Iwé: iʼwérili nokisí we aʼlá cristianas niya

1. ¿Piri ta nokisáré jiti we aʼlá cristianos nipo?

¿KECHI ko a bichíwali ju japi bilé taa towí sapú ocheri alí waʼlú nili? Echi towí ko ayó ocheri japi riká ko ke jilía. Nalí Onorúami amígowala niya ko ke echi riká ju (1 Cor. 13:11; Heb. 6:1).b Jiti we aʼlá cristianos nipo, ati newalé we aʼlá amigos niya Jeobá yúa. Ayénachó ti newalé echi espíritu santo jiti olabo we aʼlá cualidades, binésaré nokayá jaré namuti alí japi tamó iʼwírima pe aminana (Prov. 1:5).

2. ¿Piri tamó bineri Génesis 1:27, alí piri ta binepo jena binelíwami?

² Jeobá niwali echi pagótami, echi ko niwali echi rejoy alí mukí (leeri Génesis 1:27). Echi rejoy alí mukí ke chopi riká ju echoná ripokala alí ayénachó jarecho si namuti. Japi riká, Jeobá ko sinúrika nóchali iyali echi rejoy alí mukí, alí jiti omérima echi riká nokayá echi ko newalé cualidades alí machiyá jaré namuti nokayá (Gén. 2:18). Jenaʼí binelíwami, ata binepo japi nokisáré echi hermanas japi iwé ju jiti we aʼlá cristianas nima. Alí biléala binelíwami ko ati binepo japi nokisáré echi hermanos japi remalí ju.

OLÁ WE AʼLÁ CUALIDADES JAPI JEOBÁ GALÉ

3, 4. Echi hermanas japi iwé ju, ¿kumi riwimea we aʼlá ejemplos japi echi iʼwírima? (Ayénachó iné echi imágenes).

³ Echi Biblia raʼicha wiká umukí jitra japi we aʼlá nijéwami nili Jeobá alí we galeli echi (leeri echi artículo riwéami “¿Qué aprendemos de las mujeres de la Biblia?” japi chukú echoná jw.org). Japi riká aní echi texto japoná machiburi na binelíwami, echi umukí ko we kilí nili alí we aʼlá nijéwami. Ayénachó, echoná congregación ami riwimea wiká hermanas japi we aʼlá nijéwami ju alí japi mi omeri binea wiká namuti echi jitra.

⁴ Ami bilé hermana tiwé nísaká, natá jaré hermanas jitra japi we aʼlá nokáami ju alí we iʼwérili isí binea echi jitra. Iné we aʼlá cualidades japi olá echi alí pe aminana ko natá chúriká mi echi riká cho isima. Echoná jaréala párrafos ata raʼichabo bikiá cualidades jitra japi sinéami cristianas olásaré.

5. ¿Chúsiá echi hermanas ke niráami nísaré?

⁵ Ke niráami niya. Echi mukí japi ke niráami ju, we kanili Jeobá amígowala niya alí ayénachó we kanili jarecho yúa (Sant. 4:6). Japi riká, bilé mukí japi we galé Jeobá alí ke niráami ju, echi ko we kanila nijewi japi Jeobá jáwili jiti nuláami nima echoná congregación alí echoná téemala (1 Cor. 11:3).c

6. ¿Chúriká omeri echi hermanas japi iwé ju ke niráami niya japi riká Rebeca?

⁶ Jipi ko raʼichabo Rebeca jitra. Echi ko bilé mukí we aʼlá nátami nili alí aʼlá machiyé chu kabú alí chúriká isima bilé namuti (Gén. 24:58; 27:5-17). Nalí ayénachó echi ko riwíwiami nili alí aʼlá nijéwami (Gén. 24:17, 18, 65). Mujé, ami nísaká japi riká Rebeca, ke niráami alí mi riwíwisaká japi Jeobá jáwili jiti nuláami nima, ami we aʼlá iʼwírima mujé téemala alí echi hermanos echoná congregación.

7. ¿Chúriká omeri echi hermanas japi iwé ju niya japi riká Ester japi ke nátili japi we machíami ju?

⁷ Ke natia japi we machíami ju. Echi ayénachó we natéami ju japi sinéami cristianos echi riká nokimea (Prov. 11:2). Ester we aʼlá nijéwami nili Onorúami, echi ko ke siné nátili japi we machíami ju. Japi riká, japalí wilari japi riká silíami, echi ko ke siné nátili japi we natéami ju. Echi ko nalí sinibí kipuli alí nijéwili echi busuréliami japi nijili echi prímowala Mardoqueo (Est. 2:10, 20, 22). Mujé ayénachó omero niya japi riká Ester, ami busuréliami tánisaká jarecho alí nijéwisaká (Tito 2:3-5).

8. Japalí nata chúriká sipuchama, ¿chúriká omeri echi hermanas nokayá japi riká aní 1 Timoteo 2:9, 10?

⁸ Ma inepo bilecho namuti japoná Ester néwariwélitili japi ke we natéami ka nílili. Echi ko we baʼóami nili alí we semati nili echi ripokala, nalí echi ko ke riweli japi echi isima japi we natéami ka nílima (Est. 2:7, 15). ¿Chúriká mi omeri isiá japi riká echi? Bilé namuti ko ju japi riká aní echoná 1 Timoteo 2:9, 10 (leérisi). Jenaʼí echi apóstol Pablo ané echi hermanas japi we aʼlá sipuchama. Echi raʼíchali griegas japi Pablo néeli, aniwáami ju japi echi cristianas we aʼlá sipuchásaré jiti néwariwélitima japi riwiwi Onorúami alí ayénachó natásaré japi chu nílima jarecho echi inea. ¡We ti kanili inea japi echi hermanas néwariwéliti japi we aʼlá nátami ju echi sipucha jitra japi uchá!

9. ¿Piri ta biné Abigaíl jitra?

⁹ We aʼlá nátami niya. Jepuná ayénachó we natéami ju japi sinéami cristianas echi riká nima. Nalí, ¿piri aniwáami ju aʼlá nátami niya? Echi ko ju japalí bilé we aʼlá machí japi aʼlá ju alí japi ke aʼlá ju, alí miná ko isimí japi aʼlá ju. Ma binepo Abigaíl jitra. Echi kunala isili bilé namuti we chati alí Abigaíl ko machili japi echi isima japi sinéami japi piré echi yúa we risoa ikimea. Abigaíl we sapú isili bilé namuti alí echi riká wiká niyúbili (1 Sam. 25:14-23, 32-35). Aʼlá nátami niya ayénachó tamó iʼwiri machiyá chu kabú raʼichabo alí chu kabú ke, ayénachó tamó iʼwiri natéami niraa inea jarecho (1 Tes. 4:11).

BINÉ ISIÁ JARÉ NAMUTI JAPI MI IʼWÍRIMA

10, 11. ¿Chúsiá we aʼlá ju japi mi binema aʼlá leeria alí osayá? (Ayénachó iné echi foto).

¹⁰ We aʼlá ju japi echi cristianas binema nokayá jaré namuti. Echi namuti japi mi biné taa tiwé ka, mi iʼwírima sinibí. Ma inepo jaré ejemplos.

¹¹ Biné we aʼlá leeria alí osayá. Jaréanami ko ke natéami niraa iné japi echi umukí binema leeria alí osayá. Nalí jepuná ko we natéami ju sinéami echi cristianos jitra (1 Tim. 4:13).d Jiti la, kiti riwé japi echi namuti isima japi mi riwema aʼlá binea leeria alí osayá. ¿Chúsiá we aʼlá ju echi riká nokiwá? Jiti echi riká ko, ami ke me jilí nirama aa echi nóchali alí echi riká mea winomí. Ayénachó mi we aʼlá binéami nima Onorúami Raʼicháala alí mi we aʼlá binérima jarecho. Nalí wabé natéami ko ju japalí mi leeri echi Biblia alí mi nata japi aní echoná, mujé ko aminabi we aʼlá amiga nima Jeobá yúa (Jos. 1:8; 1 Tim. 4:15).

12. ¿Piri mi bineri Proverbios 31:26?

¹² Biné we aʼlá raʼichia jarecho yúa. Jepuná ayénachó we natéami ju sinéami cristianos jitra. Alí echi discípulo Santiago tamó iyali we aʼlá busuréliami jepuná jitra. Echi ko jéanili: “We yáati ne galabela kipusa mapalí auché jaré ʼyemi mi raʼícha, [...] chopi ketasi galá níima máputamo chuwé, we yáati ku nijéwaga naʼáwasa” (Sant. 1:19). Japalí ti we aʼlá kipú japalí jarecho tamó raʼichi, ata néwariwéliti japi ta we natéami niraa iné japi echi nili (1 Ped. 3:8). Ke mi inámisaká japi echi mi ané o japi nili, we aʼlá riwíwika nari, miná ko pe teili bi buwé kecho bijí raʼichia (Prov. 15:28, nota). Nárika isí: “¿Japi ni anema achi bichíwali ju? ¿Achi iʼwérili iyama? ¿Achi ni riwíwika raʼichama alí simárika?”. Miná ko natá echi hermanas jitra japi echi riká nokáami ju alí biné echi jitra (leeri Proverbios 31:26). We aʼlá kipú echi namuti japi aní alí chúriká aní. Ami aminabi binésaká aʼlá raʼichia, ami ke jilí nirama kanila simiria jarecho yúa.

13. ¿Chúriká mi omérima binea echi nóchali japi nokiwá echoná bitichí? (Ayénachó iné echi foto).

¹³ Biné isiá echi namuti japi nokiwá echoná bitichí. Jaréanami echi umukí ju japi noká wikabéala echi nóchali japi nirú echoná bitichí. A keʼré japi mujé iyela o bilecho hermana omeri mi bineria chúriká mi isima. Bilé hermana Cindy riwéami jéaní: “Bilé namuti japi nijé iyela tamí binérili ko ju, japi ta we kaníliami nipo ati we nóchami nísaká. Jiti la, echi ko tamí binérili koʼwáami wasia, biʼwayá, súa alí ralayá, jepuná tamí iʼwírili jiti ni ke me jilí nirama alí ni aminabi we nóchilima Jeobá. Mamá ayénachó tamí binérili japi ni nijíami nísaré, jiti la ani machiki wiká hermanos alí hermanas we simá nokáami japi ni bineki wiká namuti echi jitra” (Prov. 31:15, 21, 22). Echi umukí japi we nóchami ju, nijíami alí japi we nocha echoná bitichí, we iʼwiri echi téemala alí echoná congregación (Prov. 31:13, 17, 27; Hech. 16:15, TNM).

14. ¿Piri mi biné Crystal jitra, alí piri wabé natéami nísaré mujé jitra?

¹⁴ Biné isiá jaré nóchali jiti mi mema winomí. Sinéami echi cristianos iʼwérili nokisáré aboi niraa nokayá echi namuti alí kanilia echi jitra japi ma olá (Filip. 4:11). Bilé hermana Crystal riwéami jéaní: “Japalí ni tiwé nili alí a bijí simiyé escuela, niruili jaré namuti japi binerie nokayá alí japoná nijé anisaa riweili japi ni kanílisa nili binea. Alí nijé wénwala ko tamí aneki japi ni binema bilé namuti japi tamí iʼwírima. Japi riká, nijé onolá ko tamí aneki japi ni binema winomí tará alí aʼlá néea echoná biléana empresa, alí echi ko we tamí iʼwírili”. Ke bi mi binésaré isiá jaré namuti jiti mi olama nóchali, ayénachó mi binésaré we aʼlá néea echi winomí japi mi ma olá (Prov. 31:16, 18). Ami ke wikasáaká chuwé namuti jitra alí mi kanílisaká olayá echi namuti bi japi mi newalé, ami aminabi ikírima isiá echi namuti japi mi isínali nóchilimia Jeobá (1 Tim. 6:8).

ISÍ JARÉ NAMUTI JAPI MI IʼWÍRIMA PE AMINANA

15, 16. ¿Chúsiá we natéami ju echi hermanas japi ke niwíkami ju? (Marcos 10:29, 30).

¹⁵ Ami iʼwérili isísaká olayá we aʼlá cualidades japi riká Jeobá nakí alí mi binésaká isiá jaré namuti, mi iʼwírima aʼlá machiyá japi mi isima pe aminana. Ma inepo jaré namuti japi mi omeri isiá.

¹⁶ Mujé ko omeri aniyá japi mi kecho niwima. Japi riká anili Jesús, jaré ko aní japi ke niwima tákoré japoná piré anéliwa japi niwima (Mat. 19:10-12). Jarecho ko ke niwí jarecho namuti jitra. Ke mi niwíkami nísaká, mujé ko omeri we bichiwia japi Jeobá alí Jesús we natéami niraa mi iné. Omáana Wichimóbachi echi hermanas japi ke niwíkami ju, we natéami ju echoná congregación. Jiti we galéami ju alí iʼwérili noká iʼwiria jarecho, jepuná isimí japi inérami nima japi riká rejimala alí iyela (leeri Marcos 10:29, 30; 1 Tim. 5:2).

17. ¿Piri iʼwírima echi hermanas japi iwé ju nóchilia Jeobá tiempo completo niraa?

¹⁷ Mujé ko omeri nóchilia Jeobá tiempo completo niraa. Echi hermanas ju japi noká ne sojí suwaba echi nóchali japi nokiwá omáana Wichimóbachi jiti nawisárami nima echi raʼíchali aʼláala (Sal. 68:11). ¿Ami omeri natia jipi japi mi nóchilima Jeobá tiempo completo niraa? Ayena, mujé ko omeri precursora niya, betelita o nochia japi riká voluntaria niwayá salón. ¿Piri mi iʼwírima echi riká isiá? Raʼichá Jeobá yúa alí echi hermanos yúa japi ma nochi tiempo completo niraa, alí nari piri mi newalea jiti mi omérima echi riká isiá. Alí miná ko osá echi namuti japi mi isínali. Ami echi riká isísaká, mujé ko omérima isiá wiká namuti nóchilimia Jeobá.

18. ¿Chúsiá we natéami ju japi echi hermanas we aʼlá natama jepi nima japi yúa kunema? (Ayénachó iné echi foto).

¹⁸ Mujé ko omeri aniyá japi mi niwima. Echi cualidades alí japi mi machí isiá jipi, mi iʼwírima jiti mi we aʼláala upila nima. Nalí, ami niwínalaká, mujé ko we aʼlá natásaré jepi nima japi mi yúa kunema. Jepuná ko we natéami ju. Newalá japi echi rejoy japi mi yúa kuné, echi nima nuláami echoná bitichí (Rom. 7:2; Efes. 5:23, 33). Jiti la, nárika isí jepuná: “¿Achi we aʼlá Jeobá amígowala ju? ¿Achi we natéami niraa iné bachá nóchilia Jeobá? ¿Achi aʼlá isimí? ¿Achi aní japalí ke aʼlá isisa? ¿Achi riwíwiami ju echi umukí? ¿Achi aʼlá tamí tibuma, tamí iyama japi ni newalema alí tamí iʼwírima jiti ni we aʼlá Jeobá amígawala nima? ¿Achi we aʼlá isimí echi nóchali japi iyáliwa? Japi riká, ¿piri nóchali ju japi olá echoná congregación alí achi aʼlá isimí?” (Luc 16:10; 1 Tim. 5:8). Ami nakiyáaká japi echi japi mujé yúa kunema pe aminana we aʼláala kunala nima, mujé ayénachó iʼwérili isísaré we aʼláala upila niya.

19. ¿Chúsiá ti aní japi iʼwíriami niya we natéami ju?

¹⁹ Echi Biblia ko aní japi we aʼláala upila ju ko, iʼwiri binoy kunala (Gén. 2:18). ¿Achi aniwáami ju jepuná japi ke me natéami ju? Ke, jiti iʼwiria echi kunala we natéami ju. Echi Biblia ayénachó aní japi Jeobá iʼwíriami ju (Sal. 54:4; Heb. 13:6). Bilé we aʼláala upila iʼwiri binoy kunala jiti suwaba japi isínali echi téemala jitra aʼlá nima. Ayénachó jiti we galé Jeobá, echi ko iʼwiri jiti echi pagótami aʼlá raʼichama binoy kunala jitra (Prov. 31:11, 12; 1 Tim. 3:11). Ami nátiaká niwimia, iʼwérili mi isísaré aminabi we galea Jeobá, iʼwiria echoná bitichí alí echoná congregación.

20. ¿Chúriká omérima bilé iyela iʼwiria echi japi yúa piré?

²⁰ Mujé ko omeri olayá kúchuwala. Ami niwísaká, a keʼré japi mujé alí mujé kunala olama kúchuwala (Sal. 127:3). Jiti la, we aʼlá ju japi mi natama piri isimí bilé japi we aʼláala iyela ju. Japi riká ti ma bineli jenaʼí binelíwami, echi cualidades alí japi mi ma machí isiá, we mi iʼwírima we aʼlá upila niya alí iyela. Jiti mi we galéami ju, simá isíami alí kilí buwéami, mujé ko iʼwírima japi mi yúa piré jiti kaníliami nima alí jiti mujé kúchuwala aʼlá ochérima (Prov. 24:3).

21. ¿Achi we natéami ju echi hermanas, alí chúsiá? (Iné echi bachá imagen japi chukú jena oselí).

²¹ We ti emi galé hermanas, jiti timí we nóchami ju Jeobá jitra alí echi puéblowala (Heb. 6:10). We timí iʼwérili noká olayá we aʼlá cualidades japi Jeobá galé alí binea nokayá jaré namuti japi emi iʼwírima alí japi iʼwírima jarecho, ayénachó we aʼlá timí noká jipi jiti echi emi iʼwírima pe aminana. ¡Sinéami emi we natéami ju echoná congregación!