Uye Wawaza nga Yehova ni Yesu

1-2. (a) Kumutona Yehova kubiikile mukati kiki? (b) Kabili Yesu waalangiliile syani evio?

‘UPALILE kumutona Yehova Leeza obe na mutima obe onse, na mweo obe onse, na maka obe onse, ni mano obe onse.’ (Luk. 10:27) Yesu abanga wamanine nangue kekio i kibanga kyali kintu kya mana sana mu Sheria Yakue Musa. Mana nangue kumutona Yehova kubiikile mukati kumutona kwa mutima wetu onse, i kulanda, kwa isia ni tama yetu yonse. Kabili, kubiikile mukati kwipeela kwa mweo wetu onse, ni maka etu onse. Kukila pa kako, kubiikile mukati kumutona Yehova na mano etu, i kulanda, mawazo etu palua bintu paleepale. Kulanda kisinka, tetuvinda ata kanini kumana mawazo akue Yehova mu nzila ipwililikile. Inzi, kunti twamana bwino mawazo akue kupitila kusambilila “mano akue Kristu” pantu wene ali wawaza nga Baba wakue.—1 Bakor. 2:16.

² Yesu abanga wamutonene Yehova na mano akue onse. Yehova abanga watonene Yesu akite kintu kimo evi. Ni Yesu abanga wamanine bwino kekio kintu. Kabili, abanga wapingwile kukikita ata sie kine abanga wapalile kutesekelapo. Pantu abanga wapozele mano ku kukita kutona kwakue Baba wakue, Yesu taalekeleele kintu ata kimo kimwanzie kukita evio.

3. Mutumua Petro waasambiliile ki kuli Yesu, kabili waabakoseleziizie Bakristu benakue bakite ki? (1 Petro 4:1)

³ Petro pamo ni batumua benakue babanga bali ni lisyuko lya kupisia musita wingi pamo ni Yesu ni kusambilila mawazo akue. Mu mukanda wakue wa kwanza, Petro waabakoseleziizie Bakristu bekale baiteaniizie na bilwilo pamo ni malanga nga alia enka akue Kristu.a (Soma 1 Petro 4:1.) Petro lwaalembele nangue, “ikale mwaiteaniizie na bilwilo,” waabombiizie bulanzi bubanga bwabombiiwa palua ba soda, baalia babanga bateania bilwilo evi kuya ku vita. Pa kako, kine fwe Bakristu twapala malanga akue Yesu, ao mawazo akue, tuli kwaluka ni bilwilo bya maka bya kutukwasia kulwisia tama ya kukita lizambi. Kabili, bebio bilwilo bili kutukwasia kulwisia kenu kyalo kili kyateekua na Sataana.—2 Bakor. 10:​3-5; Baef. 6:12.

4. Ni biki bituli kumona mu leli lyasi belia bili kutukwasia kukonka masoke akue Petro?

⁴ Mu leli lyasi, tuli kumona Yesu vyabanga wawaza, kabili tuli kumona vya kumupala. Tuli kumona bintu bitatu. Kya kwanza, (1) vya kukita evi tuye twawaza nga Yehova. Kukita evio kuli kutukwasia fwe bonse tuye twali na mawazo amo. Kya bubili, (2) vya kukita evi tuye twali ni mibele ya kwikeefia. Ni kya butatu, (3) vya kukita evi tuye twateekameene kupitila kupepa kuli Yehova.

UYE WAWAZA NGA YEHOVA

5. Mu kipindi kimo, ni kiki kyaakitile Petro kelia kilangiliile nangue mawazo akue abanga apusene ni akue Yehova?

⁵ Mu kipindi kimo, mawazo akue Petro abanga apusene ni mawazo akue Yehova. Yesu waabalandile batumua bakue nangue abanga wapalile kuya ku Yerusalemu. Kabili, waabalandile nangue kine wafika koko, ba ntunguluzi ba ma dini bakaba kumukaka, kumutesa, kisia ni kumwipaya. (Mat. 16:21) Petro waawazile nangue Yehova takaba kumulekelela Yesu akabe kwipaiwa. Juu ya ki? pantu wene abanga wamanine nangue Yesu i abanga wali kiswapilo kya Baisraeli, kabili i abanga wali Masiya olia waalailue. (Mat. 16:16) Pa kako, Petro waamukutiile Yesu pa mbali ni kumwana evi: “[Te kwilekelela], we Mulopue, bebi bintu tebikakukitikila!” (Mat. 16:22) Yesu waakeene kukonka masoke akue Petro. Juu ya ki? Pantu mawazo akue Petro abanga apusene ni akue Yehova.

6. Yesu waalangiliile mu nzila ki nangue mawazo akue abanga ali nga akue Yehova?

⁶ Kakiine, mawazo akue Yesu abanga ali nga akue Baba wakue wa ku muulu, Yehova. Yesu waamulandile evi Petro: “Fuma papa we sataana! Uli kikovio [kikwazo] kuli nene, pantu malanga obe te a buleeza, inzi ni a bumuntu.” (Mat. 16:23) Yesu abanga wamanine nangue evi akite kutona kwakue Yehova, abanga wapalile kuteseka ni kufua. Kekio i kyaalengiizie akaane masoke akue Petro ata sie kine pange Petro abanga wakeba kumukwasia. Kekio kyaamusambiliziizie Petro nangue abanga wapalile kuya wali ni mawazo nga akue Leeza. Lelio i lisomo lya mana litupalile kusambilila.

7. Kisia musita, Petro waalangiliile syani nangue waatendekele kuwaza nga Yehova? (Mona foto ili ku ntendeko ya kazeeti.)

⁷ Kisia musita, Petro waalangiliile nangue waatendekele kuwaza nga Yehova. Musita waafikile wa kunti bazima baaluke bantu bakue Leeza. Leeza waamupeele Petro miilo ya kumusimikila Kornelio, olia abanga wali muzima wa kwanza kwaluka Mukristu. Nga vitumanine, Bayuda te babanga baunvwana na bazima, pa kako Petro abanga wapalile kwalulula mawazo akue evi avinde kubomba ezio miilo. Petro lwaainikile kelia kibanga kyatonene Leeza palua babo bazima, waalulwile mawazo akue. Pa kako, lwaatuminue, waaile ‘bila kukaana.’ (Miil Bat. 10:​28, 29) Waamusimikiile Kornelio pamo ni bantu ba mu nsesi yakue, kabili baabatiziiziwe.—Miil Bat. 10:​21-23, 34, 35, 44-48.

8. Kunti twalangilila syani nangue mawazo etu ali nga akue Leeza? (1 Petro 3:8)

⁸ Kisia myaka, Petro waabakoseleziizie Bakristu benakue baye bali ni “malanga amo.” (Soma 1 Petro 3:8) Fwe bantu bakue Yehova, kunti twavinda kuya twali ni malanga amo kine twaikwinda kuya twali ni mawazo nga akue Leeza, alia atuli twasambilila mu Mulandu wakue. Kwa mufuano, Yesu waabalandile basambi bakue baye babiika Bukolo pa ntanzi mu bwikazi bwabo. (Mat. 6:33) Kumana evio kunti kwamusonsezia kasimika atendeke miilo ya nsita yonse. Kuliko kumulanda ozo kasimika asaakule bwikazi bulengele, tupalile kulanda bintu biweme palua miradi yakue ni kumukwasia.

UYE WAIKEEFIIZIE

9-10. Yesu waakitile ki evi kulangilila nangue abanga waikeefiizie sana?

⁹ Nsita ya busiku, ntanzi Yesu tanaipaiwe, wene waamusambiliziizie Petro pamo ni batumua bange lisomo limo lya mana lya kwikeefia. Lwa ntanzi, Yesu waabatumine ba Petro ni Yoane evi bateanie bintu palua kyakulia kya mwinsio kelia kyabanga wali wa kulia pamo nabo ntanzi tanaipaiwe. Kimwenekele nangue baakebele beseni pamo ni bitambala. Mu ezio beseni i mubanga mwali mwa kusambila baeni makasa ntanzi ya kulia kyakulia. Inzi, ale nani waasiile kwitabila kwikeefia evi kubomba ezio miilo ya kubasamba baeni makasa?

¹⁰ Yesu i waaipeele evi kubomba ezio miilo. Wene waalangiliile nangue abanga waikeefiizie sana. Basambi baapapile pantu Yesu waabombele miilo elia ibanga yabombua na babombi ba pansi. Yesu waavuulile maubo akue a pa muulu, waaikakile kitambala mu kitungu, kisia waabiikile menda mu beseni, ni kutendeka kubasamba ku makasa. (Yoan. 13:​4, 5) Yesu waapisiizie musita walepele wali mukubasamba batumua bakue 12 ku makasa. Kya kupapia, waasambile ni makasa akue Yuda, olia abanga wali wa kumusaliti. Kulanda kisinka, Yesu waabombele ezio miilo waikeefiizie. Kisia papo, wene waabepuziizie evi: “Ati, mwamana kinamisambila? Muli mwankuuta nangue ‘Kasambilizia,’ kabili muli mwalanda nangue [ndi] ‘Mulopue.’ Kisinka, muli mwalanda sie bwino pantu i vindi. Kansi, kine ne Mulopue ni Kasambilizia wenu namisamba makasa enu, ni mwemue muye mwakita evio vyenka.”—Yoan. 13:​12-14.

11. Ni kiki kyaakitile Petro kilangiliile nangue waasambiliile kwikeefia? (1 Petro 5:5) (Mona ni foto.)

¹¹ Mibele ya kwikeefia yakue Yesu yaamusambiliziizie Petro lisomo limo. Kisia Yesu kubwela ku muulu, Petro waakitile kimpezia-mano kya kumukosia mwalalume umo olia waavyelue wali kilema. (Miil Bat. 1:​8, 9; 3:​2, 6-8) Kekio kimpezia-mano kyaapapiizie sana libumba lya bantu ni kulengia bamuzyungulukile Petro. (Miil Bat. 3:11) Inzi, Petro taatonene bantu bamupozeko sana mano ata sie kine waakuliile mu fwasi molia mubanga mwali bantu bengi baalia babanga batona sana kutasiiwa ao kumanika. Kuliko kukita evio, wene waaikeefiizie ni kubalanda bantu bamutasie Yehova pamo ni Yesu. Waalandile evi: “[Wene] waketekelanga mu liina lyakue Yesu. Ni keki kiketekelo i kyamukosyanga.” (Miil Bat. 3:​12-16) Kisia, Petro waabalembeele Bakristu mukanda evi kubabwila juu ya ki ni kintu kya mana kwikeefia. Kukonkana ni lulimi lwa ku ntendeko, waabombiizie milandu elia iletele liwazo lya kuvwala kwikeefia nga evelia ngubo. Kekio kyatulangulusia kintu kyaakitile Yesu. Wene waakakile kitambala mu kitungu kyakue ni kusamba makasa a batumua bakue.—Soma 1 Petro 5:5.

12. Nga evelia Petro, ni biki bitupalile kukita evi kulangilila nangue tutwaliliile kwikeefia?

¹² Kunti twakonka mufuano wakue Petro wa kulangilila mibele ya kwikeefia. Languluka nangue kwikeefia kwa kisinka te kupeleele sie pa kulanda milandu iweme. Mulandu “kwikeefia,” olia ubombiizie Petro, ulangiliile nangue kwikeefia kwa kisinka kubiikile mukati mawazo atuli nao pa lwetu ni palua bange. Tuli twabakwasia bange pantu tubatonene, kabili pantu tumutonene Yehova. Tetwizi kukita evio pantu tuli twatona kutasiiwa ao kumanika. Kunti twalangilila nangue tuli twaikeefia, kine tuli twamubombela Yehova kwa nsansa ni kubakwasia ba lupua betu kukonkana ni buvinde bwetu, ibe bange batumwene ao ata.—Mat. 6:​1-4.

UYE “WATEEKAMEENE”

13. Londolola mana ya ‘kuteekamana.’

¹³ ‘Kuteekamana’ kuli na mana ki? (1 Pet. 4:7) Mukristu olia ateekameene ali waikwinda kukwata bupinguzi buweme bolia bupateene ni mawazo akue Yehova. Ali wasangua wamanine nangue te kuli kintu kikilile kuwama mu bwikazi kupita burafiki bwakue pamo ni Yehova. Ali wasangua wali ni mawazo asawazikile pa lwakue, i kulanda, ali wasangua waitabiile nangue kuli ni bintu byasimanine. Kabili, ali walangilila nangue amuswapiile Yehova kupitila kuya wapepa kuli wene lyonse evi apate butunguluzi.b

14. Mu kipindi kimo, Petro waandilue syani kumuswapila Yehova?

¹⁴ Busiku bwa kupeleezia ntanzi tanaipaiwe, Yesu waabanine evi basambi bakue: “Bono busiku, mwe bonse muli kubutuka ni kunsia bunke.” Petro waalandile evi waiswapiile: ‘Nene wene nsikusia anzia kine bange bonse bakusia!’ Mu bolia bwenka busiku, Yesu waabasokele evi bamo pakati ka basambi bakue: “Twalilile kukeesia ni kupepa lyonse.” (Mat. 26:​31, 33, 41, NWT) Petro akonkenge azo masoke lwa ntanzi, nga wasipile ni kulanda nangue abanga wali musambi wakue Yesu. Kya bulanda, Petro waamukeene Mulopue wakue, kekio kyaalengiizie onvue sana bulanda.—Mat. 26:​69-75.

15. Ni kiki kilangiliile nangue Yesu waatwaliliile kuya wateekameene mu busiku bwakue bwa kupeleezia panu pa kyalo?

¹⁵ Yesu abanga wamuswapiile sana Yehova. Ata sie kine Yesu abanga wapwililikile, abanga wapepa lingi. Kekio kyaamukwasiizie aye wasipile ni kuvinda kukita kutona kwakue Yehova. (Mat. 26:​39, 42, 44; Yoan. 18:​4, 5) Kulanda kisinka, Petro taalabilepo ata limo Yesu vyaapepele mara ingi mu busiku bwakue bwa kupeleezia panu pa kyalo.

16. Petro walangiliile syani nangue abanga wateekameene? (1 Petro 4:7)

¹⁶ Kupwako, Petro waakilile kumuswapila Yehova. Waalangiliile evio kupitila kuya wapepa kuli wene. Kisia Yesu kutuntumunua, waamusininkiziizie Petro pamo ni batumua bange nangue bakaba kupokelela mupasi utakatifu evi bakabe kuvinda kusimikila mpunda iweme. Inzi, Yesu waabalandile bapembelele bali mu Yerusalemu mpaka kekio kikitike. (Luk. 24:49; Miil Bat. 1:​4, 5) Petro abanga wakita ki musita lwabanga wapembeleele? Wene pamo ni Bakristu benakue “baali bapepela pamo na mutima umo.” (Miil Bat. 1:​13, 14) Kisia, mu mukanda wakue wa kwanza, Petro waabakoseleziizie Bakristu benakue baye bateekameene ni kumuswapila Yehova kupitila kupepa kuli wene. (Soma 1 Petro 4:7.) Petro waasambiliile kumuswapila Yehova, kabili waalukile lipumpu mu kilonghaano.—Bag. 2:9.

17. Ata sie kine pange tuli ni buvinde fulani bwa kavyalilua, tupalile kutwalilila kukita ki? (Mona ni foto.)

¹⁷ Evi tuye twateekameene, tupalile kuya twapepa lingi kuli Yehova. Tupalile kuya twakita evio ata sie kine tuli ni buvinde bwa kavyalilua. Pa kako, kine tuli ni bupinguzi butupalile kukwata, tupalile kupepa kuli Yehova evi atutungulule, twaswapiile nangue wene amanine bwino bintu bituli nabio lazima.

18. Wewe wapingula kutwalilila kukita ki?

¹⁸ Tuli ni nsansa sana pantu Yehova waatubumbile twali ni buvinde bwa kulangilila mibele nga yakue. (Kut. 1:26) Inzi, kulanda kisinka, tetuvinda kulangilila mibele yakue Yehova mu nzila ipwililikile. (Is. 55:9) Ata sie evio, nga evelia Petro, tutwalilile kuya twawaza nga Yehova, kuya twaikeefiizie, ni kuya twateekameene.