Isaías
9 Mú, ni xáʼni mikína xóo nákha ginii índo̱ ku̱ba̱ʼ xtáa ngíná, índo̱ túyamajkuíí ku̱bo̱o̱ʼ Zabulón ga̱jma̱a̱ ku̱bo̱o̱ʼ Neftalí. Mú nda̱wa̱á Dios* maʼni dí ku̱ba̱ʼ rúʼko̱, kamba̱a̱ dí na̱jkha̱ náa lamáa* náa mbaaʼ Jordán, ga̱jma̱a̱ náa Galilea náa kúwá xa̱bu̱ bi̱ naguwaáʼ magruigú gamajkhu.
2 Xa̱bu̱ xuajin bi̱ jngruigu̱u̱n náa mikína
ndiyáá mbá aguʼ mba̱a̱.
Náa xa̱bu̱ bi̱ kúwá náa ku̱ba̱ʼ, bi̱ kúwá náa ndájkua̱ dí mikína mbiʼ,
nimbiʼi mbá aguʼ náa ikhiin.
3 Nitani̱ dí xa̱bu̱ xuajin maʼni mbaʼin,
nitani̱ rí nadxún maʼni mba̱a̱.
Ra̱ʼkhá tháán edxún náa inaaʼ ikháán,
xóo nadxún xa̱bu̱ índo̱ nurajxi̱i̱ dí nudu,
xóo edxún xa̱bu̱ bi̱ nuxuiʼtamijnáa dí niguanáa.
4 Numuu rí nitaxpígu̱u̱ yugo rí kuda,
xkuíyá dí kaʼmáʼ náa xpajpún, ragótiu̱ún bi̱ nuthúún xa̱bu̱ xóo muñajunʼ,
xó má nitani̱ mbiʼi dí nirígá Madián.
5 Xúgíʼ bota rí índo̱ nagún naʼni maʼba̱a̱n ku̱ba̱ʼ
ga̱jma̱a̱ mbá xúgíʼ xtíin dí nimajan ga̱jma̱a̱ eʼdi
maʼga̱nú mani̱ndxu̱u̱ dí mi̱kha ga̱jma̱a̱ aguʼ.
6 Numuu rí Dios niʼni dí magumaa mbáa dxámá,
nixniúlú mbáa ada̱,
ga̱jma̱a̱ náa ñawúunʼ marigá rí miʼtáñajunʼ.*
Magumbiʼyuu bi̱ Najmañuu naxná Consejo, Dios bi̱ gíʼdoo Tsiaki̱i̱, Anu̱lú bi̱ xtáa kámuu,* Príncipe bi̱ naʼtáñajunʼ tsímáá.
7 Dí maʼtáñajunʼ* maʼga̱nú asndu náá
ga̱jma̱a̱ dí tsímáá xámbáa náa xíliu̱u̱* David ga̱jma̱a̱ náa rí maʼtáñajunʼ,
mawiji̱ gújkhúʼ ga̱jma̱a̱ mawiji̱ jxa̱ʼ
ga̱jma̱a̱ dí májánʼ ma̱ngaa dí jmbu,
nákhá xúgi̱ ga̱jma̱a̱ asndu kámuu.
Jeobá bi̱ naʼtáñajúúnʼ ángeles gajkhun maʼni rígi̱.
8 Jeobá nikuʼma mbá ajngáa dí magíʼnuu Jacob
ga̱jma̱a̱ rúʼko̱ magíʼnuu Israel.
9 Mbá xúgíinʼ xa̱bu̱ xuajin mbuyáá,
Efraín ga̱jma̱a̱ xa̱bu̱ Samaria
bi̱ náa a̱jkiu̱ún nuni̱ mbaʼumíjna̱ ga̱jma̱a̱ nda̱a̱ gamajkhún, nuthi:
10 “Nijngutígú ladrillo,
mú mu̱ʼni̱i̱ ga̱jma̱a̱ itsí dí niwiʼtá.
Nirujtu sicómoros,
mú náa niguájun mutsuaju̱u̱n cedros”.
11 Jeobá ma̱ʼkha̱ kagui̱i̱n xa̱bu̱ sia̱nʼ gajmíi̱n Rezín mu muxmijná gajmiún
ga̱jma̱a̱ maʼni rí xa̱bu̱ sia̱nʼ ndrígóo muxmijná.
12 Siria ma̱ʼkha̱ xígií náa nagájnuu a̱jkha̱ʼ,* ga̱jma̱a̱ filisteos maguwáʼ xígií náa narámaaʼ a̱jkha̱ʼ,*
ikhiin muxuaja̱n rawúúnʼ ga̱jma̱a̱ mu̱phi̱i̱ Israel.
Ga̱jma̱a̱ numuu xúgíʼ rúʼko̱, dí nakásngañu̱u̱ʼ táwiji̱i̱,
fruíya̱ʼ má xúʼko̱ ñawúunʼ mu maxnún ga̱jma̱a̱.
13 Numuu rí xa̱bu̱ xuajin na̱nguá nitangiín náa bi̱ nixnún,
na̱nguá ndiyáaʼ Jeobá bi̱ naʼtáñajúúnʼ ángeles.
14 Jeobá marujturígú káaʼ mbóó mbiʼi edxu̱u̱ ga̱jma̱a̱ tsiliúuʼ Israel,
rudiuuʼ ga̱jma̱a̱ mbá xúgíʼ ixu̱u̱.*
15 Edxu̱u̱ nindxu̱ún bi̱ kuya̱ edxu̱u̱ bi̱ nduyamajkhún
ga̱jma̱a̱ tsiliúuʼ nindxu̱ún profetas bi̱ nusngáa rí minduwaʼ.
16 Bi̱ nuxnún ikha xa̱bu̱ xuajin rígi̱ nuni̱ rí xúyáá náá gágún,
ga̱jma̱a̱ bi̱ nakánún ikha najngawi̱i̱n.
17 Ikha jngóo Jeobá xáʼdxuu kaʼñún jiámiu̱ún ga̱jma̱a̱ wa̱ʼxiúnʼ,
ga̱jma̱a̱ xágáwíinʼ a̱jkiu̱u̱n kaʼñún e̱jín wáʼa* ni má gu̱ʼú xuáʼa,
numuu dí xúgíinʼ ikhiin nuxujximíjna̱ náa Dios* ga̱jma̱a̱ nindxu̱ún ra̱míjíinʼ,
náa rawúúnʼ nagájnuu ajngáa rí tséjmaa.
Ga̱jma̱a̱ numuu xúgíʼ rúʼko̱, dí nakásngañu̱u̱ʼ táwiji̱i̱,
fruíya̱ʼ má xúʼko̱ ñawúunʼ mu maxnún ga̱jma̱a̱.
18 Numuu dí ra̱májánʼ nakha xóo aguʼ,
matsikhá iná tsuwanʼ ga̱jma̱a̱ iná rí xkawiʼ.
Matsikhá xtáʼdu̱u̱ iná dí rígá náa xaxi̱,
dí matsimuu gúniúu xóo du̱u̱n.
19 Numuu dí nakásngañu̱u̱ʼ Jeobá bi̱ naʼtáñajúúnʼ ángeles,
nigídóoʼ agiuuʼ ku̱ba̱ʼ rígi̱,
ga̱jma̱a̱ xuajin maʼga̱nú mani̱ndxu̱u̱ mbá rí mi̱kha ga̱jma̱a̱ aguʼ.
Nimbáa xágáwíinʼ a̱jkiu̱u̱n kaʼyoo, ni má ndxájuu.
20 Mbáa makuiʼtsu náa níjñú mújúunʼ,
mú maxkidxu̱u̱ má xúʼko̱,
i̱mba̱a̱ makuiʼtsu náa níjñú xti̱yu̱u̱ʼ,
mú xágiʼmuu.
Mámbáa mi̱khu̱ xuyuuʼ ñawúunʼ,
21 Manasés mikhu̱u̱ Efraín,
ga̱jma̱a̱ Efraín mikhu̱u̱ Manasés.
Mbá nájmi̱i̱n xáʼndúún gúyáá Judá.
Ga̱jma̱a̱ numuu xúgíʼ rúʼko̱, dí nakásngañu̱u̱ʼ táwiji̱i̱,
fruíya̱ʼ má xúʼko̱ ñawúunʼ mu maxnún ga̱jma̱a̱.