Natabo japi riká Onorúami nata echi alcohol jitra

JEOBÁ ko tamó chiliweli wiká namuti, alí echi ko nakí japi ta aboi natabo chúriká ti néepo echi namuti. Bilé echi chiliwéliami ko ju echi vino. Alí echi Biblia ko aní japi “echi pan niwárami ju jiti raʼila okebo alí echi vino isimí japi we kanilia nílipo” (Ecl. 10:19; Sal. 104:15). Nalí ati iné japi jaré pagótami we bají echi alcohol. Ayénachó jaré pagótami jaréana piréami suwinárika niraa iné bajía alcohol. Jiti la japi ta cristianos ju, ¿chúriká ti inésaré echi alcohol?

Japalí ti noká bilé namuti, ati natásaré echi busuréliami japi Jeobá tamó iyá alí ke ko japi aní jarecho pagótami. Echi riká ti nokisáaká we ti kaníliami nipo.

Ati inéiré japi omáana nirú pagótami japi waʼlú bají alcohol alí ne sojí sinibí rawé. Jaré ko bají jiti kilí nílinali. Jarecho ko bají jiti ma ke natama echi karú ikiwáami japi ikí. Alí a nirú jaréanami japoná echi pagótami bají jiti néwariwélitinali japi we jiwérami ju.

Nalí japi ta cristianos ju, we ti aʼlá busuréliami olá japi Jeobá tamó iyá. Echoná Biblia, echi ko tamó ané echi chati namuti japi ikí echi japi waʼlú bají. Japi riká, echoná Proverbios 23:29-35 ruyé echi chati namuti japi isimí echi japi rikúami ju alí japi ikí.a Daniel, japi anciano ju echomí Europa, aní chúriká biteili japalí kecho testigo Jeobá nili. Echi ko jéaní: “Jiti ni waʼlú bajíe alcohol, echi isili japi ni ke aʼlá nátika isima jaré namuti. Alí japalí ni nata echi namuti japi ni isili o japi ni ikili, ani we omona nili”.

¿Piri tamó iʼwírima jiti aʼlá nátika nokiboa echi alcohol jitra alí jiti ke ikiboa echi chati namuti? We natéami ju japi natabo japi riká Onorúami nata echi namuti jitra.

Ma inepo japi aní echi Biblia echi alcohol jitra alí chu iyiri ju echi namuti japi jitra echi pagótami bají.

JAPI ANÍ ECHI BIBLIA

Echi Onorúami Raʼicháala ke aní japi chati ju taa bajía alcohol. Nalí ruyé japi echi vino tamó kaníliti. Eclesiastés 9:7 aní: “Kanílika oká mujé níwala koʼwáami, alí ne sulachí jonsa kanílika bají mujé níwala vino”. Echi Biblia ayénachó aní japi Jesús alí jarecho japi Jeobá nijéwami nili, siné kaachi bajili vino (Mat. 26:27-29; Luc. 7:34; 1 Tim. 5:23).

We be nalí, ke chopi iyiri ju taa bajía alcohol alí rikuka bajía. Echi Biblia aʼlá ruyé: “Ketasi tégasi [o rikusi]” (Efes. 5:18). Ayénachó aní japi echi rikúami ke pirélima japalí nulama echi Onorúami Gobiérnowala (1 Cor. 6:10, TNM). Jeobá we chati niraa iné waʼlú bajía alí rikuka bajía. Ke ti nokisáré japi riká noká echi pagótami japoná ti piré, tamujé ko nalí nokisáré echi namuti japi Onorúami galé.

A nirú jaré pagótami japi aní: “Nijé ko a omeri waʼlú bajía alcohol alí ke rikúa”. Nalí echi riká natia we chati ju. Echi Biblia ko aní japi echi rejoy alí mukí japi we bajíami ju, noká namuti we chati alí riwé Onorúami amígowala niya (Tito 2:3; Prov. 20:1). Jesús ayénachó anili japi “waminá tékasagá”, ke tasi pirélima jenaʼí Wichimóbachi japalí we baʼóami nisa (Luc. 21:34-36). Jiti la, ¿piri omeri isiá echi cristiano jiti ke ikimea echi karú ikiwáami japi ikí echi japi we bají?

NATÁ CHU CHULÚ MI BAJÍ, CHU KISAPI ALÍ CHÚSIÁ

Japi riká ti ma ineli, we natéami ju japi ta ke natabo echi alcohol jitra japi riká nata echi pagótami japoná ti piré. Jiti la echi cristianos iʼwérili noká nokayá echi namuti japi Jeobá galé japalí koʼá alí bají. Echi Biblia tamó iyá jepuná busuréliami: “Átamo kosáagá jaré koʼwáami, átamo bajísagá jaré bajíwami keremá, átamo olásagá auché jaré namuti keremá, ne suwaba mapu ikítamo olá, sinibí ne galabé niráa olasi ne suwaba, mapurigá echi Walubela Riosi echijiti waminabi walubéraga anérami níima” (1 Cor. 10:31). Ma inepo jaré busuréliami alí náriwami japi ta sinibí newalásaré.

¿Achi ni bají alcohol jiti ni kanílitinali jarecho? Éxodo 23:2 aní: “Kiti isí japi riká noká wikabéala pagótami”. Echi versículo jitra, Jeobá ko aneli echi israelitas japi ke nokimea japi riká echi pagótami japi chati namuti nokayé. Echi busuréliami a bijí we natéami ju echi cristianos jitra. Ati nokisáaká japi riká nata alí noká jarecho, a keʼré japi ta ma ke nijéwipo japi Jeobá nulá alí riwepo echi amígowala niya (Rom. 12:2).

¿Achi ni bají alcohol jiti ni néwariwélitinali japi ni we jiwérami ju? Jaréanami echi pagótami ke cháriká iné waʼlú bajía alcohol alí echi riká noká ne sojí sinibí rawé (1 Ped. 4:3). Nalí ma inepo japi aní echi Biblia echoná 1 Corintios 16:13: “Ne galá ʼnátaga muchisi. Sinibí galá bichíisi [...]. Tarapé majaga”. Bajía echi alcohol ke isimí japi echi pagótami we jiwérami nima. Echi ko nalí isimí japi echi pagótami ke aʼlá natama alí nokimea japi chati ju. Isaías 28:7 ruyé japi echi japi waʼlú bají alcohol wichiyá iyena alí sutubechia.

Ati ne bichíwali iʼwérili nokináliaká aʼlá nokayá, ati aʼlá tibuka nokisáré, tánisaré Jeobá japi tamó iʼwírima alí bichíwisaré japi echi riká isima (Sal. 18:32). Jiti la, ati we aʼlá nátika nokisáré alí echi riká ke isimia chati namuti japi isima japi ta riwepo Jeobá amígowala niya. Jesús echi riká isili japalí biteili jenaʼí Wichimóbachi, alí wiká pagótami riwíwili echi alí ineli japi riká bilé rejoy we jiwérami alí ke majáami.

¿Achi ni bají jiti ni ke natánali echi karú ikiwáami japi ni ikí? Echi japi osali bilé salmo jériká aneli Jeobá: “Japalí ni we risoa nilie, mujé isié japi ni ku kilí nílima” (Sal. 94:19). A nirúlisaká namuti japi we mi risoa níliti, kiti bají alcohol nalí iʼwírili tani Jeobá. ¿Chúriká mi isima? Sinibí raʼichá echi yúa. Jaré ko we iʼwírili busuréliami tania bilé hermano echoná congregación japi we aʼlá Jeobá amígowala ju. A bichíwali ju japalí bilé we bají ma ke natamia echi jilírami namuti, nalí echi ko ayénachó ke jiweria nílimiré aʼlá isiá (Os. 4:11). Daniel, japi ta jitra ma raʼíchiki, aní: “Ani we omona nilie echi chati namuti jitra japi ni isili. Jiti la ni bajíe jiti ni ke me cha nílima, nalí echi ko isié japi ni aminabi olama karú ikiwáami, ma ke olama amigos alí isié japi jarecho ma ke tamí riwíwima”. Nalí, ¿piri iʼwírili Daniel? Echi ko aní: “Ani machiki japi Jeobá nalí ju japi tamí iʼwírima alí ke ko echi alcohol. Jeobá iʼwírala jitra, ani omériki ku akarewia echi karú ikiwáami japi ni ikiyé”. Ke ti siné wikawásaré japi Jeobá sinibí tamó iʼwírima, tákoré ti nili japi ta ke oméripo ku akarewia echi karú ikiwáami (Filip. 4:6, 7; 1 Ped. 5:7).

Ami bajíaká alcohol isini kaachi, aʼlá nima japi mi natama jaré jepuná náriwami jitra. “¿Achi bilé nijé téemala o amigo tamí ané japi we nata echi jitra japi chu chulú ni bají alcohol?”. Bilé echi riká tamó anésaká, a keʼré japi ta ma waʼlú bají alí tamujé ko ke newa nili japi ta echi riká noká. “¿Achi ni jipi waʼlú bají alcohol chabé yúa?”. Echi riká mi isíaká, a keʼré japi mujé ko aminabi waʼlú bajínilima. “¿Achi ni sinibí rawé bajínali alcohol?”. Echi riká nísaká, echi ko aniwáami ju japi mi ma newalé sinibí bajía alí japi mi newalé japi bilé we machíami mi iʼwírima riwea echi riká isiá.

Jiti ke olama echi karú ikiwáami japi ikí echi japi we bajíami ju, jaré cristianos ko nata ke bajimia. Jaré ko ke bají jiti ke raʼili. Ati machiyáaká bilé japi echi riká isimí, aʼlá nima japi ta riwíwipo alí ke cha riká raʼichabo echi jitra.

Jaré ko aʼlá niraa ineli nokayá jaré namuti echi alcohol jitra. Japi riká, aʼlá nata chu chulú bajima alí chu kisapi. Jarecho ko nata pe taa bajimia japalí koʼá o japi bajima sinepi bi bilé tarali. Bilecho namuti japi aʼlá nátika nokimea ko ju chu iyiri alcohol bajima alí chu iyiri ko ke. Japi riká, jaré ko nata bajimia pe taa cerveza o vino, nalí ke bají jarecho namuti japi we rikútiami ju alí ke cho bají jarecho namuti nasówika. Japalí ti we aʼlá machí piri ti nokiboa, a ke jilí nímiré echi riká nokayá. Bilé cristiano japi nata echi riká isimia alí pe aminana ma echi riká isimí, ke riwélisaré japi nata jarecho echi jitra.

Bilecho namuti ko ju japi natásaré japi nata jarecho. Romanos 14:21 aní: “Ne galá níima ʼyemi ketasi kosá sapá, nibilé bajisa suguí, nirapé bilé namuti kumératasa mapurigá bichíi echi auché jaré ʼyemi ritémawala, nibilé mapurigátamo chakena aʼwapo aboni”. ¿Chúriká nokiboa jepuná? We galepo jarecho japi riká téemala. Ata machisáaká bilé japi cha nílima tamó inea bajíachi alcohol, ata ke bajibo jiti ta we galé echi hermano. Ata echi riká nokisáaká, ata néwariwélitipo japi ta riwiwi japi nata jarecho alí japi ta ke nata tamujé aboi bi (1 Cor. 10:24).

Japi ta cristianos ju ayénachó ta nijewi japi nulá echi gobierno echi alcohol jitra. A keʼré echi ko animea japi echi japi kuabi bamibi ke bajísaré alcohol o echi japi ulinama echi troca o echi máquinas ke bajísaré (Rom. 13:1-5).

Jeobá ko tamó riwé japi ta aboi nátika nokiboa chúriká néepo echi chiliwéliami japi echi tamó iyali. Jiti la, ibili niraa ati natásaré piri okebo alí piri bajibo. Sinibí iʼwérili nokiboa aʼlá namuti nokayá alí echi riká néwariwélitipo Jeobá japi ta sinibí kanílitinali echi.