Binelíwami 11

Bichíwiliami alí omáwali japi Onorúami ke kalé

¿Chu iyiri bichíwiliami alí omáwali chati ju? (1)

¿A bichíwisarikeʼré echi Jesús najátami japi Onorúami bilé Trinidad ju? (2)

¿Chúsiá echi Jesús najátami né bichíwali ke omawa Navidad, Semana Santa alí japalí ranarúami nili? (3, 4)

¿A omérimiré echi suwíkami risoa olayá echi japi a piré? (5)

¿A mukúliré Jesús biléana kúrsichi? (6)

¿Chu me natéami ju kanílitiwa Onorúami? (7)

1. Tasi né suwaba echi bichíwiliami alí omáwali chati ju. We be nalí Onorúami ko ke kalé echi bichíwiliami ba japi jona inaro echi bichíwiliami japi ke bichíwali ju alí japi bineri japi aʼlá ju japi echi Biblia aní japi chati ju (Mateo 15:6).

2. Trinidad: ¿Acha bilé trinidad keʼré Jeobá, we chakó chopi iyiri keʼré Jeobá, Jesús alí echi espíritu santo si? Ke. Jeobá ju echi Onolá, “echi Bilepi né Bichíwali Riosi ju” (Juan 17:3; Marcos 12:29). Jesús ko ju echi Nolá Bacháwala alí nijewi Onorúami (1 Corintios 11:3). Echi Onolá ko walúala ju alí echi Nolá ko ke me (Juan 14:28). Echi espíritu santo ko tasi bilé pagótami ju; echi ko Onorúami jiwérala ju (Génesis 1:2; Hechos 2:18).

3. Navidad alí Semana Santa: Jesús ko ke ranarúami nili 25 diciembre mechá, a mayewa japi ranarúami nili 1 octubre mechá níliré ma, japalí echi buʼwá niséami niseli ipó ayé japalí rokó nili (Lucas 2:8-12). Jesús ko ke sineti nuleli kipi najátowala japi omowama japalí ranarúami nili. Japi a nuleli ko japi newalama echi ko nili echi mukúala kitra (Lucas 22:19, 20). Echi Navidad alí japi omowáliwa ko inaro echi bichíwiliami kiʼyáwala jonsa japi ke bichíwali ju, ayénachó japalí omowá echi Semana Santa alí awiyá alí ke koʼyá sapá. Echi né bacháwala Jesús najátami ko ke omáwali echi Navidad ni bilé omáwali Semana Santa, kiti bela jipi rawé kecho echi riká noká echi Jesús najátami né bichíwali.

4. Japalí omowáliwa japalí ranarúami nili: Echi Biblia ko raʼicha pe okuabi pagótami japi omáwali japalí ranarúami nili, we nalí echi pagótami ke nakíami nili Jeobá (Génesis 40:20-22; Marcos 6:21, 22, 24-27). Echi bacháwala Jesús najátami ke omáwaka nokali japalí ranarúami nili. Echi omowalíwami ko inaro echi bichíwiliami kiʼyáwala jonsa japi ke bichíwali ju. Echi Jesús najátami né bichíwali a napawika noká alí chiliweka noká sinibí japalí abói nakí.

5. Majáliami echi suwíkami: Echi suwíkami ko ke bilé namuti noká alí ke néwaníli. Tamujé ko ke ta omero kuʼwiria echi, alí tasi ta risoa olárami ju echi kitra (Salmo 146:4; Eclesiastés 9:5, 10). Japalí bilé mukusaa tasi chuʼí najiti, kecho biléana simí bitélisia (Ezequiel 18:4). We nalí isini kaachi echi ángeles chati, japi demonio rewéi, mayérika noká kiti echi ju bilé chuʼí. Tasi ta majásaré echi suwíkami, kecho ta tánisaré echi nikúurala (Isaías 8:19).

6. Kursi: Jesús ko tasi uchairu kúrsichi, bilé usírili nalí. Echoná Biblia, echi raʼíchali griega nee bilé raʼíchali japi aniwáami ju usí, we nalí wiká Biblias ma ke nee jepuná raʼíchali, nalí nee echi raʼíchali kursi. Echi kursi ko inaro echi bichíwiliami kiʼyáwala jonsa japi ke bichíwali ju. Echi né bacháwala Jesús najátami tasi néeli echi kursi ni bilé amachíkili. Kiti bela, ¿ami ko mayé kiti aʼlá ju néeliwa echi kursi japalí ta amachiki? (Deuteronomio 7:26; 1 Corintios 10:14.)

7. Isini kaachi we jilí ju ku riwelia jepuná bichíwiliami alí omáwali. A ma nirúlimiré mujé téemala, mujé amígowala ma japi jemi anema japi ke riwema jepuná bichíwiliami. We be nalí we natéami ju nijéwilia Onorúami nalí alí echi pagótami ko ke me (Proverbios 29:25; Mateo 10:36, 37).

[Iyóktami/Foto japi chukú echoná página 22]

Jeobá ke Trinidad ju

[Iyóktami/Foto japi chukú echoná página 23]

Echi Navidad alí Semana Santa ko inaro echi bichíwiliami kiʼyáwala jonsa ke bichíwali

[Iyóktami/Foto japi chukú echoná página 23]

Ke ta omáwilisaré echi suwíkami kecho majásaré echi