Nawá echi Mesías

¿CHÚRIKÁ machimea riké echi pagótami jépuká nima riweili echi Mesías? Onorúami binói nikúuroma riweili kiti machimea riweili. Pe aminana 400 bamíali japalí suniiru osayá echi Oserúami Hebreos, bilé ángel japi Gabriel rewéami nili néwaikili japoná María asali, bilé iwé japi biteili echoná Nazarétachi mi jemi Galilea. Gabriel ko jéaneli María japi olama riweili bilé taa muchi. Chíkoré María ko ke siné yúa kochili bilé rejoy, Onorúami isiima riweili kiti ropea ripima. Jepuná taa towí nima riweili echi Silíami japi aniiru japi nawama riweili alí japi nulama riweili sinibimti. Onorúami ko achama riweili echoná María ropálachi echi binói Nolá japi yúa biteili ripá siyónachi.

María ko a isinálami nili japi Onorúami tánili. Echi japi kunala nima riké ko usí kitra nóchami nili, José rewéami nili. Onorúami ko júali bilé ángel kiti ruyema José japi ikiyé alí pe aminana ko ma niwili María yúa. Alí biché, newalaba japi aniiru japi echi Mesías ranarúami nima riweili mi jemi Belenchi, Nazarétachi ko ke (Miqueas 5:2). ¿Chúriká ikimea riweili jepuná, kiti Belén we miká nili, 150 kilómetros Nazaret jonsa?

Pe aminana, bilé silíami romano nulali kiti sinéami pagótami tarárami nima riweili, alí japi sinéami simama roʼasia oselichi aboni rewalá japi mi ranarúami nili. Japi riká José alí María Belenchi ranarúami nili, okuánika simíali echi mi japalí ma kéayó nawárima riké taa muchi (Lucas 2:3). Jesús ko echoná nawáriliru biléana japoná moʼoliwi namuti jákami, japi riká bowá alí waasi, alí a rikairu japoná koʼyé echi namuti jákami. Alí biché, echoná rabó ayé japi mulipi ayé echoná, wikabé ángeles a nokali kiti riwirúami nima jaré bowá niséami kitra alí jéaneiru japi ma nawali echi Mesías, japi ayénachó Cristo nima riweili, japi aniiru japi nawama riweili.

Ayénachó nirúlima riweili jarecho pagótami japi animea japi Jesús nili echi Mesías japi aniiru japi nawama riweili. Echi nawésami Isaías anili japalí kecho nawáachi echi Cristo, kiti bilé pagótami nawisama riké japi ma mulipi nawama riweili (Isaías 40:3). Jepuná rejoy ko nili Juan echi Pakóami. Siné rawé, japalí riwali Jesús anili: “[Nibí] jepuná Rejoy, echi Riosi níwala Méchuli ju, [...] biʼwayá jenaʼí wichimóbachi piréami chati orárira”. We sapuka jaré japi Juan najátami nili ma a najítili Jesús najátiami. Bilé echi jéanili: “¡Tamujé ta ma riwari echi Mesíasi aniríwami!” (Juan 1:29, 36, 41).

We nalí né we sapú machiboa riké japi Jesús né bichíwali Mesías nili. Japalí Juan pakoli Jesús, Jeobá néeli echi binói jiwérala kiti Jesús Mesías nima alí jéanili: “Jepuná ju echi bilepi Nijé [Nolá] mapu ni né wabé kalé. Nijé ni né wabé kanili Binói kiti” (Mateo 3:16, 17). ¡Ma nawali echi Mesías japi aniiru japi nawama riweili!

We nalí be ¿chu kabú ikili jepuná? Echi bamíali 29, japalí ma simároli 483 bamíali japi Daniel anili japi ikimea riké. A nirú wiká namuti japi kítara ta bineriwa japi Jesús ju echi Mesías. Alí, ¿piri namuti binérima riké japalí nawasa jenaʼí Wichimóbachi?

(Jepuná ko uchúi echoná Mateo capítulos 1-3, Marcos capítulo 1, Lucas capítulo 2 alí Juan capítulo 1.)