SECCIÓN 9
Binesi napawika Jeobá kitra
“Nijéwasi echi japi suwaba namuti niwali, japi riká ripá rewegachi alí jenaʼí Wichimóbachi.” (Revelación [Apocalipsis] 14:7, TNM)
Japi riká mi ma bineli jenaʼí oselichi, echoná Bíbliachi ko wiká busuré oserúa uchuwi japi mi bineri alí japi mi yúa bité echoná bitichí. Jeobá ko nakí japi ta mi we kaníliami niipa. Ayénachó ata mi néwariwélitisaká japi ta mi we natéami niraa iné nijewia Jeobá, echi ko jéaní japi “ʼyama suwaba [...] namuti mapu ikítamo newalebo.” (Mateo 6:33.) Onorúami ko nakí japi mi echi amígowala nima. Kiti bela echi riká mi iwérili isíisaré echi amígowala niya, echi bi we natéami ju japi mi isima (Mateo 22:37, 38).
1 WE IWÉRILI ISÍ KITI MI NIMA JEOBÁ AMÍGOWALA
JAPI ANÍ ECHI BIBLIA: “Nijeni níima ʼyemi Onolá, ayénachó ʼyemi níibotamo Nijé kúchuwala”, echi riká aní Jeobá (2 Corintios 6:18). Jeobá ko we aʼláala amigo nínali mi yúa, ami raʼichásaká Onorúami yúa aminabi mi mulíwima. “Sinibí galá tániga raʼichási”, echi riká mi ané Jeobá (1 Tesalonicenses 5:17). Echi ko kanili yúa raʼichawa, nakí japi mi ruyema suwaba namuti japi mi nili alí japi mi nata (Filipenses 4:6). Niwíkami napawika emi kúchuwala yúa raʼíchisi Onorúami, kiti machimea japi mi a bichíwiami ju Onorúami.
Tasi mi raʼichama bi, ayénachó mi kipuma. ¿Chúriká mi isima? Bineka echi Onorúami raʼicháala, alí echi oselí japi echoná Bíbliachi machibúrami ju (Salmo 1:1, 2). Nátika isí japi ma bineli (Salmo 77:11, 12). Ayénachó ami kipuma Onorúami, simiká japoná napawí echi testigo Jeobá (Salmo 122:1-4).
Ayénachó mi binérima echi pagótami Jeobá kitra. Echi riká mi bi isisaká, aminabi mi mulíwima alí we mi machísima Jeobá (Mateo 28:19, 20).
JAPI MI ISIMA:
Sinibí rawé yúa raʼichá Jeobá, echi riká cho isí leeria echi Biblia
Bineri echi kuuchi japi we natéami ju Jeobá amígowala niwa, ke me natéami ju jaré namuti ko japi riká simiwá basalówisia
2 NAPAWIKA KANÍLIKA BINESI JEOBÁ KITRA
JAPI ANÍ ECHI BIBLIA: “Mulubéanasi Riosi yuwa, aʼlí Riosi ayénachó mulubéanama ʼyemi yuwa” (Santiago 4:8). Bilé rawé anisí japi ta mi binepo alí chúrikó ta mi binénali (Génesis 18:19). Sinibí rawé natasi Onorúami kitra, alí mi binérima japi mi yúa bité kiti we machísima Onorúami kitra. Japi aní echi Biblia: “Alí mi binérisaré [Jeobá kitra] mujé kúchuwala alí yúa mi raʼichama japalí mi bitichí ku atí, japalí mi biléana iyena, japalí mi ma ku buʼuyá ayénachó japalí mi biʼyá wilisa” (Deuteronomio 6:6, 7). Echi riká cho aní japi riká anili Josué: “Nijé alí japi ni yúa bité, Jeobá nijéwami nima” (Josué 24:15).
JAPI MI ISIMA:
Japi mi binérimaré bachá bineli biné, ayénachó mi machisáré piri mi binérima echi kuuchi