Binelíwami 4
¿Jépuká ju echi Diablo?
¿Chúsiá nirú Diablo? (1, 2)
¿Chúriká eki echi pagótami? (3-7)
¿Chúmisiá ke nijéwisaré echi Diablo? (7)
1. Echi raʼíchali “diablo” ko aniwáami ju japi bilé pagótami aní ikaléwami chati bilecho kitra. “Satanás”, jepuná raʼíchali ko aniwáami ju sayériwami. Jepuná okuá raʼíchali kitra ta binériwa chu isíiami ju echi Onorúami sayérala. Chabéi ko bilé ángel aʼlá wachía isíiami nili, Onorúami yúa biteili ripá rewegachi, we nalí echi ko we niráami nílisili alí nakili kiti echi nalí nijéwipa alí Onorúami ko ke (Mateo 4:8-10).
2. Jepuná ángel, Satanás, Eva yúa raʼíchali néeka bilé sinói alí ikaleka raʼíchali kiti ke nijéwima Onorúami. Echi riká isiika, Satanás néwariwéili kiti ke nakiyé japi Onorúami Walubéala Wilíami nima. Mayérili kiti Onorúami ko ke aʼlá machiká nulema echi pagótami. Ayénachó anili kiti ke wesi nirúlima japi sinibí nijéwima Onorúami. Echi riká isiika, Onorúami sayérala najítili. Kiti bela Satanás alí Diablo rewárami nili (Génesis 3:1-5; Job 1:8-11; Apocalipsis 12:9).
3. Satanás ko eki echi pagótami kiti echi nalí nijéwipa (2 Corintios 11:3, 14). Echi ko néeka isimí echi bichíwiliami japi ke bichíwali ju. Echi ko eki echi pagótami japalí bilé bichíwiliami bineri ikaléwami Onorúami kitra (Juan 8:44). Echi pagótami japi simía bichíwiliami japi ke bichíwali ju a mayéi larú japi nijewi echi Onorúami né bichíwali, we nalí be noká japi Satanás nakí, kiti echi “walubéala nuláami ju [...] jenaʼí wichimóbachi” (2 Corintios 4:4).
4. Ayénachó Satanás ko eki echi pagótami néeka echi sipabúwami. Jaré ko echi sipabúami yúa simía kiti tibútami nima, kiti risoa olama jarecho, kiti animea japi ikimea pe aminana mi, nokiméiré ma weli namuti. Satanás ko isimí kiti echi pagótami nokimea jepuná namuti chati. Ata kanílitinalaká Onorúami, tasi ta bilé machinálisaré echi sipabúwami kitra (Deuteronomio 18:10-12; Hechos 19:18, 19).
5. Satanás ko ékika isimí echi pagótami néeka echi gobiernos. Ayénachó eki echi pagótami mayérika kiti echi nalí we natéami ju alí jarecho ko ke. We nalí echi ko kepi bichíwali ju pa (Hechos 10:34, 35). Jarecho ko a mayé kiti echi gobiernos a kariwema echi namuti chati. Jériká nokaká newaré kiti ke nakí echi Onorúami Gobiérnowala, alí jepuná gobierno bi ju japi kariwema echi namuti chati (1 Corintios 15:24).
6. Satanás ayénachó isimí kiti echi pagótami nokinálima namuti chati, echi riká ékitami ju. Jeobá ko aní kiti ke nokiboa echi namuti chati kiti echi ko a machí kiti ta risoa nílipa ata nokisáaká echi (Gálatas 6:7, 8). Jaré pagótami a nakiméalé kiti mi isiima japi riká echi noká. We nalí ami newalásaré kiti Satanás nalí nakí kiti mi isiima echi namuti chati (1 Corintios 6:9, 10; 15:33).
7. Satanás ko a omero isiá kiti mi risoa olárami nima kiti mi riwema Jeobá. Jaré pagótami japi mi we nakí pe naʼáwimiréma kiti mi binéampá echi Biblia. Jarecho ko achiméalé mi kitra. We nalí be, ¿jépuká mi iyali echi bitéliwami? Satanás ko mi majárinali kiti mi riwema binea Jeobá kitra. Kiti riwé kiti niyúroma Satanás (Mateo 10:34-39; 1 Pedro 5:8, 9). Ami anachásaká japi isimí echi Diablo, ami oméroma kanílitia Jeobá alí néwariwélitia kiti mi a nakí japi echi nulama (Proverbios 27:11).
[Iyóktami/Foto japi uchuwi echoná página 9]
Satanás eki néeka echi bichíwiliami ke bichíwali, echi sipabúwami alí japalí echi pagótami kichika noká
[Iyóktami/Foto japi chukú echoná página 9]
Aminabi wabé biné Jeobá kitra kiti mi anachama japi echi Diablo isimí