Binelíwami 9

Aʼlá biʼwíami nísaré

¿Chúsiá ta aʼlá biʼwíami nísaré suwaba namuti kitra? (1)

¿Piri ta nokisáré kiti ta olaba bichíwiliami né bichíwali? (2) ¿Alí kiti ta olaba bitéliwami biʼwíami? (3) ¿Alí kiti ke chijúntami nataba? (4) ¿Alí ripoká biʼwíami alí kalí pichítami? (5)

¿Chu iyiri ju echi raʼíchali chijúntami japi ta ke raʼichásaré? (6)

1. Onorúami Jeobá ko né wabé biʼwíami ju. Echi ko nakí japi sinéami japi a nijewi olama echi bichíwiliami né bichíwali, echi bitéliwami biʼwíami alí we aʼlá natáliami alí ripoká biʼwíami alí kalí pichítami (1 Pedro 1:16). We jiwérili nokisáré kiti ta né aʼlá biʼwíami niraa inérami niba Onorúami kitra. Ata piré biléana kawírili japoná nirú cha nokiwáami. Alí tako ta cha nokinali ata jiwérili nokisáré kiti ta ke nokiboa, ke be ta risisáré ba.

2. Bichíwiliami né bichíwali: Ata nijéwinalaká Jeobá, tasi ta bichíwisaré japi bineri echi bichíwiliami japi ke bichíwali ju, kecho omowásaré echi yúa japi Onorúami ke kalé. Ata buyásaré japoná bineri bichíwiliami japi ke bichíwali ju alí ke bilé kuʼírosaré japi noká jepuná bichíwiliami (2 Corintios 6:14-18; Apocalipsis 18:4). Japalí ta ma binésaká echi bichíwali Onorúami kitra, ata tibúsaré kiti ta ke ékitami niba echi pagótami kitra japi bineri ikaléwami (2 Juan 10, 11).

3. Bitéliwami biʼwíami: Jeobá ko nakí kiti suwaba japi ikí noká japi a nijéwami ju echi, a néwariwélitisaré kiti né Jesús najátami ju (1 Pedro 2:12). Echi ko iné suwaba namuti japi ta noká, ayénachó japi ta ichípika noká (Hebreos 4:13). Tasi ta nasawísaré iseni pagótami yúa, kecho nokisáré namuti japi riká echi alí echi namuti chati japi noká echi pagótami (1 Corintios 6:9-11).

4. We aʼlá natáliami: Ata né kalabé niraa natásaká, né kalabé niraa nokibóalé (Filipenses 4:8). We nalí japiré ta sinibí natásaká namuti chati, ata nokibóalé namuti japi ke aʼlá ju (Mateo 15:18-20). Ke ta inésaré echoná televisión japi chati ju kecho ta riʼésaré alí leérisaré oselí chati kiti ta ke chati namuti nataba. Ata binésaká Onorúami Raʼicháala ata we kalabé namuti natábalé.

5. Ripoká biʼwíami alí kalí pichítami: Japi ta Jesús najátami ju ko, ata raʼicha Onorúami kitra, kiti bela ata biʼwíami nísaré, alí ata ubásaré alí aʼlá wichósaré. Ata paníwisaré japalí ta chapisá namuti choliwéami, ayénachó japalí kecho koʼá alí japalí ta chapí koʼwáami. Ata tósaré echi witá japiré ke itélisaká japoná papa (Deuteronomio 23:12, 13). Echi ubáliami ko nikuuro kiti ta ke nayúnipa. Echi Jesús najátami pirélachi aʼlá kariwera wilisáré alí pichita wilisáré, pachá ayé alí machí ayé. Sinéami echoná puéblochi piréami a machisáré japi ta mi we aʼlá simárika piréami ju.

6. Kalabé raʼicháliami: Echi japi a nijéwami ju Onorúami sinibí a raʼichásaré echi bichíwali. Echi kaléami ko ke narema echi namuti kalabé japi nijima echi Onorúami Gobiérnowala (Efesios 4:25; Apocalipsis 21:8). Echi Jesús najátami ko ke chati raʼíchami ju. Ke kipú alí kecho raʼicha raʼíchali chijúntami. A machiwá echoná japoná nocha, echoná escuélachi alí echoná puéblochi kiti we aʼlá raʼíchami ju (Efesios 4:29, 31; 5:3).

[Iyóktami/Foto japi uchuwi echoná página 18, 19]

Echi Onorúami amígowala ko we biʼwíami nísaré suwaba namuti kitra