BINELÍWAMI 12
¿Piri mi iʼwírima jiti mi ke riwema binea echi Biblia?
We natéami ju japi ta binepo echi Biblia. Nalí isini kaachi a jilí ju. Ami nátiré japi mi ke omérima aminabi binea. ¿Chúsiá we aʼlá ju japi mi ke riwema binea? ¿Piri mi iʼwírima jiti mi ke riwema binea tákoré jilí ju?
1. ¿Chúsiá we aʼlá ju binelia echi Biblia?
“Riosi Raʼíchala sinibí bitéami ju, ayénachó ne wabé omérami ju” (Hebreos 4:12). Echi Biblia bilé libro we natéami ju, jiti aní japi Onorúami nata alí chu nili mujé jitra. Mi iʼwírima wiká namuti machiyá, aʼlá isiá alí jiti mi kanílika bitélima pe aminana. Ayénachó mi iʼwírima jiti mi Jeobá amígowala nima. Sinibí japalí mi biné echi Biblia ami riwé japi Onorúami mi iʼwírima.
2. ¿Chúsiá we natéami niraa inésaré japi aní echi Biblia?
Japi aní echi Biblia we natéami ju. Jiti la echoná aní piri ta nokiboa: “Echi bichíwali japi mi bineli kiti siné riwé” (Proverbios 23:23). Ati natásaká japi we natéami ju japi aní echi Biblia, iʼwérili ti nokiboa binea japi aní echoná tákoré jilí ke (leeri Proverbios 2:4, 5).
3. ¿Chúriká mi iʼwírima Jeobá jiti mi ke riwema binea?
Echi Jeobá japi mi amígowala ju, niwali suwaba namuti alí we jiwérami ju, echi ko we aʼlá mi machí alí mi iʼwírinali jiti mi aminabi binema echi jitra. “Riosi chopi ju mapu ʼyemi mi echirigá galabé oliri” o iʼwérili iyá (leeri Filipenses 2:13). Jiti la, we mi jilí niráaká binea alí nijewia japi mi biné, Jeobá mi iʼwírima. Ayénachó echi mi iʼwérili iyama jiti mi anachama echi karú ikiwáami alí jarecho si namuti. Sinibí tani Jeobá japi mi iʼwírima jiti mi ke riwema binea echi Biblia (1 Tesalonicenses 5:17).
AMINABI NATABO JAPI TA BINÉ
Ma binepo piri mi iʼwírima jiti mi ke riwema binea echi Biblia tákoré mi wiká namuti isié o jarecho ko ke nakiyé. Alí binepo chúriká mi iʼwírima Jeobá aminabi binea.
4. Iʼwérili isí jiti binea echi Biblia we natéami nima
Isini kaachi nirú wiká namuti japi ta nokiboa, jiti la we jilí ju japi ta ikíripo binea echi Biblia. ¿Piri mi iʼwírima? Leérisi Filipenses 1:10 alí raʼichasi jepuná jitra:
Piri mi nata, ¿chu iyiri nalí ju “echi ne wabé galabéala”?
¿Piri mi isima jiti binea echi Biblia nalí we natéami nima?
Ati bachá waʼlú saté achásaká echoná bótechi, echi rité ma ke moʼimea.
Nalí be, bachá mi muchuwásaká echi rité, a sojí suwaba bakimea echi saté. Echi riká cho, ami bachá isísaká echi namuti japi we natéami ju, ami ikírima isiá jarecho namuti.
Binea echi Biblia tamó iʼwiri jiti ta we aʼlá machiboa Onorúami alí nijéwipo. Leérisi Mateo 5:3 alí raʼichasi jepuná jitra:
¿Chúriká tamó iʼwírima ata we natéami niraa inésaká binea echi Biblia?
5. Kiti riwé binea echi Biblia
Isini kaachi jarecho ko iʼwérili nokiméeré jiti mi ku riwema binea echi Biblia. Binepo japi isili Francesco. Inesi echi VIDEO alí raʼichasi jepuná jitra:
¿Chu nokali echi Francesco téemala alí amigos si japalí echi ko ruyeli japi binea atí?
¿Chúsiá we aʼlá nili japi echi ko ke siweli binea?
Leérisi 2 Timoteo 2:24, 25 alí raʼichasi jepuná jitra:
¿Piri nata mujé téemala alí amigos si jiti mi biné echi Biblia?
Japi riká aní na versículo, ¿chúriká mi isísaré japalí bilé ke nakí japi mi binema? ¿Chúsiá?
6. Bichiwi japi Jeobá mi iʼwírima
Japalí ti we galé Jeobá, ati aminabi nijéwinali japi echi aní. Nalí isini kaachi a jilí nima riwea jaré namuti japi Jeobá ke galé. Ami echi riká níliaká, kiti siwé, Jeobá mi iʼwírima. Inesi echi VIDEO alí raʼichasi jepuná jitra:
Japi riká machina echoná video, ¿piri namuti riweli isiá Jim jiti nijéwima Jeobá?
¿Piri mi galeli japi riká echi isili?
Leérisi Hebreos 11:6 alí raʼichasi jepuná jitra:
¿Chúriká iʼwírima Jeobá japi iʼwérili isimí machiyá echi alí nijewia?
¿Chúriká mi mayé japi nili Jeobá japalí mi iʼwérili isimí binea echi Biblia?
JAPI NARI JARÉ PAGÓTAMI: “¿Chúsiá mi biné echi Biblia?”.
¿Piri mi anema?
JAPI MI BINELI
Tákoré a jilí ju binelia japi aní echi Biblia, nalí echi mi iʼwírima jiti mi we kanílika bitélima sinibí. Ami bichíwisaká Jeobá, echi mi iʼwírima.
Piri mi animea
¿Chúsiá mi we natéami niraa iné japi aní echi Biblia?
Ma mi machisaa chu iyiri namuti nalí we natéami ju, ¿piri mi isísaré?
¿Chúsiá mi tánisaré Jeobá japi mi iʼwírima jiti mi ke riwema binea echi Biblia?
JITI MI CHE BINEMA
Biné naó namuti japi iʼwírili wiká pagótami jiti a ikírima isiá japi we natéami ju.
“Piri mi isima jiti mi ikírima isiá japi natéami ju” (¡Busuréwiami!, febrero 2014)
Bilé mukí ko nijéwinali Onorúami, nalí echi kunala ke machiyé chúsiá echi riká isié. Iné chúriká Jeobá iʼwírili.
Iné chúriká bilé mukí japi ke siweli, iʼwírili echi kunala.
Jaré ko aní japi echi testigo Jeobá rojachi echi téemala. Nalí be, ¿a bichíwali ju?