Nirúlima bilé Gobierno japi nulama suníami jenaʼí Wichimóbachi

¿Ami machiyé japi ma mulipi nulama bilé gobierno jenaʼí Wichimóbachi?... Ayena, echi ko ju Onorúami Gobiérnowala. Echi nima japi niwama jenaʼí Wichimóbachi we baʼóami. ¿Ami che machinali piri ka si isima echi Gobierno?...

Sinéami echi gobierno a jáwili silíami kiti nuláami nima, echi Onorúami ayénachó wilali bilé silíami kiti nuláami nima. ¿Ami machí jépuká ju?... ¡Echi ko ju Jesús! Echi ko ripá rewegachi bité, ma mulipi nulema echi pagótami omáana jenaʼí Wichimóbachi piréami. ¿A aʼlá nuláami nímiré? Japalí ma echi nuláami nisa, ¿ata kanilia pirélipiré?...

¡Ayena a we kanilia pirélipa! We baʼóachi jenaʼí Wichimóbachi, kiti echi pagótami ma ke obátami nima. ¡Tasi iyiri sulika nakoma! Tasi wesi nayuma, kecho suwimea. Japi busukachi ju ku machilima inea, japi ke nami raʼíchiwa ku kipuma. Japi ke omeri iyena ku inama. Sinéami japi echoná pirélima wiká olama koʼwáami. Echi basachí, malibochi alí jarecho si namuti ma ke obátami nima, ami omérima yúa riʼea. Echi pagótami japi ma suwili che ku pirélima, kiti ayénachó mi omérima yúa raʼicha japi riká Rebeca, Rahab, David, Elías alí jarecho si. ¿Ami a kanílisa nili machiyá?...

Jeobá we mi kalé alí echi ko nakí japi mi we kanilia bitélima. Biné japi echi mi ané alí nijewi si japi echi mi nulé. Echi riká mi isíisaká, sinibí mi bitélima we baʼóachi jenaʼí Wichimóbachi. ¿Ami ma kanílisa nili sinibí bitea echoná Wichimóbachi we baʼóachi?...