Bilé oselí japi we natéami ju bineliwa
Japalí jonsa chotairu osayá, echi Biblia ko ju, bilé oselí japi né omáana nachutalia. ¿Ami ma leériki jepuná oserúami baʼóami? Chabénalaká tamujé rawéwalachi alí jipi, echi pagótami omáana Wichimóbachi piréami japi ma suwili alí japi jipi piré a riwali buyelíami japi Bíbliachi oserúa uchúi, a kuʼíriwa echi busuréliami kitra japi echi nijí alí kiti aʼlá kami nilia nílima. We be nalí, a bijí a nirú wiká japi kecho leeri, alí wiká a kanílisa nili larú we aʼlá machiyá, chíkoré bichiwi Onorúami ke ma keʼré. Ami nakiyáaká echi, jepuná oserúami mi kuʼírimalé kiti mi ma chotásima machiyá.
JAPALÍ kecho chotasa leeria, we aʼlá ju machiwaa jaré namuti echi kitra. Echi Biblia, ayénachó a machiwaa japi riká Onorúami Raʼicháala, 66 oselí ju japi kilipi kilipi niraa a napabuiru. Echi bachá ko Génesis ju, alí né kuwachimi ko Apocalipsis ju Revelación ma.
¿Jépuká niwali echi Biblia? Echi ko ju bilé náriwami we natéami. Echi 66 oselí 40 pagótami osali, japalí jona chotásiliru japi yéniko suniiru osayá simárili 1,600 bamíali. We nalí be, we natéami ju machiwaa japi ke bilé wesi osáami anili japi echi abói natáala nili japi osali. Nalí be, bilé ko anili: “Riosi aʼlá natárari jaré alabé oráami rejoy mapurigá aboni osimea Riosi Raʼíchara” (2 Timoteo 3:16). Alí bilecho ko anili: “Echi Jeobá jiwérala nili japi tamí kuʼíroli raʼicha, alí echi raʼicháala echoná nijé chamelálachi chukuli” (2 Samuel 23:2). Ma ta ineli, sinéami echi japi osali echi Biblia jéanili japi Jeobá, echi Walubéala Silíami, echi ju japi niwali echi Biblia. Echi oserúami japi Bíbliachi uchúi ata bineriwa japi Jeobá nijili kiti ta mulíwipa echi.
Ayénachó ata newalé machiwáami, kiti echi namuti wabé natéami japi raʼicha echi Biblia, jepuná ko ju: Onorúami ko wilama bilé silíami ripá siyónachi kiti a riwíwitami nima alí kiti machiboa japi Jeobá bi bineli ju japi nulésaré echi pagótami. Jepuná oserúami japi mi leeri, ami binémalé japi né bichíwali ju jepuná japi bineri echi Biblia, japi Génesis jona chota, alí suní Apocalipsis.
Tamujé ko nakí kiti mi natama jepuná kitra japalí mi biné japi aní echi oselí wabé natéami japi osiiru.
a Bamíali ko wikaná niraa aniwá. Jepuná oserúachi néebaré echi raʼíchali chabénala tamujé rawéwalachi (c.t.r.). Suwaba página riléi ayé ami riwimea (c.t.r.).