Isaías
24 ¡Gu̱ya̱a̱! Jeobá xtáa raguwíi xúgíʼ dí rígá náa ku̱ba̱ʼ rígi̱, naniñuuʼ i̱ndó ikhaa.
Nasmbri̱ga̱* ga̱jma̱a̱ naxidiríʼiin xa̱bu̱ bi̱ kúwá ikhí.
2 Mbá xúgíinʼ maguáʼníí xígi̱ kaʼnii:
Xa̱bu̱ xuajin ga̱jma̱a̱ ndxajkun,
ñumbáá ga̱jma̱a̱ patriúun,
a̱ʼgú ñumbáá ga̱jma̱a̱ patrona ndrígóo,
bi̱ naʼtsi̱ ga̱jma̱a̱ bi̱ nagujua̱,
bi̱ naxnátíʼña ga̱jma̱a̱ bi̱ natíʼñuu,
bi̱ naruma̱a̱ gidxóó ga̱jma̱a̱ bi̱ gíʼmaa.
3 Ku̱ba̱ʼ rígi̱ maguanúu mijchú,
magajnúu xúgíʼ dí rígá ikhí,
numuu dí Jeobá niʼthí ajngáa rígi̱.
4 Ku̱ba̱ʼ xtáa ngíná* na̱jkha̱ rakáguabaaʼ.
Ku̱ba̱ʼ náa najma̱a̱ dí nudu nujndooʼ, na̱jkha̱ raguma gámbáa.
Xa̱bu̱ bi̱ guáʼdáá numún bi̱ kúwá náa ku̱ba̱ʼ rígi̱ nujnduxtíin.
5 Xa̱bu̱ bi̱ kúwá náa ku̱ba̱ʼ rúʼko̱ nini̱ gachíí,
numuu dí niniña̱a̱nʼ runimbaníí xtángoo,
niriʼkhu̱u̱ ikha
ga̱jma̱a̱ niniña̱a̱nʼ runimbaníí dí nimbánúún muni̱ asndu kámuu.*
6 Ikha jngóo dí najuiʼthá tsrigu na̱ʼkhu̱ ku̱ba̱ʼ rígi̱,
ga̱jma̱a̱ bi̱ kúwá ikhí najuiʼyáá rí guáʼdáá aʼkhúún.
Xa̱bu̱ bi̱ kúwá náa ku̱ba̱ʼ rígi̱ na̱jkha̱ raʼni nguéjmi̱i̱n
ga̱jma̱a̱ kááʼ nguéjmi̱i̱n xa̱bekha eguanún.
7 Vino nuxi̱ʼ xtáa ngíná,* ixi̱ uva nujnduxtá,
ga̱jma̱a̱ mbá xúgíinʼ bi̱ nadxuu a̱jkiu̱ún nutsiná.
8 Niguámbáa aʼwóo panderetas rí naʼni makuwá gagi,
nánguá endxa̱ʼwa̱ bi̱ nuni̱ ndxa̱a̱,
niguámbá aʼwóo arpa rí nawáán mitsaanʼ.*
9 Nánguá ewán ajmúú índo̱ naʼwa̱a̱n vino,
miʼkhu̱u̱n eyáá iya najnga̱a̱ bi̱ naʼwa̱a̱n.
10 Xuajin dí niguanáa niguma gámbáa,
xúgíʼ guʼwá kúgoo ga̱jma̱a̱ nimbáa xándoo mato̱ʼo̱o̱.
11 Náa kamba̱a̱ nutajkháan ga̱jma̱a̱ numuu vino.
Xúgíʼ gagi nindáti̱ga̱a̱,
ga̱jma̱a̱ gagi dí rígá náa ku̱ba̱ʼ niguámbáa.
12 Niguma gámbáa xuajin,
i̱ndó xójóo niguanáa xkrugua.
13 Numuu dí rígi̱ nindxu̱u̱ dí magíʼnuu ku̱ba̱ʼ ga̱jma̱a̱ xa̱bu̱ xuajin:
Mani̱ndxu̱u̱ xóo índo̱ nuxpraʼáá ixi̱ olivo,
mani̱ndxu̱u̱ xóo índo̱ nduyáaʼ uva dí niguanáa índo̱ niguámbúun má nigimbóo.
14 Ikhiin muxujxi̱ aʼwún,
asndu gagi gúndxa̱ʼwa̱.
Asndu náa lamáa* gúthi ga̱jma̱a̱ numuu gamajkhu ndrígóo Jeobá.
15 Ikha jngóo muni̱ mba̱a̱ Jeobá náa mbaaʼ xígií náa nagájnuu a̱jkha̱ʼ,*
náa islas* dí rígá náa lamáa* muni̱ mba̱a̱ Jeobá, Dios ndrígóo Israel.
16 Asndu náa naguámbári̱go̱o̱ ku̱ba̱ʼ nidxáwíínʼxu ajmúú:
“¡Gaʼni mitsiʼyáa bi̱ májáanʼ!”.
Mú ikhúún ni̱tha̱: “¡Nakáguabúúnʼ, nakáguabúúnʼ!
¡Ngínúu lá ikhúún! Bi̱ tséguájun jmbu náa eʼwíinʼ, tséguájun jmbu má xúʼko̱”.
17 Xa̱bu̱ bi̱ kuwáanʼla náa ku̱ba̱ʼ rígi̱, gíʼtala dí gamíi, iñáʼ ga̱jma̱a̱ tsáʼkhá.
18 Bi̱ gágáyúu gáʼni aʼwóo rí gamíi maxpátuáʼáan náa iñáʼ,
bi̱ gágájnáa náa iñáʼ maxpátrámaa náa tsáʼkhá.
Numuu dí xkrugoo mekhu mambaʼtoo,
ma̱ngaa dí gíʼ ga̱jma̱a̱ ku̱ba̱ʼ maʼba̱a̱n.
19 Ku̱ba̱ʼ rígi̱ nijmídá,
ku̱ba̱ʼ rígi̱ niʼba̱a̱n,
ku̱ba̱ʼ rígi̱ niʼbajngaa gakhi̱i̱.
20 Ku̱ba̱ʼ maguáʼáan xóo eʼni mbáa bi̱ najnga̱a̱,
maʼbajngaa gi̱i̱ ñuʼún xóo índo̱ giñánʼ naʼbajngaa mbá guʼwá.
Ra̱ʼkhá tháán ki̱wu̱n aʼkhúun grígu náa tsu̱du̱u̱,
ga̱jma̱a̱ maxpátri̱ga̱a̱ mu xátujxi̱i̱.
21 Mbiʼi rúʼko̱ Jeobá maʼni ngíníi bi̱ guáʼdáá tsiaki̱i̱ bi̱ kúwá rijma̱a̱ náa mekhuíí
ga̱jma̱a̱ reyes bi̱ kúwá náa tsu̱du̱u̱ ku̱ba̱ʼ.
22 Mixtagímbíin xóo bi̱ nagún preso náa mbá iñáʼ,
ga̱jma̱a̱ maxtuguáríʼiin náa guʼwá e̱jua̱nʼ,
mbayuuʼ mbiʼi nda̱wa̱á marmáʼáan a̱jkiu̱ún kuñún.
23 Gu̱nʼ dijndii mati̱yu̱u̱ʼ,
a̱jkha̱ʼ bi̱ nambiʼii ma̱ngaa mati̱yu̱u̱ʼ,
numuu dí Jeobá bi̱ naʼtáñajúúnʼ ángeles maʼga̱nú mani̱ndxu̱u̱ Rey náa kúbá Sion ga̱jma̱a̱ náa Jerusalén,
maguma mba̱a̱ náa inún xabuanii bi̱ kúwá náa xuajñuu.*