Piri namuti mi iʼwírima sinibí tarali binea echi Biblia bineli niraa
¿AMI we jilí niraa bineli niraa binea echi Biblia sinibí tarali? ¿O ke mi kanili binea? Wiká echi riká ti ikí isini kaachi. Nalí natá jepuná: sinibí rawé ti noká wiká namuti japi ta ke nokinali, japi riká ubia. Nalí be japalí ti ma ubasa, ¡we ti kanila ripí! Echi riká cho ti inílipo ma leérisa echi Biblia japi riká ko ti ubia “echi baʼwí jiti” (Efes. 5:26). Jepuná busuréliami mi iʼwírima:
Osá bilé hora alí rawé japalí mi binema. Bineli niraa binea echi Biblia bilé namuti we natéami ju japi sinibí isísaré bilé cristiano (Filip. 1:10). Jiti mi ke wikawama binea, osá echoná bilé oselichi alí uchá japoná mi sapú inema. Ayénachó aʼlá nima japi mi uchama bilé alarma echoná teléfono jaré minutos kecho bijí séachi echi hora japalí mi binema.
Natá piri mi iʼwírima aʼlá binea. Jaré ko omeri wilí binea, jaré ko pe teeli bi. Mujé, ¿chu iyiri mi ke jilí niraa? Japalí mi osá echoná oselichi, we aʼlá natá chu kilí mi binema. Alí, ke mi binénalaká ma séachi echi hora, iʼwérili isí binea 10 minutos bi. Tákoré pe teeli bi ju, we aʼlá nima japi mi binema. A keʼré japi miná ko mi che binénilima (Filip. 2:13, TNM).
Bachá natá piri mi binema. Ke echi riká mi isísaká, ke mi ikírima aʼlá binea (Efes. 5:16). Aʼlá nima japi mi osimea jaré artículos alí temas japi mi binénali. Ami machinálisaká bilé namuti, osá. O japalí mi ma binea asisaa alí mi natásaká bilecho namuti, ayénachó osá.
Ke mi ikíriaká binea, che bilé hora o rawé biné. Japi wabé natéami ko ju japi mi binema sinibí tarali.
Bineli niraa binea echi Biblia sinibí tarali mi iʼwírima alí aminabi mi mulíwima Jeobá, ayénachó we mi aʼlá nátami nima alí mi we kanílima (Jos. 1:8).