Raʼíchipo echi ancianos japalí ti newalé iʼwírili

1. ¿Chúriká néwariwélitili Jeobá japi we galé sinéami echi hermanos?

JEOBÁ ko we galé sinéami japi echi nijéwami ju. Echi ko nijili binoy Nolá echi jitra alí nuleli echi ancianos echoná congregación muchúwami japi tibuma (Hech. 20:28). Onorúami ko nakí japi echi ancianos we simárika nokimea echi yúa. Alí echi ancianos ko nijewi japi riká Jesús nulali alí iʼwiri echi hermanos jiti ke riwema nijewia Jeobá (Is. 32:1, 2).

2. ¿Jépuká we natéami niraa iné Jeobá? (Ezequiel 34:15, 16).

² Jeobá ko we natéami niraa iné sinéami japi echi nijéwami ju, nalí wabé echi japi risoa nili. Echi ko nee echi ancianos iʼwírimia echi japi risoa nili echi chati namuti jitra japi nokali (leeri Ezequiel 34:15, 16). Jiti la, ¿piri ta nokisáré ati newaléaká iʼwírili? Onorúami ko nakí japi ta binoy yúa raʼichabo, alí ayénachó japi ta iʼwírili tánipo echi ancianos echoná congregación muchúwami (Efes. 4:11, 12).

3. ¿Chúsiá jepuná binelíwami tamó iʼwírima sinéami?

³ Jenaʼí binelíwami binepo chúriká nee Jeobá echi ancianos iʼwírimia japi ma ke me aʼlá echi amígowala ju. Binepo jepuná náriwami jitra: ¿chu kabú iʼwírili tánipo echi ancianos?, ¿chúsiá echi riká nokisáré? alí ¿chúriká tamó iʼwiri echi ancianos? Jepuná binelíwami ayénachó iʼwírima echi japi we aʼlá Jeobá amígowala ju, jiti tamó iʼwírima aminabi we natéami niraa inea japi Jeobá jáwili tamó iʼwírimia alí tamó binérima piri nokiboa pe aminana ati newalésaká iʼwírili tania echi ancianos.

CHU KABÚ “RAʼÍCHISARÉ” ECHI ANCIANOS

4. ¿Chúriká ti machí japi Santiago 5:14-16, 19, 20, raʼicha bilé jitra japi ke me aʼlá Jeobá amígowala ju? (Ayénachó iné echi fotos).

⁴ Echi discípulo Santiago ruyeli chúriká nee Jeobá echi ancianos tamó iʼwírimia. Echi ko osali: “Bilé nayúami nirúlisaká emi yúa, raʼíchisaré echi ancianos echoná congregación muchúwami” (leeri Santiago 5:14-16, 19, 20, TNM). Jenaʼí Santiago ko ruyá anili bilé japi newalé iʼwírili checho ku aʼlá Jeobá amígowala nimia. ¿Chúriká ti machí? Echi jaréala versículos jitra. Echoná echi ko ke ané echi nayúami japi simea echi doctor yúa, nalí echi ancianos yúa. Ayénachó ruyé japi echi nayúami ku saʼwí japalí ku wikáwirami ju echi chati namuti japi isili. Jiti bilé pagótami japi nayúami ju ku saʼwimea, echi ko simisáré echi doctor yúa, ruyésaré suwaba japi inili o echi nayulí jitra, miná ko echi ko nijéwisaré japi aní echi doctor. Echi riká cho, ati checho ku aʼlá Jeobá amígowala nínalaká, ati raʼichásaré echi ancianos yúa, ruyésaré suwaba namuti japi ta ikí alí miná ko nijéwisaré echi busuréliami japi tamó iyá néeka echi Biblia.

5. ¿Chúriká ti machiboa achi ti we aʼlá Jeobá amígowala ju?

⁵ Echoná Santiago capítulo 5 aní japi ta iʼwírili tánipo echi ancianos japalí ti inílisa japi ta ma ke me aʼlá Jeobá amígowala ju. Ke iʼwírili tánipo japalí ti ma riwesa Jeobá amígowala niya, nalí iʼwírili tánipo echi ancianos kecho bijí echi riká ikiyá. Echoná Biblia aní japi ta ke aʼlá tibuka nokisáaká, ati natáboré japi ta we aʼlá Jeobá amígowala ju tákoré ke echi riká ju (Sant. 1:22). Echi riká ikili jaré cristianos Sardis piréami: echi ko inílili japi we aʼlá Jeobá amígowala nili, nalí Jesús ko aneli japi ke echi riká nili (Apoc. 3:1, 2). ¿Chúriká machiboa achi ti we aʼlá Jeobá amígowala ju? Bilé ko ju natia chuti inílili chabé Jeobá jitra japalí ti pakoli alí chuti inili jipi (Apoc. 2:4, 5). Nárika nokiboa: “¿Achi ni bijí kanílika leeri alí nata japi ni biné echoná Biblia japi riká chabé? ¿Achi ni bijí simí suwaba napawíliwami alí ni aʼlá biné japi binepo echoná? ¿Achi ni bijí we kanili simiyá nawisasia o wechi ko ni kanili isiá jarecho namuti? ¿Achi ni jipi wabé nata echi winomí jitra chabé yúa?”. Jepuná náriwami tamó iʼwírima machiyá achi ta ma ke me aʼlá Jeobá amígowala ju alí achi nirú bilé namuti japi ta aʼlá ku nokisáré, jiti ta ke bilé namuti nokisáaká a keʼré japi aminabi cha ikiboa. Ke ti omérisaká aʼlá ku nokayá tamujé aboi niraa alí ma ti nokisáaká echi namuti japi Jeobá ke galé, ati raʼichásaré echi ancianos yúa.

6. ¿Piri isísaré bilé japi isili namuti we chati?

⁶ Jaré namuti japi noká echi pagótami we chati ju. Jiti la, echi ke riwésaká cha isiá, echi ko machibúrami nima echoná congregación jonsa. Bilé isísaká echi chati namuti, raʼichásaré bilé anciano yúa (1 Cor. 5:11-13). Echi pagótami newalé iʼwírili we aʼlá ku Onorúami amígowala nimia. Jeobá ko wikawi echi japi néwariwéliti japi we omona nili echi jitra japi isili (Hech. 26:20). Alí a néwariwélitima japi omona nili japalí echi ko ruyé echi ancianos echi namuti chati japi isili.

7. ¿Jépuká ayénachó newalé japi echi ancianos iʼwírima?

⁷ Echi ancianos ke bi iʼwiri echi japi nokali namuti we chati. Ayénachó iʼwiri echi japi ma ke me aʼlá Jeobá amígowala ju (Hech. 20:35). Natabo japi mi iʼwérili isimí ke isínilia bilé namuti chati alí mi inili japi mi ma ke omeri. A keʼré japi mi we jilí niraa ke echi riká inilia, jiti kecho machiyá echi bichíwali mujé ko néeami nili drogas, inéami pornografía alí mi isíami nili echi nasawíliami chati. Nalí ke mi bineli atí. Ami omeri ruyea bilé anciano japi mi inili alí echi ko we aʼlá mi kipuma. A keʼré japi echi ko mi iyama we aʼlá busuréliami alí mi newalárima japi Jeobá ke riwema mi galea ke mi isísaká echi chati namuti japi mi inili isínilia (Ecl. 4:12). Ami siwea níliaká jiti mi ke omeri riwea chati isínilia, echi ancianos ko mi newalárima japi echi namuti néwariwéliti japi mi we natéami niraa iné Jeobá amígowala niya alí japi mi ke bichiwi mujé binoy jiwérala (1 Cor. 10:12).

8. ¿Chu iyiri namuti ikisaa ke newalé japi ruyepo echi ancianos?

⁸ Ke newalé japi mi ruyema echi ancianos ibili namuti japi mi ke aʼlá isimí. Japi riká, natabo japi mujé ko aneli bilé hermano o hermana bilé namuti japi we cha nílitili o japi mi we iyoli. Echi riká ikisáaká, ke newalé japi mi ruyema bilé anciano, nalí japi mi nijéwima echi busuréliami japi Jesús anili japi mi simea raʼichasia echi hermano o hermana yúa ku wikáwili tánimia (Mat. 5:23, 24). Ayénachó ami omeri binea echoná publicaciones echi jitra japi chúriká ke mi sapú iyóami nima, kilí buwéami alí aʼlá nuléami mujé ripokala jiti ke isima japi mujé nakí. Ma mi isísaká jepuná namuti alí mi iníliaká japi mi a bijí kecho omeri ku akarewia, echalí ko ami iʼwírili tánisaré bilé anciano. Echoná carta japi osélili echi Filipenses, echi apóstol Pablo ko aneli bilé hermano echoná congregación atíami japi iʼwírima Evodia alí Síntique echi namuti jitra japi ke katúwika nokali. Bilé anciano ayénachó omeri echi riká mi iʼwiria (Filip. 4:2, 3).

CHÚSIÁ “RAʼÍCHISARÉ” ECHI ANCIANOS

9. Tákoré ti riwela nili raʼichia echi ancianos yúa, ¿chúsiá ti ariká raʼichásaré echi yúa? (Proverbios 28:13).

⁹ Ati newalé we bichíyami niya alí ke majáami niya iʼwírili tamia japalí ti nokisaa bilé namuti we chati o japalí ti ma ke omeria nili aminabi iʼwérili nokayá japi aʼlá ju. Tákoré ti riwela nili raʼichia echi ancianos yúa, ariká ti raʼichásaré echi yúa. ¿Chúsiá? Jiti Jeobá ko tamó iyali echi ancianos tamó iʼwírimia we aʼlá amigos nimia echi yúa, jiti la japalí ti raʼicha echi ancianos yúa, ati néwariwéliti japi ta bichiwi Jeobá alí japi ta echi nijewi. Ati machí japi ta newalé echi iʼwírila jiti ta sinibí nokiboa japi aʼlá ju (Sal. 94:18). Alí ti bichiwi japi ta ma ke nokisáaká echi namuti chati, Onorúami ko tamó ku wikáwima ati nawisásaká echi namuti japi ta nokali alí riwésaká echi riká nokayá (leeri Proverbios 28:13).

10. ¿Piri ta ikiboa ati ke nawisásaká echi chati namuti japi ta nokali?

¹⁰ Japi riká ti ma bineli, iʼwírili tania echi ancianos we tamó iʼwiri. Nalí, ati ke nawisásaká echi namuti chati japi ta nokali, a keʼré japi ta we risoa nílipo. Natabo echi silíami David jitra. Japalí echi ko ke nawésili echi namuti chati japi isili, echi ko we omónali alí nayúa nílili jiti machili japi ma ke aʼlá Jeobá amígowala nili (Sal. 32:3-5). Japalí ti ma ke me aʼlá Jeobá amígowala ju, echi ko ju japi riká ko japalí ti nayú bilé nayulí jitra. Ke ti sapú simásaká echi doctor yúa, aminabi ti we nayúporé. Echi riká cho, ati nokálaká bilé namuti we chati alí ke ti sapú iʼwírili tánisaká echi ancianos, a keʼré japi ta ma riwepo Jeobá amígowala niya (Is. 1:5, 6, 18).

11. ¿Piri si ikí ke nawisásaká echi chati namuti japi nokiwá?

¹¹ Ke ti nawisásaká echi chati namuti japi ta nokali, ayénachó risoa nílitiporé jarecho pagótami alí nokibóoré japi Jeobá ma ke nijima echi espíritu santo echoná congregación alí ma ke kilí nima (Efes. 4:30). Ati machisáaká japi bilé echoná congregación isili bilé namuti we chati, ati anésaré japi raʼichama echi ancianos yúa.a Newalabo japi ke ti nawisásaká, tamujé si iyiri nipo (Lev. 5:1). Jiti ta galé Jeobá, ati anepo echi ancianos japi bilé cha isili. Echi riká iʼwíripo jiti echoná congregación ke nirúlima cha isíami alí japi echi pagótami checho ku we aʼlá Jeobá amígowala nima.

CHÚRIKÁ TAMÓ IʼWIRI ECHI ANCIANOS

12. ¿Chúriká iʼwiri echi ancianos echi japi ke me aʼlá Jeobá amígowala ju?

¹² Echi Biblia ko ané echi ancianos japi iʼwírima echi japi ke me aʼlá Jeobá amígowala ju (1 Tes. 5:14, TNM). Ami isílaká bilé namuti chati, a keʼré japi echi ancianos mi nárima jaré namuti we aʼlá nátika mi iʼwírimia jiti mi animea japi mi nata alí japi mi inili (Prov. 20:5). A keʼré japi mi jilí nirama raʼichia echi ancianos yúa o ami riwela nílimiré raʼichia echi namuti jitra japi ikili. Nalí, mujé ko iʼwírima echi ancianos japalí mi suwaba ruyé echi namuti japi mi ikili. Ami anisáaká bilé namuti japi ke aʼlá ju o ami cha riká raʼichásaká, kiti chibi la (Job 6:3). Echi ancianos ko ke sapú cha riká natama, nalí iʼwérili nokimea we aʼlá mi kipúa jiti machimea suwaba namuti alí miná ko mi busuré iyama (Prov. 18:13). Echi ko machí japi iʼwiria echi hermanos kilipi niraa ju alí japi jaré namuti ke sapú ku akaréwitami nima.

13. ¿Piri si nokimea echi ancianos mi iʼwírimia? (Ayénachó iné echi fotos).

¹³ Echi ancianos ke nokimea japi mi we iyiri ka nílima echi namuti jitra japi mi isili. Echi ko nalí tánima Jeobá mi jitra. Jeobá ko kipuma echi oración japi niwá echi ancianos. Echi jitra echi ko mi iʼwírima jiti mi ku iʼweria nílima. Ayénachó mi iʼwírima “ucheka echi aceite Jeobá riwalá néeka” (Sant. 5:14-16, TNM). Jepuná “aceite” ju Onorúami Raʼicháala. Jiti la echi ko néema echi Biblia mi ku kanílitimia alí mi iʼwírimia jiti mi checho ku we aʼlá Jeobá amígowala nima (Is. 57:18). Echi busuréliami japi echi ancianos mi iyama néeka echi Biblia, mi ku jiwéritima jiti mi ke riwema isiá japi aʼlá ju. Jeobá nee echi ancianos mi ruyemia japi mi isísaré alí mi iʼwírimia machiyá chu iyiri namuti aʼlá ju (Is. 30:21).

14. Japi riká aní Gálatas 6:1, ¿chúriká iʼwiri echi ancianos bilé japi ke aʼlá teli? (Ayénachó iné echi fotos).

¹⁴ (Leeri Gálatas 6:1, TNM). Echi raʼíchali “ke aʼlá tésaká”, ruyá aní ke nijewia japi Onorúami nulá. Jepuná ko nímiré ke aʼlá nátika isiá jaré namuti o isiá namuti japi we chati ju. Jiti echi ancianos we galéami ju, echi ko iʼwérili noká “kilí niraa iʼwiria echi rijoi jiti aʼlá ku isima”. Echi raʼíchali griega japi traducíriwa “iʼwiria”, ayénachó néeliwa ruyemia chúriká nokiwá aʼlá ku rikayá echi ochí japi bilili jiti ke cha riká ripima. Japi riká bilé doctor we aʼlá tibuka isimí aʼlá ku rikayá echi ochí japi bilili jiti echi pagótami ke aminabi okoma, echi ancianos ayénachó we simárika iʼwiri echi hermano jiti ke aminabi risoa nílima. Alí japalí echi ancianos iʼwiri bilecho nijewia japi aní echi Biblia o aʼlá nátika isiá, echi ko newalá japi aboi ayénachó ke sébali aʼlá nokáami ju, jiti la ke cha riká raʼicha echi hermano jitra o ke wabé aʼlá isíami ka nili. Echi ancianos ko nalí iʼwérili noká ke niráami niya alí we aʼláala niya (1 Ped. 3:8, TNM).

15. ¿Piri ti omeri nokayá ati olayáaká bilé karú ikiwáami?

¹⁵ Ati omeri bichiwia echi ancianos japi muchuwi echoná congregación. Echi ko machí japi ke nawisásaré echi namuti japi ta ruyeli, alí ma binéritami ju jiti nijima busuréliami néeka japi aní echi Biblia alí ke ko japi riká aboi nata, alí ayénachó bineli japi aʼlá inea mochima tamó iʼwírimia (Prov. 11:13; Gál. 6:2, TNM). A bichíwali ju japi ibili echi ancianos sinúrika ju, jaré ko ma wiká bamibi japi riká ancianos alí jaré ko kuabi, nalí japalí ti olá echi karú ikiwáami, ati omeri raʼichia chuwé anciano yúa. Ke ti tánipo busuréliami ibili niraa echi ancianos japalí chéami bilé echi ma tamó anesa japi ta kipúnali. Jiti ati echi riká nokisáaká, ati nipo japi riká echi pagótami japi kipúnili bi japi echi nakí alí ke ko japi Onorúami binérinali néeka echi binoy Raʼicháala (2 Tim. 4:3). Japalí ti ruyé bilé anciano echi namuti jilírami japi ta ikí, a keʼré echi ko tamó nárima achi ti ma raʼíchili echi namuti jitra bilecho anciano yúa alí chu iyiri busuréliami tamó iyali. Ke niráami niya iʼwírima echi anciano iʼwírili tania bilecho anciano (Prov. 13:10).

PIRI TA NOKISÁRÉ IBILI NIRAA

16. ¿Piri ta nokisáré ibili niraa tamujé?

¹⁶ Echi ancianos ko tamó tibú alí tamó iyá busuréliami, nalí ke tamó ané japi ta nokisáré. Sinibí rawé ibili niraa tamujé ati néwariwélitisaré Jeobá echi namuti jitra japi ta aní alí japi ta noká, japi ta we galé echi alí japi ta kanílitinali (Rom. 14:12). Jeobá ko tamó iʼwírima aʼlá nátika nokayá alí we nijéwami niya. Jiti la, echi ancianos nee echi Biblia tamó iʼwírimia inamia chúriká iné Jeobá bilé namuti alí miná ko riwé japi tamujé aboi natabo japi ta nokiboa. Jepuná ko tamó iʼwiri jiti binepo “aʼlá nátami niya” (Heb. 5:14, TNM).

17. ¿Piri ta nokisáré?

¹⁷ ¡Ati waʼlú matétara iyá Jeobá jiti we simárika tamó tibú japi riká isimí bilé we aʼlá niséami japi tibú echi pugula namuti! Jeobá ko júali Jesús, “echi we galabé boʼwá niséami” tamó niyúbimia alí tamó iʼwírimia jiti ta sinibí pirélipo (Juan 10:11). Néeka echi ancianos echoná congregación muchúwami, echi ko isili japi ikimea japi riká aní jepuná texto: “Ani emi iyama niséami japi nokimea japi riká nijé nakí, alí echi ko emi kóʼwama aʼlá machiká alí aʼlá inámika” (Jer. 3:15). Jiti la, ma ti ke me aʼlá bichiwia níliaká alí ma ti ke me aʼlá Jeobá amígowala níliaká, sapú iʼwírili tánipo echi ancianos jiti echi ko ju japi riká chiliwéliami japi Jeobá nijili.