Binelíwami 8
Wénwala alí kúchuwala japi kaníliti Onorúami
¿Jépuká ju echi walubéala echoná bitichí? (1)
¿Chúriká tibúsaré echi kunala kipi upila? (2)
¿Piri isíisaré echi onolá? (3)
¿Piri namuti isíisaré echi upila echoná bitichí? (4)
¿Piri nakí Onorúami japi nokimea echi wénwala alí kúchuwala? (5)
¿Piri bineri echi Biblia echi divorcio kitra alí echi rojaníwami? (6, 7)
1. Echi Biblia ko aní japi echi kunala né walubéala ju echoná bitichí (1 Corintios 11:3). Echi rejoy bilepi olásaré mukí alí echi yúa niwísaré osaká bilé oselí japi riká nulá echi gobierno (1 Timoteo 3:2; Tito 3:1).
2. Echi kunala ko we nakisáré kipi upila japi riká binói nakí. Ke siné risoa olásaré, japi riká Jesús ke siné risoa olali kipi najátowala (Efesios 5:25, 28, 29). Ke siné chonisáré kecho risoa inílitisaré. We nalí riwíwisaré alí nakisáré (Colosenses 3:19; 1 Pedro 3:7).
3. Echi onolá ko we nochásaré kiti oméroma iʼáya japi newalé echi upila alí echi kúchuwala. Iyásaré koʼwáami, napacha alí japoná pirélima kipi kúchuwala alí upila si. Ayénachó kuʼírisaré echi kúchuwala alí upila kiti ke siné riwema Onorúami (1 Timoteo 5:8). Ayénachó binérisaré Onorúami kitra alí japi isíimaré (Deuteronomio 6:4-9; Efesios 6:4).
4. Echi upila we aʼlá kuʼírisaré binói kunala (Génesis 2:18). Ayénachó binérisaré kipi kúchuwala kiti kuʼírima binói kunala (Proverbios 1:8). Jeobá ko ané echi upila kiti we nakimea kipi kúchuwala, kunala si (Proverbios 31:10, 15, 26, 27; Tito 2:4, 5). Echi mukí we aʼlá riwíwisaré binói kunala (Efesios 5:22, 23, 33).
5. Onorúami ko nakí kiti echi kúchuwala a nijéwima abói wénwala (Efesios 6:1-3). Echi ko nakí kiti echi wénwala aʼlá binérima alí busuréwima kipi kúchuwala. Echi wénwala ko kuʼírisaré namuti nokayá abói kúchuwala yúa alí binésaré echi Biblia echi yúa. A kuʼírisaré kiti kami nilia nílima kiti a mulíwima Onorúami (Deuteronomio 11:18, 19; Proverbios 22:6, 15). Ke siné risoa olásaré abói kúchuwala (Colosenses 3:21).
6. Japalí echi niwíkami olá cha ikiwáami, aʼlá ju kiti nijéwima echi busuréliami japi nirú echoná Bíbliachi. Echi Biblia aní japi ta nakiká nokisáré alí wikáwika (Colosenses 3:12-14). Echi Onorúami Raʼicháala ko ke nakí japi ku rojama kiti kariwema echi namuti japi ke me natéami ju. We nalí echi upila ko a oméromalé ku rojaa echi kunala 1) japiré echi kunala ke nijínilisaká japi newalé echi upila alí kúchuwala, 2) japiré we chonáami nísaká alí echi upila pe nayúnimiré ma mukuméalé ma, alí 3) japiré wabé risoa nílitika olá echi upila kiti ke mulíwima Jeobá (1 Corintios 7:12, 13).
7. Echi niwíkami ko ke tasi bitisáré pagótami iseni yúa. Jepuná ko we chati ju alí we cha iníliti Onorúami alí echi niwíkami (Hebreos 13:4). Japiré echi kunala upila ma, iseni pagótami yúa nasawisa, echi bi isíisaká, echi Biblia ko aní japi echi niwíkami a oméroma osayá bilé oselí japi rojákiwami ju, alí ma rojásaká, a checho ku omérosaré niwía a echi riká nakiyáaká (Mateo 19:6-9; Romanos 7:2, 3). Jeobá ko we kichí japiré bilé osisá bilé oselí rojákiwami, alí niwisa bilecho yúa, japalí ke risensia nijisa echi Biblia (Malaquías 2:14-16).
[Iyóktami/Foto japi uchuwi echoná página 16, 17]
Echi Onolá nakíami iyá kipi kúchuwala alí upila japi newalé alí kuʼiri kiti mulíwima Onorúami
[Iyóktami/Foto japi chukú echoná página 17]
Onorúami ko nakí kiti echi wénwala aʼlá binérima alí busuréwima kipi kúchuwala