Japi mi buwé ne echi riká ikimea

1. ¿Chúsiá ti machí japi Abrahán we bichíwili japi Jeobá aneli?

JEOBÁ ko aneli echi amígowala Abrahán japi sinéami echi pagótami jenaʼí Wichimóbachi piréami, aʼláala namuti narema echi kúchuwala jitra (Gén. 15:5; 22:18). Jiti Abrahán we bichíyami nili, echi ko aʼlá machili japi Onorúami aneli ne echi riká ikimea. Japalí Abrahán ne sojí 100 bamíbami nili alí echi upila ko 90, kecho bijí ranéami nili (Gén. 21:1-7). Nalí echoná Biblia aní: “Abrami galá bichíiga buweli mapurigá binói arigá kúchama, ayénachó mapurigá binói kúchuwala ne wikabé muwema [...] mapujiti Riosi bachá niráa jeaneli” (Rom. 4:18). Alí ata machí japi Abrahán buweli ne echi riká ikili, jiti pe aminana echi ko onolá nili echi Isaac japi wiká bamíali buweli echi olamia. ¿Chúsiá Abrahán we bichíwili japi Jeobá isima japi riká anili?

2. ¿Chúsiá Abrahán we bichíwili japi Jeobá isima japi riká anili?

² Jiti echi Abrahán we aʼlá amígowala nili Jeobá yúa, echi ko “ne galá bichíili mapu Riosi [...] olama riwéali” (Rom. 4:21). Jeobá ko we galeli Abrahán alí ineli japi riká bilé rejoy wachíniga isíami jiti we bichíyami nili (Sant. 2:23). Japi riká aní Romanos 4:18, Abrahán ko we bichíwili alí buweli japi Onorúami isima. Jipi ko binepo japi anili echi apóstol Pablo echi jitra japi ta buwé japi riká aní echoná capítulo 5 echoná Romanos.

3. ¿Piri ruyé Pablo echi japi ta buwé jitra?

³ Pablo ko ruyeli chúsiá ta bichíwisaré japi ta buwé ne echi riká ikimea (Rom. 5:5, TNM). Ayénachó tamó ruyé chúriká ti aminabi bichíwisipo japi ta buwé. Japalí mi biné japi aní Pablo echoná Romanos 5:1-5, natá chúriká mi aminabi we bichíwisili japi mi buwé japalí mi jonsa binésili. Ayénachó japi ta jitra binepo, tamó iʼwírima machiyá chúriká ti nokiboa jiti aminabi we bichíwipo japi ta buwé. Bachá binepo bilé namuti japi ta buwé alí japi Pablo anili japi ne echi riká ikimea.

JAPI TA BUWEA PIRÉ

4. ¿Piri jitra raʼicha echoná Romanos 5:1, 2?

⁴ (Leeri Romanos 5:1, 2). Pablo osélili jepuná raʼíchali echi congregación echoná Roma. Echalí, echi hermanos alí hermanas japi echoná napawili ma bineli Jeobá jitra alí Jesús, we bichíwili alí ma cristianos nílili. Jiti la, Onorúami ko ineli japi riká we aʼlá nokáami jiti we bichíyami nili alí chapili echi espíritu santo jitra jiti nulama Jesús yúa. Echi ko we semati namuti omérili buwea alí we bichiwia japi a narema.

5. ¿Piri buwea piré echi ungidos?

⁵ Pe aminana, Pablo ko ruyeli echi cristianos ungidos Éfeso piréami, echi japi buwea pireili. Pablo anili japi Jeobá “ʼyama echi ne wabé simírami galabéala [...], mapujítita Binói níwala ju” (Efes. 1:18). Alí Pablo ayénachó aneli echi colosenses kumi narema japi buwea pireili. Echi ko jéaneli: “Mapurigátamo narepo ne suwaba echi galabéala mapu Riosi ʼyemi mi ʼyama echoʼná ripá riwigachi” (Col. 1:4, 5). Jiti la echi cristianos ungidos japalí suwisaa, Jeobá ku jawásima alí simama echoná ripá riwigachi japoná sinibí pirélima alí nulama Jesús yúa mili bamíali (1 Tes. 4:13-17; Apoc. 20:6).

6. ¿Piri anili echi hermano Frederick Franz echi namuti jitra japi buwea biteili?

⁶ Echi cristianos ungidos we natéami niraa iné japi ripá simama nulamia Jesús yúa. Bilé echi hermano ko nili Frederick Franz, japi jériká anili: “Japi ta buwé ata machí japi ne bichíwali echi riká ikimea, alí ibili niraa tamujé echi 144,000 narepo japi Jeobá anili japi tamó iyama. Japi ta narepo, rasíruka wabé natéami nima echi namuti yúa japi ta olá jipi”. Bamíali 1991, japalí ma wilí isili nóchilia Jeobá, echi hermano jéanili: “Tamujé ko a bijí we natéami niraa iné japi ta buwé. Japalí ti aminabi we buwé, ati aminabi waʼlú matétara iyá Onorúami, alí ti aminabi buwepo tákoré bilé millón bamíali simiri”.

7, 8. ¿Piri buwea piré ne sojí sinéami japi nijéwami ju Jeobá? (Romanos 8:20, 21).

⁷ Japi riká Abrahán, ne sojí sinéami echi pagótami japi Jeobá nijéwami ju, buwé pirélimia jenaʼí Wichimóbachi japalí nulasa echi Onorúami Gobiérnowala (Heb. 11:8-10, 13). Pablo ayénachó raʼíchili jepuná namuti jitra (leeri Romanos 8:20, 21). Japalí mi bineli japi aní echi Biblia japi ikimea pe aminana, ¿piri mi wabé galeli? ¿Achi mi galeli japi mi sébali aʼlá isíami nima? ¿Achi mi we kanílili machiyá japi echi mujé téemala ku jawásitami nima alí pirélima echoná Wichimóbachi we baʼóachi? Matétarabá jiti Jeobá ko ma anili japi mi iyama echi namuti, mujé we kanílika bitélima pe aminana.

⁸ Sinéami tamujé buwé bilé namuti we semati japi tamó kaníliti, jaré ko pirélima echoná ripá riwigachi alí jaré ko jenaʼí Wichimóbachi. Alí ati omeri aminabi we bichiwia echi namuti japi ta buwé. ¿Chuti riká nokiboa? Jiti ta aminabi machiboa binepo japi Pablo osali. Echi tamó iʼwírima jiti aminabi bichíwipo japi echi namuti japi ta buwea piré a ne bichíwali echi riká ikimea.

PIRI TAMÓ IʼWIRI AMINABI WE BICHIWIA JAPI TA BUWEA PIRÉ

9, 10. Japi riká ikili Pablo, ¿piri ta machí japi ta ikiboa? (Romanos 5:3; ayénachó iné echi fotos).

⁹ (Leeri Romanos 5:3, TNM). Pablo ko anili bilé namuti japi ta ke mayea nili japi echi riká ikimea: japalí ti ikí namuti jilírami, ati aminabi we bichiwi japi ta buwea piré. Alí japi ta cristianos ju, ati machí japi ta ikiboa namuti we jilírami. Natabo japi Pablo aneli echi cristianos Tesalónica piréami: “Chabénala mapalita abijí echoʼná ʼyemi yuwa muchili, echalita bachá niráa aneli mapu tamujeta arigá wabé risúu olárami níibo. Aʼlí jípitamo ma galá machí mapurigá ma echirigá ikili” (1 Tes. 3:4). Alí ayénachó Pablo ruyeli echi corintios japi ikili namuti we jilírami alí mayeli japi ne sojí suwimea (2 Cor. 1:8; 11:23-27).

¹⁰ Jepuná ko a bichíwali ju jiti japi ta cristianos ju, ati machí japi ta ikiboa namuti jilírami (2 Tim. 3:12). Alí, ¿piri namuti jilírami ami ikili japalí mi jonsa chotásili bichiwia Jesús alí nijewia japi echi aní? A keʼré japi mujé amígowala o mujé téemala mi kaweli o mi risoa olayéeré. Jiti mi ke ékiami ju, ¿achi mi ikí namuti jilírami japoná mi nocha? (Heb. 13:18). ¿Achi mi najátarami ju echi gobierno jitra jiti mi ruyé jarecho japi mi buwea bité? Tákoré ti ikiyé chuwé namuti jilírami, Pablo ko anili japi ta kanílipo. ¿Chúsiá?

11. ¿Chúsiá ti iʼwérili nokisáré anachia?

¹¹ Ati kanílipo japalí ikisaa namuti we jilírami, jiti japi riká aní Romanos 5:3, echi namuti we jilírami isimí japi ta anachabo. Jiti sinéami cristianos ata ikí namuti we jilírami, ata iʼwérili nokisáré anachia. Ati anachásaká, ata narepo japi ta buwea piré. Ke ti nínali japi riká echi pagótami japi Jesús jitra raʼíchili echoná ejemplo echi talí japi wichí echoná ritérili japoná taa weʼé atí. Echi ko kanila naré echi Onorúami Raʼicháala, “chopi mapalí aboni we risúu olárami níima [...], echalí aboni ma ketasi waminabi galá bichíima” (Mat. 13:5, 6, 20, 21). A bichíwali ju japi ke wesi kanili japalí risoa oliwá o japalí ikí namuti jilírami, nalí anachia a tamó iʼwiri. ¿Chúsiá? Ma binepo.

12. ¿Chúriká tamó iʼwiri anachia?

¹² Echi discípulo Santiago osali chúsiá we natéami ju japi ta anachabo: “Riwesi japi echi anacháliwami sunima echi nóchali, jiti emi sébali aʼlá nokáami nima alí ke bilé namuti newalema” (Sant. 1:2-4, TNM). Jiti la jepuná ko ju japi riká ko echi anacháliwami olayá bilé nóchali japi isima. ¿Chu iyiri ju? Tamó iʼwiri we kilí niya alí aminabi we bichiwia Onorúami. Nalí ke echi bi ju. Ayénachó isimí bilecho namuti aʼláala.

13, 14. ¿Piri ikí japalí ti anacha, alí chúriká tamó iʼwiri? (Romanos 5:4, TNM).

¹³ (Leeri Romanos 5:4, TNM). Pablo anili “japalí ti anacha echi isimí japi ta galérami nipo Onorúami jitra”. Jepuná ko ke aniwáami ju japi Jeobá kanili japalí ti ikí namuti jilírami, nalí echi ko kanili japalí ti anacha. ¿Kechi ko mi we kanili machiyá japi mi we nijéwami nísaká alí anachásaká, ami we kanílitima Jeobá? (Sal. 5:12).

¹⁴ Natabo Abrahán jitra. Echi ko galérami nili Onorúami jitra jiti anáchili echi jilírami namuti japi ikili. Jeobá ko ineli japi riká echi amígowala alí japi riká bilé japi we wachía isíami nili (Gén. 15:6; Rom. 4:13, 22). Echi riká cho ikí tamujé jitra. Ke ti galérami ju Onorúami jitra jiti ta noká wiká namuti echi nóchilia o jiti ta olá bilé nóchali echoná congregación, nalí jiti ta we nijéwami ju alí anacha. Alí sinéami ati galérami nipo tákoré ti ke chopi ikí bamíbami ke, sinúrika nóchali nokayé o sinúrika namuti ta ikiyé. ¿Jipi achi mi ikí bilé namuti we jilírami? Ami echi riká ikiyáaká, kiti wikawá japi mi we nijéwami nísaká, mujé ko galérami nima Onorúami jitra. Machiyá japi Jeobá we kanili tamujé yúa, we tamó iʼwiri jiti aminabi we bichíwipo japi ta buwea piré.

ATI AMINABI BICHIWI JAPI TA BUWÉ

15. ¿Piri bilecho namuti ruyeli Pablo, alí piri ta nárika nokibóaré?

¹⁵ Japi riká ti ma bineli, Pablo anili japi ta galérami nipo Onorúami jitra ati anachásaká. Miná ko jériká ruyeli: “Japalí ta galérami ju Onorúami jitra, echi isimí japi ta buwea pirélipo, alí japi ta buwea piré ne echi riká ikimea” (Rom. 5:4, 5, TNM). Nalí be, echoná Romanos 5:2, Pablo ma anili japi echi cristianos Roma piréami buwea pireili bilé namuti, japi “oʼwélatami níibo Riosi yuwa echalí mapalí Riosi waminabi wabé walubélaga anérami níima”. Jiti la, ati nárika nokibóaré: “Echi cristianos ma buwea pireili bilé namuti, nalí ¿chúsiá Pablo checho raʼicha japi buwea pireili echi cristianos?”.

16. ¿Chúriká bilé pagótami aminabi bichíwisimi japi buwea bité ne echi riká ikimea? (Ayénachó iné echi fotos).

¹⁶ Ati oméripo aʼlá inamia japi Pablo ruyá anili, ati natásaká japi ta a omeri aminabi bichiwia japi ta buwea piré. Natá japalí mi ruyeri japi mujé ko omérima sinibí bitea echoná Wichimóbachi japalí ma we baʼóachi nisa, a keʼré japi mujé ko nátili japi echi namuti we baʼóami ke ne bichíwali ikimea. Nalí, japalí mi aminabi machísili Jeobá jitra alí japi aní echi Biblia, mujé ko aminabi we bichíwisili japi echi namuti a ne bichíwali echi riká ikimea.

17. Japalí mi jonsa pakoli, ¿chúriká mi aminabi we bichíwisili japi mi buwea bité?

¹⁷ Japalí mi jonsa pakoli, mujé ko aminabi bichíwisili japi mi buwea bité jiti mi aminabi binésili alí aminabi we aʼlá amigo nílisili Jeobá yúa (Heb. 5:13–6:1). A keʼré japi mi ikili wiká namuti jilírami alí mi anáchili. Jepuná ko isili japi mi galérami nima Onorúami jitra japi riká aní Romanos 5:2-4. Jiti mi machí japi Jeobá ko we kanili mi yúa, mujé ko aminabi bichiwi japi Jeobá ko a isima japi echi ma anili. Jipi ko mi aminabi we bichiwi echi namuti japi mi buwea bité, ke ko japi riká ne kulí. Alí mi néwariwéliti japi riká mi ju mujé téemala yúa, japi riká mi bité alí japi mi isínali.

18. ¿Piri tamó ané Jeobá echi Pablo jitra?

¹⁸ Pablo ko anili japalí ta galérami ju Onorúami jitra, echi isimí japi ta buwea pirélipo. Miná ko, echi ko anili bilecho namuti we natéami: ata omeri bichiwia japi echi namuti japi ta buwea piré ne bichíwali echi riká ikimea. ¿Chúsiá? Jiti Onorúami echi riká aneli echi cristianos néeka echi Pablo: “Alí japi ta buwea piré ne echi riká ikimea; jiti Onorúami we tamujé galeli echi espíritu santo jitra japi ma tamujé iyali” (Rom. 5:5, TNM). Jiti la, ami we bichíwisaré japi echi namuti japi mi buwea bité ne echi riká ikimea.

19. ¿Piri ta we bichiwi?

¹⁹ Aʼlá ju japi mi natama Abrahán jitra. Jeobá ko we galeli, aneli japi iyama bilé namuti alí ineli japi riká echi amígowala. Alí japi Abrahán buweli ne echi riká ikili. Echoná Biblia aní: “Mapalí echi Abrami [...] buweli, echalí binói arigá echirigá ʼyárami níili mapurigá Riosi bachá niráa ne bichíwaga aneli” (Heb. 6:15; 11:9, 18; Rom. 4:20-22). Japi riká Abrahán, ati we bichiwi japi ta we nijéwami nísaká Jeobá, echi japi ta buwea piré ne echi riká ikimea. Japi ta buwé ne bichíwali ju, alí echi ko we tamó kaníliti (Rom. 12:12). Pablo ko osali: “Nijeni nakí mapu Riosi ʼyemi mi wabé kanílatama, ayénachó [...] mapurigátamo kilíi ologá pirélabo, mapujítitamo galá bichíi Binói. Aʼlí Riosi echirigá ʼyemi mi ʼyama mapurigátamo echijiti abijí waminabi galá bichíibo, mapujiti echi Wabé Galabé Riosi Iwigala ʼyemi mi jiwérata” (Rom. 15:13).