Pa kako, Paulo waakitile mwaka umo ni nusu waali mukusimikila mu ozo muzi.

16. Ni kiki kyaabakwasiizie Bakorinto bamo evi bafikiile kubatiziiwa? (2 Bakorinto 10:​4, 5)

¹⁶ Ni kiki kyaabakwasiizie Bakorinto bafikiile kubatiziiwa? (Soma 2 Bakorinto 10:​4, 5.) Mulandu Wakue Leeza pamo ni mupasi wakue utakatifu i byaabakwasiizie bakite bupilibuko bukata mu bwikazi bwabo. (Baeb. 4:12) Bakorinto baalia baaitabiile mpunda iweme pa lwakue Kristu baalekeele kukita bintu bibipile, nga evelia bukyakolua, bukaboko pamo ni kulaalana kwa balalumenke ni banakazinke.—1 Bakor. 6:​9-11.b

17. Wewe wasambilila ki kupitila mufuano wa Bakorinto?

¹⁷ Ata sie kine Bakorinto babanga bapalile kukita bupilibuko bukata, te baatontonkaniizie nangue kibanga kyakolele sana kuli bene kukita bobo bupilibuko evi kwaluka Bakristu. Baakitile maka sana evi batendeke kwenda mu nzila ya kasansaila ili yatwala ku bukose bwa lonse. (Mat. 7:​13, 14) Eba, ni wewe uli mukwikwinda evi kulekela bikitua bibipile juu ya kunti ubatiziiwe? Te kulekela kwikwinda! Mulombe Yehova akupeele mupasi wakue utakatifu evi te kunti uye watona kukita bintu bibipile.

18. Mufuano wakue Monika kunti wakukwasia syani?

¹⁸ Monika ali waikala mu kyalo kya Georgia. Evi akite buyantanzi ni kufikiila kubatiziiwa, waakitile sana maka mpaka walekela bulanzi bubipile, kutwilizia, ni kumona bintu bibipile. Wene walanda evi: “Mu bukazyana bwane, naali napata maka a kukita bupilibuko kupitila kupepa kuli Yehova. Yehova abanga wamanine nangue naali natonene kukita bintu biweme, kabili lyonse abanga wankwasia ni kuntungulula.” Monika waabatiziiziwe na myaka 16. Eba, ni wewe uli ni bintu byupalile kulekela evi umubombele Yehova mu nzila yatonene? Kine i evio, twalilila kumulomba maka aukabiile evi kukita bupilibuko. Wene ali wapeelana mupasi wakue utakatifu mu kwitonena.—Yoan. 3:34.

KIKETEKELO KYOBE KUNTI KYAKUUSIA MPILI

19. Wewe kunti wakita syani evi uvinde kusipikizia maavia atanine nga lupili? (Mona ni foto.)

¹⁹ Uye wasininkiziizie nangue Yehova akutonene, kabili atonene waaluke mu lupua lwakue. Akutonene ata sie kine pange uli mukusaakaana ni maavia alia ali mukukulengia uye wamwene kyakolele kukwata bupinguzi bwa kubatiziiwa. Yesu waabalandile evi bamo pakati ka basambi bakue: “Kabenge mwali ni kiketekelo kikata nga lubezu lwa kilanga, nga mwaluana lolu lupili, ‘we lupili fuma papa uye wipoze kolia, penka papo lwaipoza,’ kabili nga temuya mwaandua kantu.” (Mat. 17:20) Baalia babanga bali palia evi kunvua ezio milandu, baali bakitile sie myaka inini pamo ni Yesu, pa kako kiketekelo kyabo kibanga kyakikula sie. Inzi, Yesu waabasininkiziizie nangue kine balumyako kiketekelo kyabo, Yehova wakaba kubakwasia kusipikizia maavia atanine nga lupili. Yehova wakaba kukukwasia ni wewe!

20. Mifuano ya Bakristu ba mu nsita ya batumua ni ba mu eno nsiku, elia itwalondolwela mu leli lyasi, yakusonsezia kukita ki?

²⁰ Kine wewe wainika nangue kuli maavia ali alengia uye watiina kubatiziiwa, leenga uapwisie. Teeka mutima ni kupata maka kupitila kutontonkania palua mifuano ya Bakristu ba mu nsita ya batumua ni ba mu eno nsiku. Kansi, lekela ezio mifuano ikukoselezie ni kukusonsezia evi ufikiile kwipeela kuli Yehova ni kubatiziiwa. Bobo i bupinguzi bwa mana pa bonse!