CHUTI RIKÁ NOKIBOA JAPI RIKÁ CRISTO
Napawíliwami japi bikiá rawé rojorá, ata néwariwéliti japi ta we galéami ju
¿Chúsiá ta we kanili simiba japalí kaachi napawíliwami japi bikiá rawé rojorá? Japi riká omáwili chabé echomí Israel piréami, jipi ayénachó ti biné alí wikarani Jeobá wiká hermanos yúa. Ata iʼaliwa publicaciones, videos, audios, alí ta kipú nawésali we natéami. Ayénachó ti yúa raʼicha japi tamujé amígowala ju alí tamujé téemala. We ti natéami niraa echalí rawé simiba alí ti iʼwérili noká simiba bikiá rawé.
Japalí ta napawí, tasi bi natabo japi jarecho tamujé we galema, nalí ayénachó tamujé we galepo jarecho (Gál 6:10; Heb 10:24, 25). Ata newa noká japalí ta muchuwasa echi oselí japoná ta bi mochíboré o iʼwiria ma irapia echi yewi bilé hermano (Flp 2:3, 4). Echoná asambleas ayénachó ti aapo amigos. ¿Chúsiá mi ke yúa raʼicha japi mi kecho machí? Ami echi riká isima kecho chotásiachi echi programa o ma kuwanílachi echi programa o ayénachó japalí mi koʼyá iyena nasipa rawé (2Co 6:13). Na amigos ko sinibí mujé amígowala nímalé. Jarecho ko machimea japi tamujé ne bichíwali galéami ju, alí ayénachó ma si nijéwimiré Jeobá (Jn 13:35).
INEPO ECHI VIDEO ASAMBLEAS INTERNACIONALES “SINIBÍ GALÉAMI NIPO”, ANISÍ JAPI TI MI NÁRIPORÉ JENAʼÍ:
¿Piri nokali echi hermanos jiti néwariwélima japi we galé echi delegados japi simíali asambleas internacionales 2019?
¿Chúsiá echi pagótami machinali chúsiá we galéami ju echi testigo Jeobá?
¿Piri namuti we natéami ruyeli echi hermanos Japi Aʼlá Niseri jiti sinibí galéami nima echi hermanos?
¿Piri mi isima jiti mi néwariwélima japi mi we galé echi hermanos echoná napawíliwami japi bikiá rawé rojorá?
¿Piri nokali echi hermanos echoná Alemania alí Corea del Sur jiti néwariwélitima japi we galéami ju?
¿Piri ta nokisare?