Isaías
62 Xáguanúʼ wíí ga̱jma̱a̱ numuu Sion,
ma̱ngaa xáguanúʼ wíí ga̱jma̱a̱ numuu Jerusalén,
asndu índo̱ rí májánʼ dí naʼni gáxpíbínʼ xóo mbá aguʼ rí mitsaanʼ,*
ga̱jma̱a̱ rí maguma kríya̱a̱ʼ mani̱ndxu̱u̱ xóo mbá aguʼ.
2 “A̱ʼgu̱, xa̱bu̱ xuajin maguánú mbuyáá rí májánʼ natani̱,
xúgíinʼ reyes mbuyáá rí xóo mitsiʼñán.
Ga̱jma̱a̱ makánaaʼ i̱mba̱ nuxi̱ʼ mbiʼyaaʼ,
dí mina̱a̱ʼ má Jeobá gáʼthí.
3 Mani̱ndxa̱a̱ʼ xóo mbá corona mitsaanʼ náa ñawúunʼ Jeobá,
ga̱jma̱a̱ náa ñawún paskoo Dios ndrígáaʼ ma̱nindxa̱a̱ʼ xóo mbá xtíin kiejuunʼ rí nagi̱wa̱nʼ edxu̱u̱ rey.
4 Ni xágumbiʼyaaʼ a̱ʼgu̱ bi̱ niguanáa,
ga̱jma̱a̱ ku̱ba̱a̱ʼ xágumbiʼyuu mbaaʼ dí niguanáa.
Ikháán magumbiʼyaaʼ Gagi Ndrígóʼ Rígá náa Ikhaa,
ga̱jma̱a̱ ku̱ba̱a̱ʼ magumbiʼyuu A̱ʼgu̱ bi̱ Ninújúnʼ.
Numuu dí Jeobá maʼdxuu kaʼyaaʼ
ga̱jma̱a̱ ku̱ba̱a̱ʼ mani̱ndxu̱u̱ xóo mbáa a̱ʼgu̱ bi̱ ninújúnʼ.
5 Numuu dí xó má mbáa dxámá nanigúnʼ ga̱jma̱a̱ mbáa dxáʼgú bi̱ xóó tsébóoʼ ga̱jma̱a̱ xa̱bu̱,
xúʼko̱ má gátatsíʼgún gajmiáanʼ xa̱bu̱ bi̱ kúwá náa ikháán.
Xó má mbáa dxáʼgú bi̱ nacho̱o̱ manújúnʼ naʼni dí maʼdxuu dxámá bi̱ mbayáa,
xúʼko̱ ikháán matani̱ dí maʼdxuu Dios ndrígáaʼ.
6 Jerusalén, ni̱ni̱ dí náa xtájtsí ndrígáaʼ madra̱ʼmíin bi̱ muyejngoo.
Xáʼyóoʼ dí maguanála wíí xúgíʼ mbiʼi ga̱jma̱a̱ mbruʼun.
Ikháanʼla bi̱ nu̱ta̱ ga̱jma̱a̱ numuu Jeobá, xúyáa jxa̱la.
7 Xúniʼñáánʼ dí mbayáa jxu̱u̱ʼ Dios asndu índo̱ gágíʼ jxa̱ʼ Jerusalén,
xúʼko̱, asndu índo̱ gáʼni dí xúgíinʼ xa̱bu̱ muxnáá gamajkhu”.
8 Jeobá nixná ajngóo ga̱jma̱a̱ ñawún mújúunʼ, ñawúunʼ dí gíʼdoo tsiaki̱i̱:
“Ni xáxnu̱ún xa̱bu̱ sia̱nʼ ndrígáaʼ mu̱phu̱ trigo dí nitadu,
ni má xa̱bu̱ bi̱ naguwaáʼ xúwáan vino ndrígáaʼ rí nuxi̱ʼ dí ikháán nitiejuíínʼ wéñuuʼ.
9 Rígi̱ dí phú gíʼmaa marigá, bi̱ gúrajxi̱i̱ trigo muphiʼtsu ga̱jma̱a̱ muni̱ mba̱a̱ Jeobá,
ga̱jma̱a̱ bi̱ gúndrigúu uva muwa̱a̱n vino náa rexo̱o̱ goʼwóʼ dí kaʼwu”.
10 Anújngala, anújngala náa xkrugua.
Gu̱ni̱ májáanʼ kamba̱a̱ náa manújngún xa̱bu̱ xuajin.
Guríya̱ʼ, guríya̱ʼ mbá kamba̱a̱.
Gurajxi̱ngaaʼ xúgíʼ itsí.
Guxujxí mbá tsinaʼ mu mbuyáá* xa̱bu̱ xuajin.
11 ¡Gu̱ya̱a̱! Jeobá niʼthí ajngáa rígi̱ asndu náa naguámbári̱go̱o̱ ku̱ba̱ʼ:
“Guta̱a̱nla wáxióo* Sion:
‹¡Atayáá! Dí maguma kríña̱a̱nʼ na̱ʼkha̱ má.
¡Atayáá! Ikhaa kayá dí maxnúu mada̱a̱ʼ mámbáa,
ga̱jma̱a̱ xtáa má xawii mu maʼni numi̱ín›”.
12 Ikhiin magumbiʼñúún xuajin kaʼwu, bi̱ niʼtsiwíin Jeobá,
ga̱jma̱a̱ ikháán magumbiʼyaaʼ bi̱ Nandún kuyáá, Xuajin dí Taguanáa.