Echi pagótami ma ke bichiwi echi políticos | ¿Piri aní echi Biblia?

Na bamíali 2024 nirúlima wiká elecciones omáana Wichimóbachi, ke siné echi riká ikili chabé. Nalí be, wiká pagótami ma ke bichiwi echi políticos.

• Echoná Estados Unidos wiká pagótami náritami nili alí wikabéala anili japi “ne sojí suwaba echi políticos binoy bi nátika silíami nínali”, ke ko iʼwírimia echi pagótami (centro de investigación Pew Research Center, 19 inárachi septiembre 2023).a

Wiká kúruwi alí iwé ayénachó ma ke bichiwi echi políticos.

• “Echi kúruwi alí iwé akaréwinali echi karú ikiwáami japi nirú. Japalí náritami nili, echi ko anili japi echi políticos ke omeri akarewia echi namuti chati japi ikí” (The New York Times, 29 inárachi enero 2024).

• “Jaré kúruwi alí iwé náritami nili jépuká bichiwi, alí ineli japi wiká echi bichiwi echi videos japi machina echoná internet alí ke ko echi políticos” (The Korea Times, 22 inárachi enero 2024).

Alí biché, ¿a isima echi políticos japi pe aminana we aʼlá nima? ¿Jépuká ti bichíwisaré?

Natá jépuká mi bichiwi

Ata we aʼlá natásaré jépuká ti bichíwipo. Echi Biblia aní: “Japi ke aʼlá nátami ju ko, bichiwi suwaba japi anéliwa, nalí be japi we aʼlá nátami ju ko, aʼlá nátika isimí” (Proverbios 14:15).

• Ami machináliaká chu iyiri japi aniwá a bichíwali ju o ke, leeri echi artículo “Cómo protegerse de la información falsa”.

Jaré políticos japi aʼláala ju alí japi a iʼwírinali echi pagótami, ke omeri echi riká nokayá. Jiti la, echi Biblia tamó ané:

• “Kiti bichíwisi echi príncipes [o japi nulá], ke cho echi rijoi, jiti ke omero niyubia” (Salmo 146:3).

Bilé nuláami japi mi a bichíwisaré

Echi Biblia ko ruyé japi Onorúami wilali bilé nuláami japi a omeri iʼwiria echi pagótami alí japi ta bichíwisaré: echi ko Jesucristo ju (Lucas 1:32, 33). Jesús ju echi Silíami japi Onorúami wilali alí japi nulama ripá rewegachi jonsa (Mateo 6:10).

• Biné chúsiá mi bichíwisaré Jesús alí japi echi isima akaréwimia echi karú ikiwáami japi ta ikí. Leeri echi artículos “¿Quién es el Rey del Reino de Dios?” alí “¿Qué hará el Reino de Dios?”.