Binelíwami 6
¿Piri ju echi Onorúami Gobiérnowala?
¿Kumi wilárami ju echi Onorúami Gobiérnowala? (1)
¿Jépuká ju echi Silíami? (2)
¿A nirúiré jarecho japi nulama echi Silíami yúa? A nirúaká, ¿chu kipi? (3)
¿Chúriká ta machí japi ta kuwachimi rawé piré? (4)
¿Piri isiima echi Onorúami Gobiérnowala kiti kuʼírima echi pagótami? (5-7)
1. Japalí Jesús biteili jenaʼí Wichimóbachi, binérili kipi najátowala japi raʼíchaka tama japi ma chotásima nulasia echi Onorúami Gobiérnowala. Tasi bilé nirú gobierno japi riká echi Onorúami Gobiérnowala. Ripá rewegachi wilárami ju alí nulema echi pagótami japi piré jenaʼí Wichimóbachi. A machírimalé japi ikaléwami nili echi namuti chati japi aniwái Onorúami kitra. Isiima japi Onorúami nakí jenaʼí Wichimóbachi echi riká japi riká ripá rewegachi (Mateo 6:9, 10).
2. Onorúami ko anili japi Jesús Silíami nima riweili ripá rewegachi (Lucas 1:30-33). Japalí Jesús biteili jenaʼí Wichimóbachi néwariwélitili japi Silíami nima riweili kami aníamti, wachía isíiami, alí ke sineti isiima riweili namuti chati. Japalí ku roʼili ripá rewegachi, ke né ayó chotásili nulayá (Hebreos 10:12, 13). Echi bamíali 1914 Jeobá iyali Jesús echi nulalíwami japi iyama ruli. Echalí jonsa Jesús nulá ripá rewegachi japi riká Silíami echoná echi Onorúami Gobiérnowala (Daniel 7:13, 14).
3. Jeobá ayénachó a chapili jaré pagótami nijéwami japi jenaʼí Wichimóbachi piréami ju kiti simama ripá rewegachi. Jepuná pagótami ko nulema echi pagótami jenaʼí Wichimóbachi piréami alí Jesús yúa nulama japi riká isélikami (Lucas 22:28-30; Apocalipsis 5:9, 10). Jesús ko riwali “pe okuaa” buʼwá echi 144,000 pagótami japi yúa nulámaré echoná ripá rewegachi (Lucas 12:32; Apocalipsis 14:1-3).
4. Japalí Silíami wilairu Jesús, machí awali echi Satanás alí echi ángelwala chati alí jenaʼí Wichimóbachi awátami nili. Kiti bela wiká namuti chati muwésimiba jenaʼí Wichimóbachi 1914 jonsa (Apocalipsis 12:9, 12). Echi weli nakówami, lochéwami, nawilí, echi cha nokiwáami..., suwaba jepuná ko bilé bawelá ju japi ta binériwa japi Jesús ma nulá alí ma keʼayó suwábitami nima echi pagótami chati (Mateo 24:3, 7, 8, 12; Lucas 21:10, 11; 2 Timoteo 3:1-5).
5. Jesús ko oyérima echi pagótami alí rojanama japi riká bilé niséami rojacha echi buʼwá chiva yúa. Echi ko rewama “buʼwá” sinéami japi néwariwéliti japi echi kitra nulérami nínali ko, alí echi ko nijima sinibí piréliwami jenaʼí Wichimóbachi. Rewama “chiva” echi japi ke nakí echi Onorúami Gobiérnowala (Mateo 25:31-34, 46). Ma keʼayó, Jesús suwábama sinéami echi pagótami japi riká chiva ju ko (2 Tesalonicenses 1:6-9). Ami Jesús buʼwáwala nínalaká, ami kipúsaré japi binériwa echi Onorúami Gobiérnowala kitra alí ami isíisaré japi mi biné (Mateo 24:14).
6. Echi Wichimóbachi wikaná niraa rojanárami ju países niraa alí ibili niraa a olá kipi Gobiérnowala. Wisabé niraa echi países nakowa anakupi niraa. We nalí echi Onorúami Gobiérnowala suwábima sinéami echi isélikami jenaʼí Wichimóbachi piréami. Echi bi bineli nulama omáana Wichimóbachi (Daniel 2:44). Alí biché ma ke che nirúlima weli nakówami, miʼaká nakówami, sinéami echi pagótami napawika pirélima kilii niraa (Miqueas 4:3, 4).
7. Japalí Jesús nuláachi bilé mili bamíali, echi pagótami nijéwami ma ke chati oláami nima alí omáana Wichimóbachi we baʼóami ayenama. Japalí ma suwíasa echi mili bamíali, Jesús ma sunima isiá suwaba japi Onorúami nakili japi isiima. Alí biché iyama echi Gobierno binói Onolá (1 Corintios 15:24). ¿Chúsiá mi ke ruyé mujé téemala alí mujé amígowala japi Onorúami Gobiérnowala isíimalé?
[Iyóktami/Foto japi chukú echoná página 13]
Japalí nuláachi Jesús, ma ke che nirúlima nakichíwami, alí echi pagótami ko anakupi niraa nakiká nokimea