Isaías

7 Nákhá mbiʼi rí nixtáa Acaz, a̱ʼdióo Jotán, a̱ʼdióo Uzías, rey ndrígóo Judá, rey Rezín bi̱ xtáa náa Siria ga̱jma̱a̱ Pécah a̱ʼdióo Remalías, rey bi̱ xtáa náa Israel, nitsimún gúxmijná gajmiún xa̱bu̱ Jerusalén, mú táʼngu̱u̱n gátu̱ʼu̱u̱n. 2 Bi̱ kúwá náa goʼwóo David nijuiʼthúún: “Siria ga̱jma̱a̱ Efraín niruwamíjna̱ mu muxmijná ga̱jma̱á nindxu̱lú”.

Ikhú a̱jkiu̱u̱n Acaz ga̱jma̱a̱ a̱jkiu̱ún xa̱bu̱ xuajin niʼba̱a̱n, xóo eʼba̱a̱n ixi̱ dí rígá náa xaxi̱ índo̱ naxnúu giñánʼ.

3 Ikhú Jeobá niʼthúu̱n Isaías: “Mbá péñu,* ayuʼ ga̱jma̱a̱ʼ a̱ʼdiáaʼ Sear-Jasub* gútsijníí Acaz, náa nanújngoo iyaʼ dí na̱jkha̱ náa tanque dí grígu rijma̱a̱, dí rígá náa kamba̱a̱ dí na̱jkha̱ náa nujñáa xtíin xa̱bu̱. 4 Arathán: ‹Tsu̱ma̱á gátani̱ ga̱jma̱a̱ xáxmiéjuaanʼ,* gakhi̱i̱ a̱jkia̱a̱nʼ gátani̱ ga̱jma̱a̱ xámíñáaʼ gáʼni a̱jma̱ xuíʼtóo ixi̱ dí naʼni gúniúu rúʼko̱, dí nakásngañu̱u̱ʼ Rezín ga̱jma̱a̱ Siria, ma̱ngaa a̱ʼdióo Remalías. 5 Numuu dí Siria ga̱jma̱a̱ Efraín ma̱ngaa a̱ʼdióo Remalías, niriya̱ʼ mbá awan dí muxmijná ga̱jma̱á nindxa̱a̱ʼ. Nithi: 6 “Gutsimulú gúxmijná gajmiúlú Judá, gurujkhu̱u̱* ga̱jma̱a̱ gutu̱ʼu̱lú,* ga̱jma̱a̱ guʼgíiʼ a̱ʼdióo Tabeel xóo rey ikhí”.

 7 Rígi̱ dí naʼthí Tátá Jeobá bi̱ itháán mba̱a̱:

10 Jeobá ma̱ngaa niʼthúu̱n Acaz: 11 “Atanda̱ʼa̱a̱ Jeobá Dios ndrígáaʼ mbá tsinaʼ, ma̱ndoo manindxu̱u̱ xóo Iñá wajinʼ* dí mi̱jnu̱ʼ o mitsídánʼ xóo mekhu”. 12 Mú Acaz niʼthí: “Xánda̱ʼa̱ nimbá, ni má xáʼgíʼ tsáʼkhá inuu Jeobá”.

13 Ikhú Isaías niʼthí: “Ikháanʼla bi̱ kuwáanʼ náa goʼwóo David, gudxawíín rígi̱ mbá péñu, lá ikhí eya̱a̱ rí mu̱ni̱ rí ni xáʼngo̱o̱ a̱jkiu̱ún xa̱bu̱ kuyala ráʼ. Rí asndu ma̱ngaa mu̱ni̱ rí ni xáʼngo̱o̱ a̱jkiu̱u̱n Dios kaʼyala ráʼ. 14 Ikha jngóo, mína̱a̱ʼ Jeobá masngájmala mbá tsinaʼ rígi̱ mbu̱ya̱a̱. ¡Gu̱ya̱a̱la! Dxáʼgú* maguewáan ada̱, magiʼdaa mbáa dxámá ga̱jma̱a̱ magumbiʼyuu Emmanuel.* 15 Índo̱ gájmaa maʼni gaʼduunʼ dí ra̱májánʼ ga̱jma̱a̱ maraʼwíí maʼni dí májánʼ, ikhú ma̱ndoo mi̱khu̱ mantequilla ga̱jma̱a̱ maga̱a̱n jyááʼ. 16 Numuu dí nákhá ada̱ xóó tséjmaa maʼni gaʼduunʼ dí ra̱májánʼ ga̱jma̱a̱ maraʼwíí dí májánʼ maʼni, ku̱bu̱únʼ a̱jmi̱i̱n reyes bi̱ ikháán namíñáanʼ xtañún maguanáa mbá kayuuʼ. 17 Jeobá ma̱ʼkha̱ kayóo náa ikháán, náa xa̱bu̱ xuajñanʼ ga̱jma̱a̱ bi̱ kúwá náa goʼwóo ana̱a̱ʼ* mbá mbiʼi rí nditháan tárígá, asndu nákhá mbiʼi rí Efraín niʼniwájíminaʼ náa Judá, numuu rí makuʼmaa rey ndrígóo Asiria.

18 Mbiʼi rúʼko̱, Jeobá majuíyú mu mandxaʼwún ñu̱ju̱n bi̱ kúwá mitsínguánʼ náa na̱jkha̱ kúʼúun iyaʼ Nilo dí rígá náa Egipto, ga̱jma̱a̱ aʼma bi̱ kúwá náa ku̱ba̱ʼ Asiria. 19 Ikhiin maguwáʼ ga̱jma̱a̱ magi̱wi̱i̱nʼ náa mata* mi̱jnu̱ʼ, náa tsówóoʼ tsíñu ga̱jma̱a̱ náa mbá xúgíʼ xtáʼdu̱u̱ iná tsuwanʼ, ma̱ngaa náa mbá xúgíʼ rí naʼwa̱a̱n iyaʼ xujkhúʼ.

20 Mbiʼi rúʼko̱, ga̱jma̱a̱ mbá navaja katíʼñáa dí rígá náa mbaaʼ dí rígá náa mañu Éufrates, Jeobá majmiuu rey ndrígóo Asiria mu ma̱ʼda̱ edxu̱u̱ Judá, ga̱jma̱a̱ tátsúun xtiyuu, ma̱ngaa navaja ma̱ʼda̱ stawuunʼ.

21 Mbiʼi rúʼko̱ mbáa xa̱bu̱ maniñuuʼ dí maxtáa mbáa a̱ʼdá xédí náa mbá xúgíinʼ xedi̱ bi̱ gíʼdiin ga̱jma̱a̱ a̱jmi̱i̱n mugu̱. 22 Numuu dí ra̱ʼkhá tháán gárígá yáʼdú, ikhaa mi̱khu̱ mantequilla, numuu dí mbá xúgíinʼ bi̱ gáguanún náa xuajin mu̱phu̱ mantequilla ga̱jma̱a̱ muwa̱a̱n jyááʼ.

23 Mbiʼi rúʼko̱, asndu náa má nirígá 1,000 náa kiʼdu ixi̱ uva dí naʼni numuu 1,000 mbújkha̱a̱ plata, i̱ndó iná tsuwanʼ ga̱jma̱a̱ iná xkawiʼ gárígá. 24 Xa̱bekha mbaʼyóoʼ rí muda gágún ikhí xkamídá ga̱jma̱a̱ flecha, numuu dí náa mbá xúgíʼ xuajin makráʼáan iná tsuwanʼ ga̱jma̱a̱ iná xkawiʼ. 25 Ga̱jma̱a̱ numuu dí mamiñáanʼ gáʼni iná tsuwanʼ ga̱jma̱a̱ iná xkawiʼ, xátaxuʼmaminaʼ náa kúbá náa dí nákhá ginii naguma kaʼwi̱i̱ ga̱jma̱a̱ azadón, maʼga̱nú mani̱ndxu̱u̱ mbá mbaaʼ náa muphiʼtsu xedi̱ ga̱jma̱a̱ mbá mbaaʼ náa muxujmbirigu̱u̱nʼ mugu̱”.