Bombia Bibilia nga Evelia Kio

Musambi Yakobo waapalaniizie Bibilia na kio pantu ili yatukwasia kumona bumuntu bwetu bwa mukati. (Yak. 1:​22-25) Kunti twabombia syani Bibilia nga evelia kio?

Uye waisoma wapozeleko sana mano. Kine twaikenta sie lubilo-lubilo mu kio, kunti twaandua kumona litaka litupalile kwifumia. Enka evio, evi tuvinde kumana bintu bitupalile kuwamia ku bumuntu bwetu bwa mukati, te tupalile kusoma Mulandu Wakue Leeza lubilo-lubilo, tupalile kuusoma twapozeleko mano.

Uye wawaza sana pa lobe kuliko kuwaza palua bange. Nsita inge, kine fwefue twaikenta mu kio, kunti twamonamo ni muntu unge kine ali pepi, kabili pange kunti twapoza sana mano ku litaka lyali nalio. Enka evio, kunti kyakitika tuye twasoma Bibilia ni kutendeka kuwaza palua bilubo bya muntu unge, belia byapalile kulekela. Inzi, kukita evio te kuvinda kutukwasia kupwisia bilubo bituli nabio.

Uye wali ni mano ateekameene. Kine twapoza sana mano ku mataka etu fwe bene, alia atuli twamona musita utuli twaikenta mu kio, kunti twatyoka mutima. Pa kako, musita utuli twasoma Mulandu Wakue Leeza, tupalile kuya twali ni mano ateekameene. Te tupalile kuya twakeba kukita bintu bingi sana bipitile buvinde bwetu, pantu Yehova tatulombele tukite evio.—Yak. 3:17.