Piri aní echi Biblia echi nóchali jitra alí winomí

¿Ami isini kaachi we nata chúriká mi olama nóchali alí winomí? Ami we jilí niráaká olayá japi mi newalé alí ayénachó isiá japi Jeobá mi nulé, echi busuréliami japi uchuwi echoná Biblia mi iʼwírima jiti mi machimea chúriká mi isima.

1. ¿Piri aní echi Biblia echi nóchali jitra?

Onorúami ko nakí japi ta kanila nochabo, jiti la echoná Biblia aní: “Ke nirú bilecho namuti japi we kaníliti echi rijoi japi riká [...] kanila nochia” (Eclesiastés 2:24). Jeobá ko we nóchami ju. Alí japalí tamujé ayénachó we nocha, ati ju japi riká echi alí ti we kanili.

Echi nóchali we natéami ju, nalí ke siné riwésaré japi echi isima japi tamujé riwepo nijewia Jeobá (Juan 6:27). Onorúami ko anili japi sinibí tamó iyama japi ta newalé ata bachá nokisáaká japi echi aní.

2. ¿Piri aní echi Biblia echi winomí jitra?

Echi Biblia ko aní japi “echi winomí tamujé iʼwiri”, nalí ayénachó aní japi echi winomí ke sinibí tamó iʼwírima jiti kaníliami nipo (Eclesiastés 7:12). Jiti la echi Biblia aní japi ta ke we korúsaré echi winomí alí nijí jepuná busuréliami: “Kanílasi echi jaré namuti jiti mapu ikítamo ma níwa” (leeri Hebreos 13:5). Ke ti kanila pirélisaká olayá echi namuti bi japi ta ma olá, aminabi ta iʼwérili nokibóaré aa japi ta olánali alí ti we risoa níliporé (Proverbios 22:7). Nalí ati kanilia pirélisaká olayá echi namuti bi japi ta ma olá, ke ti wiká wikaboa, ke cho ti sakeka riʼepo echi winomí jitra alí ke ti narepo echi nóchali japoná ti wiká winomí me, nalí japi ke aʼlá ju.

3. ¿Chúriká néepo echi winomí japi ta olá?

Jeobá ko we simá isíami ju alí nijí japi ta newalé, alí japalí ta nijí japi ta olá, ati newa noká japi ta ju japi riká echi (1 Timoteo 6:18). Ata omero nijía winomí echoná congregación jiti natétima japi newalé, ayénachó iʼwíripo jarecho japi newalé, nalí bachá echi hermanos. Jeobá ko ke me natéami niraa iné chu kipu ta nijí, nalí chúsiá ta nijí. Ata nijísaká ne sulachí jonsa japi ta olá, ata we kanílipo alí ayénachó we kanílitipo Jeobá (leeri Hechos 20:35).

AMINABI NATABO JAPI TA BINÉ

4. Japalí ti we nóchami ju ati kanílitipo Jeobá

VIDEO: Nóchilipo Jeobá ne sulachí jonsa (4:39)

• ¿Piri mi we galeli japi riká isili Jason echoná nóchali?

• ¿Piri iʼwírili Jason jiti ke rasíruka natéami niraa inema echi nóchali Jeobá yúa?

Leérisi Colosenses 3:23, 24, TNM, alí raʼichasi jepuná jitra:

• ¿Chúsiá we natéami ju japi ta ne sulachí jonsa nokiboa echi nóchali?

Echi nóchali ko we natéami ju, nalí ke tasi wabé rasíruka natéami niraa inésaré Jeobá yúa.

5. Chúsiá we aʼlá ju japi ta kanila pirélipo echi namuti bi jitra japi ta ma olá

Wiká pagótami iʼwérili noká muwewia winomí, nalí echi Biblia ke aní japi echi riká nokiboa. Leérisi 1 Timoteo 6:6-8 alí raʼichasi jepuná jitra:

• ¿Piri busuréliami tamó iyá echi Biblia?

VIDEO: “Chopi galá kanílasi echi jaré namuti jiti mapu ikítamo ma níwa” (3:20)

• ¿Chúsiá a kanila piré echi hermanos tákoré ke wiká winomí olá?

Nalí ma ti olásaká winomí alí ti che minabi olánalaká, Jesús anili japi ke aʼlá ju echi riká natasa. Leérisi Lucas 12:15-21 alí raʼichasi jepuná jitra:

• ¿Piri mi biné echi jitra japi anili Jesús? (Inesi echi versículo 15).

Leérisi Proverbios 10:22 alí ayénachó inesi japi aní 1 Timoteo 6:10. Alí raʼichasi jepuná jitra:

• ¿Piri nalí wabé natéami ju: Jeobá amígowala niya, o wiká winomí olayá? ¿Chúsiá?

• ¿Piri ikiboa ata we korúsaká echi winomí?

6. Jeobá tamujé iʼwírima jiti olabo japi ta newalé

VIDEO: Jeobá tamó iʼwírima jiti olabo japi ta newalé (6:21)

• ¿Piri namuti we jilírami ikili echi hermano japi machina echoná video?

• ¿Chúriká newa isili japi we bichíwili Jeobá?

Leérisi Mateo 6:25-34 alí raʼichasi jepuná jitra:

• ¿Piri ané Jeobá echi japi iʼwérili noká echi nijewia?

JAPI MI BINELI

Echi nóchali alí winomí we natéami ju, nalí ke ti siné riwésaré japi wabé rasíruka natéami nima Jeobá yúa.

Piri mi animea

• ¿Piri mi iʼwírima jiti mi ke rasíruka natéami niraa inema echi nóchali Jeobá yúa?

• ¿Chúsiá we aʼlá ju japi ta kanila pirélipo echi namuti bi jitra japi ta ma olá?

• Jeobá ko aní japi iyama japi newalé echi japi nijéwami ju, nalí ¿chúriká mi newa isima japi mi we bichiwi echi?

JITI MI CHE BINEMA

Biné achi echi Biblia aní japi echi winomí chati ju.

“¿Achi echi winomí iyiri ju japi ta risoa nílipo?” (Oselí japi nirú echoná jw.org)

Leeri chúriká nakí Jeobá japi ta nijibo echi namuti.

“Japi riká aní echi Biblia, ¿chúriká nijibo?” (Oselí japi nirú echoná jw.org)

¿Achi we chati ju riʼea jiti olabo winomí?

“Japi aní echi Biblia: Echi sakeka riʼéliami” (¡Busuréwiami!, marzo 2015)

Leeri piri namuti iʼwírili bilé rijoi jiti riwema sakeka riʼea alí chiwáami niya.

“We ni kanilie sakea japoná riʼéliwa carreras de caballos” (Echi Nawésami, 1 inárachi noviembre 2011)