Hermanos kipú echi waʼlú napawíliwami radio alí televisión jitra

Echi waʼlú napawíliwami 2020 we natéami nili, kulí siné grabáritami nili jiti buyama echoná internet. Nalí be, wiká hermanos Malaui piréami alí Mozambique piréami ke néeli echi internet. ¿Chúriká ineli?

Echi Comité de Coordinadores alí Enseñanza japi nikuuri japi Aʼlá Niseri, a risensia iyairu jiti ineka olama echi televisión alí ayénachó jiti kipuma echoná radio. Pe echi ko na bi piréami echi riká olali waʼlú napawíliwami alí echi ko na Malaui piréami alí Mozambique piréami. ¿Chúsiá echi riká nokali? Jiti echomí Malaui we natéami nirú internet, jiti la pe okuabi testigo Jeobá olá internet echoná Malaui. William Chumbi, japi nocha Comité de Sucursal echoná Malaui, jériká aní: “Pe echi riká omebama inea echi waʼlú napawíliwami echoná televisión alí ayénachó radio omebama kipúa”. Luka Sibeko, japi ayénachó nocha Comité de Sucursal echoná Malaui, jéaní: “Ke olásaká echi radio alí televisión, pe okuabi kipúmilialé echi waʼlú napawíliwami echomí Malaui”. Ayénachó echi riká ikili echomí Mozambique. Pe okuabi hermanos a omero ralá bilé celular o bilé tableta, alí we jilí ju natétilia echi internet.

Chúriká nokali

Jiti ma niruili echi nayulí COVID-19, jaré estaciones de radio jonsa a omero simeria echi radio echi reunión sinibí tarali.a Echi hermanos a risensia tánili echi estaciones de radio nóchami jiti wilibé rojorama echi waʼlú napawíliwami.

Echi hermanos echoná Malaui a olali bilé namuti we jilírami. Echi estación de radio pe bilepi hora uchá. A wilí uchásaká, a nasinámalé echi pagótami japi kipúa muchuwi. Echi hermanos a ruyeli a wilibé anachásaká echi napawíliwami, a iʼwírimalé echi pagótami. Tákoré ti ke omero buyánali, nalí ti a iʼwiri echi pagótami jiti binema echi Biblia. Echi riká a we kaníliami nima echi pagótami. Echi estación de radio nóchami japalí kipusa, aminabi wilí uchali.

Echoná Malaui, echi estación de radio a omérili buyania echi radio alí ayénachó echoná televisión echi waʼlú napawíliwami. Wiká pagótami ineli echi televisión alí ayénachó wiká pagótami kipuli echoná radio. Echoná Mozambique, 85 estaciones de radio uchali echi waʼlú napawíliwami. Nalí echi televisión ko pe bilepi estación nili.

28,227 dólaresb echi ikí winomí suwábali jiti echi waʼlú napawíliwami buyama echoná televisión alí ne nokí 20,000 dólares jiti kipúrami nima echi waʼlú napawíliwami echoná radio echi okuaná países. Jaré estaciones de radio nepali 15 dólares, nalí jaréanachó ko nepali 2,777.

Echi hermanos ko we tibuka néeli echi winomí. Echoná Malaui riwali echi estación de radio japi ke me natétika néema, japoná riwali 30% ke me natéami alí ke suwíali 1,711 dólares. Echoná Mozambique, jaréana estaciones de radio ke me natijí japi echi testigo Jeobá we aʼlá natétiami ju.

Echi hermanos ko waʼlú matétara nijí

Echi hermanos ko waʼlú matétara iyali jiti we aʼlá ineli echi waʼlú napawíliwami echoná televisión alí ipuli echoná radio. Patrick, japi anciano ju echoná Malaui, jéanili: “Tamujé waʼlú matétara iyá echi hermanos japi Aʼlá Niseri, japi chiliwé iyali jiti inema echoná televisión alí echoná radio”. Bilecho hermano echoná Malaui bitéami japi Isaac riwewi, jéanili: “Ke ta ité jarecho aparatos, jiti bela ta matétara iyá japi ta kipuli echi napawíliwami echoná radio. Na chiliwé we natéami nili echi organización jitra jiti echi kúchuwala ipuli echi waʼlú napawíliwami. Jiti bela ta machí japi Jeobá ko we galé binoy puéblowala”.

Bilé publicador echoná Mozambique ineli echoná televisión echi waʼlú napawíliwami bamíali 2020. Echi ko jéanili: “Japalí ni ineki echoná televisión echi waʼlú napawíliwami, ni newalari japi Jeobá ko we jiwérami ju. Echi pandemia ko ke tamí chéwili japi ta inepo echi waʼlú napawíliwami jenaʼí bitichí. We ni aʼlá ineki japi echi testigo Jeobá we galéami ju, alí ni machí japi nali religión ko ne bichíwali ju”.

Bilé anciano, Wyson riwéami, jéanili: “Waʼlú matétarabá ni iyánali echi pioni aʼlá nijéwami japi riká tamí tibuli echi pandemia jitra. Ta piré jenaʼí wichimóbachi japoná we risóati ju, nalí be, waʼlú matétara iyá jiti ta ineli echi waʼlú napawíliwami echoná televisión alí ipuli echoná radio”.

Echi Comité de Coordinadores alí Comité de Enseñanza a checho iyáliwami nili chiliwé jiti inepo echi waʼlú napawíliwami 2021 echoná radio alí televisión pe jaréana bi. ¿Chúriká natétilia echi estaciones de radio alí televisión? Matétarabá echi winomí jitra japi nijí sinéami echi hermanos. Wiká jepuná winomí a nijíliwa echoná página internet donate.jw.org. Matétarabá jiti timí we kanílika nijí.