¿Chúsiá ti katúwika raʼichásaré Jeobá yúa alí pakósaré?

Japalí bilé katuwi Jeobá yúa, echi ko raʼíchika ané japi echi bi nóchilima alí japi wabé natéami ko nima echi jitra isiá suwaba japi Onorúami nakí (Salmo 40:8). Alí japalí ma pakó, echi ko néwariwéliti jarecho japi ma katúwili Onorúami yúa. Echi namuti wabé natéami ju japi ta sinéami omero nokayá. Jiti la, ¿piri mi iʼwírima jiti mi pakónilima?

1. ¿Chúsiá ti katuwi Jeobá yúa?

Jiti ta we galé Jeobá, ata katúwipo echi yúa (1 Juan 4:10, 19). Echi Biblia tamó ané: “Ne sulachí niráa ne wabé galesi echi Walubela kétamo Riósawa. Ayena cho ne suwaba kétamo iwigá niráa [...]. Kétamo ʼnátawa niráa [...]. Ayena cho ne suwaba kétamo jiwérawa niráa” (Marcos 12:30). Japi ta raʼicha alí japi ta noká, néwariwéliti japi ta we galé Jeobá. Japalí bilé mukí alí bilé rijoi we aboi galé anakupi niraa, echi ko niwínali. Echi riká cho ju japalí ti we galé Jeobá, ata katúwika raʼicha echi yúa alí ti pakó.

2. ¿Piri namuti aʼláala iyá Jeobá echi japi ma pakótami ju?

Japalí mi ma pakosa, mujé ko yúa napawima echi Jeobá amígowala, japi ju japi riká téemala alí we kaníliami. Echalí mujé ko aminá inema chúriká Jeobá néwariwéliti japi we mi galé alí mi we mulipi ka nílima echi yúa (leeri Malaquías 3:16-18). Jeobá nima mujé Onolá alí echi hermanos omáana Wichimóbachi piréami japi we galé Onorúami, echi ko nima japi riká mujé téemala alí we mi galema (leeri Marcos 10:29, 30). Nalí a bichíwali ju japi kecho pakoa mujé ko isísaré jaré namuti. Japi riká, ami machisáré Jeobá, galésaré alí mi néwariwélitisaré japi mi bichiwi echi Nolá Jesucristo. Alí aminá ko, ami katúwika anésaré Jeobá japi mi echi bi nijéwima. Ami isísaká suwaba jepuná namuti alí mi pakosa, mujé ko we kanílika bitélima sinibí. Echi Onorúami Raʼicháala ko aní: “Mapalita baʼwí jiti [pakótami] ju, echalí tamujeta achigórigá kuʼwíratami ju [o niyúbitami]” (1 Pedro 3:21).

AMINABI NATABO JAPI TA BINÉ

3. Sinéami tamujé anisáré jépuká ti nijéwipo

Chabé jaré israelitas ko nátili japi aʼlá ju nijewia Jeobá alí ayénachó echi dios Baal. Nalí ke aʼlá nili japi riká nátili. Jiti la Jeobá júali echi profeta Elías jiti anema japi ke aʼlá nili japi nokayé. Leérisi 1 Reyes 18:21 alí raʼichasi jepuná jitra:

• ¿Piri nokisaa riweili echi israelitas?

Japi riká echi israelitas, tamujé ayénachó natásaré jépuká ti nalí nijéwipo. Leérisi Lucas 16:13 alí raʼichasi jepuná jitra:

• ¿Chúsiá ke ti oméripa nijewia okuánika niraa, japi riká Jeobá alí bilecho si, o jarecho si namuti?

• ¿Piri ta nokisáré jiti Jeobá inema japi ta echi bi nijéwinali?

4. Natá japi Jeobá we mi galé

Jeobá ko tamó chiliweli wiká namuti we natéami. Alí tamujé ko, ¿piri ta iyabo? Inesi echi VIDEO.

VIDEO: Piri ta omero nokayá Jeobá jitra (3:04)

¿Chúriká Jeobá mi néwariwéliti japi we mi galé? Leérisi Salmo 104:14, 15 alí 1 Juan 4:9, 10, alí raʼichasi jepuná jitra:

• Suwaba echi namuti japi Jeobá tamujé chiliweli, ¿chu iyiri mi wabé natéami niraa iné?

• Japalí mi nata suwaba namuti japi Jeobá mi iyali, ¿chumi nili echi jitra?

Japalí bilé tamó iyá bilé namuti japi ta we galé, tamujé ko nakí japi echi machimea japi ta we natéami niraa iné japi tamó iyali. Leérisi Deuteronomio 16:17 alí raʼichasi jepuná jitra:

• Japalí mi nata suwaba echi namuti japi Jeobá mi iyali, ¿achi mujé ayénachó nili iyánalia bilé namuti? ¿Piri mi iyama?

5. Ata pakósaká, ati narepo wiká namuti aʼláala

VIDEO: We ni kanilie riʼea echi fútbol (5:45)

• Tákoré echi deportista we kanilie riʼea echi fútbol, ¿chúsiá riweli riʼea?

• Echi ko riweli echi fútbol jiti nijéwinali Jeobá. ¿Achi mi mayé japi we aʼlá isili? ¿Chúsiá?

Kecho cristiano niya, echi apóstol Pablo we natéami nili jiti echi ko bineli bilé binériami yúa japi we machirúami nili echi judíos jitra. Nalí echi ko riweli echi namuti jiti omérima cristiano niya. Pe aminana, ¿achi nátili japi ke aʼlá isili? Leérisi Filipenses 3:8 alí raʼichasi jepuná jitra:

• ¿Chúsiá Pablo anili japi suwaba echi namuti japi olali chabé, nili japi riká basura?

• ¿Piri nareli jiti riweli echi namuti?

• ¿Achi mi mayé japi mi we aʼlá bitélima ami nijéwisaká Jeobá? ¿Chúsiá echi riká mi nata?

JAPI MI BINELI

Ata we galésaká Jeobá, ata katúwika raʼichabo echi yúa alí pakobo.

Piri mi animea

• ¿Chúsiá ti we galésaré Jeobá alí nijéwipo ne sulachí niraa?

• ¿Piri namuti aʼláala iyá Jeobá echi japi ma pakótami ju?

• ¿Ami katúwika anénali Jeobá japi mi echi bi nijéwima?

JITI MI CHE BINEMA

Iné chúsiá bilé tiwé wikaráami alí bilé deportista riweli japi nokali jiti nóchilima Jeobá.

Japi nárika noká echi kúruwi alí iwé si... ¿Piri ni isima ma ochérisa? Japi nokali chabé (6:54)

Biné jarecho si namuti japi chúsiá aʼlá ju japi mi katúwika raʼichama Jeobá yúa.

“¿Chúsiá mi katúwika raʼichásaré Jeobá yúa?” (Echi Nawésami, 15 inárachi enero 2010)

Iné japi we kaníliami ju echi japi katúwika raʼicha Jeobá yúa alí pakó.

Mi ni galémarí (4:30)

Ami machimea chúsiá bilé mukí we winomíwami, nátili japi nijewia Jeobá nalí wabé natéami ju. Leeri echi biografía “Ani machinalie chúsiá ti piré”.

“Binesa echi Biblia jipi ko we kaníliami ju” (Echi Nawésami, 1 inárachi noviembre 2012)