BINELÍWAMI 36
Sinibí ne wachíniga nokiboa
Sinéami nakí japi echi amígowala sinibí bichíwali raʼichama. Jeobá ayénachó echi riká nakí, nalí a we jilí ju echi riká niya jiti wiká pagótami ikaleka raʼicha. Ma binepo chúsiá we aʼlá ju japi ta sinibí ne bichíwali raʼichabo alí piri namuti aʼláala narepo.
1. ¿Chúsiá we natéami ju japi ta sinibí bichíwali raʼichabo?
Japalí ti ke ikaleka raʼicha alí ti ke eki jarecho, ati néwariwéliti Jeobá japi ta we galé alí japi ta riwiwi. Ati newalásaré japi Jeobá ko suwaba machí japi ta nata alí japi ta noká (Hebreos 4:13). Echi ko we natéami niraa iné japalí ti iʼwérili noká ke ikaleka raʼichia. Jiti la echoná Biblia aní: “Jeobá we kichí echi pagótami japi cha nokáami ju, nalí amígowala ju echi japi we aʼlá noká” (Proverbios 3:32).
2. ¿Chúriká néwariwélitipo japi ta bichíwali raʼicha?
Jeobá ko nakí japi sinéami tamujé sinibí “bichíwali raʼichabo anakupi niraa” (Zacarías 8:16, 17). Echi riká nokiboa japalí ti raʼicha tamujé téemala yúa, japoná ti nocha, echi hermanos echoná congregación alí echi weli jáwami yúa. Ke ti ékisaré alí ke chiwénisaré jarecho (leeri Proverbios 24:28 alí Efesios 4:28). Ayénachó nateti echi winomí japi echi gobiernos tamujé tani (Romanos 13:5-7). Suwaba japi ta noká ata néwariwélitipo japi ta “ne wabé galabé olánali” (Hebreos 13:18).
3. ¿Chúsiá aʼlá ju japi wachíniga nokáami nipo?
Japalí ti ke ékiami ju alí ke chiwáami, jarecho ko a tamó bichíwima. Echi riká ti iʼwiri jiti echoná congregación sinéami ka napawika nima japi riká téemala, alí tamujé aboi ayénachó kilí niraa piré. Ati wachíniga nokáami nísaká, echi pagótami riwisá animea “mapu Riosi Raʼíchala binékowami ne wabé galabé ju”, jepuná iʼwírimaré jiti echi ayénachó nijéwinalima Jeobá (Tito 2:10).
AMINABI NATABO JAPI TA BINÉ
Ma binepo chúsiá Jeobá we natéami niraa iné japi echi amígowala wachíniga nokimea alí japi chúriká ti sinibí ne bichíwali aniboa.
4. Jeobá ko we galé echi pagótami japi ne bichíwali raʼicha
Leérisi Salmo 44:21 alí Malaquías 3:16, alí raʼichasi jepuná jitra:
¿Achi mi mayé japi mi ke nawisásaká japi ikili ke bilé machimea? ¿Chúsiá mi echi riká nata?
Tákoré we jilí ju nalí ami ne bichíwali raʼichásaká, ¿chúriká nílimalé Jeobá?
Japalí echi kuuchi bichíwali raʼicha, a kaníliti echi wénwala. Japalí tamujé bichíwali raʼicha, ati kaníliti Jeobá.
5. Sinibí wachíniga niraa nokiboa
Wiká pagótami ke kanili wachíniga niraa nokayá, nalí a we aʼlá ju japi ta sinibí wachíniga nokiboa. Ma binepo chúsiá. Inesi echi VIDEO.
Leérisi Hebreos 13:18 alí raʼichasi chúriká ti sinibí wachíniga nokiboa...
... tamujé téemala yúa.
... japoná ti nochi o echoná escuela.
... jarecho namuti ikisaa.
6. Sinibí we aʼlá ju japi ta wachíniga nokiboa
Ati ne bichíwali raʼichásaká ne kulí ko ati risoa níliporé, nalí be we aʼlá ju jiti miná ko we kanila pirélipo. Leérisi Salmo 34:12-16 alí raʼichasi jepuná jitra:
Ati sinibí wachíniga nokáami nísaká, ¿chúriká ti pirélipo?
Japalí echi kunala alí echi upila sinibí wachíniga noká, we kanílika piré.
Japalí echi nóchami sinibí wachíniga nokáami ju alí bichíwali raʼicha, echi isima japi echi patrón sinibí bichíwima echi.
Japalí echi pagótami sinibí wachíniga nokáami ju, echi weli jáwami aʼlá raʼichama echi jitra.
JAPI ANÍ JARÉ PAGÓTAMI: “Ke namú ikimea ati isini kaachi ikaleka raʼichásaká”.
¿Achi nakí Jeobá japi ta isini kaachi ikaleka raʼichabo? ¿Chúsiá mi echi riká nata?
JAPI MI BINELI
Jeobá ko nakí japi echi amígowala sinibí wachíniga nokimea alí sinibí bichíwali raʼichama.
Piri mi animea
¿Chu kabú alí jépuká yúa sinibí wachíniga nokiboa?
¿Chúsiá ti ke mayésaré japi ta ke nawisásaká japi ikili ke bilé machimea?
Mujé ¿chúsiá mi sinibí wachíniga isínali?
JITI MI CHE BINEMA
¿Chúriká echi wénwala binérisaré echi kúchuwala jiti sinibí bichíwali raʼichama?
¿Piri namuti aʼláala narema japi a noká japi ma anili?
Leeri achi ta natétisaré winomí echi gobiernos tákoré ke aʼlárika nee.
“¿Achi mi natétisaré winomí echi gobiernos?” (Echi Nawésami, 1 inárachi septiembre 2011)
¿Piri namuti iʼwírili bilé rijoi japi ékiami nili jiti riwema cha isiá alí we aʼláala rijoi nima?
“Ani bineki japi Jeobá ko we aʼláala ju alí tamó wikawi” (Echi Nawésami, 1 inárachi mayo 2015)