Echi namuti wabé weli japi Cristo niwali

ONORÚAMI ko iyali jiwériwami Jesús kiti echi oméroma isiá weli namuti japi aneliwa milagros, wiká pagótami riwali japalí isiili. Echi riká ta machí japi Jesús omero mitayá japi sayérala ju echi pagótami sinibí. Jepuná ko ju pe jaré bi.

Kóali echi pagótami. Echi né bachá milagro japi Jesús isiili jepuná ko nili echi baʼwí uva baʼwila ayéntili. Echi riká néwariwélitili kiti echi ko a oméroli nijía wiká koʼwáami alí japi bajima. Pe aminana ko, osá niraa echi okuáabi pani alí rochí wiká muwéwili kiti kóama wiká mili pagótami alí wiká koʼwáami ripili.

Saʼweli echi nayúami. Cristo ko “saʼweli sinéami nayúkami, sinéami okówami ayénachó” (Mateo 4:23). Saʼweli busukachi, pagótami japi ke oméroli kipúa, éena alí jarecho nayúami. Echi binói jiwérala né bichíwali a oméroli saʼwea suwaba.

Raʼámali echi waʼlú iká. Siné rokó, japalí Jesús alí echi najátami éenali Galiléachi biléana bárcochi echoná marchi, chotásili we ikayá. Echi najátami ko we mi majaa nili, we nalí be Jesús ko ripá inélipa alí jéanili né jiwérika: “¡Kilii asagá!”. We sapú, kilii wilíali echi iká (Marcos 4:37-39). Che sinecho rawé Jesús ko moba ayé baʼwírili iyénali japalí we ikayé (Mateo 14:24-33).

Oméroli nulea echi demonios. Jepuná ángeles, demonios rewéami, we jiwérami ju, tamujé ko ke me. Echi ko wiká pagótami risoa olali, alí wiká pagótami ko ke mi omérami nili kiti ke risoa olárami nima. We nalí be, Jesús ko ke pi bilé majaa nili pa. Nalí be, echi ko né mi sawiliwia nokali japalí ineli Jesús alí we sapú nijéwali japalí nuleiru japi riwema risoa olayá echi pagótami.

Ku jawásili echi suwíkami. Echi mukuwáami ko rewaliwa “echi kuwachimi sayériwami”, japi sinibí mitá sinéami (1 Corintios 15:26, NM). Echi mukuwáami ko tasi né waʼlú nili Cristo kitra, kiti echi ko a ku wilásili bilé mukúami ukunámikami ranala alí bilé tewé. We nalí echi namuti wabé walubé japi isiili Jesús, echi ko nili japalí ku wilásili echi binói amígowala Lázaro rewéami, kiti ma naó rawé mukuká boʼili japalí Jesús ku wilásili alí wikabé pagótami riwali. Jepuná ko né wabé walubé nili kiti echi sayérala ko a machili kiti echi ko wabé jiwérami nili (Juan 11:38-48; 12:9-11).

We nalí be, echi pagótami japi Jesús kuʼíroli, kilipi kilipi niraa nayúnali alí suwili. Alí biché, ¿chúsiá isiili jepuná weli namuti? Echi namuti japi isiili echi kitra ta bineriwa kiti ta a bichíwisaré japi aní echi Biblia alí kiti echi riká isiima echi Onorúami Gobiérnowala. Jepuná Silíami japi Onorúami wilali isiima kiti echi Wichimoba jiwérala alí echi ripá siyónami ma ke risoa olama echi pagótami alí suwábama echi lochéwami, nawilí, echi demonios alí ayénachó echi mukuwáami. A newaré japi Jeobá né bichíwali a iyali echi jiwériwami kiti echi riká omérima isiá.

(Jepuná ko uchúi echoná oselichi Mateo, Marcos, Lucas alí Juan.)