BINELÍWAMI 11

¿Piri mi isísaré jiti mi we aʼlá binema japi aní echi Biblia?

Japi riká machíina echi oselí

¿Ami siné kaachi mi olali bilé nóchali japi mi nátili japi mi ke omero isiá? Jiti mi ke jilí nirama, ami pe kuabi nóchili isíliré sinibí rawé. Echi riká cho ju japalí ta leeri echi Biblia, ami nátiré japi we jilí ju. Jenaʼí binelíwami ami binema piri mi iʼwírima jiti mi kanila leérima echi Biblia alí mi natama japi aní echoná.

1. ¿Chúsiá we aʼlá ju japi ta sinibí rawé leéripo echi Biblia?

Japi sinibí rawé leeri ko echi Biblia, o “echi Jeobá nuláala”, we kaníliami nima (leeri Salmo 1:1-3). Kulí chotasia ko, pe teeli bi leeri sinibí rawé. Japalí mi aminabi machisaa echi Onorúami Raʼicháala, aminabi mi we kanílima leeria.

2. ¿Piri mi iʼwírima jiti mi we aʼlá binema japi aní echi Biblia?

Jiti we aʼlá binepo japi aní echi Biblia, ata natásaré japi ta leeri. Ke ti bi leérisaré, ayénachó ati “we aʼlá natásaré” (Josué 1:8). Japalí mi leeria asisaa, nárika isí jepuná: “¿Piri ka ni biné Jeobá jitra japi aní na versículo? ¿Chúriká ni nijéwima japi aní jenaʼí? ¿Chúriká ni néema echi versículo jiti ni iʼwírima jarecho?”.

3. ¿Piri mi isima jiti mi a ikírima leeria echi Biblia?

¿Ami we jilí niraa leeria echi Biblia? Wiká echi riká cho ikí. Nalí natá japi aní jenaʼí Bíbliachi: “We yaa galabé olasi suwaba máputamo omero” (Efesios 5:16). Jiti mi omérima echi riká isiá, ami we aʼlá natásaré chúrikó mi leérima. Jaré ko ikiri leeria biʼá. Alí jarecho ko ma aʼlí japalí isábisa. Ayénachó jaré ma rokojó kecho ochimeya. Mujé ru, ¿chúrikó mi mayé japi aʼlá nima jiti mi leérima echi Biblia?

AMINABI NATABO JAPI TA BINÉ

Ma inepo piri ka ti nokisáré jiti ta we kanílipo leeria echi Biblia. Jenaʼí mi binema jaré namuti japi mi iʼwírima jiti mi we aʼlá binema japi aní echi Biblia.

Jenaʼí nirú bikiá dibujos japoná bilé towí ochérisimi alí japi ne kulí ko ke raʼili koʼyá bilé koʼwáami nalí ma we okesa ma raʼili: 1. Echi towí ko riʼecha atí echi koʼwáami. 2. Echi towí ma pe ochérisa ma sapú koʼá echi koʼwáami. 3. Ma remalí ka ma kanila koʼá echi koʼwáami. — Japi riká ti ne kulí ko ke raʼili koʼyá bilé koʼwáami, ati we okésaká, aminá ko ati raʼílipo, echi riká cho ikimea japalí ti leeri echi Biblia.

4. Piri mi isima jiti mi kanila leérima echi Biblia

Ne kulí ko we jilí nímiré leeria echi Biblia. Nalí, japi riká ti ne kulí ko ke raʼili koʼyá bilé koʼwáami, ati we okésaká, aminá ko ati raʼílipo, echi riká cho ikimea japalí ti leeri echi Biblia. Leérisi 1 Pedro 2:2 alí raʼichasi jepuná jitra:

¿Achi mi mayé japi sinibí rawé mi leérisa echi Biblia ma mi we kanílima leeria?

Inesi echi VIDEO jiti timí machiboa jaré témali japi jipi ko we kanili leeria echi Biblia. Alí raʼichasi jepuná jitra:

VIDEO: Kúruwi alí iwé japi ma kanili leeria echi Biblia (5:33)

¿Chúsiá ne kulí ko jilí nirali leeria echi Biblia echi kúruwi alí iwé?
¿Chu nokali jiti ke siwema?
¿Chu nokali jiti we kanílima leeria echi Biblia?

Japi mi iʼwírima chotasia:

Aa bilé Biblia japi ke jilí ju leérilia alí inámilia. Ami olásaká echi Traducción del Nuevo Mundo japi riká mi raʼicha, echi leeri, ke mi olásaká bilecho idioma leeri japi mi a inami.
Chotasi leeria echi relatos japi mi we baʼori. Iné echi recuadro “Chotasi leeria echi Biblia”.
Osá japoná mi inari leérisia. Nee echi recuadro “Japoná ni inari leeria echi Biblia”, japi chukú jena libro.
Nee echi aplicación JW Library^®. Ami descargárisaká echoná teléfono o jaréana ma, ami omérima leeria alí kipúa echi Biblia japoná mi iyena.
Nee echi namuti japi nirú echoná Traducción del Nuevo Mundo. Japi riká mapas, tablas alí echi glosario, jepuná mi iʼwírima jiti mi we aʼlá binema.

5. We aʼlá biné japi mi binémaré

Leérisi Salmo 119:34 alí raʼichasi jepuná jitra:

¿Chúsiá we aʼlá ju japi mi raʼichama Onorúami yúa kecho leeria echi Biblia o japalí mi binema?

¿Chúriká mi isima jiti mi we aʼlá binema? Kulí binemia echi binelíwami, isí jepuná namuti:

Kecho binemia leeri suwaba párrafos echoná bilé parte.
Aa suwaba echi textos bíblicos, leeri alí natá chúsiá oserúa uchuwi echoná.
Iyowi echi palabras we natéami japi ruyé echi respuesta. Jepuná mi iʼwírima jiti mi we aʼlá binema ibili binelíwami japalí mi binériwa.

Jenaʼí nirú bikiá dibujos japoná bilé mukí binea atí japi binémaré: A. Echi ko bachá parte leeria wilí. B. Leeria atí suwaba echi textos japi echoná oserúa uchuwi. C. Echi ko iyowi echi palabras we natéami.

¿Ami machiyé?

Echi testigo Jeobá ayénachó nee jarecho Biblias, nalí ti we nee echi Traducción del Nuevo Mundo jiti ke jilí ju inámilia, we aʼlá aní alí nee echi Onorúami riwalá (iné echi oselí japi nirú echoná jw.org “¿Achi olá echi testigo Jeobá aboi níwala Biblia?”).

JAPI ANÍ JARÉ PAGÓTAMI: “Leeria echi Biblia a we jilí ju alí ni ke ikiri”.

Alí mujé ru, ¿piri mi aní?

JAPI MI BINELI

Jiti mi we aʼlá binema japi aní echi Biblia, aʼlá mi natásaré chúrikó mi leérima, ayénachó mi tánisaré Onorúami jiti mi inámima japi mi leeri alí we mi aʼlá binésaré japi mi binémaré.