Echi Walúala Binériami tamó binérili wiká namuti

JAPI NIJÉ WÉNWALA TAMÍ BINÉRILI

Bamíali 1957, nijé wénwala simíali Italia jonsa echomí Kindersley riwéachi, japi ju echoná Saskatchewan (Canadá). Miná ko, echi ko bineli echi Biblia alí nóchilia Jeobá we natéami nílili tamujé jitra. Ani newalá japalí ni taa ke, nijé alí nijé wénwala ati wiká horas nawesie. Jiti la, isini kaachi nijé ko riʼea aní japi ni ma precursor auxiliar nili, tákoré ni osá naó bamíbami ke.

Nijé wénwala ke me winomíwami nili, nalí sinibí iʼwérili nokayé nóchilia Jeobá. Bamíali 1963 nili bilé asamblea internacional echomí Pasadena (California, Estados Unidos). Jiti nijé wénwala simánilie, ralineli wiká namuti japi olali jiti omérima olayá winomí. Bamíali 1972, ata simíaki iʼwírimia nawesia bilé congregación italiano raʼíchami echomí Trail, echoná Columbia Británica (Canadá), japi we miká nili bitichí jonsa. Nijé onolá nochie atewia namuti echoná bilé tienda alí biʼwayá. Alí jiti aminabi we nóchinilie Jeobá, echi ko ke nakili jarecho nóchali japoná wiká winomí mema.

We ni kanili jiti nijé wénwala tamó naónika binérili Jeobá jitra. Echi ko tamí iʼwírili nóchilia Jeobá alí tamí binérili bilé namuti we natéami: ani bachá isísaká japi Jeobá nulá, echi ko sinibí tamí tibuma (Mat. 6:33, TNM).

ANI CHOTASI NÓCHILIA JEOBÁ TIEMPO COMPLETO NIRAA

Bamíali 1980, ani niwiki Debbie yúa, bilé we semati hermana japi we aʼlá machiyé japi isínalie nóchilimia Jeobá. Okuaka ti nóchinilie Jeobá tiempo completo niraa, jiti la kulí simírisa bikiá michá japalí ti jonsa niwili, Debbie chotásili precursora niya, alí bilé bamíali simírisa, ata simíaki biléana congregación japoná newalelie publicadores, alí nijé ayénachó precursor níliki.

Miná ko ata siwea níliki alí ti ku simánilie echoná jonsa. Nalí bachá ti raʼíchiki echi hermano circuito yúa japi we simárika raʼíchika tamó aneki: “Emi ayénachó ke aʼlá noká, a timí iné echi namuti chati bi. Nalí timí áasaká echi namuti aʼláala, a timí wiká riwimea”. Echi busuréliami nili japi ta newaleli (Sal. 141:5). We ti sapú echi riká nokaki alí ti machiki japi niruili wiká namuti aʼláala. Wiká echoná congregación aminabi we nóchinilie Jeobá, japi riká echi kuuchi alí jaré hermanas japi echi kunala ke Testigos nili. Jepuná tamó binérili bilé namuti we natéami: inea echi namuti aʼláala alí bichiwia japi Jeobá akaréwima chuwé namuti jilírami japi ikí (Miq. 7:7). Miná ko ma ti we kanilie nochia echoná congregación.

Echoná bachá escuela de precursores japi ta simíaki naó instructores nili, alí bikiá echi nóchili Jeobá jaréanachó país. Tamó riwírili fotos alí tamó ruyeli jaré namuti jilírami japi ikili alí namuti aʼláala japi Jeobá iyali. Jiti la ti aniki japi iʼwérili nokiboa misioneros nimia.

Japi riká ti nátiki misioneros nimia, echalí bamíali 1984 ata simíaki pirélisia echomí Quebec, 4,000 kilómetros Columbia Británica jonsa japoná ta piréi. Echoná echi pagótami raʼicha francés, jiti la ti bineki echi raʼicháliami alí nokayá japi riká echi pagótami echoná piréami. Bilecho namuti we jilírami nili, japi ta ke me olayé winomí. Siné kaachi bilé rijoi tamó aneki japi ta napabupo echi rilowi ripíami japoná echi ichali alí japi ma ʼwírami nili. Jepuná bi nili japi ta olali okemia. Debbie wasie echi rilowi suwinárika niraa alí we raʼíami koʼwáami niwayé. Tákoré we jilí nili, we ti jiwérika nokaki kanílika anachia echi namuti. Ayénachó ti ineki japi Jeobá sinibí tamó tibúe (Sal. 64:10).

Siné rawé bilé hermano tamó raʼíchiki teléfono néeka, tamó bayemia jiti simabo nochamia Betel japi wilí echomí Canadá. Tákoré ti kaníliki, ayénachó ti omona níliki jiti ta simánilie Escuela de Galaad. Nalí ariká ti simíaki. Japalí ti siki echoná Betel, ati náriki echi hermano Kenneth Little, japi nochie echoná Comité de Sucursal, piri ikimea echi solicitud japi ta júali simamia echoná Galaad, alí echi ko tamó aneki: “Ma timí bayérami nisa, echalí natasi echi namuti jitra”.

Bilé tarali bi simírili japalí ti bayérami nili echoná Galaad, jiti la ti nátiki piri nokiboa. Echi hermano Little tamó aneki: “A timí simánalaká Galaad o nochia jenaʼí Betel, aʼlá ju. Nalí isini kaachi a timí natámiré japi biléala nalí aʼlá nili. Okuánika aʼlá ju, Jeobá emi iʼwírima echi jitra japi timí nátili nokimea”. Ati simíaki Galaad alí suwaba echi bamíali japi ma simárili, ati ineki japi a bichíwali nili japi anili echi hermano Little, alí wisabé niraa tamujé ayénachó aneki jepuná raʼíchali jarecho hermanos japalí echi nátili piri nokimea aminabi nóchilimia Jeobá.

JAPI TA IKILI JAPALÍ TI MISIONEROS NILI

We ti kaníliki japalí ta sili jarecho 22 hermanos yúa echoná clase 83 echi Escuela de Galaad, japi chotásili echi michá abril bamíali 1987 echoná Brooklyn (Nueva York). Echi instructores nili echi hermanos Ulysses Glass alí Jack Redford. We sapú simárili echi malí michá alí ti suniki echi escuela 6 inárachi septiembre 1987. Ata juláari John alí Marie Goode yúa echomí Haití.

Bamíali 1962 japalí echi upáwala misioneros machí awátami nili Haití jonsa, echi Escuela de Galaad ma ke júali misioneros, alí tamujé nili echi bacháwala misioneros japi checho ku julárami nili echomí. Bikiá tarali simírisa japalí ti suniki echi escuela, ata siki echoná Haití alí ti chotásiki nochia bilé taa congregación japi wilili nasipa wiká kawírili alí japoná niruili 35 publicadores. Ata kuabi bamíbami nili echalí alí ke me machíami. Ati awénili piréi echoná casa misional anilíwami. Echi pagótami Haití piréami we risóati nili alí wiká ke machiyé leeria. Japalí ta pireili echoná, wiká pagótami naʼawia pireili echi gobiernos yúa, jiti la ikosie wiká namuti jiti echi pagótami ke simárima o ke machínima, ayénachó isini kaachi we jiwérami ukuli alí we ikéami.

Ati bineki japi echi hermanos Haití piréami, we anáchami nili alí we kaníliami. Jaré ko we risoa nilia piréi, nalí we galéi Jeobá alí we kanilie nawesia. Bilé hermana wiláami ke machiyé leeria, nalí bineli 150 textos Bíbliachi uchúwami. Suwaba japi ta inéi sinibí rawé, tamó iʼwirie jiti jiwérika nokiboa ruyea echi pagótami japi echi Onorúami Gobiérnowala bi ju, japi akaréwima echi namuti chati japi ikísimi. We ti kaníliki inea japi pe aminana jaré binéami precursores regulares alí especiales nílili, alí ancianos.

Echomí Haití ani machiki bilé remalí japi misionero mormón nili, Trevor riwéami. Ati raʼíchiki echi Biblia jitra wisabé niraa. Ma simírisa jaré bamíali, we ni kaníliki japalí ni nareki bilé echi níwala carta japoná aniyé: “¡Ani pakoma echoná asamblea japi ma mulipi nima! Ani ku siminali Haití alí ni precursor especial nínali japoná ni misionero mormón nili”. Alí echi riká isili: echi alí binoy upila wiká bamíali nokali nóchilia Jeobá echoná.

EUROPA ALÍ PE AMINANA ÁFRICA

Pe aminana ata juláari nochamia echoná Europa, japoná echi gobierno ma checho ku riweli japi echi testigo Jeobá nawesama echoná. Bamíali 1992, ati siki echoná Liubliana (Eslovenia), mulipi japoná nijé wénwala ochérili kecho simíaya pirélisia echomí Italia. Echalí niruili guerra japoná chabé riwéami nili Yugoslavia. Niruili hermanos japi nochie echoná sucursal echomí Viena (Austria) alí echoná oficinas echomí Zagreb (Croacia) alí Belgrado (Serbia), echi ko inéi chúriká nokiwá echi nóchali echoná Europa. Nalí jipi ibili país olama riweili aboi níwala Betel.

Jiti la ti bineki bilecho raʼicháliami alí nokayá japi riká echi pagótami echoná piréami. Echi eslovenos tamó anéi “Jezik je težek”, japi aniwáami ju “Jepuná raʼicháliami jilí ju”. ¡Alí a bichíwali nili! We ti kaníliki inea japi echi hermanos we nijéwami nili alí we sapú kanílika nokayé echi kulíwami namuti japi echi organización nulayé. Alí ti ineki japi Jeobá iʼwírili echi hermanos jiti echi riká nokayé. Checho ti ineki japi Jeobá, japi we galéami ju, sinibí akarewi echi namuti japi ke aʼlá ju, japalí echi nakí. Echi bamíali japalí ta pireili echoná Eslovenia, tamó iʼwírili néwalayá wiká namuti we natéami japi ta ma bineki alí tamó binérili jarecho kulíwami namuti.

Bamíali 2000, ata juláari echoná Costa de Marfil (África Occidental). Nalí chotásili bilé guerra alí noviembre 2002 tamó juláari echomí Sierra Leona, japoná kulí sunili bilecho guerra japi 11 bamíali rojorali. We jilí nili we sapuka machinia Costa de Marfil jonsa. Nalí suwaba echi namuti japi ta bineki chabé, tamó iʼwírili jiti ke riwepo kaníliami niya.

We ti natéami niraa ineki japi echi pagótami we aʼlá tamó kipúe japalí ta nawesie alí japi echi hermanos we galéami nili tákoré wiká bamíali anáchili echi guerra. Tákoré risóati nili, echi ko we nijíami nili. Bilé hermana chiliwénalie Debbie jaré sipucha alí Debbie simárika aneli japi ke nakí, nalí echi hermana jéaneli: “Japalí niruili guerra, echi hermanos jaréana países piréami tamó iʼwírili. Jipi ko tamujé iʼwírisaré jarecho”. Jiti la ti nátiki japi tamujé ayénachó nokiboa japi riká echi.

Pe aminana checho ti ku simíaki Costa de Marfil, nalí echi pagótami checho ku chotásili nakóaya echi política jitra. Jiti la noviembre 2004 tamó machibuli echoná jonsa néeka bilé helicóptero alí ibili ata omérili toyá bilepi maleta 10 kilos betéami. Ati wichí kochili japoná niruili echi sontarsi franceses alí biléala rawé tamó tóoli néeka bilé avión echomí Suiza. Ati siki echoná sucursal sojí nasipa rokó. We ti kaníliki inea echi hermanos japi nocha echoná Comité de Sucursal alí echi instructores echi Escuela de Entrenamiento Ministerial alí echi jubila japi tamó buwea mochili, tamó mutuli, tamó iyali koʼwáami ratáami alí wiká chocolate suizo.

Miná ko ti juláari pe teeli bi echomí Ghana, alí japalí echi pagótami ma ke nakóaya járili, checho ku tamó juláari echomí Costa de Marfil. Echi hermanos we galéami nili, jepuná tamó iʼwírili japalí we jilí nili jiti ta we sapuka machínisa riweili biléana chéami alí ti pe teeli bi simíaki nochamia jaréanachó. Ati ineki japi echi Jeobá organizaciónwala we galéami ju, jiti la ti aniki japi ta sinibí we natéami niraa inepo jepuná. Echi namuti jilírami japi ta ikili, tamó binérili namuti we natéami japi tamó iʼwírili aminabi nóchilia Jeobá.

BILECHO KULÍWAMI NÓCHALI

Bamíali 2006 ata nareki bilé carta japi nawali central mundial jonsa, japoná tamó ruyeli japi ta simabo echomí Asia occidental (Oriente Medio). Echoná ayénachó ti binesa riweili kulíwami raʼicháliami alí japi riká piré echi pagótami, alí nirúlima riweili namuti jilírami alí aʼláala. Echomí echi política alí religión we natéami ju. Echi congregaciones wiká sinúrika raʼíchami nili alí echi hermanos we napawika nili, jiti nijewie japi aniyé echi Jeobá organizaciónwala. Ati ineki japi echi hermanos we anachie japi echi téemala sayerie, echi pagótami japi mulipi pireili alí echi compañeros echoná escuela alí japoná nocha.

Bamíali 2012, ata simíaki bilé waʼlú napawíliwami we natéami japi nili echomí Tel Aviv (Israel). Ke ti siné wikawabo echalí rawé jiti Pentecostés bamíali 33 jonsa ke wiká napawíe echoná japi Jeobá nijéwami ju.

Echalí bamíali tamó juláari biléana país japoná echi gobierno ke riwé japi echi testigo Jeobá nawesama. Ati tóoki publicaciones, ati simíaki nawesasia alí jaré asambleas japoná kuabi napawili. Niruili sontarsi rifle apéami, nalí ke ti majaa nilie jiti jaré publicadores echoná país piréami, tamó yúa simíali alí tamó ruyeli chúriká nokiboa jiti ke namú ikiboa.

CHECHO TI KU SIMÍAKI ECHOMÍ ÁFRICA

Bamíali 2013, ati nareki bilé kulíwami asignación: tamó bayeli nochamia echomí sucursal Kinsasa (República Democrática del Congo). Jepuná país waʼlú ju alí we semati, nalí echi pagótami echoná piréami we risóati ju alí nirú guerras. Ati aniki: “Ma ti machí chúriká ju África jiti ta ma pireili echoná, ma ti machí piri ta ikiboa”. Nalí ke ti machiyé chúriká nima, japi riká chúriká simáripo japoná ke nirú carreteras alí puentes. Nalí ayénachó niruili wiká namuti aʼláala japi ta ineki, japi riká echi hermanos we anáchami nili alí we kaníliami tákoré we risóati nili. Echi ko we kanilie nawesia alí simíaya napawíliwachi alí asambleas. Ati ineki chúriká Jeobá nikúurala jitra, wiká muwésili echi testigo Jeobá. Japalí ta pireili echomí Congo-Kinsasa, ati bineki wiká namuti we natéami alí ti olaki amigos japi nili japi riká tamujé téemala.

Ma sojí suníachi bamíali 2017, ata juláari echoná Betel echomí Sudáfrica. Jepuná nili echi sucursal japi wabé waʼlú nili japoná ti nóchili alí ti nokali jaré nóchali japi ta ke siné nokali. Checho ti binesa riweili wiká namuti, nalí japi ta chabé bineki tamó iʼwírili. Nirú wiká hermanos japi nochi Jeobá wiká bamíali jonsa alí ti we galé echi. We semati ju inea echi hermanos japi nocha echoná Betel jiti we napawika ju tákoré sinúrika países piréami ju. Echi japi Jeobá nijéwami ju we simá noká alí nijewi echi busuréliami japi Bíbliachi uchuwi, jiti la Jeobá iʼwiri jiti kilí pirélima.

Suwaba echi bamíali, Debbie alí nijé, ati nareki sinúrika nóchali, ati bineki japi riká nokáami nili echi pagótami japoná ti simíaki alí japi riká raʼicha. Tákoré isini kaachi we jilí nili, ati ineki japi Jeobá néwariwélitili japi we tamó galé néeka echi hermanos alí echi organizaciónwala (Sal. 144:2). Suwaba japi ta bineki nochia tiempo completo niraa, tamó iʼwírili aminabi we aʼlá nijewia Jeobá.

We ni natéami niraa iné japi tamí binérili nijé wénwala, japi isimí nijé upila Debbie alí japi riká nokali alí noká wiká hermanos omáana piréami. Japalí ti nata japi nokiboa pe aminana, ati nata japi riwepo japi echi Walúala Binériami sinibí tamó binérima.