Piri tamó bineri echi okuá cartas japi osali Pedro

1. ¿Piri nóchili iyali Jeobá echi apóstol Pedro japalí ma mulipi mukumea riweili?

ECHI apóstol Pedro we aʼlá nóchili Jeobá wiká bamíali. Echi ko Jesús yúa nawesia iyénili, chotásili nawesia echi pagótami japi ke judíos nili alí nóchili japi riká aʼlá nisériami. Miná ko, japalí machili japi ma mulipi mukumea riweili, Jeobá ko iyali bilecho nóchali. Bamíali 62 aminá 64, Onorúami ko néeli Pedro jiti osimea okuá cartas: echi libros bachá alí osá oserúami Pedro. Echi apóstol Pedro ko nakiyé japi jepuná cartas aminabi iʼwírima echi cristianos japalí echi ma mukusaa (2 Ped. 1:12-15).

2. ¿Chúsiá echi cartas japi osali echi apóstol Pedro we natéami nili echi cristianos jitra?

² Pedro ko osali jepuná cartas japalí echi hermanos we jilírami namuti ikiyé (1 Ped. 1:6). Echalí echoná congregación cristiana niruili pagótami we chati japi ikaleka binerie alí nokayé namuti we chati (2 Ped. 2:1, 2, 14). Echi cristianos Jerusalén piréami inema riweili japi “ke ʼme ayó suwibama suwaba namuti”, o japalí echi sontarsi romanos najunama echi ciudad alí echi templo (1 Ped. 4:7). Ati machí japi echi cartas japi Pedro osali we iʼwírili echi cristianos echalí piréami jiti anachama echi jilírami namuti japi ikiyé alí jiti ma aʼlárika buwea mochima japi ma mulipi ikimea.b

3. ¿Chúsiá ti binésaré echi okuá cartas japi Pedro osali?

³ Tákoré Pedro osélili jepuná cartas echi cristianos bachá siglo piréami, Jeobá ko nakili japi echoná Bíbliachi oserúa uchúwima jiti ta binepo echi jitra (Rom. 15:4). Tamujé ayénachó piré japoná echi pagótami we chati namuti noká alí ti ikí namuti jilírami japi isimí japi ta we jilí nirabo nóchilia Jeobá. Alí ma mulipi tamujé ayénachó ikiboa namuti japi wabé rasíruka jilírami nima japi ikili japalí najunárami nili Jerusalén alí echi templo. Jiti la, echi okuá cartas japi Pedro osali tamó bineri namuti we natéami japi tamó iʼwiri jiti ta aʼlárika buwea mochibo echi Jeobá rawéwala, jiti ke majabo echi pagótami alí jiti we galepo echi hermanos. Jepuná ayénachó iʼwírima echi ancianos jiti aʼlá nokimea iʼwiria echi hermanos.

SINIBÍ AʼLÁRIKA BUWEA MOCHIBO

4. ¿Piri isímiré japi ta ma ke me bichiwia nílipo? (2 Pedro 3:3, 4).

⁴ Jipi rawé echi pagótami ke bichiwi japi aní echi Biblia japi ikimea pe aminana. Japi riká ti ma chabé jonsa nawesa japi echi chati namuti suwábitami nima, a keʼré japi echi pagótami japi ke tamujé galé, kawélima tamujé jitra alí animéeré japi ke siné echi riká ikimea (leeri 2 Pedro 3:3, 4). A bilé tamujé téemala, bilé japi ta yúa nocha o japalí ti nawisasia simía, echi riká anisáaká, a keʼré japi ta ma ke me bichiwia nílipo. Nalí, ¿piri tamó iʼwírima echi riká ikisáaká? Ma inepo japi anili Pedro.

5. ¿Piri tamó iʼwírima kilí niraa buwea echi Jeobá rawéwala? (2 Pedro 3:8, 9).

⁵ A keʼré japi jaré ko nata japi Jeobá wilí isimí suwábimia echi chati namuti japi nirú jenaʼí Wichimóbachi. Nalí japi anili Pedro tamó natari japi Jeobá ko ke iné echi rawé japi riká echi pagótami iné (leeri 2 Pedro 3:8, 9, TNM). Mil bamíali Jeobá jitra ko ju japi riká ko bilé rawé. Ayénachó echi ko kilí buwéami ju jiti ke nakí japi ke wesi suwábitami nima. Nalí echi rawé ko a sibama alí suwábitami nima suwaba echi chati namuti. ¿Kechi ko we semati ju echi nóchali japi ta olá jipi, nawesia echi pagótami omáana Wichimóbachi piréami?

6. ¿Piri tamó iʼwírima we bichiwia japi echi Jeobá rawéwala ma mulipi nawama? (2 Pedro 3:11, 12).

⁶ Pedro ko nijili jepuná busuréliami: “Galá bichíiga buwesi mapuyénasí sebama echi Walubela Riosi níwala rawé” (leeri 2 Pedro 3:11, 12). Nalí, ¿chúriká ti omeri echi riká nokayá? Natabo sinibí rawé japi chúriká ti pirélipo echoná Wichimóbachi we baʼóachi. Japi riká, ¿achi mi ma echoná Wichimóbachi we baʼóachi bitea asá nili, koʼyá echi koʼwáami japi we aʼlá ju alí iwía echi iká japi biʼwíkami ju? ¿Achi mi ma nata ku inea mujé téemala alí amigos si japalí ku jawásitami nisa alí ruyea jarecho pagótami japi chabé pireili japi riká ikísili echi profecías? Natia echi namuti mi iʼwírima we kanílika buwea echalí rawé alí we bichiwia japi ta ma jubá rawé piré. Jiti ta ma aʼlá machí japi ikimea pe aminana, tamujé ko ke riwepo japi echi pagótami japi ikaleka bineri, nokimea japi ta riwepo nijewia Jeobá (2 Ped. 3:17).

KE MAJABO ECHI PAGÓTAMI

7. ¿Piri ikimea ati majaa nílisaká jarecho?

⁷ Jiti ta machí japi echi Jeobá rawéwala ma mulipi nawama, ati iʼwérili noká nawesia echi pagótami echi aʼláala namuti japi isima echi Onorúami Gobiérnowala. Nalí isini kaachi ke ti raʼichániliporé echi pagótami yúa. ¿Chúsiá? Jiti ta majaa nili echi pagótami. Echi riká ikili Pedro echalí rokojó japalí Jesús oyéritami nili. Echi ko wisabé niraa anili japi ke machiyé Jesús alí japi ke nili echi discípulowala (Mat. 26:69-75). Nalí pe aminana echi ko ma ke majali, alí jéanili: “Ke wesi majasi, nirapé majajasi” (1 Ped. 3:14). Japi echi anili néwariwéliti japi ta a omero ke majáami niya.

8. ¿Piri tamó iʼwírima jiti ke majabo echi pagótami? (1 Pedro 3:15).

⁸ ¿Piri tamó iʼwírima jiti ke majabo echi pagótami? Pedro ko tamó iyá jepuná busuréliami: “Echoʼná ʼyemi sulálachi niráa, sinibí waminabi galá bichíisi Jesucristo mapurigá ne Wabé Walubela niráa” (leeri 1 Pedro 3:15). Jepuná ko aniwáami ju japi ta natabo chu yena omériami ju Jesucristo, echi japi tamujé Silíamiwala ju. Ami omériaká nawesia echi pagótami nalí mi majaa nílisaká o riwela ma, natá tamujé Silíamiwala jitra. Natá japi riká ko ma mi inea nulayá atíami echoná ripá siyónachi nolérika wiká millones echi ángeles. Alí newalá japi Jesús “ʼyárami ju mapurigá [...] ne suwaba omérami níima echoʼná ripá riwigachi, jenaʼí wichimóbachi ayénachó”, alí japi echi tamujé “yuwa atí sinibí rawé [...] suwibáluachi rawé yénasí” (Mat. 28:18-20). Pedro ko tamó ané japi ta “sinibí galá kariwesa” mochibo nimimia japi ta bichiwi. ¿Achi mi kanílisa nili nawesia echoná escuélachi, nóchali o jaréanachó? A echi riká nísaká, natá chu kabú mi omeri echi riká isiá alí aʼlá biné japi mi animea. Tani Jeobá japi mi iʼwírima ke majaa alí we bichiwi japi echi mi iʼwírima jiti mi ke majaka raʼichama echi pagótami yúa (Hech. 4:29).

“AʼNAGUPI NE WABÉ GALEBO”

9. ¿Chu kabú Pedro ke néwariwélitili japi galéami nili? (Ayénachó iné echi dibujo).

⁹ Pedro ko bineli néwariwélitia jarecho japi we galé. Echi ko asali japalí Jesús jériká anili: “Bukulíwami niráa Nijeni ʼyemi mi jerigá nulé: Máputamo aʼnagupi niráa wabé galebo. Achigórigá mapurigá Nijeni ʼyemi mi wabé galé, echirigá galesi ʼyemi aʼnagupi” (Juan 13:34). Nalí pe aminana, Pedro ko majali echi cristianos japi judíos nili, jiti la riweli koʼyá echi cristianos yúa japi ke judíos nili. Echi apóstol Pablo ko anili japi Pedro “yékaka” isili o japi ke bichíwali isili japi riká aniyé (Gál. 2:11-14). Pedro ko nijéwili echi busuréliami japi iyali Pablo alí ma ke che echi riká isili. Echoná okuá cartas echi ko ruyeli japi ta ke bi galea nílisaré echi hermanos, nalí japi ta ayénachó néwariwélitisaré.

10. ¿Piri tamó iʼwírima anakupi galea japi riká téemala? (1 Pedro 1:22).

¹⁰ Pedro ko anili japi “mapalítamo ma galá bichíiga nijéwali echi ne bichíwali Riosi nawésawala [...] jípitamo galá galé echi auché jaré ritémtami” (leeri 1 Pedro 1:22). Echi riká ikí jiti tamujé ko ma “machí mapu Riosi ne bichíwali galé echi auché jaré isena pagótami” (Hech. 10:34, 35). Ati galésaká pe jaré hermanos bi echoná congregación, ke ti nijéwipo japi Jesús anili japi galepo sinéami. A bichíwali ju japi ta jaré hermanos yúa we aʼlá amigos nipo, japi riká ikili Jesús jaré discípulos yúa (Juan 13:23; 20:2). Nalí Pedro ko tamó newalari japi ta néwariwélitisaré suwaba echi hermanos japi ta we galé japi riká téemala niraa (1 Ped. 2:17).

11. ¿Piri aniwáami ju “wabé simírami” galea ne sulachí jonsa?

¹¹ Pedro ko anili japi ta “galebo aʼnagupi, ne sulachí niráa” alí japi “ne wabé simírami echirigá galebo aʼnagupi”. Echi raʼíchali “wabé simírami” aniwáami ju japi ta we galepo bilé japi ta we jilí niraa galea. Japi riká, ¿piri ikimea bilé hermano tamó cha nílitisaká o cha olásaká? A keʼré japi ta echi riká cho ku olánilipo japi riká tamó olali alí ke néwariwélitipo japi ta galéami ju. Nalí, echi riká ti nokisáaká, ke nima japi riká Jesús binérili Pedro alí Jeobá ko ke galema (Juan 18:10, 11). Echi apóstol ko osali: “Ketasi ku nimíkasi mapalí auché jaré ʼyemi mi sitila olá, nibilé cho ku kuwana niʼyókasi sitila anigá mapalí aboni ʼyemi mi sitila ané. Chopi siʼwinárigá wabé galigá raʼíchasi echi jaré aboni” (1 Ped. 3:9). Ami we galéami nísaká, mujé ko sinibí simá isíami nima tákoré jaré mi cha olá.

12. a) Ati we galésaká echi hermanos, ¿piri auché jaré namuti nokiboa? b) ¿Chúriká mi iʼwiri echi video We natéami ju ku akarewia echi hermanos yúa?

¹² Echoná bachá carta, Pedro ayénachó néeli echi raʼíchali “aʼnagupi ne wabé galebo”. Ata we galésaká anakupi niraa, echi isima japi “wisabé aʼnagupi ku wikáwabo” (1 Ped. 4:8). Japalí osali jepuná, a keʼré japi Pedro newalali japi Jesús binérili japalí echi yúa raʼíchili jaré bamíali jonsa. Pedro ko aneli japi echi ko “ku wikáwama kicháosa” niraa, a keʼré japi echi ko nátili japi ma wabé aʼlá wikáwiami nili. Nalí Jesús ko binérili japi wikawásaré kicháosa makoy kichao niraa, echi ko aniwáami ju japi ta sinibí wikawásaré (Mat. 18:21, 22). Ami jilí niráaká nijewia jepuná busuréliami, kiti siwé. Jiti ta ke sébali aʼlá nokáami ju, sinéami japi ta Jeobá nijéwami ju isini kaachi ati jilí niraa wikawia jarecho. Jiti la, ¿piri mi omeri isiá? We natéami ju japi mi iʼwérili isima ku wikawia echi hermanos alí ku akarewia echi namuti echi yúa.c

ANCIANOS, NISÉRASI ECHI BOʼWÁ

13. ¿Chúsiá a jilí nímiré echi ancianos jitra iʼwiria echi hermanos?

¹³ A keʼré japi Pedro ke siné wikáwili japi Jesús aneli japalí ku owínili: “¡Galá [niseri] echi jaré Nijé pugula boʼwá!” (Juan 21:16). Ami anciano nísaká, mujé ko machí japi mi ayénachó nijéwisaré jepuná busuréliami. Nalí a jilí nímiré ikiria isiá jepuná nóchali we natéami. Bachá namuti japi nokisáré echi ancianos ko ju, iyayá echi téemala suwaba namuti japi newalé, iʼwiria jiti nílima japi galéliwa alí jiti mulíwima Jeobá. Ayénachó we aʼlá ejemplo nísaré simiyá nawisasia, we aʼlá binésaré japi binérima echoná napawíliwachi alí japi nawisama echoná waʼlú napawíliwachi. Alí jaré ancianos ko iʼwiri nochia Comités de Enlace con los Hopitales o echoná Departamento Local de Diseñó y Construcción. Ayena, ¡echi ancianos we nóchami ju!

14. ¿Piri iʼwírima echi ancianos jiti nokimea echi nóchali japi Jeobá iyali? (1 Pedro 5:1-4).

¹⁴ Pedro ko jéaneli jarecho ancianos: “Galá nisérasi echi auché jaré Riosi níwala pagótami” (leeri 1 Pedro 5:1-4). Ati machí japi echi ancianos we galé echi hermanos alí iʼwírinali. Nalí isini kaachi echi ko nílimiré japi ke omeri nokayá echi nóchali jiti olá wiká namuti japi nokisáré o we risiyá nili. Ami echi riká ikiyáaká, ¿piri mi omeri isiá? Ané Jeobá japi mi nili. Pedro ko osali: “A bilé ʼyemi kuʼwírasagá auché jaré, galá níima galabé niráa kuʼwírasa mapurigá Riosi ʼyemi mi jiwérata” (1 Ped. 4:11). A keʼré japi echi hermanos ikí namuti we jilírami japi jipi ko ke omeri ku akarewia. Nalí newalasi japi Jesucristo, “echi Walubela Boʼwá Niséami”, omeri isiá wiká namuti echi jitra, jipi alí echoná Wichimóbachi we baʼóachi, japi emi ko ke omeri nokayá. Jeobá nalí nakí japi echi ancianos we galema echi hermanos, iʼwírima alí we aʼlá ejemplos nima echi jitra.

15. ¿Piri isimí bilé anciano iʼwírimia echi hermanos? (Ayénachó iné echi foto).

¹⁵ William, japi ma chabé jonsa nocha japi riká anciano, we natéami niraa iné iʼwiria echi hermanos. Japalí chotásili echi pandemia COVID-19, echi alí jarecho ancianos echoná congregación muchúwami, ineli japi we natemi ju raʼichia sinibí tarali sinéami echi publicadores yúa japi muchuwi echoná grupo japi ibili echi olá. ¿Chúsiá? Echi ko jenaʼí: “Wiká hermanos ko awénili mochili aboi pirélachi, jiti la a keʼré japi echi ko sapú natama namuti japi ke aʼlá ju”. Japalí bilé hermano olá karú ikiwáami, William ko we aʼlá kipú jiti echi riká machimea piri jitra siwea nili alí chúriká iʼwírima. Miná ko, echi ko amí bilé oselí o video ma echoná jw.org iʼwírimia echi hermano. William ayénachó aní: “Jipi wabé natéami ju iʼwiria echi hermanos. Ati iʼwérili noká iʼwiria echi pagótami jiti machimea Jeobá jitra. Alí ti echi riká cho nokisáré iʼwiria echi hermanos jiti ke riwema Jeobá”.

RIWEPO JAPI JEOBÁ AMINABI TAMÓ BINÉRIMA

16. ¿Piri namuti mi isínali japi riká ti bineli echoná cartas japi osali Pedro?

¹⁶ Jenaʼí binelíwami ati bineli pe kuabi namuti bi japi nirú echoná okuá cartas japi osali Pedro. Alí ami inéliré jaré namuti japi mi aminabi aʼlá isísaré. Japi riká, ¿ami kanílisa nili aminabi natia japi chúriká pirélipo pe aminana echoná Wichimóbachi we baʼóachi? ¿Achi mi ma nátili nawisamia echoná nóchali, escuélachi o jaréanachó? ¿Achi mi nátili jarecho namuti japi mi omero isiá néwariwélitimia echi hermanos japi mi we galé? Alí ami anciano nísaká, ¿achi mi iʼwérili isínali we kanila iʼwírimia echi hermanos? Japalí mi echi riká nárika isisa, ami inésaká japi nirú jaré namuti japi mi ke aʼlá isimí, kiti siwé. Newalá “japi echi Walubéala we aʼlá isíami ju” alí echi mi iʼwírima aminabi aʼlá isiá (1 Ped. 2:3, TNM). Pedro ko jéanili: “Riosi ʼyemi mi ne sébali galabé niráa ku niwáma. Alí bichétamo ne wabé galá bichíyami níibo. Alí Riosi sinibí ʼyemi mi waminabi tibútama. Alí Riosi Binói ayénachó sinibí ʼyemi mi wabé galigá kuʼwírama” (1 Ped. 5:10).

17. ¿Piri ti narepo ata iʼwérili nokisáaká aʼlá nokayá alí ti riwésaká japi Jeobá tamó binérima?

¹⁷ Siné kaachi, Pedro ko nílili japi echi ko ke Jesús discípulowala nisa riweili (Luc. 5:8). Nalí, jiti Jeobá alí Jesús we simárika iʼwírili Pedro, echi ko ke siweli alí ke riweli Jesús discípulowala niya. Jiti la echi ko chapirúami nili jiti nulama “echoʼná ripá riwigachi, mapoʼná tamujé Walubélawala Jesucristo sinibí niráa nulama” (2 Ped. 1:11). ¡We semati ju echi nóchali! Ami iʼwérili isísaká japi riká Pedro alí mi riwésaká japi Jeobá mi binérima, mujé ayénachó olama japi mi buweli: ami niyúbitami nima alí mi omérima sinibí bitea (1 Ped. 1:9, TNM).