Binelíwami 3

¿Jépuká ju Jesucristo?

¿Chúsiá Jesús rewaliwa Onorúami Nolá “bacháwala”? (1)

¿Chúsiá rewaliwa “echi Raʼíchali”? (1)

¿Chúsiá Jesús nawali jenaʼí Wichimóbachi japi riká rejoy? (2-4)

¿Chúsiá isiili weli namuti? (5)

¿Piri isíimalé Jesús pe aminana mi? (6)

1. Japalí kecho nawayá jenaʼí Wichimóbachi, Jesús ko biteili ripá rewegachi japi riká bilé ángel. Echi ko né bachá niwárami nili Onorúami kitra; kiti bela rewaliwa Onorúami Nolá “bacháwala” (Colosenses 1:15, NM; Apocalipsis 3:14). Pe Jesús bineli bi niwárami nili Onorúami kitra. Jeobá ko néeli Jesús japalí kecho nili japi riká bilé rejoy, japi riká “waʼlú nóchami”, japalí niwali suwaba namuti ripá siyónachi nirúami alí jenaʼí Wichimóbachi (Proverbios 8:22-31; Colosenses 1:16, 17). Onorúami ayénachó néeli Jesús japi riká bilé nawésami we natéami. Kiti bela Jesús ko rewaliwa “echi Raʼíchali” (Juan 1:1-3, NM; Apocalipsis 19:13).

2. Onorúami ko júali kipi Nolá jenaʼí Wichimóbachi, echi ko achábali echi Jesús bitéala echoná María ropálachi. Kiti bela Jesús ko ke olali bilé onolá jenaʼí Wichimóbachi bitéami alí kecho nachuli echi namuti chati. Onorúami ko júali Jesús jenaʼí Wichimóbachi kiti isiima bikiá namuti we natéami: 1) kiti binérima echi bichíwali Onorúami kitra (Juan 18:37), 2) kiti né sébali nijéwima Onorúami alí kiti binérima japi chúriká ta pirélisaré (1 Pedro 2:21) alí 3) kiti nijima binói bitéala kiti ta niyúbitami niba echi mukuwáami kitra alí echi chati namuti. ¿Chúsiá mukusaa riweili? (Mateo 20:28.)

3. Japalí ma ke nijéwili echi Onorúami nuláala, echi rejoy bacháwala, Adán, isiili japi echi Biblia ané “cha isimíwami”. Kiti bela Onorúami ko aneli kiti mukumea riké (Génesis 3:17-19). Kiti ma ke sébali nijéwili echi Onorúami nuláala, echi ripokala ma ke aʼlá nili. Kilipi kilipi niraa ochérami ayenli alí mukuli. Adán ko nachútali echi chati sinéami abói kúchuwala. Kiti bela tamujé ayénachó ochérsimi, nayúnsimi alí ta suwí. ¿Chúriká omérosa riweili niyubia echi pagótami? (Romanos 3:23; 5:12.)

4. Jesús tasi olali namuti chati ripokálachi japi riká Adán. Nalí Jesús ko suwaba sébali nijéwami nili Onorúami, tákoré né wabé risoa olairu. Kiti bela echi ko oméroli nijía kipi bitéala japi ke olali chati namuti kiti natétima echi namuti chati japi Adán isiili. Echi Biblia ko rewá “natétiwami” jepuná isimíwami. Echi riká echi Adán kúchuwala niyúbitami nima riweili echi mukuwáami kitra. Sinéami japi a bichiwi ko Jesús a wikáwitami nima alí narema sinibí piréliwami (1 Timoteo 2:5, 6, NM; Juan 3:16; Romanos 5:18, 19).

5. Japalí jenaʼí Wichimóbachi biteili, Jesús ko saʼweli nayúami, kóali echi pagótami alí raʼámali waʼlú baʼwí. Ayénachó ku jawásili suwíkami. ¿Chúsiá isiili weli namuti? 1) Natimáami nili echi pagótami japi risoa nili alí kuʼírinalami nili. 2) Néwariwéili japi Onorúami Nolá nili. 3) A néwariwéili piri isiima kiti kuʼírima echi pagótami nijéwami japalí echi nulasa japi riká Silíami omáana Wichimóbachi (Mateo 14:14; Marcos 2:10-12; Juan 5:28, 29).

6. Jesús ko mukuli, Onorúami ko ku wilásili japi riká ángel alí ku roʼili ripá rewegachi (1 Pedro 3:18). Pe aminana ko Onorúami wilali Silíami niraa. Jesús ko ma keʼayó suwábama echi namuti chati alí echi risoa níliwami japi nirú jenaʼí Wichimóbachi (Salmo 37:9-11; Proverbios 2:21, 22).

[Iyóktami/Foto japi uchuwi echoná página 7]

Jesús binérili, weli namuti isiili, alí mukuli kiti ta pirélipa