BINELÍWAMI 51
¿Chúriká ti raʼichásaré jiti kanílitipo Jeobá?
Jeobá tamó niwali jiti ta oméripo raʼichia, echi ko ju bilé chiliwéliami we natéami. ¿Achi natéami niraa iné Jeobá chúriká ti raʼicha? ¡Ayénaʼá! (Leeri Santiago 1:26). Alí, ¿chúriká ti raʼichásaré jiti Jeobá a galema japi riká ti raʼicha?
1. ¿Chúriká aʼlá nima japi ta raʼichabo?
Echi Biblia ko tamó ané: “Aʼnagupi waminabi wabé kanílatasi, ayénachó aʼnagupi waminabi galá bichíilatasi” (1 Tesalonicenses 5:11). ¿Ami machí bilé japi newalé iʼwérili? ¿Achi mi omeri iʼwiria jiti ku kanílima? Néwariwéliti echi pagótami japi mi we natéami niraa iné; ami omero anea echi aʼláala namuti japi isimí echi. ¿Achi mi newalá bilé texto japi iʼwérili iyama bilé japi mi machí? A nirú wiká textos japi mi omero ruyea. Ayénachó ke mi wikawásaré japi we natéami ju chúriká mi aní echi namuti. Jiti la iʼwérili isí simárika raʼichia alí kilí niraa (Proverbios 15:1).
2. ¿Chúriká alí piri namuti ke ti siné raʼichásaré?
Echoná Biblia aní: “Ke siné sitírarigá raʼichasi” (leeri Efesios 4:29). Jepuná ko aniwáami ju japi ke siné chati namuti raʼichabo alí ke aniboa echi namuti japi omonáriti jarecho. Ayénachó ke ikaleka alí ke cha riká raʼichabo jarecho jitra (leeri Proverbios 16:28).
3. ¿Piri tamó iʼwírima jiti we aʼlá raʼichabo?
Japi ta raʼicha néwariwéliti japi chuti nili alí piri ti nata (Lucas 6:45). Jiti la ti iʼwérili nokisáré sinibí natia echi namuti japi aʼláala ju, japi riká echi namuti japi kaníliti jarecho, japi bichíwali ju alí jarecho si (Filipenses 4:8). Jiti ta oméripo echi riká nokayá, ati aʼláala amigos olásaré, aʼlá namuti inésaré alí ke ti kipúsaré japi chati ju (Proverbios 13:20). Ayénachó we natéami ju japi ta bachá natabo kecho bijí raʼichia. Ami natásaré chu nílima jarecho kipusa japi mi aní. Echi Biblia ko aní: “Japi ke nátika raʼichi ko ne chiwayá isimí piyati, nalí japi we aʼlá nátika raʼichi ko ku saʼwea isimí” (Proverbios 12:18).
AMINABI NATABO JAPI TA BINÉ
Inepo chúriká ti raʼichásaré jiti iʼwérili iyabo jarecho alí kanílitipo Jeobá.
4. Aʼlá nátika raʼichabo
Sinéami isini kaachi ati anili bilé namuti japi ta ke anisaa riweili (Santiago 3:2). Leérisi Gálatas 5:22, 23 alí raʼichasi jepuná jitra:
Jiti mi we aʼlá alí simárika raʼichama, ¿chu iyiri echi cualidades mujé ko tánima Jeobá? ¿Chúriká mi iʼwírima echi cualidades?
Leérisi 1 Corintios 15:33 alí raʼichasi jepuná jitra:
¿Achi mi mayé japi mujé amígowala, echi namuti japi mi kipú alí japi mi iné, isima japi mi aʼlá raʼichama o chati ma? ¿Chúsiá?
¿Piri isima japi mi aʼlá raʼichama o cha riká ma?
Leérisi Eclesiastés 3:1, 7 alí raʼichasi jepuná jitra:
¿Chu kabú aʼlá nima japi mi ke namú animea o japi mi buwema kecho bijí raʼichamia?
5. Aʼlá raʼichá jarecho jitra
¿Piri ta nokisáré jiti ke aniboa namuti japi cha nílitima jarecho? Inesi echi VIDEO alí raʼichasi jepuná jitra:
¿Chúsiá echi hermano japi machina echoná video riwénilie cha riká raʼichia jarecho jitra?
¿Piri isili jiti omérima riwea cha riká raʼichia?
Leérisi Eclesiastés 7:16 alí raʼichasi jepuná jitra:
¿Piri ta newalásaré japalí ti cha riká raʼichánilisa jarecho jitra?
Leérisi Eclesiastés 7:21, 22 alí raʼichasi jepuná jitra:
Japalí bilé cha riká raʼichasa mi jitra, ¿chúriká mi iʼwírima japi aní jepuná versículos?
6. Simárika raʼichá japalí mi raʼicha mujé téemala yúa
Jeobá ko nakí japi ta simárika raʼichabo tamujé téemala yúa. Inesi echi VIDEO alí raʼichasi jepuná jitra:
¿Piri mi iʼwírima jiti mi simárika raʼichama mujé téemala yúa?
Leérisi Efesios 4:31, 32 alí raʼichasi jepuná jitra:
¿Chúriká ti raʼichásaré jiti sinéami we kanílima echoná bitichí?
Jeobá ko anili japi chu nili Jesús jitra. Leérisi Mateo 17:5 alí raʼichasi jepuná jitra:
Japalí mi raʼicha mujé téemala yúa, ¿chúriká mi isima japi riká Jeobá?
Iné echi aʼláala namuti japi jarecho noká alí ané japi we aʼlá isimí.
JAPI ANÍ JARÉ PAGÓTAMI: “Nijé ko aní japi ni nata. Jarecho ke galésaká japi ni aní, echi aboi iyiri ju”.
¿Achi aʼlá ju japi ta echi riká natabo? ¿Chúsiá?
JAPI MI BINELI
Japi ta aní kanílitima jarecho o cha nílitima. Jiti la we aʼlá natásaré japi ta aniboa, chu kabú ti aniboa alí chúriká.
Piri mi animea
Jiti mi iʼwírima jarecho, ¿chúriká mi raʼichásaré?
¿Chúriká alí piri namuti ke ti siné raʼichásaré?
¿Piri tamó iʼwírima sinibí aʼlá raʼichia alí simárika?
JITI MI CHE BINEMA
¿Piri tamó iʼwírima jiti ta we aʼlá raʼíchami nipo?
Biné piri namuti mi iʼwírima jiti mi ke cha riká raʼichama.
“¿Piri ikimea ami cha riká raʼichásaká?” (Oselí japi nirú echoná jw.org)
Biné piri namuti mi iʼwírima jiti mi ke chijanama echi raʼíchali jarecho jitra.
Leeri chúriká Jeobá iʼwírili bilé rijoi jiti omérima riwea cha riká raʼichia.
“Ani nátiki japi ni riwésaré cha isiá” (Echi Nawésami, 1 inárachi agosto 2013)