¿Chúsiá ke bilé omeri isiá japi ta kilí pirélipo? | ¿Piri aní echi Biblia?

Echi japi nuláami ju omáana wichimóbachi alí echi organizaciones japi nirú ke omeri nokayá japi ta kilí pirélipo. Japalí jonsa niruili echi Segunda Guerra Mundial, jipi wabé aboi kichika piré echi pagótami. Wiká pagótami, sojí 2.000 millones, piré japoná nirú guerras o jarecho namuti chati.

¿Chúsiá echi pagótami ke omeri isiá japi ta kilí pirélipo? ¿Piri aní echi Biblia?

Bikiá namuti japi jiti echi pagótami ke omeri nokayá japi ta kilí pirélipo

1. 1. Echi Biblia aní japi jipi rawé echi “pagótami chopi a aboni niráa galéami níima. Aboni ne wabé korúkami níima echi wenomí. Ayénachó aboni ne wabé oʼwéalatama a aboni niráa. [...] Aboni ketasi ku wikáwama echi jaré aboni sayela. [...] Ayénachó aboni wabé jobátami níima. Aʼlí aboni ne wabé sayérami níima suwaba galabé oluwáwami. Echalí rawé echi [...] aboni niráa, ne bachá oʼwéala niráa mayema”. Jiti echi riká ju, jiti la ke omeri nokayá japi ta kilí pirélipo (2 Timoteo 3:2-4).

2. 2. Echi pagótami ke omeri akarewia echi karú ikiwáami japi olá jarecho alí japi echi binoy ikí, jiti ta newalé japi Jeobáa, japi tamó niwali, tamó iʼwírima. Echi Biblia ko aní: “Echi rijoi ko ke tasi omeri binoy nulaká isiá” (Jeremías 10:23).

3. 3. Jenaʼí wichimóbachi nulá bilé silíami japi we chati ju alí we jiwérami, “échiko sinibí wabé ʼyékiami ju jenaʼí wichimóbachi piréami pagótami”. Echi ko Satanás ju. A bijí nulasa Satanás jenaʼí wichimóbachi, a bijí nirúlima namuti chati alí guerras (Apocalipsis 12:9; 1 Juan 5:19).

¿Jépuká isima japi ta kilí pirélipo?

Echi Biblia ko aní japi Onorúami ju japi isima japi ta kilí pirélipo, echi pagótami ko ke.

• “We ni aʼlá machí japi ni isímaré emi jitra —echi riká aní Jeobá—. Ani nakí japi timí kilí pirélima alí timí ke chati namuti ikiboa. Ani nakí japi timí kanílika pirélima pe aminánami alí japi timí buwema namuti aʼláala” (Jeremías 29:11).

¿Chúriká isima Onorúami japi riká anili jenaʼí Jeremías? Echi Biblia ko aní: “Riosi ʼyemi mi ʼya mapurigátamo kilí ologá pirélabo, [...] ke ʼme ayó rikema echi riablo, Satanasi riwéami” (Romanos 16:20). Onorúami ko néema bilé gobierno japi ripá siyónachi nirúami ju alí japi isima japi echi pagótami kilí pirélima jenaʼí wichimóbachi. Jena ko ju echi Onorúami Gobiérnowala alí echi silíami ko nima echi Jesucristo (Lucas 4:43). Japalí Jesús nuláachi jenaʼí wichimóbachi echi pagótami binema kilí pirelia (Isaías 9:6, 7).

• Ami che machináliaká, leeri echi artículo “¿Qué cosas logrará el Reino de Dios?”.