BINELÍWAMI 19
CANCIÓN sjj-S 6 Los cielos proclaman la gloria de Dios
Nokiboa japi riká echi ángeles we nijéwami
“Walubéala anesi Jeobá, emi ángeles” (SAL. 103:20).
JAPI TA JITRA BINEPO
Piri ta biné echi ángeles jitra japi nijéwami ju.
1, 2. a) ¿Piri namuti ta sinúrika ju echi ángeles yúa? b) ¿Piri namuti ta chopi iyiri ju echi ángeles yúa?
JAPALÍ Jeobá isili japi mi binema echi bichíwali, echi ko mi bayeli echi puéblowala japoná nirú wiká japi we galéami ju alí nijéwami, japi riká wiká hermanos alí ayénachó echi ángeles (Dan. 7:9, 10). Japalí ti nata echi ángeles jitra, a keʼré japi ta nata japi we sinúrika ju tamujé yúa. Japi riká, echi ko bachá niwárami nili wiká bamíali jonsa echi pagótami yúa (Job 38:4, 7). Ayénachó wabé jiwérami ju, santos alí wabé wachíniga nokáami tamujé yúa, jiti tamujé ko ke sébali aʼlá nokáami ju (Luc. 9:26).
2 Tákoré ti ke chopi riká ju echi ángeles yúa, a nirú wiká namuti japi a chopi iyiri ju. Japi riká, echi ángeles alí tamujé ati omeri néwariwélitia echi cualidades japi olá Jeobá, aboi natia japi ta nokiboa, ati olá riwalá alí ti sinúrika nokáami ju, ayénachó ti noká sinúrika nóchali nóchilia Jeobá. Alí, japi riká echi ángeles, ata nijéwisaré Jeobá (1 Ped. 1:12).
3. ¿Piri ta biné echi ángeles nijéwami jitra?
3 Jiti wiká namuti ati ju japi riká echi ángeles, echi ko tamó iʼwérili iyá alí tamó bineri namuti we natéami. Jenaʼí binelíwami binepo japi echi ángeles ke niráami ju, we galé echi pagótami, we anáchami ju alí iʼwérili noká jiti echoná congregación ke nirúlima cha nokáami. Alí binepo chúriká tamujé ayénachó nipo japi riká echi.
ECHI ÁNGELES KE NIRÁAMI JU
4. a) ¿Chúriká néwariwéliti echi ángeles japi ke niráami ju? b) ¿Chúsiá ke niráami ju echi ángeles? (Salmo 89:7).
4 Echi ángeles nijéwami ke niráami ju. Tákoré we machíami ju alí we jiwérami, echi ko nijewi japi Jeobá nulé (Sal. 103:20). Echi ko ke niraka noká echi nóchali japi Jeobá iyá alí ke néwariwéliti japi we jiwérami ju. We kanili nijewia japi Jeobá ané, tákoré ke bilé machí chu riwéami ju (Gén. 32:24, 29; 2 Rey. 19:35).a Ayénachó nakí japi Jeobá nalí walubéala anérami nima, ke ko echi. ¿Chúsiá ke niráami ju echi ángeles? Jiti we galé Jeobá alí we riwiwi (leeri Salmo 89:7).
5. ¿Chúriká néwariwélitili bilé ángel japi ke niráami nili? (Ayénachó iné echi dibujo).
5 Ma inepo bilé ejemplo japoná ti iné japi echi ángeles ke niráami ju. Mulipi bamíali 96, bilé ángel japi ta ke machí echi riwalá, riwírili echi apóstol Juan bilé namuti we natéami (Apoc. 1:1). ¿Piri isili Juan japalí ineli jepuná namuti? Echi ko chokóbika chukúali walubéala anemia echi ángel. Nalí echi ko sapú jéaneli: “Ketasi tamí oʼwiké echirigá, mapujiti nijeni bilé pioni ju, Riosi piónawala niráa, achigórigá mapurigá mujé [...]. Walubéraga ané echi bilepi Walubela Riosi” (Apoc. 19:10). ¡Echi ángel ko ke niráami nili! Echi ko nakili japi Juan walubéala anema Jeobá alí echi ko ke. Ayénachó ke nátili japi echi ko wabé natéami ju echi Juan yúa. Tákoré ma wiká bamíbami nili nóchilia Jeobá alí wabé jiwérami nili, echi ángel ko ke niráami nili alí jéaneli: “Nijeni bilé pioni ju, Riosi piónawala niráa, achigórigá mapurigá mujé”. Tákoré echi ángel aneli Juan japi ke aʼlá isili, echi ko ke iyoka echi riká aneli, nalí we simárika aneli. A keʼré japi echi ángel ko machili japi Juan walubéala anénali jiti ke mayea nili japi ineli.
Echi ángel ke niráami nili japalí raʼíchili Juan yúa alí japalí aneli japi ke aʼlá isili. (Iné echi párrafo 5).
6. ¿Chúriká nokiboa jiti ke niráami nipo japi riká echi ángeles?
6 ¿Chúriká nokiboa jiti ke niráami nipo japi riká echi ángeles? Ke niraka nokayá echi nóchali japi ta noká echoná organización alí ke néwariwélitia japi echi nóchali japi ta noká, jarecho ko ke omeri nokayá (1 Cor. 4:7). Ayénachó ke ti natásaré japi ta wabé natéami ju jarecho yúa jiti ta ma wiká bamíali nóchili Jeobá o jiti ta olá jaré nóchali we natéami; jiti japalí ti aminabi naré nóchali we natéami, ati aminabi ke ti niráami nísaré (Luc. 9:48). Tamujé ko iʼwírinali jarecho japi riká noká echi ángeles; ke ti nakí japi echi inílima japi ta we natéami ju echi yúa.
7. ¿Chúriká néwariwélitipo japi ta ke niráami ju japalí ti busuré iyá bilé?
7 Ayénachó ti néwariwélitipo japi ta ke niráami ju japalí ti busuré iyá bilé japi ke aʼlá isili, japi riká bilé hermano o tamujé kúchuwala. Isini kaachi ati newalepo jiwérika anea bilé namuti. Nalí, japi riká echi ángel japi we simárika iyali busuré, tamujé ayénachó oméripo ke nokayá japi echi pagótami omona nílima. Ke ti we natéami niraa inílisaká jarecho yúa, ati riwíwika alí we simárika iyabo busuré, alí néeka japi aní echi Biblia (Col. 4:6).
ECHI ÁNGELES WE GALÉ ECHI PAGÓTAMI
8. a) Japi riká aní Lucas 15:10, ¿chúriká néwariwéliti echi ángeles japi we galé echi pagótami? b) ¿Chúriká tamó iʼwiri echi ángeles japalí ti nawesa? (Ayénachó iné echi imagen).
8 Echi ángeles we natéami niraa iné japi ikí echi pagótami alí we galé. Ayénachó we kanili japalí bilé cha isíami riwé cha isiá o bilé japi Jeobá nijéwami nili checho ku Jeobá nijewi, o japalí bilé pagótami machí echi bichíwali alí chotásimi riwea namuti japi Jeobá ke galé alí nóchilia echi (leeri Lucas 15:10). Echi ángeles ayénachó tamó iʼwiri japalí ti nawesa (Apoc. 14:6). Tákoré ke raʼicha echi pagótami yúa, echi ko tamó iʼwiri jiti riwiboa echi pagótami japi a binénali Jeobá jitra. Nalí be, ke ti sinibí anisáré japi echi ángeles nokali japi ta riwiboa bilé pagótami, jiti Jeobá ko omeri néea jarecho namuti, japi riká echi espíritu santo, iʼwírimia echi pagótami o yúrimia echi japi binoy nijéwami ju jiti sibama echi pagótami yúa japi a binénali (Hech. 16:6, 7). Nalí Jeobá ko a we nee echi ángeles. Jiti la, japalí ti nawesa, tamujé ko bichíwisaré japi echi ángeles sinibí tamó iʼwírima. (Iné echi recuadro “Kipúrami nili Jeobá jitra”).b
Bilé niwíkami ma sunili nawesia néeka echi carrito alí bitichí ku simía. Echi hermana iné bilé mukí japi we omona atí. Echi hermana we aʼlá machí japi echi ángeles tamó iʼwiri jiti riwiboa echi pagótami japi newalé binea Jeobá jitra. Jiti la, echi ko we inili raʼichánilia echi yúa ku kanílitimia. (Iné echi párrafo 8).
9. ¿Chúriká nokiboa jiti we galebo echi pagótami japi riká echi ángeles?
9 ¿Chúriká nokiboa jiti we galebo echi pagótami japi riká echi ángeles? Japalí echoná congregación nijírami nisa bilé anuncio japoná ruyé japi bilé hermano o hermana ma ku testigo Jeobá ju, tamujé ko we kanílisaré japi riká noká echi ángeles. We kanílika ku narepo echi hermano alí néwariwélitipo japi ta we galé (Luc. 15:4-7; 2 Cor. 2:6-8). Bilecho namuti japi riká ti omeri nokayá japi riká echi ángeles, echi ko ju japalí ti iʼwérili noká nawesia (Ecl. 11:6). Alí japi riká echi ángeles tamó iʼwiri japalí ti nawesa, tamujé ayénachó iʼwíripo echi hermanos japalí ti simía nawisasia. Japi riká, ati omeri simíaya nawisasia bilé publicador yúa japi kulí chotásili nawesia o bayea bilé hermano japi nayúami ju o ochérami ma, jiti tamó yúa simea nawisasia.
10. ¿Piri ta biné Sara jitra?
10 ¿Alí ma ti ke omériaká nawesia japi riká chabé? Ati oméripo sinúrika nóchali nokayá nawesia echi ángeles yúa. Ma inepo japi ikili bilé hermana India bitéami, Sara riwéami.c Echi ko precursora nili ne sojí 20 bamíali, nalí miná ko nayuli alí echalí jonsa ma ke omerie wilisia cámachi jonsa. Echi ko we omona nílili, nalí jiti echi hermanos iʼwírili alí simá nokali echi yúa alí binoy ke riweli binea echi Biblia, pe aminana checho ku kanílili. A bichíwali ju japi sinúrika isili nawesia. Jiti ke omerie nawesia asaká osayá cartas, echi ko raʼichie echi pagótami yúa teléfono niraa alí raʼichie japi chabé yúa raʼichi echi Biblia jitra, alí echi pagótami ayénachó ruyéi jarecho pagótami jitra japi binénalie echi Biblia. Jiti la ma jaré michá simírisa, Sara ko ma binerie 70 pagótami. ¡Echi ko wiká nili! Jiti la Sara ko ke omérili bineria suwaba alí aneli jarecho hermanos echoná congregación japi binérima. Jipi ko wiká echi binéami ma simía echoná napawíliwachi. Ata machí japi echi ángeles we kanili iʼwiria echi hermanos japi iʼwérili noká nawesia japi riká Sara.
ECHI ÁNGELES WE ANÁCHAMI JU
11. ¿Chúriká néwariwéliti echi ángeles nijéwami japi we anáchami ju?
11 Ayénachó ti biné bilecho namuti echi ángeles jitra: japi echi ko we anáchami ju. Ma wiká miles bamíali, echi ko anáchili echi chati namuti. Echi ángeles ineli japalí Satanás alí wiká jarecho ángeles riweli nijewia Jeobá (Gén. 3:1; 6:1, 2; Jud. 6). Echi Biblia raʼicha bilé ángel jitra japi nikoli bilé demonio we jiwérami yúa (Dan. 10:13). Alí, japalí jonsa piré echi pagótami, echi ángeles ko iné japi kuabi ju echi pagótami japi nijewi Jeobá. Tákoré echi riká ju, echi ko ke riwé nijewia alí aminabi we kanílika nóchilia Jeobá. Echi ángeles we aʼlá machí japi Onorúami ma mulipi isima japi ma ke nirúlima echi chati namuti.
12. ¿Piri tamó iʼwírima anachia?
12 ¿Chúriká nokiboa jiti anachabo japi riká echi ángeles? A keʼré japi tamujé ayénachó inepo wiká chati namuti o sayéritami nipo. Nalí ati we bichiwi japi pe aminana Jeobá suwábima echi chati namuti. Jiti la, japi riká echi ángeles we nijéwami, ke ti riwepo nokayá japi aʼlá ju (Gál. 6:9). Alí Jeobá aní japi tamó iʼwírima anachia (1 Cor. 10:13, TNM). Ati omeri tania Jeobá japi tamó iyama echi espíritu santo, japi tamó iʼwírima kilí niya alí kanilia (Gál. 5:22; Col. 1:11). ¿Piri mi isísaré ami najátarami nísaká? Bichiwi Jeobá alí kiti majá. Jeobá ke siné mi bineli riwema alí mi jiwérili iyama (Heb. 13:6).
ECHI ÁNGELES IʼWIRI JITI KE NIRÚLIMA CHA NOKÁAMI ECHONÁ CONGREGACIÓN
13. ¿Chu iyiri nóchali we natéami noká echi ángeles jipi jubá rawé? (Mateo 13:47-49).
13 Jipi jubá rawé, Jeobá ko iyá echi ángeles bilé nóchali we natéami (leeri Mateo 13:47-49, TNM). Japalí ti nawesa, wiká millones pagótami omáana Wichimóbachi piréami, biné Jeobá jitra. Jaré echi ko chotásimi nijewia Jeobá, nalí jaré ko ke. Echi ángeles ju japi rojachi echi pagótami chati nokáami, aʼlá nokáami yúa. Echi riká iʼwiri jiti echoná congregación ke nirúlima cha nokáami. Nalí jepuná ko ke aniwáami ju japalí bilé riwésaká nijewia Jeobá, ma ke omérima checho ku nawayá echoná congregación. Ke cho aniwáami ju japi echoná congregación ke nirúlima jilírami namuti. Nalí ti omeri bichiwia japi echi ángeles we jiwérika nocha jiti echoná congregaciones ke nirúlima cha nokáami.
14, 15. ¿Chúriká ti omeri nokayá japi riká echi ángeles jiti echoná congregación ke nirúlima cha nokáami? (Ayénachó iné echi fotos.)
14 ¿Chúriká nokiboa japi riká echi ángeles jiti ke nirúlima cha nokáami echoná congregación? Iʼwérili nokiboa jiti ta sinibí Jeobá bi nijéwipo alí aboi ke cha nokiboa. Ibili tamujé, ata we aʼlá tibuka nokisáré jiti ke napawipo echi pagótami yúa japi ke aʼláala ju alí ke nokayá echi namuti japi isima japi ta riwepo Jeobá (Sal. 101:3). Ayénachó ti omeri iʼwiria echi hermanos jiti ke riwema nijewia Jeobá. Japi riká, ¿piri ta nokisáré ati machisáaká japi bilé hermano isili bilé namuti we chati? Jiti ta we galé echi hermano, ati anésaré japi raʼichama echi ancianos yúa. Ke nijéwisaká, tamujé ju japi ta ruyésaré echi ancianos. Ata nakí japi echi hermano japi cha isili sapú iʼwíritami nima (Sant. 5:14, 15, TNM).
15 We ti omona nili machiyá japi jaré japi noká namuti we chati, machibúrami ju echoná congregación jonsa. Japalí echi riká ikisaa, tamujé ko riwé napawía echi yúa (1 Cor. 5:9-13).d Jepuná ko iʼwiri jiti echoná congregación ke nirúlima cha nokáami. Ayénachó, japalí ti ke napawí echi yúa, ati néwariwéliti japi ta we galé. Japi riká ti noká, a keʼré japi iʼwírima jiti checho ku nijéwinalima Jeobá. A echi riká nokisáaká, ati we kanílipo japi riká Jeobá alí echi ángeles (Luc. 15:7).
Ati machisáaká japi bilé hermano o hermana ma isili bilé namuti we chati, ¿piri ta nokisáré? (Iné echi párrafo 14).e
16. ¿Chúriká mi isima japi riká echi ángeles?
16 Ata we natéami niraa iné machiyá echi nóchali japi noká echi ángeles alí napawika nochia echi yúa. Jiti la, iʼwérili nokiboa ke niráami niya, we galea echi pagótami, anachia alí iʼwérili nokayá jiti ke nirúlima cha nokáami echoná congregación. Ati nokisáaká japi riká echi ángeles we nijéwami, tamujé ayénachó oméripo niya japi riká Jeobá téemala ne sinibí.
CANCIÓN sjj-S 123 Seamos leales y sumisos al orden teocrático
a Tákoré wiká millones ángeles nirú, echi Biblia bi ruyé okuá ángeles riwalá: Miguel alí Gabriel (Dan. 12:1; Luc. 1:19).
b Jiti mi machimea jarecho experiencias, iné echi video riwéami Japi nawesa echi japi Aʼlá Niseri 2021 #1.
c Sinúrika ju echi riwalá.
d Japi riká aniri echoná video riwéami Japi nawesa echi japi Aʼlá Niseri 2024 #2, bilé pagótami japi machibúrami nili congregación jonsa simisáaká echoná napawíliwachi, echi publicadores aboi natama achi narépima o ke.
e JAPI RUYÉ JAPI MACHINA ECHONÁ FOTOS: Bilé hermana ané binoy amígawala japi raʼichama echi ancianos yúa. Jiti echi amígawala ke raʼíchili echi ancianos yúa, ma jaré rawé simírisa echi hermana simí raʼichasia echi ancianos yúa echi namuti jitra japi isili echi binoy amígawala.