¿Piri aniwáami ju neutral niya?

Jesús ko anili japi echi discípulos ke nokimea riweili japi riká noká echi pagótami jenaʼí Wichimóbachi piréami (Juan 15:19). Jepuná aniwáami ju japi neutrales ju, jiti la echi ko ke iʼwiri echi política alí echi guerras. Nalí, a jilí ju neutral niya, jiti isini kaachi jarecho cha riká raʼichama tamujé jitra. ¿Chúriká ti neutrales nipo alí ti sinibí nijéwipo Jeobá?

1. Japi riká cristianos ne bichíwali, ¿chúriká ti iné echi gobiernos?

Japi riká cristianos, ata riwiwi echi gobiernos. Jesús ko anili: “Galá natétasi suwaba mapu ikí echi walula Sesara anilíwami taní”. Alí echi riká ti noká: ati nijewi japi riká nulá echi leyes, japi riká natetia echi impuestos (Marcos 12:17). Echoná Biblia aní japi echi gobiernos nulá jiti Jeobá riwé japi echi riká nokimea (Romanos 13:1). Jiti la ti machí japi echi gobiernos ke walúala nuláami ju, pe Jeobá bi. Ati we bichiwi japi Onorúami alí echi Gobierno ripá riwigachi nirúami akaréwima echi chati namuti japi nirú jenaʼí Wichimóbachi.

2. ¿Chúriká ti newa noká japi ta neutrales ju?

Japi riká Jesús, tamujé ayénachó ke iʼwiri echi política. Japalí echi pagótami ineli echi milagros japi isili Jesús, echi ko wilánali japi riká silíami, nalí Jesús ko ke nakili (Juan 6:15). ¿Chúsiá ke nakili? Echi ko anili pe aminana: “Nijé Gobiérnowala ko, ke jenaʼí wichimóbachi nirúami ju” (Juan 18:36, TNM). Japi ta Jesús discípulowala ju, ati newa noká japi ta neutrales ju. Japi riká, ke ti simiba nakosia echoná guerra (leeri Miqueas 4:3). Tamujé ko riwiwi echi namuti japi olá bilé país, japi riká echi bandera, nalí ke ti bilé namuti noká echi jitra jiti echi riká ti nokisá ko ju, japi riká ko ti amachikia bilé imagen (1 Juan 5:21). Ke cho ti iʼwiri alí ke cho sayeri bilé partido político o candidato. Echi riká ti newa noká japi ta Onorúami Gobiérnowala bi nijewi.

AMINABI NATABO JAPI TA BINÉ

3. Echi ne bichíwali cristianos neutrales ju

Jesús alí echi discípulos tamó binérili chúriká ti nokiboa. Leérisi Romanos 13:1, 5-7 alí 1 Pedro 2:13, 14. Miná ko inesi echi VIDEO alí raʼichasi jepuná jitra:

VIDEO: Echi ne bichíwali cristianos neutrales ju (parte 1) (4:28)

• ¿Chúsiá ti riwíwisaré echi isélikami?

• ¿Chu iyiri ju jaré namuti japi riká ti néwariwélitipo japi ta nijewi echi?

Japalí nirú guerra jaré países aní japi neutrales ju, nalí echi ko okuánika iʼwiri japi nakó. Japi echi riká noká, ¿achi ne bichíwali neutrales ju? Leérisi Juan 17:16, TNM. Miná ko inesi echi VIDEO alí raʼichasi jepuná jitra:

VIDEO: Echi ne bichíwali cristianos neutrales ju (parte 2) (3:11)

• ¿Piri isimí bilé japi neutral ju?

Isini kaachi echi gobiernos tamó iʼwérili ané japi nokiboa japi Onorúami aní japi chati ju. ¿Piri ta noká japalí echi riká ikisaa? Leérisi Hechos 5:28, 29. Miná ko inesi echi VIDEO alí raʼichasi jepuná jitra:

VIDEO: Echi ne bichíwali cristianos neutrales ju (parte 3) (1:18)

• Bilé gobierno nulásaká japi ta nokiboa japi Onorúami ke galé, ¿jépuká nalí nijéwipo?

• ¿Chu iyiri ju jaré namuti japi nulá echi isélikami alí japi ta ke nijéwisaré?

4. Sinibí newa nokiboa japi ta neutrales ju japi riká ti nata alí noká

Leérisi 1 Juan 5:21. Miná ko inesi echi VIDEO alí raʼichasi jepuná jitra:

VIDEO: Chúsiá ke majásaré japi ta Jeobá nijéwami ju: Jiti ke nokiboa suwaba japi política aneliwa alí kecho nakoba (2:49)

• ¿Chúsiá Ayenge ke napawíe echi política yúa alí ke cho narepánali echi bandera?

• ¿Achi mi mayé japi aʼlá isili?

¿Chu iyiri auché jaré namuti isima japi ta ke neutrales nipo? Inesi echi VIDEO alí raʼichasi jepuná jitra:

VIDEO: Japi tamó bineri echi oselí “Echi Nawésami”: Sinibí neutrales nipo (5:16)

• ¿Chúriká ti newa nokiboa japi ta neutrales ju japalí nirú riʼékiwami wikaná país nirúami?

• ¿Chúriká ti neutrales nipo japalí echi políticos noká bilé namuti japi tamó iʼwiri o ke?

• ¿Chúriká echi japi ta yúa napawí alí japi ta leeri o iné, isima japi ta ke neutrales nipo?

JAPI MI BINELI

Echi cristianos iʼwérili noká ke iʼwiria echi política alí echi riká néwariwéliti japi neutrales ju japi riká nata, raʼicha alí suwaba japi noká.

Piri mi animea

• ¿Chu kabú ata nijéwisaré echi gobiernos?

• ¿Chúsiá ti ke iʼwiri echi política?

• ¿Piri namuti isima japi ta ke neutrales nipo?

JITI MI CHE BINEMA

¿Piri namuti jilírami ta ikibóaré jiti ta neutrales ju?

Jeobá ko ke siné awénili tamó riwé (3:14)

Kecho ikíachi echi namuti japi isima japi ke neutrales nipo, ¿piri nokisáré echi niwíkami alí kúchuwala?

Japalí wiká pagótami rijólisa, ¿ami nijéwima Jeobá? (4:25)

Wiká ko we natéami niraa iné tibúa echi país japoná piré. Nalí, ¿achi echi ju wabé natéami?

“Riosi ne suwaba namuti galá omérami ju” (5:19)

Japalí ti olánali bilé nóchali, ¿chúriká ti newa nokiboa japi ta ke noká japi riká echi pagótami jenaʼí Wichimóbachi piréami?

“Ibili niráa ku ʼyárami níima achigórigá mapurigá aboni olali” (Echi Nawésami, 15 inárachi marzo 2006)