Amós
9 Ndi̱yo̱o̱ Jeobá náa tsu̱du̱u̱ rí nakarámáʼ tsigijñaʼ. Ikhaa niʼthí: “Araxnáá edxu̱u̱ columna, mu xúʼko̱ ma̱ʼba̱a̱n rajkhúu. Atrujtu rígú edxu̱u̱ columna ga̱jma̱a̱ ikhúún magúdíin ga̱jma̱a̱ espada bi̱ gáguanún xóó náa xuajin. Bi̱ nagáñún, nimbáa xáʼngo̱o̱ gákríya̱a̱ʼ, bi̱ gáʼniminaʼ maʼni kríya̱minaʼ, xáʼngo̱o̱ gákríya̱a̱ʼ.
2 Á mu ikhiin nundii asndu naguáʼnu náa Iñá wajinʼ,*
ikhí maguwíin ga̱jma̱a̱ ñawúnʼ,
á mu natsimún náa mekhuíí,
ma̱ni̱ rí maguájta̱án.
3 Á mu nurkaʼwumijná náa inuu kúbá Carmelo,
ikhí mbaʼñíinʼ ga̱jma̱a̱ maʼkháaʼ kagui̱i̱n.
Á mu nurkaʼwumijná náa awúu̱n lamáa,*
ikhí matañájuunʼ a̱bu̱nʼ mu mikhu̱u̱n.
4 Á mu nagún kuʼdiin náa ku̱bu̱únʼ xa̱bu̱ sia̱nʼ ndrígu̱ún,
ikhí matañájuunʼ mbá espada mu magudíin,
ikhúún mayejxu̱u̱n má xúʼko̱ mu maniu̱u̱n dí ra̱májánʼ raʼkháa rí májánʼ.
5 Numuu rí Tátá Jeobá bi̱ itháán mba̱a̱ bi̱ naʼtáñajúúnʼ ángeles nixkajma xuajin,
ikha jngóo xuajin nijuiya̱a̱ʼ, xúgíinʼ xa̱bu̱ makuwá ngíná.
Xúgíʼ xuajin mani̱ndxu̱u̱ xóo índo̱ naʼni mba̱a̱ mañu Nilo
ga̱jma̱a̱ magajta̱a̱ xóo mañu Nilo dí rígá náa Egipto.
6 ‹Ikhaa bi̱ naʼni escalero náa mekhu
ga̱jma̱a̱ nagíʼ mekhu náa tsu̱du̱u̱ ku̱ba̱ʼ,
ikhaa bi̱ nagímbóo iyaʼ lamáa
mu xúʼko̱ maxidirámuuʼ náa tsu̱du̱u̱ ku̱ba̱ʼ...,
mbiʼyuu nindxu̱u̱, Jeobá›.
7 ‹Xa̱bu̱ xuajin Israel, lá raʼkháa ikháanʼ nindxa̱la xóo e̱jñu̱ún cusitas náa ikhúún ráʼ.› Eʼthí Jeobá.
‹Ikhúún nindxu̱ʼ bi̱ niríya̱a̱ʼ Israel náa ku̱ba̱ʼ ndrígóo Egipto,
bi̱ niguwíin filisteos náa Creta ga̱jma̱a̱ niríya̱a̱ʼ Siria náa Quir›.
8 ‹¡Gu̱ya̱a̱! Tátá Jeobá bi̱ itháán mba̱a̱ nayejxu̱u̱ má xúʼko̱ xa̱bu̱ ñajunʼ, xúgíinʼ xa̱bu̱ bi̱ kúwá ikhí bi̱ nuxudamijná aʼkhá,
ga̱jma̱a̱ ikhaa maʼni gámbíin mbá kayuuʼ náa tsu̱du̱u̱ ku̱ba̱ʼ.
Mú xáni̱ gámbáa mbá kaʼyuuʼ goʼwóo Jacob›, eʼthí Jeobá.
9 ‹¡Gu̱ya̱a̱! Numuu rí matañájunʼ
ga̱jma̱a̱ mabajngaa goʼwóo Israel náa majñu̱u̱ʼ xúgíʼ xuajin,
xóo e̱ʼba̱a̱n mbá criba índo̱ natsowooʼ tsígáʼ
nimbá itsí tséxpatríga̱ mbayííʼ.
10 Makhañún ga̱jma̱a̱ espada xúgíinʼ xa̱bu̱ xuajñunʼ bi̱ nuxudamijná aʼkhá,
bi̱ nuthi “Xáʼkha̱ gamiéjunʼ ní má xáʼngo̱o̱ gaxkamáánʼ”›.
11 ‹Mbiʼi rúʼko̱ makujxíi̱ guʼwá xtúguá ndrígóo David rí ningajxi̱i̱.
Ma̱ni̱ májáanʼ náa nijngudi̱i̱
ga̱jma̱a̱ mani̱i̱ náa niguma gámbáa.
Mani̱i̱ xó má nákha ginii,
12 mu ikhiin majmúún dí gáguanúu náa Edom
ma̱ngaa xúgíʼ xuajin rí nuthi mbiʼyuʼ›, eʼthí Jeobá, bi̱ naʼni rígi̱.
13 ‹¡Gu̱ya̱a̱! Na̱ʼkha̱ mbiʼi, eʼthí Jeobá,
bi̱ naxnúu xku̱bi̱ maxkamaa bi̱ nagujxi̱i̱ rí nijuiʼdu
ga̱jma̱a̱ bi̱ nakujmbi̱i̱ uva maxkamaa bi̱ na̱jkha̱ kagu̱ tsígáʼ.
Náa kúbá matsuwarígúu vino nuxi̱ʼ
ga̱jma̱a̱ magadírígúu náa xúgíʼ bíjní.*
14 Ikhúún maʼkháaʼ kagui̱i̱n xa̱bu̱ xuajñunʼ Israel bi̱ ni̱jkha̱ kiʼdiin
ikhiin muni̱ májáanʼ xuajin rí niguanáa ga̱jma̱a̱ makuwá ikhí.
Mudu uva ga̱jma̱a̱ muwa̱a̱n vino,
muguaʼdáá huerta ga̱jma̱a̱ mu̱phu̱ xndú taun rí gájma̱a̱ ikhí›.
15 ‹Maniʼñúúnʼ makuwá náa ku̱bu̱únʼ
ga̱jma̱a̱ nditháan xúxkawíin ikhí
náa ku̱ba̱ʼ rí ikhúún nixnu̱u̱n›, eʼthí Jeobá Dios ndrígáaʼ”.