¿Jépuká ju echi “pioni aʼlá nijéwami alí aʼlá nátaka nóchami”?

Japalí kecho mukuyá, Jesús ko waná toká yúa raʼíchali echi naó japi yúa iyenili: Pedro, Santiago, Juan alí Andrés. Aneli japi chu ikimea japalí ma Silíami nisa echalí jubá rawé kaachi, Jesús ko nárili: “¿Jépuká né bichíwali ju echi pioni aʼlá nijéwami alí aʼlá nátaka nóchami, japi wilárami nili echi nuláami kitra kiti nulema echi jaré bitichí nóchami, kiti iyama koʼwáami japalí ma sebachi tétali?” (Mateo 24:3, 45; Marcos 13:3, 4). Jesús ko tasi raʼíchali koʼwáami japi ta koʼá, echi ko nalí raʼíchali japi Onorúami bineri japi riká koʼwáami ju. Jesús ko anili japi jawama jaré pagótami kiti ta sinibí binéritami niba Jeobá kitra né echi riká nokísima né jubá rawé jonsa. ¿Jépuká ju alé?

Echi ko ju pe okuáabi chapirúami japi Jesús najátami ju. Echi Japi Aʼlá Niseri nocha japi riká echi Biblia anili japi nochama riweili echi “pioni”: nijía echi oselí japi Onorúami binériala ju kiti japi Jeobá nóchiliami ju machimea. Echi ko tamujé “ibili niráa ʼyama koʼwáami mapalí ma seba tétali” (Lucas 12:42).

Tibú echi nóchali japi Onorúami nulali jenaʼí Wichimóbachi (Lucas 12:44). Jesús nuleli echi “pioni” kiti tibuma echi pagótami jenaʼí Wichimóbachi pireami japi a noká japi Jeobá nulá, echi “pioni” aní kumi simama nawisasia a nijí oselí japi ta binépa echoná napawíliwachi, ayénachó aʼlá tibúliwa japi kitra niwaliwa echi oselí alí jarecho namuti. Echi “pioni aʼlá nijéwami ju alí aʼlá nátaka nóchami” ata binériwa japi ta machinali japi aní echi Biblia ayénachó néwalelíwa echi oselí japi ta ka simiba nawisasia; japalí napawí wiká pagótami ayénachó ta napawí Japoná biné echi Testigo Jeobá, echi “pioni” ju japi aní piri binéparé.

Echi “pioni” aʼlá nijéwami ju kiti bineri alí noká né japi riká aní echi Biblia alí nawesa echi raʼíchali kalabé, ayénachó aʼlá nátaka nóchami ju alí tibú kiti aʼlá nokimea jenaʼí Wichimóbachi japi Cristo nakí (Hechos 10:42). Jeobá ko we kanili kiti we simárika niwa echi nóchali, kiti bela aminabi muwésimi echi pagótami japi testigo Jeobá nílisimi alí a nirú wiká oselí japi ta binériwa japi aní echi Biblia (Isaías 60:22; 65:13).

• ¿Jépuká wilárami nili kiti binérima echi Jesús najátowala japi aní echi Biblia?

• ¿Chúsiá echi “pioni”aʼlá nijéwami ju alí aʼlá nátaka nóchami?