CHUTI RIKÁ NOKIBOA JAPI RIKÁ CRISTO
Ma mi aʼlá machisáré piri mi isima japalí mi nayusa
¿Chúsiá we natéami ju japi mi machimea japi mi isima? Sinéami ta nayúporé alí sapú torúami nipo echomí hospital. Ati aʼlá ówitami nínalaká, ati bachá natásaré chúriká ti nakí japi ta ówitami nipo néeka echi namuti japi nirú. Echi riká néwariwélitipo japi ta natéami niraa iné japi ta piré, ayénachó japi ta riwiwi japi Jeobá nulá echi la jitra (Hch 15:28, 29).
¿Chúriká mi machimea japi mi isima?
Ma raʼichasa Jeobá yúa alí natasa japi mi isima, osá echi tarjeta de instrucciones médicas (DPA).a Echi publicadores japi ma pakoli, a omeri tania echi tarjeta echi hermano japi wilárami ju jiti nijima oselí, alí echi wénwala ko a omero taa echi Tarjeta de identidad (ic) iyamia echi kúchuwala.
Ami ropéami nísaká, tani echi ancianos echi oselí japi rewé Información para mujeres embarazadas (S-401), echi oselí mi iʼwírima machiyá piri ówili o jarecho namuti mi néema japalí mi ropéami ju o japalí ma mulipi ranélisa.
Ami newalésaká bilé tratamiento japi néemiré echi la o echoná hospital mi boʼimea, sapú ruyé echi ancianos. Ayénachó ané echi doctores japi mi nakí japi bilé testigo Jeobá nawama mi inesia echoná hospital.
¿Chúriká omero iʼwiria echi ancianos? Echi ko a omero mi iʼwiria jiti mi osimea echi tarjeta DPA, nalí echi ko ke mi anema chu iyiri tratamientos mi narema, ke cho mi anema piri nata echi tratamientos jitra (Ro 14:12; Gál 6:5). Japalí mi ruyesa echi ancianos japi echi doctor mi ané japi mi newalémiré echi la, jepuná ancianos ko we sapú raʼichama echi Comité de Enlace con los Hospitales (CEH).
¿Chúriká omeri iʼwiria echi CEH? Echi hermanos japi nocha echoná comité, binéritami ju jiti iʼwírima echi doctores alí abogados inamia chúsiá echi testigo Jeobá ke naré echi la. Ayénachó isini kaachi ruyémiré echi doctores chu iyiri tratamientos a omeri narea alí echi riká ke roʼemia echi la. Echi doctor iʼwérili anisáaká roʼénala echi la, echi Comité de Enlace con los Hospitales aa jarecho doctores japi ówima echi nayúami ke néeka echi la.
INEPO ECHI VIDEO PIRI MI MACHISÁRÉ ECHI LA JITRA, ALÍ ANISÍ JAPI TI MI NÁRIPORÉ JENAʼÍ:
¿Piri mi iʼwírima aʼlá machiyá japi mi isima japalí mi nayusa alí mi anésiwa japi mi newalé echi la?
a Jiti mi che machimea, echi binelíwami 39 echi libro We mi kanílika bitélima mi iʼwírima aʼlá machiyá piri mi isima japalí echi doctores mi roʼénali echi la.