BINELÍWAMI 24

Japi Pablo osiili echi bichíwiami

Pablo ko júali oserúami kiti kuʼíroma echi Jesús najátami kiti we jiwérami nima

JEOBÁ ko néema riweili echi japi kulí chótali najata Jesús kiti napawika nokimea jaré namuti we natéami japi Jeobá nakili. We nalí jaré echi anachama riweili japalí risoa olásiwa, ayénachó a nirúlima riweili namuti we jilírami anakúpiri rejimá niraa. ¿Chúriká anáchali? Echi 21 Oserúami Griegas Cristianas kuʼíroli echi Jesús najátami kiti aʼlá kami nilia nílima, echi oserúami nijili ruyelíami japi newaleli.

Pablo ko osali makoy naó oserúami, Romanos jona chótali alí sunili Hebreos. Suwaba oserúami anili jépuká níwala nili ibili niraa echi oserúami, bilepi pagótami we chakó wiká bichíwiami oké. Ma ineba jaré namuti japi osali echi julárami Pablo.

Echi bitéliami alí isimíwami. Echi japi a nasawí ko kecho bilecho niwisá, alí echi niwíkami japi nasawí iseni pagótami yúa alí japi noká jarecho namuti chati alí ke mi omona nili nokisaa echi namuti chati, jepuná pagótami ko “tasi narema echi namuti kalabé japi nijima echi Onorúami Gobiérnowala” (Gálatas 5:19-21; 1 Corintios 6:9-11, NM). Echi japi Jesús najátami ju ko we nakisáré sinéami pagótami, chíkoré ke piréi echoná paísichi japoná echi piré (Romanos 2:11; Efesios 4:1-6). We aʼláala pagótami nísaré alí a kuʼírosaré japi echi yúa napawila kiti nóchima Onorúami (2 Corintios 9:7). Echi julárami Pablo jéaneli kiti raʼíchisaré Jeobá né sulachí jona alí ruyé: “Sinibí aʼlá tániga raʼichasi Riosi” (1 Tesalonicenses 5:17; 2 Tesalonicenses 3:1; Filipenses 4:6, 7). We nalí kiti kipúrami nima Onorúami kitra a raʼíchisaré né wabé bichíwika echi (Hebreos 11:6).

¿Piri iyiri ruyelíami iyali echi Pablo echi wénwala alí kúchuwala? Echi ukunala ko we nakíami nísaré kipi jubí yúa echi riká japi riká nakiká noká abói niraa. Echi jubila né bichíwali riwíisaré kipi ukunala. Alí Onorúami ayénachó nakí kiti echi kúchuwala a nijéwima kipi wénwala, alí echi wénwala ko né aʼlá nakiká binérisaré kipi kúchuwala alí ruyésaré japi bineri echi Biblia (Efesios 5:22–6:4; Colosenses 3:18-21).

Mapa japoná mi iné kumi osali Pablo echi carta

Chúsiá nijili Onorúami echi nulalíwami. Echi Nulalíwami japi Moisés osali tibuli echi israelitas alí ayénachó binérili wilimna rawemti niraa, we nalí japalí ma nawali echi Mesías kipi najátawala ko ma ke newaleli echi nijewáliami japi Moisés osali (Gálatas 3:24). Japalí Pablo osiili echi Hebreos, japi judíos nili, Pablo ko ruyeli chúsiá nijiiru echi Nulalíwami alí piri nóchali iyali Jeobá echi Cristo. Pablo ko ruyeli kiti echi Nulalíwami echi japi oserúami nili echi kitra kiti ta a machiboa japi ikimea riweili. Echi chiliwéliami japi alíwami nili Onorúami koʼwiká namuti jákami, echi ko aniwáami nili kiti Jesús nijima riweili kipi bitéliwala alí echi riká ta wikáwirami niba riweili sinibí (Hebreos 10:1-4). Alí biché, echi Cristo mukúala isiili kiti sunima echi Onorúami katúwiala japi isiili chabéi (Colosenses 2:13-17; Hebreos 8:13).

Echi bichíwami ko kipúa muchuwi leériwachi echi carta japi Pablo osalí

Piri noká ibili niraa echi pagótami echoná napawíliachi. Echi rejoy japi aliwi nóchali echoná napawíliachi echi ko pirélisaré japi riká nulaliwa echoná Bíbliachi alí nijéwisaré japi osiiru echi kitra (1 Timoteo 3:1-10, 12, 13; Tito 1:5-9). Ayénachó, wabé natéami ju kiti sinéami echi japi nochi Onorúami sinibí simásaré echi napawíliachi kiti a we binésima alí kiti anakupi niraa aʼlá kanílika nokimea (1 Corintios 14:26, 31; Hebreos 10:24, 25).

Japalí Pablo osali echi osá oserúami Timoteo, echoná Rómachi checho bachara asali cárcelchi alí buyea asali kiti owéritami nima. Pe okuáabi nili echi bichíwiami japi ke majáami nili alí simíali inebia japoná bachara asali Pablo, tako a machili larú japi oméroma suwiyá. Echi julárami Pablo a machiyé kiti ma né nokí suwibama echi bitéala, kiti bela osálipa: “Ma ni sébari aʼlá nikówari suwaba chati orowáwami sayéraga. Ma ni né sébari suniri nawésiya Riosi Raʼíchara mapurigá bilé máami ma aʼlá suní. Né sinibí nijé ni aʼlá bichiiri Riosi” (2 Timoteo 4:7). A mayewa kiti pe aminana ko ma miʼliru. We nalí, echi oserúami japi echi osali a we aʼlá kuʼíroli echi japi Jesús najátami nili kiti né bichíwali nóchiami nili Onorúami alí jipi ayénachó a bijí nikuuro.

(Jepuná uchúi echoná Romanos, 1 Corintios, 2 Corintios, Gálatas, Efesios, Filipenses, Colosenses, 1 Tesalonicenses, 2 Tesalonicenses, 1 Timoteo, 2 Timoteo, Tito, Filemón alí Hebreos.)

¿JÉPUKÁ JU ECHI NIYÚBIAMI JAPI ANIIRU JAPI NAWAMA RIWEILI?

Pe aminana japalí Adán alí Eva nokali chati namuti, Onorúami ko aneli echi sinói: “Sayékatami níbalé mujé alí echi mukí, alí mujé kúchuwala alí echi mukí ranala. Echi ko mi rikema moʼólachi alí mujé ko ikima raníkalachi” (Génesis 3:15). Japi riká aní Apocalipsis 12:9, echi Diablo “bilé sayawi [sinói] ju, kiʼyá jonsa nirúami”. Echalí ko ke machiwái jépuká nima riweili echi pagótami japi rikema kipi moʼola, we nalí echi Biblia kilipi kilipi niraa anili jépuká nima riweili echi Niyúbiami japi nawama riweili.

Né nokí okuá mili bamíali pe aminana japalí Adán alí Eva nokali namuti chati, Jeobá ko anili kiti echi Niyúbiami ko Abrahán ka jona nawama riweili (Génesis 22:17, 18). Wikabé bamíali pe aminana, echi julárami Pablo ruyeli kiti echi Niyúbiami nili echi pagótami japi rikema riweili echi sinói moʼola, alí echi ko echi Mesías nili (Gálatas 3:16). Echoná Génesis 3:15 aniiru kiti ikima riweili bilé pagótami ‘raníkala’ alí echi ko ikili japalí Cristo mukuli. We nalí, Onorúami ko ku wilásili Jesús alí ma checho ku bitésili japi riká ángel (1 Pedro 3:18).

Onorúami ayénachó nakili kiti nirúlima jarecho pagótami echi Niyúbiami yúa, japi 144,000 pagótami ju, echi ayénachó nochama riweili echoná Onorúami Gobiérnowala (Gálatas 3:29; Apocalipsis 14:1). Jepuná, pe aminana ma suwisaa, ku jawásirami nima riweili kiti pirélima ripá siyónachi japi riká ángeles alí kiti nulama napawika Cristo yúa (Romanos 8:16, 17).

Jesús ko ma Silíami ju ripá siyónachi alí ma we sapú suwábama echi Diablo alí echi kúchuwala, japi demonios ju alí echi pagótami chati japi Satanás nochi (Juan 8:44; Efesios 6:12). Jepuná gobierno ko néema Jesús alí nijima kilii níliwami alí kaníliwami echi japi nijéwiami ju Onorúami. Alí kuwachimi ko, Jesús binói rikema echi sinói ‘moʼola’, echi miʼlimea (Hebreos 2:14).